( 10 )
گوله سر گئجیکمیشدی . سحر تئزده ن ائو – ائشیی سوپورموش ، قیزلارلا پئنجره گئتمیش ، گئری قاییداندا سهنگین بوش اولدوغونو گورموشدو . آتاسی ایندیجه گله جکدی . چرکز ده آخشام اوستو ائوه دونه جکدی . هئچ اولمازسا اونلارا بیر ایسته کان چای وئرمک لازیمدی .
او ، سهنگی گوتوروب بیرباش کوره یوللاندی . گون یاخمیشدی . کندین قرب طرفینده کی هوندور تپه لرین زیروه سی نارینجی رنگه بویانمیشدی . ساحیلده کی سویود آغاجلاری نین بوداقلاری قیزیلی رنگه چالیردی . گوله سر هوندور یارغانین یانیندان سولا بورولوب جیغیرلا آشاغی ائندی . چمنلیکده اویناشان اوشاقلار ماللاری قاباغینا قاتیب کنده دوغرو هایلاییردیلا . لاپ اوزاقدا بیر اوغلان آت چاپیردی . اطرافا سرینلیک گتیره ن کولگه چوکوردو . گوله سر آددیملارینی یئیینله تدی . سویون یاخاسی بویو اوزانان یارغانین قاشیله گئتدی . گویون اوزونده سوزه ن سایسیز – حئسابسیز قیزلارقوشونون سسی بیر – بیرینه قاریشمیشدی . سولارین شیریلتی سی ، جله ده کی سالخیم سویود یارپاقلاری نین خیشیلتی سی ، چمنلرده ن کوله یین قوووب گتیردیی چیچه ک قوخولاری گوله سری مست ائتمیشدی . او هرده ن – بیر آیاق ساخلاییر ، کورون بالیق قوخوسو وئره ن نم هاواسینی جییه رلرینه دولدوروردو .
یارغانین کولگه سی سویا دوشموشدو . اونون قاشیلا گئده ن گوله سرین ده کولگه سی خیردا لپه له رین اوزه ریله ایره لی له ییردی . قیز ، چیینینده سهنگ ، سویون آخاری نین عکسینه گئده ن کولگه سینه تئز – تئز دونوب باخیردی . سولار چهرایی رنگه بویانمیشدی . یاخینداکی آداجیقلاری بوروین چیچه کله میش یولغون کوللاری نین اوجلاری نین رنگینی سولاردان سئچمه ک اولموردو . ائله بیل گونش یاخان زامان هر یئر آخار سولار ، یاشیل تپه لر ، سونبوللو زمیلر ، اود توتوب یانیردی . گوله سر کورون گوریئرینه شفق ساچان گونشه باخدی . یاریسی تپه نین دالیندا گیزله نن گونشین عکسی شففاف سولاردا پاریلداییردی . یئرله سما بیرله شمیش کیمی گورونوردو . سانکی گونش کورون باشیندا ، تپه لرین آغیز – آغیزا قوووشدوغو یئرده آشاغی ائنمیش و آخشام – آخشام آخار سولاردا چیمیردی . اونون قیزیلی ساچلاری سویون اوزونه داغیلیب قیوریلیردی .
گوله سر سوواداغا چاتاندا ساحیله قاتی بیر کولگه چوکدو . قیز باشینی قالدیریب اوفوقه باخدی . گونش گیزله نمیشدی . تپه لرین دالیندان قیزارتی گوروندو . ائله بیل کیمسه اورادا نهنگ بیر تونقال قالامیشدی . اوجاغین شفقلری سمادا عکس ائدیب آغ بولودلاری آلوولاندیریردی .
گوله سر سهنگی سویا باسیب دولدوردو . کناره چکیب آغزینی تیخاجلادی . تله سیک اوزونه سو چیرپیب ساچینی سیغاللادی .تئزجه ده یولا دوشمک ایسته دی .
بیرده ن اونون بدنی نه اوشوتمه گلدی . سینه سینده گویرچین کیمی چابالایان اوره یی قوفتاسی نی تیتره تدی . قیز واهیمه له نن کیمی اولوب سهنگین قولپوندان یاپیشدی . ائله بو آن ساحیلده کی یولغون کوللاری نین آراسیندان بیر قاییق چیخدی . قیز جلد سهنگینی چینینه آلیب یارغانین قاشینا دیرنمانماق ایسته دی . کیمسه اونو چاغیردی . گوله سر تانیش سس ائشیدیب گئری دونه نده شامخاللا قارشی – قارشی یا دایاندی . بیر مودده ت هئچ بیری دینمه دی . گوله سر گوزله نیلمه ین بو تصادوفده ن اوزونو ایتیردی . آخشام اوستو ، چای کناریندا اونلاری بیر یئرده گورسه لر ، نه دئیه ردیلر ؟ ائل ایچینده بیابیر اولمازدیمی ؟ قیز باشینی قالدیریب شامخالین اوزونه باخدی . اونون دینمه دیی نی ، تئز – تئز نفس آلدیغینی گوردو . گوز اوجو یارغانین آشاغی سیندا ساحیله یان آلمیش قاییغا و اوردا اوتوروب اینتیظارلا شامخالی گوزله ین تاپدیغا باخدی . قیزین گوزلرینه کورون اوستونه ائنن کولگه ده ن ده قاتی بیر کولگه ائندی . آرالانماق ایسته دی ، آنجاق شامخال اونون بیله یینده ن یاپیشدی . سهنگ یئره دوشدو . دیغیرلانیب ساحیله قده ر گئتدی . ایری داشا توخونوب دایاندی . تیخاج سیچراییب چیخدی . سهنگین سویو لوققولتویله سوزولوب ساحیل داشلارینی ایسلاتدی .
