(8)
گمی چی قوجا آغیر – آغیر یوخوشو قالخیردی . الینده کی سویود چوبوغونا کئچیردیی بالیقلارین پوللاری پاریلداییر ، قانادلاری و قویروقلاری آچیق – چهرایی رنگه چالیردی .کیشی یورولموشدو . تئز – تئز دایانیب نفسینی دریر ، چیینینده کی ایسلاق کندیرلری سیلکه له ییب کوره یی نین اورتاسینا آتیردی . او موحکم ایسلانمیشدی . دیزی یاماقلی شالواری ، آرخالیغی نین آلتیندان گورونن بویونو ، قارا ساپلا ایشلنمیش کیرلی آلت کوینه یی بئله یاش ایدی . چاریقلارینی و ایپلیک جورابینی سویونوب الینه آلمیشدی . گئجه لی – گوندوزلو سودا قالدیغیندان آغاپپاق اولان دابانی و جودلاشمیش آیاق بارماقلارینی قیزمیش توزلو تورپاغا باسدیقجا ، بدنب نه ایستیلیک یاییلیردی . او ، ایری ، ساچاقلی پاپاغینی بوینونون دالینا ایته له میشدی . قیرخیق باشیندان بوغ قالخیردی . سینه سینه دوشن آغ ساققالینین پراکنده توکلرینی سحر کوله یی اوینادیردی .
کیشی دایانیب نفسینی دردی . بیر خئیلی کورده چیمیشن اوشاقلارا ، یولغونلوغا دولوشان مال – قارایا باخدی . اوکوزونون بورالاردا اولوب – اولمادیغینی یوخلادی . سونرا یئنه یولونا داوام ائتدی . دیکدیرین قاشینا چاتاندا بیر دسته اوشاقلا قارشیلاشدی . اونلارین اللرینده بالاجا قارماقلار واریدی .
اوشاقلار قوجا کیشینی آرایا آلدیلار . حریصلیکله اونون الینده کی بالیقلارا باخدیلار . گوزلری پاریلدایان بالیقلارین ایچینده هله ده نفس آلانلاری واریدی .
- قوجا دایی ، بونلاری هاردان توتموسان ، یئرینی بیزه ده دئه !
- دئمیره م .
- نییه کی ؟
- خئییری یوخدور .
- نه یین خئییری یوخدور ؟
- سیزده ن بالیق توتان اولماز.
- نییه اولمور ، آی قوجا دایی؟
- اوشاقسینیز ، گئدین آغزینیزین قاتیغینی سیلین .
- کیم ، بیز اوشاغیق ؟
- بس نه سی نیز ، آی خالاسی گویچک لر ؟
- خالامیزدا ایشین اولماسین .
- یاخشی ، - دئیه قوجا کیشی دایانیب اونلاری سوزدو .یانلاری قیریش – قیریش گوزلری کیچیلیب بالاجالاشدی .- خالانیز اولماسین نیشانلینیز اولسون . ایندی منده ن نه ایسته ییرسینیز آی نیشانلی سی گویچک لر ؟
- ای ، ای ، - دئیه اوشاقلاردان علی آدلی بیریسی دیللندی . – ائله ائله مه کی ، قیزینا ...
- قیزیما نه دئیه جکسن ، آی سنین باجیین مه مه سینی یئییم ....
علی گوزونو قییب کیشی نی سوزدو. اونون سینه سینه دوشموش ساققالینا باخدی .
- آخی باجارمازسان .
- نییه باجارمارام ؟
- قوجاسان .
- قوجا اولاندا نه اولار ، آی قیریشمال ، باجینی منده ن آرتیغینا وئره جکسن ؟
- آخی سنه یازیغیم گلیر .
- نییه ؟
- ساققالینی یولار.
- قیرخدیررام .
- بس بیغلارین ؟
- کسدیرره م. هه ، ایندی سوزون نه دیر ؟
علی دایاندی ، صیفتی نه قاییغی کئش بیر گورکم وئردی .
- باجیمین خاصییه تی پیسدیر . قوجا دایی ، گل بو ایشده ن ال گوتور . واللاه باشینا اویون آچار .
- مسلن ، نه قاییرار ؟
- پاچالاما اوستونه مینیب ، تومانینین باغی ایله سنی بوغار .
اوشاقلار قهقهه چکیب گولوشدولر . قوجا کیشی ده اونلارا قوشولدو .
- آی حارامزادالار ، منی باغلادینیز . گلین ، بالیقلاری سیزه وئریم ، آپارین نیشانلینیزا.
