دوردونجو حیسسه

  (3)

      آلئکسئی اوسیپوویچ  یاستیغا  دیرسه کلنه ره ک قونشو چارپایا دا شیرین یوخویا گئتمیش آروادینا  تاماشا  ائدیردی . وئرا  الی نین ایکیسی نی ده جوتله ییب باشی نین آلتینا  قویموش ، دیزلرینی  قارنینا  دوغرو  آزاجیق  قاتلاییب  یاتمیشدی . یورغان  سوروشوب  دوشدویونده ن ، چیینی نین  بیر  حیسسه سی  و سینه سی  آچیلمیشدی . نفه سی  ایپک  کوینه یی نین  یاخاسینداکی  تورو  یئلله ندیریردی . چیراغین  ایشیغی  آشاغی  چکیلمیش  اولسادا ، آروادین  ساچلارینا  دوشن  دَن  آیدینجا  گورونوردو . قیریشلار  اونون  آلنی نا  ایز  سالمیشدی . گوزلری نین  آلتی  کولگه له نمیش ، بوخاغیندا ، سینه سینده  نازیک  زئه لر  عمله  گلمیشدی . حال بوکی  بئش – آلتی  ایل  بوندان  اوول  یاناغی ، بوخاغی ، ائله  سینه سی ده  قشنگ  و  سیغاللی ایدی . ساچلاری  گور  و  دالغالی ایدی . کوکسو  قاباریق  اولسادا ، بده نی  نازیک  و  اویناق ایدی . حرکتلری  چئویک ، یئریشی  قوش  کیمی  یونگول ایدی .آنجاق  ایندی  اَته  دولوب آغیرلاشمیشدی . حیسس  اولونوردو کی ، وئرا  یاش لاشمیشدیر .

      اونلار  اون  ایلده ن  چوخ ایدی کی ، ائوله نمیشدیلر . چتین  گونلرده ، بیر – بیرینه  حَیان  اولموش ، ائوده  بیر  آزجا  سویوقلوق  حیسس  ائده نده  نفسلری ایله  اونو  ایسیتمیش ، قریب لی یه  دوشه نده بیر – بیرینه  سیغینمیشدیلار.

دوردونجو حیسسه

  (2)                                                                                 

 داملارین و چارداقلارین اوستونده آخشامدان  تزه ک  یاندیرمیشدیلار . گئجه ده ن  خئیلی  کئچمه سینه  باخمایاراق ، هاوا  دورغون  اولدوغوندان  کثیف  توستو  لایلاری  کندین  اوستونه  چوکموشدو . بیر  یارپاق ، بیر  اوت  بئله ترپه نمیردی .آغجاقاناد  سوروسونون  ویزیلتیسی  بیر – بیرینه  قاریشیب  کنده زوو توتوردو . هر شئی سوسموشدو . آناسی  عوثمانا  آخشامدان  دامین  اوستونده  یئر سالمیشدی . او ، یاتیب  یوخویا  قالماماق اوچون تئزده ن  یورغان –  دوشه یه  گیرمیشدی ، آنجاق  گوزونه  یوخو  گئتمیردی .  