گوله سر قیشقیرماق ایسته دیسه ، گوجلو بیر ال اونون آغزینی قاپادی . شامخال قوجاغیندا تیتره ین قیزین چابالاماسینا باخمادی . اوز – گوزونون جیریلماسینا دا فیکیر وئرمه دی . آج جاناوار قوزو گوتوره ن کیمی قیزی باسمارلاییب قاییغا سالدی . تاپدیغا (( ترپن )) – دئدی . اوزو ایسه دال طرفده اوتوروب ، پاچاسی نین آراسینا سالدیغی قیزی سینه سینه سیخدی . اونون چابالاییب قاییغی چئویرمه سینه ، یا دا سویا آتیلماسینا ایمکان وئرمه دی . لال سولاری یاریب شوتویه ن قاییق کورون اورتاسینداکی آدانین آرخاسیندا گورونمز اولدو ...
مال اوتاران اوشاقلار های – هارایلا کنده قاچدیلار . ایکی اوغلانین بیری قیزی زورلا قاییغا قویوب قاچیردیقلارینی سویله دیلر قیزین تئز- تئز چیرپینیب اوزونو سویا آتدیغینی ، اوغلانینسا اونو توتوب گمییه باسدیغینی و اوسته لیک بیر – ایکی شیللی چکدیی نی ائله یارغانین قاشیندان گوردوکلرینی دانیشدیلار . قیز آغلاییب چیرپینیرمیش . آنجاق اونون سسینی ائشیده ن اولماییب . قاییق او تایا ، مئشه یه کئچیب .
مالی سولاماغا آپاران ناخیرچیلار بوش سهنگی تاپیب گتیردیلر . گوله سرین اولدوغونو بیلیب قوجا کیشی یه خبر یوللادیلار . باجیسینین قاچیریلدیغینی ائشیده ن چرکز توفنگی گوتوروب باشی آلوولی ساحیله قاچدی .اطرافا بویلاندی . یالاندان هاوایا بیر – ایکی گوللله آتدی ، آنجاق هئچنه تاپا بیلمه دی . قاتی قارانلیق اطرافی بوروموشدو . کورون قیژیلتیسی ، یولغون کوللاری نین اوغولتوسو آدامی واهیمه لندیریردی . جله ده کی چاققاللار ایسه سس – سسه وئریب اولاشیردیلار .
بیر خئیلی ساحیلده وورنوخان چرکز علاجسیز قالیب گئری ، کنده قاییتدی . دیکدیری چیخاندا دایاندی . کندین ایشیقلاری یانمیشدی . قاپیلاردا اوجاق قالامیشدیلار . باغدان آچیلان ایتلر یال اوستونده بوغوشوردولار. یالنیز اونلارین ، چرکز گیلین اوجقارداکی ائولرینده ن ایشیق گلمیردی . او ، کوکسونو اوتوروب آغیر – آغیر قارانلیق داخمایا دوغرو آددیملادی .
گوله سرین کونلو شلمخالی اینیشیل ، داغ کوچونده توتموشدو ... گوی تپه لیلرین آرابالاری آغیز – آغیزا قوووشان سیسلی – دومانلی داغلارین آراسینداکی دره ایله قیژیلداییب آخان چایین ساحیلینده دایانمیشدی . هامی آرابانین یانینا ، ائله گوی اوتلوغون اوستونه گبه سالمیشدی . کندین موعتبر آداملاری موتککه یه سویکه نیب دینجه لیر، جاوانلار ایسه آتلارینی چاپیب ایری یوللاردا اوتوشور ، قیز – گلین بولاقدان سو گتیریب چای تداروکونه باشلاییردی . اوستو ده یه لی آرابالارین بویرونده اوجاق توستوله نیردی . قویون کسیب آلیشما ائده نلرده واریدی .
گمیچی قوجانین آراباسی همیشه کی کیمی کوچون لاپ آخیریندا گئتدیینده ن ، دوشرگه ده ده هامیدان سونرا ، بیر آز آرالی دایانمیشدی .
گوله سر آتاسینین فیکیرلی – فیکیرلی آرابانین یانیندا دولاشدیغینی ، آناسی نین ، الی قوینوندا ، اوجقارلارا آسیلمیش قازانلارا ، بوغلانان آغ ساماوارلارا تاماشا ائتدیینی گوردو . آروادین گوزو یول چکیرمیش کیمی اینتیظارلی ایدی . صیفه تینده ملول – موشگول بیر ایفاده واریدی . گوله سر بیرجه آن گئتدی . سونرا آرابانین ایچینده ن بوز کیلیمی گوتوروب یئره سالدی . اوستونه بالاجا دوشکچه آتدی . ساری ساماواری چیخارتدی . آرواد قیزینین قاب – قاشیق تداروکونو گوروب تعججوبلندی :
- بالا ، فیکرین نه دیر ؟
- هئچ ، - دئیه ساکیتجه جاواب وئردی . گوله سر اوزونو آتاسینا توتدو . – آی ده ده ، گل اوزان ، دینجل . منده اوجاق قالایاجام .
