(3)
گون باتان چاغي كورون اوستونو بوروين دومان اته يي ني ساللاياراق ، آستا- آستا اطرافا ياييلدي . گون قربه دوغرو اييله نده ن سونرا يوخاريداكي بوز داغلاردان خفيف مئه اسدي . اوتلارين ، دميه لرده اكيلميش سينه سي لاله لي تاخيللارين اوستونده ن كئچيب گلن بو آخشام كوله يي ساحيله ائنيب ، كورون اوزه رينه دوواق كيمي چكيلميش آغ ، نازيك دوماني قوووب اوزاقلارا- آشاغي داكي كندلره دوغرو آپاردي . گئتديكجه سويون سطحينه ياتان چيسكينلي دومان جله ده كي يولغون كوللارينا توخوناراق پارچالانير ، سورونه- سورونه اوتايا مئشه يه دوغرو گئدير، اورادا ايسه آغاجلارين باشينا دولانيب يوخ اولوردو. اوروشده ن قاييدان ماللار بوينوزلاشا- بوينوزلاشاساحيله ائنيب دويونجا سو ايچير، او تايدان، اودون قيرماقدان قاييدان كند جاوانلاري ايسه سال باغلاييب بري اوزه كئچيرديلر. سحركي حاديثه ده ن سونرا آتيني مينيب مئشه يه گئده ن جاهاندارآغا دا ساحيلده ايدي . او بوتون گونو هيرسلي- هيرسلي مئشه ده گزميش ، درديني داغيديب باشيني قاتماق اوچون قاباغينا چيخان قوشلار ا ، وحشي دونوزلارا گوللله آتميشدي. نهايت، آخشام اوستو قارا سويون ياخاسي بويو كئچيب گئده ن ماراللارين ايزينه دوشوب كورون ساحيلينه قده ر گلميشدي . جاهاندارآغا سو ايچن ماراللارين اوستونو آلميش و سرراست آتديغي گوللله يله ايري بير مارال ووروب ييخميشدي. آتدان دوشوب اووونو كنارا چكميش ، جله ده دالدا بير يئرده گيزلتميشدي.
جاهاندارآغا كورون كيچيك قولونو كئچيب جله يه چاتدي. قارشي ساحيلده كي كند ائولريني گوره ن آت بركده ن كيشنه دي. جاهاندارآغا ايكي بارماغيني آغزينا ساليب فيت چالدي . او هميشه اوودان قاييداندا بو يوللا كورده ن كئچيب و جله يه چاتاندا ايكي دفه فيت چالاردي. ائوده كيلر درحال اونو باشا دوشر ، وورولموش اووو گتيرمك اوچون آرابا قوشوب ساحيله ائنرديلر.
بودفه ده بئله اولدو.
جاهاندارآغا آتيني گيرمه ده ن ساليب ساحيله چيخاندا ائنيشده ن گلن آرابا يله قارشيلاشدي . هميشه اوودان قاييداندا اونو اوغلو شامخال قارشيلاييردي . ايندي ايسه آرابانين بوينوندا اوغلو يوخ ، نوكرلرين بيري ايلشميشدي. مارالي ووراندان سونرا كئفي بير قده ر آچيلان جاهاندارآغانين قاشقاباغي يئنه توتولدو . او كللرين قاباغي ني ساخلاييب جاواب گوزله ين نوكره اوزونو بئله چئويرمه ده ن ديللله ندي:
- آ بالا ، آ تاپديق ، آراباني يوخاريدان ، گيرمه ده ن سال،قيز قاياسي نين آلت طرفينده كي جله يه سور. اوراداكي ايچي اوووق قوواقي گورموسنمي؟ همين آغاجين ديبينده مارال وار. آرابايا قوي گتير.
اوغلان شورولتو ايله سو ايچن كللري چوبوقلاييب آراباني سويا سالدي. تكه رين دمير شيني خيردا داشلاري ازيب قيجيردادي. سو اوولجه تكه رين توپونو، سونرا دا جاغلاري باتيريب تارا چيخاندا تكه رلرين قيجيرتي سي داكسيلدي. آتي ني ماهميزلاييب ديكديره قالخان جاهاندارآغا قانريليب گئري باخدي.