- نیشانلیمیز سنین بالیغینا قالماییب ، اوزوموز توتاریق.
- بلکه الینیز بوشا چیخدی ؟
- اوندا گلیب آپاراریق.
- ایندی آلین ، سونرا پئشمان اولارسینیز .
- آلداتمازسان کی ؟
- منیم سیزنن زارافاتیم وار ؟
اوشاقلار گوله – گوله اوندان آرالانیب ائنیش آشاغی دوشدولر . قوجا کیشی ساحیله ائنن اوشاقلارین دالینجا خئیلی باخدی . نفسینی دریب یولونا داوام ائتدی . ایندی او داها جسارتله آددیملاییردی .
گمی چی قوجا همیشه کندین یئنی یئتمه لریله زارافاتلاشماغی سئوه ردی . هئچ کس کیشی نین بو شوخلوغوندان اینجی مز ، عکسینه ، هاردا گورسه لر ، باشینا توپلاشیب اونا ساتاشاردیلار . کیشی ده سوز آلتیندا قالمازدی . دئییب – گولدوکجه ائله بیل جاوانلاشیب یونگولله شردی . ایندی ده اوشاقلارلا زارافاتلاشاندان سونرا اوزونو یونگول حیسس ائتدی . ائله بیل بدنی نین آغریسی دا آزالدی .
یوخوشو چیخیب قاشی آشاندان سونرا دایاندی . تپه لرده ن اسیب گلن باهار کوله یی اونون اوزونه ووردو . کیشی دایانیب کنده دوغرو باخدی .بو ایل هاوالارین یاخشی کئچمه سی ، یاغیش یاغماسی دمیه لری گوم گوی ائتمیشدی . کندین اوست طرفی نده کی تپه لر یام یاشیل ایدی .دمیه ده اکیلمیش تاخیللار قورشاغا چیخیردی . آرپالار بوغوم وئریب سونبوللله نمیشدی . بیر آز بریده ، تپه لرین دوشونده ایسه قوزولار اوتلاییردی . قارنی دویان چپیشلرین چمنلیکده آتیلیب – دوشمه سی کورون ساحیلینده ن بئله گورونوردو . ساری چیچه کلر ، توپا – توپا بیتن لاله لر آدامین گوزونو اوخشاییردی . بیر دسته قیز پئنجر (penjar) ده ریردی .
گمی چی قوجا اطرافی نی اوت باسمیش جیغیرلا کندین اوجقارینداکی ائوینه دوغرو آددیملادی . اونون قارا دامی تورپاقدان گوجله سئچیلیردی . دامین اطرافینداکی کالافالیقلاری ، خیرمان یئرینی ، چارداغین یانینی اوت باسمیشدی .حتتا تورپاق قازمانین اوستونده بئله اوت جوجرمیشدی . آروادی زولئیخا اوله نه قده ر ائو سلیقه لی اولاردی . آنجاق ایکی ایل ایدی کی ، قاری رحمته گئتمیشدی . بوندان سونرا کیشی نین ال – آیاغی سویوموشدو . او ، هفته لرله ائوه باش سالا بیلمیردی . اگر قیزی گوله سر اولماساییدی ، بلکه ده آیلارلا گمی نین یانیندا قالار ، هئچ ائوه قاییتمازدی .
او ، دوز بیر هفته ایدی کی ، ائوه گلمیردی .، بینه یه کوچه نلری او تایا ، مئشه یه یایلاغا حاضیرلاشانلاری ایسه بری اوزه ، کنده کئچیریردی . چوره کده ن یئییب ، اورالاردا دولانیردی . هرده ن بیرده اوشاقلار اونا بالیق گتیریردیلر . اگر سیراغا گون گوله سر اونون یانینا گلمه سه یدی ، بلکه ده ائوه قاییتمایاجاقدی . گمی چی قوجا همده هئچ اولماسا ، بیر – ایکی گون دینجه تمه لیدی . آخی بو گون – صاباح ائل یایلاغا قالخاجاقدی . مئشه ده ن کوچوب گلن بینه لرین ، قویون سورولری نین ، مال – قارانین سایی – حئسابی اولمایاجاقدی . اونلارین چوخونو کیشی اوز گمی سینده بری اوزه کئچیرمه لی ایدی .