او ، سهنگی گوتوروب بولاغا گئتدی . یاریمجا ساعاتدان سونرا قوجا کیشی نینده آراباسی یانیندا اوجاق توستوله ندی . قازاندا نه ایسه دیغیلداماغا ، ساری ساماوار پوققولداماغا باشلادی . گوله سر هله ده تعججوبله اونا باخان آناسی نین بوینونو قوجاقلادی .
- آی آنا ، کیمدی گلیب سنین قازانینا باخان ؟ قوی هامی ائله بیلسین کی ، بیزده اوجاغا خوره ک
آسمیشیق ، چای دمله میشیک .
- آی بالا ، کوچون ایشینی نه بیلمه ک اولار ، بیرده ن قوناق- زاد گلر ، بیابیر اولماریقمی ؟
- اولاندادا اولاریق ، نئیله یه ک .
دوغروداندا آرادان بیر آز کئچمه میش چرکزله شامخال اونلارین آراباسینا یاخینلاشدیلار . چرکز گوز آلتی قاینایان ساماواری ، اوجاقداکی قازانی ، کیلیمین اوستونه اوزانمیش آتاسی نی سوزدو . اوزونو سیندیرماماق اوچون شامخالی سوفره یه تکلیف ائتدی . او ، شامخالین تشککور ائدیب گئده جه یی و بورادا دایانمایاجاغی ظنینده ایدی . آمما چرکزین گوزله دیی نین عکسینه شامخال :
- بیر ایسته کان چای ایچه ره م ، دئیه اونون تکلیفینی قبول ائتدی . چرکز آناسی نین تلاش ایچینده قالدیغینی ، گوله سرین اونسوزدا داغ هاواسیندان آللاشمیش یاناغی نین داهادا قیزاردیغینی و لال باخیشلارلا نه ایسه دئمک ایسته دیی نی آنلادی . آنجاق گئج ایدی . شامخال قوجا کیشی ایله سالاملاشیب یانینی یئره قویموشدو .
گوله سر ساکیتجه ساماوارین یانیندا اوتوردو . آیلارلا ساندیقدا ساخلادیغی و ایندی اینینه کئچیردیی قیرچینلی قیرمیزی دونونون اوزون اته یی ایله یالین آیاغینی اورتدو . ایسته کان - نلبه کینی یویوب سیلمه یه باشلادی .
شامخال گلنده ن سونرا پرتله شن قوجا کیشی نهایت دیلله ندی :
- آ بالا ، کاسیبلیغین اوزو قارا اولسون ، ایندی سنی نه یه قوناق ائده ک ؟
- هئچنه لازیم دئییل ، قوجا دایی ، ائله گوله سر بیر ایسته کان چای وئرسه پیس اولماز .
- چاییمیز وار ، آمما ....
کیشی دایاندی . سوال ائدیجی نظرلرله آروادینا ، سونرا دا قیزینا باخدی . گوله سر آتاسی نین و آناسی نین وضییه تینی باشا دوشدو ، اوزو ده حیسس ائتمه ده ن دیلاورلییه باشلادی :
- قندیمیز یوخدور .
- نییه یوخدور ، آی بالا ، آنجاق فرماشدادیر . بو ساعات گتیره ره م .
زولئیخا آرواد یئرینده ن قالخماق ایسته دی . شامخال چرکزین قاشقاباغین دان مسله نی آنلادی و اونلاری چیخیلماز وضیه تده ن قورتارماق اوچون گولومسوندو .
- اذییت چکمه یین ، زولئیخا خالا ، سیزین چایینیز قندسیز ده شیرین اولار .
گوله سر سوزدویو چایی شامخالین قاباغینا قویدو و نه اوچون سه باشینی قالدیریب اونون اوزونه باخدی . قیزین دوداقلارینداکی تبسسوم دونوب قالدی . اوزونه زیلله نن گوزلرده هم مئهریبان ، هم ده قلبه نوفوذ ائده ن قریبه بیر ایفاده اوخودو . قیز عومرونده ایلک دفه دویدوغو و معناسینی باشا دوشمه دیی بیر حیسسین تاثیری ایله سارسیلدی . اونا ائله گلدی کی ، اوزونه زیلله نن گوزلر کوز کیمی اونو یاندیریب قارسدی . دئیه سن ، اوزو ده حیسس ائتمه ده ن بیر خئیلی بئله جه دایاندی . یوخسا آتاسی اوسکوروب برکده ن ایچینی آریتلاماز ، چرکز ده قاش – گوز اویناتمازدی .
گوله سر آتاسی نین (( تاخصیرین هامیسی بو خالاسی گویچک ده دیر )) – دئیه اوغلونو گوستردیی نی و اونو خبرسیز قوناق گتیرمه کده مذممت ائتدیی نی ائشیده نده ن سونرا الینی ایسته کاندان چکدی . اونون قولاقلاری گویولده دی . ساماوارین ایستی سی ووردوقجا قیزارمیش یاناقلاری داهادا پورتدو . کیشیلرین صوحبتینی گوجله ائشیتدی . آیاغا دوروب اوزاقلاشماق ایسته دیسه ده باجارمادی .
شامخال چوخ اوتورمادی . چایی ایچن کیمی آیاغا دوردو . (( آغزینیز شیرین اولسون )) ، - دئیه تشککور ائتدی . چرکزله برابر آرابادان اوزاقلاشمازدان اوول دونوب بیرده گوله سره باخدی . قیز اونون چرکزه :
- ماشاللاه ، باجین لاپ بویویوب ، - دئدیینی آیدینجا ائشیتدی .