- ايه ، يوخاريدان سور، يوخسا آراباني چيله كه نه ووروب دونده ره رسن . آرابا قارشي داكي جله ده گوزده ن ايته نده، ساحيلده ن دوز حيه تلرينه چيخان جيغيرلا بيرباش ائولرينه گلدي . آتدان دوشوب نوكرلري سسله دي:
- آي اوشاق، كيم وار، گلين ، آتين يهري ني آلين.
او توفنگي ائيوانين ديره گينده ن آسيب سامانليغين اوستونه چيخدي. گوزونو گون باتان طرفه ، چمنلي يه زيللله دي . ماللار كورون ياخاسي بويو قاتارلاشيب گليرديلر . يئلي ني دولموش اينك لر بالاسينا چاتماق اوچون مه له يير، يازابوغالار ، دويه لر بير- بيريني بوينوزلاييب قوووردولار . ناخيردان خئيلي آرالانيب نريلده ين ايري ايري بير بوغا اياغي يله يئري ائشيب توزو گويه سوووروردو.
جاهاندارآغا ، ناخير كورده ن سو ايچيب يارغانين قاشينا چيخانا قده ر سامانليغين اوستونده ن ائنمه دي. بوغازي زينقيروولو مارال ائركج كيمي قاباغا دوشوب خالخالا ياخينلاشاندا نوكرلري سسله دي . اوزو ده اونلارلا برابر ناخيرين قاباغينا گئتدي. پرلي- بوداقلي بوينوزونو شاخ توتوب يئري ين مارال اونو گوره ن كيمي ياخينلاشيب اليني اييله دي. حئيوانين سويوق و نم بورنونون تماسيندان كيشي نين قيديغي گلدي. جاهاندارآغا حئيوانين باشي ني، قولاقلاري نين بوينوزونون ديبي ني قاشيدي. اوچ ايل بوندان اوول مئشه ده ن توتوب گتيرديي و الده بويودوبناخيرا قاتديغي بو مارال هميشه اونون درديني داغيداردي. آنجاق بودفه بئله اولمادي.
نوكرلر حئيوانلاري يئرلشديرديلر. قوللوقچولار اينك لري ساغيب راحاتلاديلار . زنجيرده ن آچيلميش ايتلرميريلداشا- ميريلداشا ياللاريني ايچديكده ن سونرا ائوين اطرافينا دولانماغا باشلاديلار.
حیه ته ساکیتلیک چوکدو. بو سوکوت گئدیکجه گوجلندی و بوتون شئنلیی بورودو. ساحیل بویو سپه لنمیشکند ائولری نین سولغون ایشیقلاری، حیه تلرده قالانان اوجاقلارین کوزه رتیلری ده یاواش – یاواش سوندو. کورون قیژیلتی سی گوجلندی. اسن آستا کولک بیچیلمیش اوتلارین قوخوسونو کنده دولدوردو. هامی چکیلدی. جاهاندار آغا ایسه قاپی دا هرله نیر ، پنجره سینده ن ضییف ایشیق گلن اوتاغا یاخینلاشا بیلمیردی . ایندی او نه ائتمه لی ایدی؟ اوز حرکتلرینه نئجه براعت قازاندیرمالی ایدی؟.....