   مینا خالا  اوغلونون  یانیندا  اوتورموشدو . آرواد  عوثمانین  کوینه یینی  دیزی نین  اوستونه  قویوب  یاماییردی . دوز  اوچ گون  هر  یئری  گزمیش ، قونوم – قونشویا  آغیز  آچمیش ، حتتا  شه هره  گئده نلره  یالوارمیشدی کی، اونا  بئش – آلتی  مئتر  پارچا  آلسینلار ، سونرا  الینه  پول  دوشن  کیمی  بورجو  قایتارار . اونا  ال  توتان  اولمامیشدی  . آرواددا  هر  یئرده ن   علاجی  کسیلدیی نده ن ، اوغلوندان  خلوه ت  قاپیلارینداکی  یئگانه  خوروزو  توتموش ، قونشو  کندده کی  دوکانا  گئدیب  پارچا  ایسته میشدی . دوکانچی  بیر  آرشیندان  آرتیق  پارچا  وئره  بیلمه یه جه یینی    سویله دیکده  ایسه ، (( کسه رم ،  اوشاغیم  یئیه ر )) .- دئمیش  و  بیر باش  ائوه  قاییتمیشدی . او ، اوغلونون  اَینینی تزه له مه یه  چالیشمیش ، یولداشلاری نین  یانیندا  عوثمانین  اوتانماسینی  ایسته مه میشدی . ایسته میشدی کی ، عوثمان  قریب  یئره  اوره یی  سینیق ، اَینی  چیلپاق  گئتمه سین . آنجاق  نه  ائده سن کی ، یوخدان  آللاه دا  بئزاردیر .

دوردونجو حیسسه

      (1)

           آخشام  قارانلیغی  قاتی  بیر  کولگه  کیمی  "قوری"نین  اوزه رینه  چوکموشدو . یاریمجا  ساعات  بوندان  اوول  زیروه سینده  گونه شین  سون  ساریلیغلارینی  عکس  ائتدیره ن  داغلار  بویون – بویونا  وئریب  مورگوله ییردی . بورانین  طبیعه تی  شیمالا  بنزه میردی ، نه  بیاض  گئجه لر ، نه ده  اوزون  سوره ن  یای  آخشاملاری  وار ایدی .      بیرده ن – بیره  زیل  قارانلیق  چوکور ، بیرده ن – بیره ده دان  یئرینده  شَفَقلر اویناشیردی .

      سئمیونوو  آرتیق  بونلارا  وردیش  ائتمیشدی . اووللر  "پئتئربورگ"ون  بیاض  گئجه لرینه  وورغون  اولان  دیمیتری  دیمیتری یه ویچ  ایندی ده  جَنوب  آخشاملارینا  مفتونلوق  گوسته ریردی . او  هر  آخشام  پنجره  قاباغیندا  دایانیب  قوروبا  تاماشا  ائتمه یی  سئویردی . بو گون ده  عاده تی  اوزره  همیشه کی  یئرینده  دوروب  اوفوقه  باخیردی ،           باغ – باغات  ایچینده  ایته ن  " قوری"نین  کیچیک  داخمالاریندا  یانان  چیراقلار  قارانلیقدا  پاریلدایان  یارپیز  قوردلاری  کیمی  ایشیلداییردی .

           سئمیونوو  اللرینی  سینه سینده  چارپازلاییب  شه هرین کناریندا " کور"له  قوجاقلاشان  " لییاخو" – ا (liyaxv) چای نین  قیژیلتی سینا  قولاق  آسیردی . پنجره ده ن  ایچری  دولان  خفیف  کولک  اونون  آغارماقدا  اولان  ساچینی  اویاندیریر ، چنه سی نین  آشاغی سیندا  هاچالانمیش  توپا  ساققالی نین  یومشاق  توکلری  آراسیندا  دولانیردی . او  طرفده ، داغلارین  اته یینده  یئرله شن  بالاجا  دمیریولو  واغزالی نین  سولغون  ایشیقلاری  گورونوردو . قاتارلار  اوتدوکجه  تکرلر  یئکنه سقلیکله  تاققیلداییر ، پاراووزلار  کسیک – کسیک  فیت  وئریردی .

اوچونجو حیسسه

  (19)

      جاهاندارآغا  سحر  تئزده ن  آتین  هورویونو  دییشدیرمک  اوچون دَیَه ده ن  چیخدی . توفنگی نی  الینه  آلیب ، بینه لرین  آشاغی  طرفینده کی  چمنلی یه  گئتدی . چیسه کله ییردی . هر  یئری  دومان  بوروموشدو .  بئش – اون  آددیملیقداکی  قارالتی لار  گوجله  سئچیلیردی . اوتلار  یویولوب  سوروشکنله شمیشدی . هاوانین  سویوقلوغونو  آدام  نفس آلدیقجا  جییه رلرینده  حیسس  ائدیردی . دَیَه لرین  اطرافیندا  دولاشان  ایتلر  تنبل – تنبل  هوروردو . خالخالداکی  دانا – بوزوو  مَله شیردی .    بینه  مورگوله ییردی .