گوله سر داغلارین کولگه سالدیغی جیغیرلا گونئیه دوغرو آددیملایان شامخالی و قارداشینین خیر یولونا قده ر گوزده ن قویمادی . آناسی اونو سسله مه سه یدی ، بلکه آخشاما قده ر بئله جه دایاناردی .
او سوفره نی و ایسته کان – نلبه کینی ییغیشدیراندا دا شامخالین سوزلری قولاغیندان گئتمه دی . (( سیزین چایینیز قندسیز ده شیرین اولار )). بو نه دئمه ک ایدی ؟ نئجه یعنی چایینیز قندسیز ده شیرین اولار ؟ یوخسا او باشقا سوز دئمه ک ایسته ییردی ؟آمما قریبه گوزلری وار . آدامین دوز اوره یی نین ایچینه باخیر .
قیز سونرالار داغدا اولاندا دا ،حتتا آرانا کوچنده ده بو سوزلری اونودا بیلمه دی . او ، حیسس ائتدی کی ، قلبینده نه ایسه باش قالدیریب ، بو خاطیره لر نه اوچونسه اونو سئویندیریر .اوزونه بیر همدرد آختارماغا ، اوره یینده ن کئچنلری کیمه ایسه دانیشماغا سووق ائدیر . آنجاق بو سیرری کیمه سویله یه بیلمیردی ؟ اونو مسخره یه قویمازدیلارمی ؟ (( گور قیزین ایشتاهیندان نه کئچیر ؟ )) – دئیه اله سالمازدیلارمی ؟
او ، بعضن قارا دامدا میتیل یورغان - دوشه یه بورونوب گوزلرینی حیسس باسمیش کره نه زیلله ییر ، تورپاق دیوارین یاریقلاریندا جیریلداشان گئجه بوجه کلری نین سسینی دینله ییر ، بعضن گویون اوزونه سپه لنمیش اولدوزلارا اورتا باجادان تاماشا ائده ره ک خیالا دالیردی . باجادان سئیر ائتدیی سمانین بیر پارچاسی اونون خیالی تک گاه ترتمیز اولور ، گاهدا کوله یین قوووب گتیردیی دومانا بورونوب توتقونلاشیردی . باجادان ائوین اورتاسینا دوشن آی ایشیغی آزالیر ، اونسوزدا قارانلیق اولان قازمایا اوره ک سیخیجی بیر کولگه چوکوردو . گوله سر گوزونو یوموب یوخلاماغا چالیشسادا باجارمیر ، یئرینه قور دولموش کیمی سحره جن قوورولوردو . قیز اوزونون ده آییرد ائده بیلمه دیی حاللار کئچیریردی . بعضن (( او هارا ، من هارا ؟ )) – دئیه اوزونو دانلاسا دا ، شامخالین سوزلری یئنه قولاقلاریندا سسله نیر ، خیالی گوزونون اونونده ن گئتمیردی . شامخال آتینی سولاماغا آپاراندا بیر بهانه ایله سهنگی گوتوروب کوره ائنیر ، اوزاقداندا اولسا اوغلانی گورمه کله تسللی تاپماغا چالیشیردی . سحرلر یورغان - دوشه یی سرمه ک آدیلا چارداغین اوستونه چیخیب هرله نیر ، جاهاندارآغاگیلین حیه تینه بویلانماقدان یورولموردو . هرده ن تصادوف اونلاری قارشیلاشدیراندا ایسه گوله سر یولونو دییشدیریب ، شامخالدان قاچیر ، اوزونو ائله آپاریردی کی ، گویا هئچنه اونو ماراقلاندیرمیر . آنجاق کوره یینه زیلله نن باخیشلاری دویور ، دوز یولدا آیاقلاری دولاشیر و آز قالیردی کی ، بودره ییب ییخیلسین . بئله حاللاردا گوله سر ایندیجه اوره یی نین پارتلایا جاغیندان قورخوردو . بو ایضطراب و مجهول حیسسلر اونا عذاب وئرسه ده ، خوش و لذه تلی ایدی . گنجلیک قلبینین سیرلرینی مگر آخیرا قده ر باشا دوشمک اولورمو ؟ اورادا جوجه ره ن مئیللرین ، پاریلدایان قیغیلجیملارین ، کول آلتیندا قالمیش کوز کیمی ایشیلداییب سونن آرزولارین سایینی – حئسابینی بیلمک ، هانسی نین آلوولانیب پاریلدایاجاغینی ، هانسی نین سونه جه یینی اوولجه ده ن دئمک اولورمو ؟
شامخال ائله او گئجه کنده قاییتدی . گوله سری مئشه یه آپارمادی . قاییغی بیرباش کورون اورتاسینداکی بالاجا آدایا سوروب ، یولغون کوللاریندا گیزله تدی . او ، ایز ایتیره ره ک ، جاماعات یاتاندان سونرا شئنلی یه دونمک ایسته ییردی .