ایکی گون بوندان اوول ، شهرده ن قاییدارکن ، کورون ساحیلینده مله یه راست گلنده او هئچ نه فیکیر له شمه -میشدی . جاوان ، اتلی- قانلی گلینی سو کناریندا گوره نده سونمه کده اولان ائحتیراسی بیرده ن – بیره قودوز کیمی اویانمیشدی. هله کئچن، ایل داغا گئده نده ، جاهاندارآغانین گوزو بو گلینی آلمیشدی . گوی تپه لیلر داغ یولوندا ، چای کناریندا آرابالارینی آچمیشدیلار . کورون آشاغی سینداکی اوبالارین کوچو ایسه گلیب کئچیردی . بیر دسته قیز-گلین آتلا ، آرابالاردان قاباق یولا دوشموشدو . اونلار بولاق باشیندا جیلووو چکیآتلارینی سولادیلار. ائله بو واخت جاهاندارآغانین گوزو یهرین اوستونده شستیله اوتورموش مله یین آچیق بودونا ساتاشدی. گلین اته یی نین چیرمانماغیندان خبرسیز اولسادا ، بیر قادین سووق- طبییسی ایله کیمینسه اونا باخدیغی نی دویدو و اطرافینا گوز گزدیره نده بولاغین اوست طرفینده توفنگی نی قوجاقلاییب اوتلوغا اوزانمیش جاهاندارآغانی گوردو . گلین اوز گوزه للیی نی درک ائده ن بیر قادین قوروروندانمی ، یوخسا اونا گوزنو زیللله ین کیشی نین آغایانالی غی -نی خوشلادیغیندانمی ، نه دنسه ، گولومسوندو . بونو حیس ائده ن جاهاندارآغانین ایری دوداقلاری آرالاندی . آنجاقملک آنی شاشقانلیقدان سونرا اوزونو اله آلدی. پول کیمی قیزاردی . کالاغایی سی نی گوزونون اوستونه چکیب آتینی ماهمیزلادی . دونونون چیرمانمیش یئرینی دوزه لدییب بودونو اورتدو . بیر گوز قیرپیمیندا قارشیداکی دونگه ده ن بورولوب یوخ اولدو . جاهاندارآغا آراباچیلاردان بوکوچون هانسی اوبانین اولدوغونو اویره نسه ده ، نه گلینین آدینی ، نه ده کیملیی نی هئچ کسده ن سوروشا بیلمه دی.
....ایندی بیر ایلده ن سونرا تصادوف اونلاری یئنه قاباقلاشدیرمیشدی. جاهاندارآغا چوخدان بری خیالیندان چیخمایان گلینی گوره نده آتینین باشی نی چکیب ساخلامیش و دونونون اته یی نی دیزینده ن یوخاری قالدیریب پاچاسی نین آراسیندا بورمه له میش گلینین سودا داها گوزه ل گورونن مایا کیمی آغ بالدیرلارینا حسره تله ، اوغرون – اوغرون باخمیشدی.ملک آخشام اوستو ، گونشین سون شوعالارینی عکس ائتدیریب پاریلدایان کورون قیزیلی سولاریندا ال – اوزونو یویوردو.
جاهاندار آغا آتینی یاخین سوروب :
-آی باجی ، آتان ائحسانینا بیر قاب سو وئر، ایچیم ، -دئمیشدی. ملک سسه دیکسینیب گئری دونموش و باشی نین اوستونو کسدیره ن ائنلی کوره ک کیشی نین بیغی نین آلتیندان گولومسه دیی نی گورموشدو. گلین اللری تیتره یه – تیتره یه ایری میس پارچی دولدوروب قاباغا اوزاداندا جاهاندارآغا مله یین بیله یینده ن یاپیشیب اوزونه دوغرو چکمیش و بیر گوز قیرپیمیندا آتین قوجاغینا آلمیشدی . اونون چیرپینماسینا باخمایاراق آتی کوره سالمیش و بیر باش او تایا ، مئشه یه گئچمیشدی . ایکی گون بینه لرده گئجه له دیکده ن سونرا اوز قلبه سینده ن مست اولان جاهاندارآغا مله یی گوتوروب بیر باش ائوه گلمیشدی. اونسوزدا طالیینده ن ناراضی اولان ملک ایسه بو شیر اوره کلی کیشی نین ایراده سینه تابع اولوب سوسموشدو.
جاهاندارآغا هر شئیین ساکیت گئچه جه یی نی ، زرنیگارین بیر آز دئیینیب سوساجاغی نی ظن ائتمیشدی.آنجاق سحرکی حادیثه اونو سارسیتمیشدی . اصلینه باخسان ، جاهاندارآغا گوزو قیزیب مله ی گتیره نده اوشاقلارینی هئچ یادینا سالمامیشدی.
...ایندی او ، قاپی دا هرله نیر، ایچری گیرمه یه جسارت ائتمیردی .قورخوردو کی قاپی نی آچان کیمی یئنه های- کوی دوشه جک ، کیم بیلیر، بلکه ده ، الینده ن بیر خاطا دا چیخاجاقدیر.