      جاهاندارآغا  سَکسَکه لی ایدی . آخشام ، ال – آیاق  ییغیشیریلاندان  خئیلی  سونرا  ایتلرین  آراسینا  چاخناشما  دوشموشدو . سیغیرچیلار  کیمی ایسه  قی یا  باسمیشدیلار . ایتلر  بینه لرین  اوستونده کی  یولا  قده ر  گئتمیشدی . نوکرلر  هر  یئری ، آرخاجی ، خالخالی  دونه – دونه  یوخلامیش ،  آتین   هورویونو   دَییشمیش ،  هر   شئیین   یئرینده   اولدوغونو  سویله میشدیلر . (( یقین  یول  آداملاری ایمیش )) ، - دئیه  کیشینی  ساکیت  ائتمیشدیلر .

      جاهاندارآغانین  چیینینده کی  یاپینجی  نمله ندی . خیرداجا  چیسکین  اوزونه  قوندو . پاپاغینی ، قاشینی ، بیغی نی  قیروو  کیمی  بورودو . اوزاقدان  قمرین  قارالتی سی  گوروندو . آت  بیر  یئرده  دایانمیشدی . همیشه  جاهاندارآغانین  آیاق  تاپپیلتی سینی  ائشیده نده  برکده ن  کیشنه ییردی . ایره شمه نی  دارتیب  اورا – بورا  قاچار ، سونرا دا  دال  آیاغی  اوستونده  شاها  قالخیب  دایاناردی . آنجاق  بو  دفه  ترپه نمه دی . جاهاندارآغا  اونا  یاخینلاشاندا  کونولسوزجه سینه  اوخراندی . کیشی  تعججوب  ائندی . قمر  بوینونو  بوکموشدو ، یازیق – یازیق  صاحیبی نین  اوزونه  باخیردی .

اوچونجو حیسسه

   (18)

      جاهاندارآغا  بوتون  گئجه نی  آت  بئلینده  یول  گلدی . قالین  مئشه لرده ن  نئجه  کئچدیینی ، کوپوکلو  چایلاری  نه  واخت  آدلادیغینی ، دولاما  جیغیرلارلا  بَلَنلری  هاچان  آشدیغینی  بیلمه دی . قمر  آرادا  آددیملارینی  یاواشیداندا  اونو  ماهمیزلادی ، آتین  یورولماسینا  فیکیر  وئرمه دی . بوتون  یولو  چاپاراق  گلدی . او ، منزیله  یاخینلاشدیقجا  داها دا  هیجانلانیردی . اوره یی  یوماق  کیمی  بوکولور ، نفسی  داریخیردی . کیشی  قورخوردو . یایلاغا  یئتیشن  کیمی   بینه ده  بدبخت  بیر  حادیثه ایله  قارشیلاشا  بیله جه یینی  خیالینا  گتیردیکجه  بده نی  بوز  کیمی  سویویور ، آلنینا  تر  گلیردی . او ، ائوده کیلرین  بیری نین  اولومونه ، مال – قارانین  اوغورلانماسینا  دوزه  بیلردی . آنجاق  آرواد – اوشاغین  ناموسونا  ساتاشیلمیش  اولسایدی ...آمان  آللاه ، سن  بئله  بیر  روسوایچیلیق  ائله مه !!!