گوله سر اوولجه چوخ چیرپیندی . آدایا چاتان کیمی قاچیب اوزونو سویا آتدی . اوزوب کئچمه ک ایسته دی . شامخالدان اوول تاپدیق قاباغا گئچدی . قیزی دارتیب سودان چیخارتدی . گوله سرین بدنی تیر – تیر اسمه یه باشلادی . قیز قورخدو . ایللرده ن بری اوره یینده بسله دیی آرزولار ین پوچ اولدوغو قناعتینه گلدی . شامخالین اونون اوزونه یوخ ، نوکرلرینه گوتوروب قاچیردیغی نی یقین ائتدی . او ، یئنیده ن چیرپیندی . جانینی قورتارماق اوچون وار قووه سینی توپلاییب دارتیندی . اوغلانین اونو بوراخمایاجاغینی حیسس ائتدیکده ایسه گوزلری ایله شامخالی آختاردی ، اونو کومه یه چاغیرماق ایسته دی . شامخال بونو دویموش کیمی قاباغا کئچیب آخشام آیازیندا تیر – تیر اسن گوله سرین قولوندان توتدو . قیزین باخیشلاریندا عاجیزانه یالواریشلا باهم درین بیر مذممت ، دیل آنلاماز ، مرحمتسیز بیر آداما قارشی جوشان کین قاریشیق گیلئی – گوزار واریدی .
تاپدیق چکیلیب کناردا دایاناندان سونرا گوله سر بیر آز ساکیتله شدی . شامخال قیزی چکیب یولغون کوللاری نین قالین یئرینه آپاردی . گوله سرین جانینی یئنیده ن تیتره تمه گوتوردو .
- قوربان اولوم ، منه دیمه . اوزوم آیاقلاری نین آلتینا ، آی شامخال ، منی بیابیر ائله مه .
قیز قورخوسوندانمی ، یوخسا ایمداد آختاردیغیندانمی ، ندنسه ، هئچ اوزو ده بیلمه ده ن اونون قوینونا قیسیلدی . شامخال ایسلاق پالتاری بدنی نه یاپیشان قیزین اعضالاری نین تیتره دیی نی حیسس ائتدی . یازیق قیز چیپینیر ، هم قورخودان ، هم ده سویوقدان چنه سی شاققیلداییردی .
شامخال اله کئچیردیی اووو ییرتیجی بیر ائحتیراسلا پارچالاماق فیکرینده دئییلدی . او ، گوله سری ائوه آپارماق و اوزونه همیشه لیک آرواد ائتمک ایسته ییردی . ایندیه جن آتاسی نین بو ایشه قول قویمایاجاغینی بیلدیی نده ن ، سیررینی هئچ کسه آچمامیشدی . آنجاق ایندی ایشلر ترسینه دونموشدو . گورونور ، اینسان اوز تالئعینده ن قاچا بیلمه زمیش !
اون یئددی یاشی یئنیجه تامام اولان گوله سر ایسه باشینا گلن احوالاتدان هئچ نه آنلامیر ، ائله بوراداجا ، کولون دیبینده دهشتلی و عئینی زاماندا جاذیبه دار بیر ماراقلا گوزله دیی احوالاتین باش وئره جه یینده ن قورخوردو . هله ایندیه قده ر بیر اوغلان الی توخونمایان بدنی شامخالین تماسیندان داها شیدده تله تیتره ییردی . اوغلان اونو قوجاقلایاندا سودان کنارا آتیلمیش بالیق کیمی چابالاییر ، ال – قولو توتولاندا ایسه دارتینیب چیرپینیردی .
شامخال اونون اوزونو هلاک ائده جه یینی گوروب ، ائحتیراس و هیجاندان بوغولان بیر سسله دیلله ندی :
- آی دلی ، اوزونو نییه اولدورورسن ؟
- قوربانین اولوم ، منی قایتار ائویمیزه .
قیز اونون سینه سینه قیسیلیب بئلینده ن قوجاقلادی . شامخالی توتوب ساخلاماق ، ال – قول آتماغا قویماق ایسته مه دی . اودا بونو حیسس ائدیب ترپنمه دی . چوخاسی نین اته یی ایله گوله سری بورویوب اوزونه دوغرو چکدی . قیزین ایسلاق قوفتاسینا یاپیشمیش یومرو دوشلری نین اوره یی چیرپیندیقجا تیتره دیی نی حیسس ائتدی . اونون نفسی داریخدی . قیزین آیاقلارینی یئرده ن اوزوب یوخاری قالدیردی . تپیمیش دوداقلارینی اونون یاناقلاریندا ، اوزونده گزدیردی . ایلک اوپوشده ن باشی گیجه للله نن گوله سر سوستالدی .
- من سنی بیابیر ائله مک ایسته میره م کی ، نییه قورخورسان؟
- اولوم آیاقلاری یین آلتیندا ، منه دیمه .
...... گئجه یاریدان کئچیب ، شئنلیک ساکیتله شنده ن سونرا اونلار یئنه قاییغا اوتوردولار . بو دفه گوله سر چیرپینمادی . شامخالین چوخاسینا بورونوب ساکیتجه ایله شدی . او ، اوغلانی یولا گتیردیینه و بیر آزدان ائولرینه قاییداجاغینا سئوینیردی . شامخال اینصافلی ایمیش . گوله سر گوتورولوب قاچیریلان قیزلارین دویولدویونو ، زورلا باشلارینا اویون گتیریلدیی نی چوخ ائشیتمیشدی . حتتا اونلاری آیلارلا گیزله دیب اورتایا چیخارمیردیلار دا . آنجاق شامخال اونا گولده ن آغیر آجی بیر سوز ده دئمه دی . بو ساریدان قیزین اوره یی ساکیتله شمیشدی . گوره سن گئجه ده ن چوخمو کئچیب ؟ ده ده م ائوه گلیب می ؟ چرکز هاردادیر ؟ من قاپیدان ایچری گیره نده نه دئیه جک ؟ یقین بوینومو قوجاقلاییب (( نه یاخشی گلدین ، آی گوله سر ، - دئییب اوزومده ن اوپه جک . – سنسیز لاپ داریخمیشدیم )) . بلکه دوشومده ن ایته له ییب هئچ ایچری بوراخمایاجاق؟!