نهایت ، گویون اوزونه اولدوزلار سپه لنیب ، هاوا تامام سویویاندا جاهاندارآغا ایچری گیردی. گوزله دیی نین عکسینه اولاراق اونو سوکوتلا قارشیلادیلار. اصلینه باخسان ، هئچ اونون قاباغینا چیخان اولمادی . شامخال ائوده ن گئدنده ن سونرا زرنیگار خانیم کونجون بیرینه چکیلیب آغلاییر ، سالاتین ایسه قورخوسوندان گوزه گورونموردو.یالنیز ملک ائوده یدی . او ، تاختین ایاغ طرفینده دیوارا قیسیلیب اوتورموشدو
تاواندان آسیلمیش چیراغین فیتیلی نی قالدیران اولمادیغیندان ، اوتاق گوجله ایشیقلانیردی . بو ضییف و سولغون ایشیق اونو داهادا کدرلندیریردی. الینی اوزادیب فیتیلی یوخاری چکدی . یالنیز بو زامان دونوب مله یه باخدی. الی قوینوندا دایانمیش گلین گوزونو پنجره یه زیللله میشدی . پالتاری بیر نئچه یئرده ن جیریلمیشدی. یاناقیندا و آلنیندا قارا لکه لر واردی.
جاهاندارآغا خئیلی نه ائده جه یینی بیلمه دی. اونا یاخینلاشیب کونلونومو آلسین ، یوخسا قیشقیریب ((سسینی کس))می دئسین. سوکوت خئیلی چکدی. مله یین ساکیت آخان گوز یاشی گوجلندی. اوتاغی هیچقیریق بورودو. تاختین اوستونده ، موتککه یه دیرسه کله نن جاهاندارآغانین صبری توکندی .
- دی یاخشی ، آخشام-آخشام گوزونون یاشینی آز آخیت. دور بیر گل گوروم.
ملک یاواشجا ایاغا دوردو. تاختا یاخینلاشیب کیشی نین قاباغیندا دایاندی.
- منی نییه بدبخت ائله دین ؟ یوردوما- یوواما سو جالادین ؟
مله یین کدرلی گورکمی کیشی نی قهرلندیردی.
- آخی سنه نه اولوب؟ -دئیه سوروشدو.
- داها بوندان آرتیق نه اولاجاق ، ائل ایچینده بیابیر اولدوم .ایندی من هانسی اوزله گئری قاییدیم ؟ منیم بویوک تیکمی قولاغیم بویدا ائله مزلرمی؟
- سارساق- سارساق دانیشما. سن بو ائوده ن هئچ یانا گئتمه یه جکسن!
- بس شامخال؟
- کیم ؟ او نه قودوقدور؟-کیشی قالخیب دیک اوتوردو.-بیرده اونون آدینی منیم یانیمدا چکمه!
- بس آروادین ، قیزین؟
- آز دانیش ، اونلارین سنه دخلی یوخدور. بو ائوین صاحیبی منم ، من ده نه ائله دیی می بیلیره م.
او نه قده ر حیرصلی اولوب مله یه سوسماقی امر ائتسه ده ، قلبی نین درینلیکلرینده حاقسیزلیغی نی دویوردو . بو حادیثه نین بئله ساکیتجه گلیب کئچمه یه جه ینی ، ائوده هر گون داوا- دالاش دوشه جه ینی آیدینجا گوروردو. آنجاق او ، ائوینین امین-آمانلیغی نی ساخلاماق ، نئجه اولور-اولسون ، دیل تاپیب هر شئیی ساهمانا سالماق ایسته ییردی.آخی زرنیگار دا یازیق یدی . نئچه ایل ایدی کی ، اونونلا بیر یاستیغا باش قویوردولار. یئتیشمیش اوغلو،قیزی واردی. ایندی نئجه اولسون؟ اونو بو ائوده ن قووماق اولارمی ؟ ائل – اوبا بونا نه دئیه ر ؟ بس مله یین تقصیری نه دیر؟ بو یازیغی دا یئرینده ن – یوواسیندان او اویناتماییبمی ؟ بس اونون اری ؟ بو گون- صاباح مئیدانا چیخیب قان- قان دئیه، آت اویناتمایاجاقمی؟
دوشونجه لر گئدیکجه گوجلنیر، آغیر یوک کیمی اونو ازیردی . جاهاندارآغا گاه حیرصلنیر ، ناحاق یئره باشینی جنجله سالدیغی نی دویوب پئشمانلاییر ، گاهدا اوزونه اوره ک – دیره ک وئریردی. (( اشی ، نه اولوب ، ائلده ن چیخاری بیر ایش توتمامیشام کی؟ ائله ده ده – بابا دان ایکی آرواد ساخلاماق پئشه میز دئییلمی؟بو ایشی بیر من ها گورمه میشم. هئچ نه اولماز، آرواد طایفاسی نین قایداسی دیر، بیر آز چیغیر-باغیر سالاجاقلار، سونرا دا قینلارینا چکیلیب سوساجاقلار. بس اشرف ؟... یوخسا او دا قارداشی شامخال کیمی منیم اوستومه دوشه جک ؟ آناسی نا قهمر دوروب منی بی حورمت ائده جک ؟)).