      جاهاندارآغا  ایسته ییردی کی ، تئزده ن  بینه لر  یوخودان  آییلمامیش  اوزونو   یایلاغا   یئتیرسین  ،  هئچ کسین   گوزونه   گورونمه ده ن    آلاچیغا  گیرسین ، احوالاتین  نه  یئرده  اولدوغونو  اویره نسین . اگر  بیر  بدبختلیک  اوز  وئریبسه ، اونون  کئچیرتدیی  ایضطرابلاری  هئچ کس  گورمه سین . جاماعاتین  گوزو  قاباغیندا  ضربه  آلماق  و  قووشورولوب – قیوریلماقدان  دهشه تلی  نه  اولا  بیله ردی ؟

      آت  سحره  یاخین  لاپ  یاواشیدی . سال  داشلی  یوخوشو  چیخاندان  سونرا  آستادان  کیشنه ییب  دایاندی . جاهاندارآغا  آتین  کوپوک  ایچینده  اولدوغونا  یالنیز  ایندی  فیکیر  وئردی . بیر آز  بئله  گئتسه ، قمر  هئچ   ترپه نه  بیلمه زدی .

اوچونجو حیسسه

 (17)

      سالاتین  خئیلی  اوزونه  گلمه دی . یمن خانیم  دَیَه نین  اورتاسیندا  هوش سوز  اوزانان  قیزا  تلاشلا  باخدی . اونون  الینی ، آیاغینی  آچدی . آغزینا  تاخانمیش  دسمالی  چیخارتدی . اوزونه ، سینه سینه  سو  چیله دی . قیزین  پالتاری  دیدیک – دیدیک  اولموشدو . بده نی  قیپ قیرمیزی ایدی . بعضی  یئرلرینده  قان  ساغیلمیشدی . ساچینا  پیتراق  دولموشدو . صیفه تی  شیشمیشدی . یمن خانیم  الینده  چیراق ، بیر  مودده ت  قیزین  ترپه نمه سینی  گوزله دی . آروادین  اوره یی  کووره لدی . کالاغایی نین  اوجو ایله  یاشارمیش  گوزونو  سیلدی . قیزین  سالامات  یئری  یوخ ایدی . تیکان  اونون  بده نی نی  دئشیک – دئشیک  ائتمیشدی . آرواد  چیراغی  کنارا  قویدو . (( اینصافسیزلار ، گور  یازیغی  نه  کوکه  سالیبلار ، - دئیه   اوز – اوزونه  دئییندی . – دئیه سن ، اوشاغین  ساچیندان  توتوب    سورویوبلر . گوره سن ، یازیغین  آتا – آناسی  وارمی ؟ )) تله سیک  آیاغا  دوروب    قیزا   یئر   سالدی  .  سالاتینی    قوجاغینا    گوتوروب    دوشه یین  اوستونه  اوزاتدی . سونرا دا  قیزین  باش  طرفینده  اوتوروب  ساچینی  سیغاللادی ، یئنه  اوزونه  سو  چیله دی ، قیز  اینیلده دی . آزاجیق  سونرا ایسه  گوزلرینی  آچیب  دویوکدو . هئچ نه  آنلامادان  ساکیت – ساکیت    باخدی . آرواد  باشا  دوشدو کی ، قیزین  هوشو  هله  تامام  اوزونه گلمه ییب . گوزو  باخسادا  هئچ نه  گورمور .      یمن خانیم  سالاتینین  باشینی  قالدیریب  دیزی نین  اوستونه  قویدو . سویو  اونون  دوداقلارینا  یاخینلاشدیردی :

-        ایچ ، بالا ، هوشون  اوزونه  گلسین .