قیزی دهشت گوتوردو . آغلینا گلن قارا فیکیرلر ایلدیریم کیمی چاخیب اونو سارسیتدی . آخی ، اونون قولوندان یاد کیشی یاپیشمیشدی ! یقین کی ، بو ساعات شئنلی یین آداملاری اونون گوتورولوب قاچیریلدیغینی بیلیرلر . آغیللارینا جور به جور فیکیرلر گلیر . آمان آللاه ، نه بویوک روسوایچیلیق دیر ! ایندی منه کیم اینانار؟ اوزومو قارالاییب ، ائششه یین بئلینده ترسینه اوتوردوب ، کندین ایچینده گزدیرمزلرمی ؟
قیز هیچقیردی . آنجاق اونو ائشیده ن اولمادی . کوره ک چکیلدیکجه شوتوین قاییق خیرداجا لپه لری یاریب سویو شاپپیلدادیردی . شامخال قاباق طرفه کئچدی . قاییغین بورنو ساحیل داشلارینا دییب خیرجیلدایاندا ، آتیلیب کنارا چیخدی . قاریشیق فیکیرلرده ن هله ده اوزونه گله بیلمه ین گوله سری آستادان سسله دی . الینده ن توتوب ساحیله چیخارتدی . قاییقدا اوتوران تاپدیق پیچیلتی ایله دیللندی :
- منده گلیممی ؟
- یوخ ، اوزوموز گئده ریک .
- بیرده ن یولدا – زاددا ....
- هئچ نه اولماز ، سن قاییت .
تاپدیق قاییغی ایته له ییب ساحیلده ن آرالاندی ، سویون آخاری ایله آشاغی یا دوغرو گئتدی . او ، یارغانلارین کولگه سینده گوزده ن ایته نده شامخال گوله سرین قولوندان یاپیشدی . قیز یئنه ده تیتره دی .
اونلار کند ایتلرینی دویوق سالماماق اوچون چمنلی یین اورتاسینداکی جیغیرلا گئتدیلر . گوله سر قاباغا دوشموشدو . شامخال ایسه آغیر – آغیر آددیملاییردی . قیز آز قالا قاچیر ، قورشاغا چیخان اوتلارین آراسیلا کولگه کیمی ایره لی له ییردی . سوروده ن آییری دوشن قویون دا بئله ، موطیع حالدا جاناوارین قاباغینجا قاچیر .
اونلار دییرمانین اوست طرفینده ن کئچیب قاشداکی توت آغاجی نین یاخینلیغیندا دایاندیلار . کند ظولمت ایچینده ایدی . جیر جیرامالار سس – سسه وئرمیشدیلر . آرابیر سودان سیچرایان ایری بالیقلارین شاپپیلتی سی ائشیدیلیردی . دییرمانین نووونا توکولن سولارین شیریلتی سی جاخجاغین بوغوق تاققیلتیلارینا قاریشیردی .
شامخال تپه لرین دالیندان یئنیجه دوغان آی ایشیغیندا قیزی باشدان – آیاغا سوزدو .
- ایندی فیکرین نه دیر ؟ هارا گئتمه ک ایسته ییرسن ؟
قیز دینمه دی . یئرینده جه سیلکه له نیب دایاندی . دانیشماق ایسته دیسه ده باجارمادی . یاش اونو بوغدو . یاییلیغی نین اوجونو آغزینا سالیب دیدیشدیردی .
شامخال اونو ائولرینه بوراخان دئییلدی . اگر قیزی قایتارسا ، صاباح باش قالدیریب ، شئنلی یین آراسیندا گزه بیلمزدی . جاوانلار اونو مسخره یه قویوب ، کند آراسیندا ، دوققازدا اوتوران کیشی لر سالامینی دا آلمازدیلار ، (( بی وئج – دئیه اله سالاردیلار ، - گول پارچاسی کیمی بیر قیزی دا اوزونه رام ائده بیلمه ییب ، داها او نه کیشیدی ؟)) . قاچیریلان قیزین بکاره تی نین پوزولمادان گئری قاییتماسی اوغلان اوچون اولوم ساییلیردی . اونا گورا وحشیلیک دره جه سینه گلسه ده ، هئچ کس قیزی سالامات بوراخماق ایسته میردی . بورادا ایکینجی بیر جهتده واردی . عیصمه تینی ایتیرمیش قیز ، عومورلوک ایشکنجه ده اولسا ، همین آداملا قالیب یاشاییر ، بیرده گئری ، آتاسی ائوینه قاییتمیردی . شامخال بونلاری چوخ یاخشی بیلیردی و دئدیینده ن ده دونن دئییلدی . آنجاق گوله سری ده اینجیتمه ک ایسته میردی . ائله بونا گورا دا بیر آز آرخایین ترپه نیردی .
- اوزون بیله ن یاخشی دیر . تر تمیز سن . الیم – آیاغیم دیمه ییب . آنجاق سنه کیم ایناناجاق ؟
ائله گوله سری ده سارسیدان بو ایدی .