کیشی لاپ داریخدی. اونا ائله گلدی کی ، بو ساعات قوری موعلیملر سئمیناریاسیندا اوخویان اوغلو قاپینی آچیب ایچری گیره جک ، قاشلارینی چاتیب ((آتا ، عیب دئییلمی ، بو نه ایشدیر توتموسان ؟ )) – دئیه جکدیر.سونرا دا باش گوتوروب ائوده ن گئده جک ، بیر داها بورالارا اوز چئویرمیه جکدیر....
حیه تده سس- کوی چوخالدی. ایتلر زینگیلده ییب سوسدولار . آرابا تکری نین جیریلتی سی و کللری هایلایان تاپدیغین سسی ائشیدیلدی. جاهاندارآغا پنجره ده ن حیه ته ، نوکرلرین کومکله شیب مارالی آرابا دان نئجه دوشوردوکلرینه گوز قویدو. آز سونرا اونون دالینجا گئده ن تاپدیق الینده کی تنه ک چوبوغونو اوینادا – اوینادا پنجره یه یاخینلاشدی.
-آغا ، مارالی گتیردیم.
- آپارین بیشیرین . اوشاقلاری دا چاغیر.
- بس سیز؟
- بیر- ایکی شیش کاباب گتیرسه نیز بسیمیز دیر.
تاپدیق ائیواندان آرالاندی. خیرمان یئرینده مارالین یانینی کسدیره ن نوکرلره یاخینلاشدی :
- آی اوشاقلار ، بیر یاخشی اوجاق چاتین .دئیه سن بو آخشام کی کاباب بیزه قیسمت اولاجاق .
اونون سوزونو گیزلی سئوینجله قارشیلادیلار . آروادلار ال-ایاغا دوشوب ، تله سیک قارا داملارا قاچدیلار. قاب- قاجاق گتیریب کیشی لرین یانینی کسدیردیلر. هئچ بئش دقیقه گئچمه میش شاققالانان مارالین اتی دوغرانیب سینی لره دولدورولدو. بوزارتمالیق اتله کابابلیق آییرد ائدیلدی. اوجاق آلوولاندی . پنجره شوشه لری ائله بیل آلیشیب یاندی.کندین اوستونه چوکن قارانلیق ،قورخورموش کیمی، جاهاندارآغانین حیه تینه یاخین گلمهدی.
تاپدیق قولونو چرماییب گوستریش وئرمه یه ، اوزونده ن جاوانلاری بویورماغا باشلادی . او ، آغانی حیرصلندیر مه مک اوچون همیشه کی کیمی کابابی اوزو بیشیرمه یی قرارا آلدی.
اوجاغین اطرافیندا هرله لنلرین کولگه لری تئز- تئز چارپازلاشیب حیه ته سریلیر ، بعضن ده اوزاناراق چپری آشیر ، کنارداکی اوت تایالاری نین اوستونده دولاندیقدان سونرا قارانلیغا قاریشیردی . اوجاق چاتیردادیقجا قیغیلجیملار اطرافا سیچراشیر ، یاواش- یاواش دوشوردو.
زنجیرده ن آچیلمیش ایتلر ده ات ایی نی دویموشدولار . بیر – ایکیسی اوجاقدان بیر آز آرالی باشینی بیلکلری نین اوستونه قویوب اوزانمیشدی. قالانلاری ایسه چومه لیب اتی گوزده ن قویمور ، فورصت تاپان کیمی سینیب ایره لی سورونوردو.اللرینه بیر شئی کئچمه یه نده یسه گئری چکیلیب آستادان زینگیلده ییردیلر.
تاپدیق مارالین ایچی نی تمیزله دیکده ن سونرا باغارساقلاری بیر نئچه یئره بولوب ایتلرین قاباغینا آتدی.ایتلر اوولجه بیر- بیری نین اوستونه جومدولار ، سونرا باغیرساقلاری دارتیشدیرا- دارتیشدیرا حیه تده ن اوزاقلاشدیلار.