اوچونجو حیسسه

  (16)

      جاهاندارآغا  آیاغی نین  ایکیسینی ده  یه هرین  اوستونده ن  ساغ  طرفه  آشیریب ، آتین  بئلینده  یاناکی  اوتورموشدو . او ، پاپیروسونو  سومورور  و قیرچین – قیرچین  اولوب  دالغالانان  زمی لره  تاماشا  ائدیردی . دَمیه ده کی  تاخیل لار  کهر با  کیمی  سارالمیشدی . سونبوللر  آغیرلاشیب  بوینونو  اَیمیشدی . اوفوقلره  قده ر  اوزانیب  گئده ن  زمی لری  آرابیر  " کور "  طرفده ن  اسن  مئه  یئرینده ن  اوینادیب  دنیز  کیمی  لپه له ندیریردی . چول لره  آهنگدار  بیر خیشیلتی  یاییلمیشدی . قرب  طرف ده کی  داغلارین  سینه سی  بئله  سارالمیشدی . (( بورانی دا  بیچدیریب ، دریزلری  قاپی یا  داشیتدیرسام ، آتین  باشینی  قانیریب  یایلاغا  قاییدارام ، - دئیه  جاهاندارآغا  دوشونمه یه  باشلادی .  -  اورالاردا  یئیه سیز  قالیب ، آراندا  چوخ  لنگیمک  اولماز ،  زامانا  اَللَم – قَللَم  زاماناسی دیر ، سونرا  نه  اولار ،         نه  اولماز . شامخال  ظننیمی  ایتیردی .، اشرفده ن  ایسه  آغلیم  بیر  شئی  کسمیر ، اونلارا  آرواد – اوشاق  تاپشیرماق  اولماز )) .

      کیشی  آخیر  واختلار  باش  وئره ن  حادیثه لری  خاطیرلادی ، نهایت ، مارالین  اولدورولمه سینی  یادینا  سالدی . بونلارین  هامیسی  دوشمن چیلیک ایدی . اونو  ایزله ییر ، هر  آددیم  باشی  ساتاشیردیلار . جاهاندارآغا  اووللر  بونا  او  قده رده  اهمییت  وئرمک  ایسته میردی . هر  گده – گوده یه  باش  قوشماغی  شانینه  سیغیشدیرمیردی . بئله  اولماسایدی ، دوشمن ین  قاپی سینا  آتین  سوره ر ، اونو  باییرا  چاغیرار  و  گولله نی  سینه سینه  سیخاردی . بیرده او ، هئچ  آغلینا  گتیرمزدی کی ، جساره ت  ائدیب  اونون  هنده وه رینه  هرله نن  اولار .

اوچونجو حیسسه

  (15)

       بینه لرین  اوست  طرفینده ن  سس – کوی  قالخدی .  ایتلر  چاخناشیب  بیر – بیرینه  دَیدی . دانا – بوزوو  بویروشدو . یئنی جه  یوخویا  گئده ن  آرواد – اوشاق  اویاندی . کیمی  ایسه  ووردولار . سونرا دا  ایت  زینگیلتی سی  ائشیدیلدی . هامی  سکسکه لی  حالدا  داها  نه  اولاجاغینی  گوزله دی .

      گلنلر  دَیَه لره  یاخینلاشدیلار . آرواد  قیشقیرتی سی  اوشاق  آغلاماسینا  قاریشدی . کیمی  ایسه  سویدولر . کیمی  ایسه  ایته له دیلر . چته ن  شاققیلدادی . بیرینجی  دَیَه ده  باش  وئره ن  عینی ایله  ایکینجی ، اوچونجو  دَیَه ده  تکرار  اولدو .

      زرنیگار خانیم  یئرین  ایچینده ، یوخاری  محلله ده  باش  وئره ن  بو  سس – کویه  قولاق  آسدی . یورغانی  اوستونه  چکدی . بویرونه  قیسیلیب  تیتره ین  سالاتینین  ساچینی  سیغاللادی . سس – کوی  یاواش – یاواش   بینه لرین  اوست  طرفینده ن  آشاغی  ائندی . زرنیگلر خانیم  مسله نی  باشا  دوشدو . دَیَه لره  باسقین  ائتمیشدیلر . آنجاق  چاپقینچیلار   مال – قارا  آپارماغا  گلمه میشدیلر . بئله  اولسایدی ، بیر باش  خالخالی  آچار ، حئیوانلاری  قاباقلارینا  قاتیب   آپاراردیلار . گلنلر   دَیَه لری  آختاریردیلار . زرنیگار خانیم  اونلارین  ایچه ری  نئجه  گیردیکلرینی ، آرواد – اوشاغین  اوستونده ن  یورغانی  نئجه  آتدیقلارینی ،  قیزلارین  قولوندان  یاپیشیب  نئجه  قالدیردیقلارینی  تصوورونده  جانلاندیردی . آروادین  جانینا  واهیمه  دوشدو .