کندین گیره جه یینده باشینی قالدیریب اطرافا باخدی . گوله سر تاخیلین ایچینده پئنجر ییغان قیزلاردان آرالانیب آتاسینا دوغرو گلیردی . او ، چیت دونونون اته یی نی بئلینه سانجمیشدی . آیاقلاری یالین ایدی . یئملیک یئمه کده ن اللری و دوداقلاری بیر آز قارالیب ، شابالیدی رنگه دوشموشدو . چوللرین کوله یی قیزین یاناغینی جیزمیشدی . دوداقلاری دا قایساقلانان کیمی اولموشدو . اونون اته یی دولو ایدی . الینده کی بیچاق و دیرناقلاری نم تورپاغا بولاشمیشدی . کیشی قیزینی گوره نده سئویندی . آیاق ساخلادی . گوله سر برابرینه چاتاندا گولومسوندو :
- بوردا نه گزیرسن ، آ خالاسی گویچک ؟
- سنه پئنجر ده ریره م .
- منده سنه گور نه گتیرمیشم .
- بیی نه یاخشی بالیقلاردیلار ، آی ده ده ، اوزونمو توتوبسان ؟
قوجا کیشی بالیغی گمی ایله کئچیردیی اوشاقلاردان آلدیغینی دئمه دی . باشینی ترپه دیب ، قیزینین سوزونو تصدیقله دی ،
- دئدیم ، شئیطانیم قوی بو گون بالیق یئسین .
- دونن ده توتموشدو ...شامخالدا بیزده ایدی .
- کیم |
قیز آغزیندان سوز قاچیردیغینا پئشمان اولوب قیزاردی . آتاسی دا بونو حیسس ائتدی . قیزی نین ختیرینه دیمه مک اوچون آرایا سوز قاتدی .
- نه ده ریبسن ؟
- ایلان اوتو . سنه پئنجر بیشیره جم .
- یاغین وارمی ؟
- دونه نده ن بیر قاشیق ساخلامیشام . یقین نئچه گوندور دیلینه ایستی خوره ک ده یمیر .
- نییه ده یمیر ، آی بالا ، اوزوم هوپپادان – زاددان بیشیریره م .
او ، الینده کی بالیقلاری قیزینا وئریب قاباغا کئچدی . گوله سر آتاسی نین چاتلامیش دابانلارینا باخا – باخا اونون ایزی ایله گئتدی .
هر شئی اویانمیشدی . یولون کنارینداکی چیچه کلرین اوستونه قونان خاللی کپنکلر قانادلارینی اوینادا – اوینادا شیره سورور ، بعضن ده هاوانین عطرینده ن خوشلانیب گویه قالخیر و بیر – بیریله زارافاتلاشیر کیمی چمنلرین درینلیکلرینه اوچوردولار . اونلارلا بحثه گیره ن بال آریلاری گوللرین باشینا دولانیردیلار . جیغیرلاردا جیغیر سالان قاریشقالار هاراسا تله سیر ، اللرینه کئچنلری داشییب یووالارینا دولدوروردولار . گوله سر دایانیب باخدی . ایکی دوزانقوردو ( dozangord) مال تزه یی نی یومورلاییب آپاریردی . اونلار باشی آشاغی دوروب ، دال آیاقلاریلا کوره جیی دیغیرلادیردیلار . بیر – بیرینی نئجه ده باشا دوشور ، نئجه ده کومک له شیردیلر ! آرابیر لاپ یاخیندان ، قوجا کیشی نین آز قالا آیاغی نین آلتیندان پیریلتی ایله قالخان قوشلار اوچوب قاباغا دوشور و بیر خئیلی جیغیرین اورتاسیندا سکی ییردیلر . بعلی ، یاز گلمیشدی . بوتون جانلی لار اللله شیب ایشله ییردیلر . قریبه ایدی . همیشه گول – چیچه ک ایچینده اوزه ن کپنکلر نئجه ده گوزه ل ایدیلر . اونلار اذییت چکمیر ، سحرده ن آخشاما قده ر چیچه کده ن – چیچه یه قونوردولار . آمما قاریشقالار ، یا دا تزه ک یووارلادان دوزانقوردلار اللله شیردیلر .....
گوله سر کوکسونو اوتوردو و اوندان خئیلی آرالانان آتاسی نین یورغون گورکه مینه تاماشا ائتدی . کیشی قوجالیب الده ن دوشموشدو . گوله سرین علاجی اولسا ، اونو هئچ یانا بوراخمازدی .اوزو قولونو چیرمالاییب اورتایا آتیلاردی . آمما نئیله سین ، قیزین الینده ن نه گله بیلردی ؟
اونلار حیه ته چاتدیلار . قوجا کیشی تالوارین آلتیندا ائشه له نن چرکزین یانینا گئتدی . عادتی اوزره شوخلوغا باشلادی :
- آ خالاسی گویچک ، بوردا نه اللله شیرسن ؟
چرکز بئلینی دوزه لدییب ترینی سیلدی . آتاسی نین سوالینا زارافاتلا جاواب وئردی . قاباغینداکی قیریق آرابانی گوستردی :
- اولو دیریلدیره م .