شامخال اونون تره ددود ائتدیی نی گوروب ، قلبه سینه امین اولدو و هئچنه سوروشمادان قیزی کیریمیشجه قاباغینا سالیب ائوه گتیردی .
قارا دامدا تکجه اوتوروب ،واهیمه ایچینده قارداشی نی گوزله ین سالاتین گئجه یاریدان سونرا شیققیلتی ائشیدیب ، حیه ته چیخدی . سکسکه لی حالدا :
- آدام ، کیمسن ؟ - دئیه سوروشدو .
شامخال آستاجا دیللندی :
- منم .
- آی قاغا ، آدام دا ...
- سس سالما !
سالاتین قارداشی نین یانیندا باشقا بیر آدامین دا گلدیی نی گوروب سوسدو . اونلار چارداغین قاباغیندا دایاندیلار .
- تئز اول ، چیراغی یاندیر ، بونو ایچری آپار . یازیق تیر – تیر اسیر . اوست – باشی سودور .
سالاتین چوخایا بورونوب کولگه ده دایانان قیزی تانیمادی :
- بو کیمدیر ؟
- گوله سر .
- گوله سر ؟ آی قاغا ، نه ائله دیی ندیر ؟
- اوزون دانیشما . نه دئییره م اونا باخ !
سالاتین چیراغی یاندیریب قاباغا کئچدی . شامخال یئرینده جه دونوب قالان قیزی ایته له ییب ایچری سالدی . سونرا باجیسینی سسله دی :
- قورو پالتارین وارسا ، وئر دییشسین .
اونلار ایچری کئچدیلر . سالاتین سویوقدان گوم گوی گویرمیش قیزا باخدی . گوله سر اوچوم – اوچوم اوچونوردو . لاکین سویوقدان چوخ ، قارشیداکی مجهوللوق اونو تیتره دیردی .
- آی قیز ، بو نه ایشدیر ؟
گوله سر اوشاق کیمی کووره لدی و بیرده ن سالاتینین بوینونا ساریلیب هونکوردو . اونلار خئیلی بئله جه دایاندیلار . گوله سر آغلاییب اوره یی نی بوشالتدی .
- قوربان اولوم ، منه بیر یول گوستر .
- نه یول ؟ داها گلیب چیخیبسان .
- او منه هئچنه ائله مه ییب . بلکه گئج دئییل ،ائویمیزه گئدیم ؟
سالاتین حیادان قیزاردی . قیزلیق عیصمه تی نین باکیره لیین چوخ چتین اولدوغونو بیلدیینده ن ، گوله سرین حالینا آجیدی . بیرده ، او گئری قاییتسا داها پیس اولمازدیمی ؟ (( کاسیب قیز ایدی ، بیر گئجه ساخلاییب بوراخدیلار )) . – دئیه یازیغی داشقالاق ائتمزدیلرمی ؟ آرالیغا قان دوشمزدیمی ؟ بیر دوشمنچیلیک ده بو یاندان باشلامازدیمی ؟ بونلاری فیکیرله شن سالاتین یاشلی قادین کیمی گوله سره اویود- نصیحت وئرمه یه باشلادی :
- هئچ یانا گئتمک لازیم دئییل . شئنلی یی اوزونه گولدورمه کمی ایسته ییرسن ؟
سالاتین حیرصله نمیشدی . قارداشی نین هئچ کسله مصلحت له شمه ییب ، اوزباشینا آرواد آلماسی اونا یامان توخونموشدو . (( بو گده لاپ آغلینی ایتیریب . آخیردا کیشی نین اوره یی نی پارتلاتماسا یاخشی دیر )) ، دئیه خیالیندا اونو آسیب – کسیردی . دیگر طرفده ن ، اوره یی نین لاپ درینلیینده باش قالدیران بیر حیسس اونو سئویندیریردی . قارداشی ائوله نیردی . مگر او بو گونو چوخدان آرزولامیردیمی ؟ تئز – تئز شامخالا ساتاشیب (( نه واخت گلین گتیریرسن ؟ )) – دئیه ن او دئییلدیمی ؟ بس ایندی نییه حیرصله نیر ؟ گولوب – اویناماق عوضینه نییه قاشقاباغین توکور ؟ بو سواللارا سالاتین اوزو ده جاواب تاپا بیلمیردی . بلکه قارداشی نین بئله خلوتی ائوله نمه یی ، جاه – جلالا توی ائتمه ییب ، قیز گوتوروب قاچماسی اونا توخونوردو ؟ آخی ، سالاتین شامخالین تویوندا دویونجا اویناماغی عهد ائتمیشدی ! اونون آرزولاری نییه پوچ اولوردو ؟ بلکه گوله سری بیه نمیردی ؟ یوخ ، گوله سر اونون چوخدان خوشونا گلیردی . اونلار آز – آز گوروشسه لر ده ، بیر- بیرینه چوخ یاخین ایدیلار .
- یاخشی ، بسدی . یاد یئره ها گلمه ییبسن ؟
- آخی من بئله ایسته میردیم .
- نه بیلیرسن ، بلکه بو یاخشیدیر .
- قوربان اولوم ، منی دانلاما.