نوکرلر پالید اودونونون سوروشوب دوشن کوزلرینی بیر آز دا ایره لی چکدیلر . شیشلری یان- یانا دوزدولر. اطرافی کوز اوستونده بیشن یاغلی ات ایی بورودو....
گئجه ده ن خئیلی کئچمیشدی.مله یین نفسینده ن مست اولان جاهاندارآغا پیچیلتی یله تزه آروادینی اوخشاییردی:
- اوزون بیلیرسن کی، سنی هئچ یانا بوراخان دئییلم . کیشی توپوردویونو یالاماز. سن همیشه ، قبره جن منیم اولاجاقسان. آنجاق اودا یازیقدی. بیر تهر دیله توتوب، یولا گتیرمک لازیمدیر. نئجه اولسا اوشاقلاریمین آناسی دیر. یانینا گئت، ال- ایاغینا دوش ، یالوار، ده کی ، بیر قضادی باشیما گلیب، یازیغام ، کئچ گوناهیمدان ، ائله بیل منده سنین قوللوقچون . قاباغیندا دیللله نیب اوزونه آغ اولمارام . خاصییه تینی بیلیره م . اوره یی یومشالیب باریشاجاق. ائله من اوزوم ده اونو دیله توتاجاغام. سونرا دا بیر- بیری نیزه ایسینیشه جکسسینیز. هر شئی دوزه له جک ، فیکیر ائله مه .
ملک بیر پیشیک مئهریبانلیغی یله جاهاندارآغانین سینه سی نه قیسیلیب خومارلانیر، اونون دئدیی سوزلره قولاق آسدیقجا اوره یینده کی شوبهه وقورخو یوخا چیخیردی. توکلو سینه سی نده مئهریبان بیر الین گزدیی نی حیس ائده ن جاهاندار آغا هر شئیی اونودوب مله یین اتلی بدنی نی قوجاقلاییر، جاوان قادینین حرارتلی تماس-یندان مست اولوردو.....
اصلینه باخسان ، ملک بو ائوه گلدیی نده ن ناراحات دئییلدی . او ، کورده ن خئیلی آرالی اولان داغ کند لرینده ن ایدی. تمیز هاواسی، سرین دیش گوینه ده ن بولاقلاری ، گوللو- چیچکلی چمنلیکلری اولان بو کندین بوتون قیزلاری کیمی ملک ده ایاق یالین ، باشی آچیق بویوموشدو....
او، بالاجالیقدان یئتیم قالمیشدی. هله بئش یاشی تامام اولمامیش داغدا اونلارین ائوینی سئل آپارمیشدی.آتا-آناسی دا دیه یله بیرلیکده یوخ اولموشدو.خوشبختلیکده ن گوندوزده ن امیسی گیله ، قیزلارلا اویناماغا گئده -ن ملک گئری قاییتمامیش ، بئله لیکله سالامات قالمیشدی.
امیسی آروادی اونو یانیندان بوراخمامیشدی. بینه یه کوچنده یایلاغا قالخاندا اونو اوزویله آپارمیشدی. او ، چوخ قوچاق قیز ایدی . یاشی نین آز اولماسینا باخمایاراق دره ده ن دورد-بئش سهنگ بولاق سویو گتیره ردی. کندده هامی اونون قوچاقلیغیندان دانشیردی. سحر تئزده ن سویا گلن آروادلار،آتینی سولاماغا ائنن جاوانلار مله یین جیغیرلا دره ده ن چیخدیغی نی گوروردولر.او آز قالا اوزو بویدا اولان میس سهنگی دالینا آلیب دوداق آلتی زومزومه ائده – ائده یوخوشا دیرماشیردی. مله یین دورد امیسی قیزی واردی. ایللر کئچدیکجه اونلار بویویوب و بیر-بیر نیشانلانیب اره وئریلیردی. هر دفه توی اولوب قیزلار جئهیزله کوچورولنده ، ملک اوشاق کیمی سئوینیر ، نهایت ، اونا دا نووبه چاتاجاغی نی ، اونون دا بئله بیر شاد گونو اولاجاغینی فیکیرلشیردی . او ، امیسی نه و امیسی آروادینا ایناندیغی اوچون هئچ نه دوشونمور، واختی چاتاندا اونادا جاه- جلاللا توی اولاجاغینی گوزله ییردی... آنجاق بیر گون ملک گوزونو آچدی و گوردو کی ، اونون تای- توشلاری ، حتتا اوزونده ن کیچیک اولان قیزلار بئله ارده دیلر ، ائو- ائشیک صاحیبی اولوبلار.