قوجا کیشی توز – تورپاق باسمیش بویوندوروغا و تکرلری اییله ن آرابایا باخدی . اووللر اونون آراباسی نین بیر جاغی دا سینیق اولمازدی . داغ کوچونه هامیدان قاباق حاضیر اولاردی . اینیشیل آروادی اولدو . کئچن ایل ده اللری آشاغی اولدو . بو ایل ایسه هئچ آرابا قوشمامیشدی . هئچ چرکزده آرابایا یاخین دورمازدی . ایندی اوغلونون حرکتی اونو خئیلی دوشوندوروردو .
- فیکرین نه دیر ، آی بالا ؟
- بلکه داغا کوچدوک .
کیشی اوغلونون شئنی دوشموش تکرله اویناماسینی عبث زحمت حئساب ائتسه ده ، بیر شئی دئمه دی . آرابانین جاغلاری چوروموشد . تکرلرین ایریسی چاتلاییب آرالانمیشدی . دئیه سن ، اوخ دا قاجی ییب اییلمیشدی .
بئله بیر آرابانی سازلاماقدانسا ، تزه سی نی باغلاماق داها آسان اولاردی . بیر ده آخی بو اذییت نه یه لازیمدی ؟
اونلار کی داغا کوچن دئییلدیلر .
کیشی چیینینده کی کندیری حیه ته آتدی . ایسلانمیش جورابلارینی تالوارین اوستونه توللادی . چاریقلارینی قیزینا وئردی .
- آ بالا ، ائله یئره قوی کی ، ایت – پیشیک آپارماسین . زهریمار ایسلانیب جیلغییا دونوب .
گوله سر آتاسی نین آلتی دئشیلمیش چاریغینی گوزده ن کئچیردی و ایچری آدلادی . اورتا اوجاقدا کورون – کورون یانان کوتویون اوجونا ووروب قورلاندیردی . چیر – چیرپی ییغیب اوستونه توکدو .اوجاق توستوله ندی . اطرافی بوغاز آجیشدیران گویومسوو بیر توستو بورودو . بو دومان بیر موددت لایلانیب ائوین ایچینه چوکدو و یاواش – یاواش اورتا باجادان بورولوب چیخدی . قیز بیر – ایکی دفه اوجاغی پوفله دیسه ، اودون یانمادی . گوله سر گوز یاشینی و بورنونو سیلیب ، اوزون دونونون اته ییله اوجاغی یئلله دی . کوسوولر چاتیردادی و بیرده ن آلیشیب پاریلدادی . توستوده ن نفسی کسیلن گوله سر ائشییه چیخدی .
- آی ده ده ، سنه پئنجرمی بیشیریم ، بالیقمی ؟
- پئنجر یاخشیدیر . هئچ بو ایل نوبار ائله مه میشم . ایسته ییرسن بالیغی دا پورتده ت .
چرکز فیرلادیب او اوز - بو اوزونه باخدیغی تکری الینده ن بوراخدی . تکر حیه تین اورتاسیندا دیغیرلانیب بیر – ایکی دووره ووردو و گوی اوتلوغا دوشدو . اونون شئنی جینگیلتی ایله چیخیب ، تکرده ن اوچ – دورد آددیم کنارداکی چوکه یه یووارلاندی . چرکز الینین توزونو سیلیب ، تاختین اوستونده اوتوران آتاسینا یاخینلاشدی .
- آی ده ده ، دئیه سن بالیق توتموسان ، هانی ، گوستر گوروم ؟
- سن توتدوغون بالیغی منه گوستردینمی ، منده گوستریم ؟
- سن منیم بالیق توتدوغومو هاردان بیلیرسن ؟
- بیلیره م ، آی خالاسی گویچک .
کیشی اوغلونون اوزونه باخیب ، خیریلتی لی سسله گولدو . چرکز اوولجه آتاسی نین قیییق گوزلرینه ، سونرا دا اوجاغین کناریندا ائشه له نن باجیسینا باخدی .
- بالیغی کیمنن توتموشدون ؟
- شامخالنان .