سالاتین آییلان کیمی اولدو . دولاشیق فیکیرلرده ن یاخاسینی قورتاریب ، گوله سرین اوزونده ن اوپدو :
- بئله خوش گلیبسن ! قدمین یونگول اولسون ! آللاه سیزی قوشا قاریتسین ! بیر ده کی ، آی شئیطان ، ناز
ائله مه ، اوزویون اوره یینده ندیر . پیشی یین کونلو سامانلیقدایدی ، ایت ده ووردو سامانلیغا سالدی . داها نه ایسته ییرسن ؟
ائله بیل سالاتینی بیرده ن – بیره دییشدیردیلر ، آزجا بوندان اوولکی دونوق قیز هارایا ایسه چیخیب گئتدی . عوضینه شیتیخ ، قاش- گوزونو اوینادیب گولن آیری بیر قیز گلدی . او تئز صاندیغی آچدی . قورو پالتار چیخارتدی .
- آمان آللاه ، گور نئجه ده تیتره ییرسن ؟ آز ، گوم گوی کسیلیب سن . تئز اول ، اینینده کی نی سویون .
آل ، آللاه ائله مه میش ناخوشلاییب – ائله رسن ، بیابیرچیلیق اولار . تئز ، تئز .
بو یونگوللوک و شیتیخلیق گوله سره ده تاثیر ائتدی . اونون دا چوهره سی آچیلدی . قاشلارینی اوینادیب گولومسوندو . سالاتین چیراغین ایشیغیندا اونون یاشلی گوزلری نین درینلیک لرینده پارلایان قیغیلجیملاری دویدو . قیز قوفتاسی نی سویوناندا سالاتین گوله سرین آلت پالتاری نین دا ایسلاق اولدوغونو گوردو . اونون یئنیجه اته دولان آغ سینه سینه باخدی . یاش کوینک قیزین یومرو دوشلرینه یاپیشمیشدی . بعضی یئرلرده اتله پالتار آراسیندا هاوا قالمیشدی . آغ زولاقلارین آراسیندا آچیق – چهرایی رنگه چالان بدنی گورونوردو .
سالاتینین اوره یی چیرپینیردی . گیجگاهلارینداکی دامارلار نبضی نین آهنگینه اویغون اولاراق وورماغا باشلادی . ائله بیل قیزین صیفه تینه ایستی بوغ وئردیلر . یاناقلاری آللانیب پورتدو . بیرده ن گوله سر ده دایاندی . الینده کی دونو سینه سینه توتوب گئری چکیلدی .
- سن آللاه ، اوزونو او یانا توت . قوی کوینه ییمی دییشدیریم .
اونلار بیر – بیری نین بدنی نی چوخ گورموشدولر . ائله اوشاقلیقدان کورده یان – یانا چیمیر ، بیر – بیرینده ن چکینمه ده ن سویونوب سویا آتیلیردیلار . حتتا بعضن بیر – بیرینی سویا باساندا زارافاتا سالیب دوشلرینی سیخیردیلار . آمما ایندی سالاتین قیزا باخاندا قارداشی شامخالی گوزونون قاباغینا گتیردی و اوزونو ایتیردی :
- یاخشی ، سویون ، - دئیه اوندان آرالانیب یوک یئرینه یاخینلاشدی .
دهلیزده آیاق تاپپیلتی سی ائشیدیلدی . سالاتین یویوروب قارداشی نین قاباغینی کسدی :
- گلمه ، قوی قیز پالتارینی دییشسین .
او ، قارداشینی گئری قایتاریب تاختین اوستونه یورغان – دوشک سالدی . یاستیقلاری قوشالاییب یان – یانا قویدو . کونجده دایانیب اونا تاماشا ائده ن گوله سرین اوزونده ن اوپدو . چیخیب گئتمه ک ایسته دی . قیز بوراخمادی . (( گئتمه ، قورخورام )) ، - دئیه تیتره دی . سالاتین اونو تاختین اوستونده اوتوردوب ، قوشا یاستیقلارا باخدی :
- هئچ نه اولماز ، - دئیه قیمیشدی و قیزین اوزونده ن بیر ده اوپوب ، جلد اوتاقدان چیخدی .
شامخال ایچری گیره نده گوله سر اوزونو ائله ایتیردی کی ، زیفاف گئجه سینده نئجه حرکت ائتمه لی اولدوغو حاققیندا واختیلا گلینلرین اونا اویره تدیکلرینی اونوتدو . دوروب شامخالین آیاغینی باسدالامادی و بئله لیکله ده بوتون عومرو بویو ائوده (( اوستونلوک قازاناجاغی )) ائحتیمالینی الده ن وئردی . شامخال اونون تیتره مه سینه ، قیسیلیب کونجه چکیلمه سینه اهمییت وئرمه دی . ساکیتجه :
- سویون یات ، آیاق اوسته نییه دورورسان ؟ - دئدی .
گوله سر یورغانین آراسینا نئجه و نه واخت گیردیی نی بیلمه دی .
چیراق سوندو .
باجادان سوزولن آی ایشیغی تورپاق دوشه مه نین اورتاسینا آغ بیر لکه سالدی . گوله سر یاد و ایستی بدنین تماسیندان دیکسینیب تیتره دی ...
دان یئری سوکولوردو . شئنلی یین خوروزلاری سس – سسه وئریب بانلاشیردیلار . شرق طرفده اوفوق آغاریشیر ، گویون اوزو قیزاریردی . بو قیزارتی گئتدیکجه چوخالیر . کورون سولارینی بئله آلوولاندیریردی . چمنلیک لرده و یوللارین کناریندا سکه ن قوشلار یئنی بیر سحرین آچیلدیغینی دویوب اوخویوردولار ....