مله یی فیکیر گوتوردو.(( بس من؟ یوخسا ائیبه جره م؟ قاش- گوزومده شیکستلیک وار؟ نییه منه یاخین دوران یوخدور؟))
بیر گون ائوده هئچ کس اولمایاندا ، دیواردان آسیلمیش بالاجا ، اوستو چیل- چیل گوزگونون قاباغیندا دایانیب ، بوی- بوخونونا خئیلی باخدی. قاشلاری چاتمایدی . ایری گوزلری بولاق کیمی قایناییردی. یاناقلاریندان آز قالا قان دامیردی. قاباریق سینه سی ائله بیل کوهنه قوفتاسی نی پارتلاتماق ایسته ییردی . قیزین اوزونده ن خوشو گلدی . ((یوخ ، دئیه سن ، پیس دئییلم )) ، دئیه خیالیندان کئچیریب قیمیشدی . اوتاقدا بیر نئچه دفه دونونون ایچینده قوزو قویروغو کیمی ییرغالانان اندامینا باخدی . سونرا دا کونجده کی بادیانین آغزینی آچیب بیر قاشیق سود اوزو گوتوردو. یاناقلارینا ، ساچلارینا چکدی. ائله بیل قیز بیرده ن شام کیمی آلیشیب یاندی . ملک گوزگوده اوزونه بیرده باخدی . هورکموش کیمی گئری چکیلدی. آینادا قاش- گوز اوینادیب شاققیلدادی ، باییراقاچدی.
امیسی آروادی ملک ده دیشیلی یی حیس ائتسه ده ، اوستونو وورمادی . او بئله بیر قیزی تئزلیکله الده ن ایسته میردی. بولاق باشیندا ، چای کناریندا ، قایناردا، اوندان سوز سوروشوب آغزینی آرایان اولاندا جاواب وئریردی کی ، قیز نیشانلی دیر ، قارداشیم اوغلونا آلاجام . مله یینده قولاغی بو سوزو چالمیشدی . لاکین هفته لر کئچیب آیلار دولاندیسا دا ، اورتایا چیخان اولمادی. نهایت بیر قیزلیق سووق- طبیسی یله حیس ائتدی کی ، اونون ان گوزه ل گونلری گلیب گئچیر. آتینی سولاماغا گتیره ن کند جاوانلاری اونو بولاق اوستونده گوره نده داها اوولکی کیمی حسرتله باخمیردیلار. اوندان داها جاوان ، یئنی یئتمه قیزلارا سوز آتیب ماهنی قوشوردولار.
نهایت ، بیر گون مله یی کورون آشاغی طرفی نده کی کندلرده ن بیرینه اره وئردیلرکیشی اوندان خئیلی یاشلی ایدی. دئییلنلره گورا ، کندین وارلی آداملاریندا اولان آللاهیار یئدی دفه ائولنمیشدی . سونونجو آروادینی بوشایاندان سونرا هئچ کس اونا قیز وئرمه میشدی. (( نه اولسون دوولتی وارسا دا ، آرواد ساخلایان دئییل.بلکه هئچ کیشی لیی ده یوخدور )) ، - دئیه اونون آرخاسینجا آغیز ایمیشدیلر.
آللاهیار آلدیغی آروادلا آلتی – یئدی آیدان آرتیق یاشامیردی. هره سینده بیر عیب تاپیب و ائوده ن قوووردو.اصلینده ایسه اونون دردی اوشاق دردی ایدی.
او سونونجو آروادیله خاق-حئسابینی کسنده ن سونرا اوز کندلرینده ن ائولنه بیلمه یه جه ینی باشا دوشوب بیرباش یوخاری داغ کندلرینه گئتمیش و اورادا مله یی گوروب ائلچی دوشموشدو . جمی بیر نئچه هفته یه هر شئیی حل ائدیب قیزی ائوه گتیرمیشدی.