- او بیزه گلمیشدی ؟
- هه ، - دئیه چرکز جاواب وئردی و قاشقاباغی توکولن آتاسینا باخدی . – نه اولار کی ؟
- هئچ ، - دئیه کیشی ساکیتجه دیللندی .
بیر آزدان یاغدا قیزاردیلان سوغان ایی اطرافا یاییلدی . گوله سر ایری میس جاما چکدیی پئنجری آتاسینین قاباغینا قویدو . اوزو ایسه چرکزله یاناشی اوتوردو . ساریمساقلی قاتیغی ایره لی چکیب بیر – ایکی قاشیق پئنجرین اوستونه توکدو .
- آی ده ده ، - دئدی ، - ساریمساقلی یاخشیدیر . ایشتاهان آچیلار . بالیغا دا سو آسمیشام . بو ساعات
حاضیر اولار . سویوتما بیشیره ره م .
قوجا کیشی قیزینین بو مئهریبانلیغینا قارشی نئجه میننتدارلیق ائده جه یینی بیلمه دی . آنجاق اونون اوزونه باخیب گولومسه مه کله کیفایتله ندی . جامی قاباغینا چکیب بارداش قوردو . چوره کده ن کسیب پئنجری چومچه له دی .
کیشی قورو چوره یی دیشسیز داماغیندا اووکه له دیکجه ، چنه سی شاققیلداییر ، گیجگاهلارینداکی دامارلار اویناییردی . او ، تئز – تئز اییلیب فطیر گوتوره ن قیزینی گوز آلتی سوزوردو . گوله سر بویوموشدو . هئچ بیر ایل بوندان قاباقکی آریق ، قورو قیزا اوخشامیردی . دوشلری نیمداش قوفتاسینی دیک توتوردو . کیشی بونون فرقینه ایندی واردیغیندان ، تعججوبله اونا باخیر ، دئمه یه سوز تاپمیردی . او ایندیه قده ر گوله سری اوشاق حئساب ائدیردی . آمما بو گون ائله بیل یوخودان آییلمیشدی .
گوله سر قارداشی ایله بیر قابدا خوره ک یئییردی . تئز – تئز شیتلیک ائدیر ، چرکزین قاباغینداکی پئنجری چومچه له ییب گوتوروردو . قارداشینی جینله ندیریب خیسین – خیسین گولوردو .کیشی گوروردو کی ، قیزی شوخلوق ائدیر . زارافاتلاشماق ، ازیلیب – بوزولمک ایسته ییر . گوزلری اویور – اویور اویناییر . یاناقلاری رنگده ن – رنگه دوشور . گوله سرده ایلک دفه موشاهیده ائتدیی بو حال کیشینی هورکوتدو . (( گونو قارا لاپ اوزونو آچیب ، - دئیه خیالیندان کئچیردی ، - ایندیده ن مازاقلاشماق ایسته ییر . آللاه سیزین دامازلیغینیزی کسسین . بویلاری بیر قامچی اولان کیمی آدامین بئلینه سیچراییرلار )) .
اونون ایشتاهاسی قاچدی . جامی گئری ایته له ییب ، اللرینی شالواری نین دیزینه چکدی . گوله سر آتاسی نین دایاندیغی نی گوروب تعججوبله سوروشدو :
- نییه یئمه دین ، آی ده ده ، یوخسا خوشونا گلمه دی ؟
- یوخ ، قیزیم ، چوخ ساغ اول ، آغزین شیرین اولسون دویدوم .
گوله سر قابی گوتوردو .
- بو ساعات بالیق گتیریم ، - دئیه آیاغا دوردو .
کیشی اونون آرخاسینجا باخدی . قوشا هوروکلری گوره نده خیالی اوزاقلارا گئتدی . قیز لاپ آناسینا اوخشاییردی . بویو ، بوخونو ، یئرییه نده بوینونو بیر آز یانا ایمه سی لاپ زولئیخا ایدی . او دا بونون کیمی اورتابویلو ، توکمه بده نلی ایدی . (( یوخ قیز لاپ یئتیشیب ، گوزده – قولاقدا اولماق لازیمدیر )) .
کیشی تاختین اوستونه اوزاندی . گوله سر کوهنه بیر موتککه گتیریب اونون باشی نین آلتینا قویدو . قوجا کیشی قلیانینی دولدوردو . آرخالیغی نین جیبینده ن چاخماغی نی چیخاردییب قووو آلیشدیردی . قلیانی نین اوستونه قویوب سوموردو . باش بارماغی ایله توتونو باسیب ، چوبوغونو توستوله تدی . کیشی نی فیکیر گوتوردو ...