اوچونجو حیسسه

  (14)

سالاتین  چته نی  چکیب  ده یه نین  قاپی سینی  اورتدو . کونجه ، یوک  یئری نین  یانینا  بیر  دوشکچه  آتدی . آیاقلی  دوعاغی  اورتایا  قویدو . دوشه یین  آلتیندان  دفتر – قلم  چیخارتدی . بارداش  قوروب  اوتوردو . یایلاغا  گله نده ن  بری  اویره نیب  یازدیغی  حرفلره  خئیلی  باخدی . اونلاری  سس سیزجه  اوخودو . سونرا دا  دوعاغین  اوستونه  اییلیب  ایری ، ناشی  حرفلرله  سوزلر  یازماغا  باشلادی . او ، خطی نین  گوزه ل  اولماسینا  چالیشدیغیندان  قلمی  کاغیذا  داها  موحکم  باسیردی . قیز  ائله  بیلیردی  کی ، قلمی  گوجو  گلدیی  قده ر  سیخسا  هر  شئی  دوزه له جکدیر .

      سالاتین  گون  گون اورتا  یئرینه  گلنه  قده ر  اوچ  صحیفه  یازیب  دولدوردو . سونرا  بوینونو  یانا  اییب  دیققتله  یازدیقلارینا  باخدی . اللرینی  بوینونون  آرخاسیندا  چارپازلاییب  برکده ن  گرنه شدی . اونون  سوموکلری   شاققیلدادی . آیاغا  دوروب  کاغیذ – قلمی  ییغیشدیردی . دوشه یین  آلتیندا  گیزله تدی . ده یه ده ن  چیخدی .

اوچونجو حیسسه

  (13)

      اشرف  پئنجه یینی  چیینینده ن  گوتوروب  گئیدی . کیتابی  یان  جیبینه  قویدو . آغاجلارین  کولگه سینده ن   کناردا ، گونئی ده کی  قالین  یارپاقلارین  آراسیندا  قیزاران  چیه له کلری  درمک  اوچون  دیزی  اوسته  چوکدو .   چیه لکلرین  عطری  درحال  اونو  ووردو . اشرف  هر  شئیی  اونوتدو . خاللی  کپنک  دالینجا  قاچان  اوشاق  کیمی  یارپاقلاری ، آرالاییب  قیرمیزی  چیه لکلری  دره – دره  مئشه نین  درینلیینه  دوغرو ایره لی له دی . اونون  باشی  قاریشدی . مئشه ده  نه قده ر  قالدیغینی  بیلمه دی .  ( چیه لک = توت فرنگی )

      قارشیدان  سس  گلدی . جینگیلتیلی  قیز  گولوشلری  اونو  آیاغا  قالخماغا  مجبور  ائتدی . اشرف  تالایا  یاخینلاشدیغینی  باشا  دوشدو . بوداقلاری  آرالاییب  چمنلییه  باخدی .

      موللا صادیق گیلین  محلله سی نین  قیزلاری  نهنگ  بیر  قاراآغاجین  بوداغیندان  یئلله نجک  آسمیشدیلار . اشرف  بیر آز دا  ایره لی  گلیب ، یارپاقلاردان  سئچیلمز بیر  یئرده  دایاندی . یئلله نن  پاکیزه ایدی .