اونسوزدا تالئیینده ن کوسکون اولان ملک ائله ایلک گونده ن ارینه بویون ایمیش ، اونون دئدیی یله اوتوروب دورموشدو . آللاهیار دا ایلک گونلر اونا پیس اولمامیشدی . مله یی گئییندیریب- کئچیندیرمیشدی ، ((یئتیملیکله بویوموسن ، قوی اینین سئوینسین، ))-دئمیشدی. آنجاق بیر ایلده ن سونرا یاواش- یاواش کورلویه باشلامیش، مله یین یئدیی نی – ایچدیی نی بورنوندان توکموشدو . هر گون بیر بهانه ایله اونو دانلاییب سویموش ، (( نییه اوشاغین اولمور ، سونسوز آرواد منیم نه ییمه لازیم دیر ))، - دئیه ائوه داوا – دالاش سالمیشدی.
ملک شام کیمی اریسه ده ، دردینی هئچ کسه آچمیردی. بیر ده بو غریب کندده اونون دردینی سویله سی بیر آدامی دا یوخ ایدی. ملک سیرینی چوله سالماماق اوچون قونوم- قونشویا بئله گئتمیردی . تئز – تئز ائیواندا دایانیب یوخاریلارا ، دولاما یوللارین اوزانیب گئتدیی تپه لرین او اوزونده کی داغ اته یینده کی گوجله گورونن کندلرینه باخیردی. (( ایندی یقین کی ، اورالارین اوتو هله سولماییب. چیچه کلرده یازین اووللرینده کی کیمی ترتزه دیر . بولاقلارین سویو گوره سن یئنه سریندیرمی؟یئنه قایالارین آراسیندان سیزدیقجا شیریلداییرمی؟آه، آللاهین آلتیندا بیرجه گونلویه قانادلی قوش اولاییدیم ، اوچا-اوچا گئدیب باجامیزدان دوشه یدیم ، امیمه ، ائویمیزه دویونجا باخایدیم ، سونرادا بولاق باشینا قاچایدیم ، اوتلارین اوستونه سریلیب ، گویده کی بولودلارین داغلارین باشینا نئجه قوندوغونا باخایدیم.چیچه کلریمیزین ، ککوتوموزون ایینده ن اوته ری بونومون اوجو گوینه ییر. گوره سن منی هئچ یادا سالان وارمی ؟ سویا گلن قیزلاردان ، آتینی سولایان اوغلانلاردان منی آنان اولورمو ؟ یوخسا یاددان چیخمیشام ؟ ))-دئیه دوشونور ، اورپه یی نین اوجویله دولموش گوزلرینی سیلیردی. او ، بیر آن بئله کندلرینی ، دوشلرده مال اوتاران اوشاقلاری ، آتینی چاپیب چمنلیکلرده گزه ن اوغلانلاری اونودا بیلمیردی. تئز – تئز یارپیزلی دره لر ، دولاما جیغیرلار یوخوسونا گیریردی. اونو قینایان اولماساییدی ، یا پیادا ، یادا یوخاریلارا گئده ن آرابالارین بیریله ائولرینه قایداردی . او ، حیس ائدیردی کی ، بورادا ، آللاهیارین ائوینده قفسه سالینمیش قوش کیمی یاشاییر. اری اویانا دورسون ، قایناناسی دا اونا گوز وئریب، ایشیق وئرمیردی. آنجاق هله لیک صبر ائدیر ، بوتون بو ایشلرین سونونا چاتماق ایسته ییردی.برک ایاقدا امیسینه سیفاریش ائدیب یانینا چاغیرماغی و دردینی اونا آچماغی قراره آلمیشدی. اگر او ، مله یی ائشیتمه سه ، اوندا.....
ملک آخیر واختلار تئز-تئز کورون ساحیلینه چیخیر ، الینی گوزونون اوستونه قویوب چیله کنلره ، یارغانلارین دیبینده کی بورولغانلارا ، لاپ آشاغی لاردا ، سولارین بیرله شدیی یئرده کی قایالیقلارا باخیردی. او ، جانا دویسا دا ، هله قطی قرارا گله بیلمیردی.
باخ ائله بو واختلار جاهاندار آغا پئیدا اولدو و لئی جوجه گوتوره ن کیمی ، اونو جایناغینا آلیب بیر باش ائوینه گتیردی.