(12)
شامخال آیاغا دوروب کمرینی دارالتدی . بوغازی قایتانلی کوینه یی نین قیریشلارینی آرخایا طرف ییغدی . یونگول آددیملارلا قاپی یا یاخینلاشدی . الینی جفته یه اوزاتمازدان اوول دونوب گئری باخدی . شاه نیگارخانیمین سینه سی قالخیب – ائنیر ، سالاتین ایسیتمه لی آداملار تک تیتره ییر ، گوله سر ایسه جسد کیمی یئرینده ن ترپه نه بیلمیردی . او بونلاری گورسه ده دینمه دی ، ساکیتجه دیوارا سویکه دیی توفنگه یاخینلاشدی. بئینینده ن ایلدیریم سورعتلی فیکیرلر گلیب کئچدی . (( توفنگی گوتورسونمو؟ یوخسا چرکزین قاباغینا ائله – بئله، سایمازیانا ، الی بوش چیخسین ؟ اونون یانینا یاراقلی گئتمک قورخاقلیق دئییلمی ؟ آروادلار ، ایللاه دا گوله سر بونا نه دئیه ردی ؟ ائله ایلک گونده ن آروادینین گوزونده ن دوشمزدیمی ؟ یوخ ، ائله – بئله ، الی بوش گئده جم . بلکه اونون سیلاحی وار ؟ قاپی یا چیخان کیمی سینه می نیشان آلاجاق ؟ هئچ ال – آیاق ترپه تمه یه قویمایاجاق ؟ کیمی ، منی ؟ چرکز منه ، جاهاندارآغانین اوغلو شامخالا ال قالدیراجاق ؟ واللاهی اونلارین کولونو توربا ایله داشیتدیرارام . هونری وار ، ترپه نسین!))
او ائهمالجا توفنگی گوتوروب الینده هرله دی .شاه نیگار خانیم قارداشی اوغلونون اوره یینده ن کئچنلری اوزونده ن اوخودو، اونون ایکی سو آراسیندا قالدیغینی و قطی بیر قرارا گله بیلمه دیینی باشا دوشدو . ساکیتجه شامخالا یاخینلاشدی .گوزلرینی اونون گوزلرینه زیلله دی .
- ائحتیاط ایگیدین یاراشیغیدیر ، اوغول ، کیشی کیشی نین قاباغینا یاراقسیز چیخماز.
بو سوزده ن سونرا شامخال توفنگین چاخماغینی چئویردی ،خزنه نین بوش اولدوغونو گوروب ، تاختین اوستونده کی قولتوق آلتیدان بیر دارق پاترون گوتوردو و توفنگی دولدوردو . چاخماق شاققیلتیسی کسنده ن سونرا ائوده کیمینسه تلاشلا نفس آلدیغینی دویدو . دونوب گوله سره باخدی . اونون کالاغایی سی سوروشوب چیینی نه دوشموشدو . شاه نیگار خانیمین یئنیجه قولاغینا تاخدیغی سسیرغالار تیتره شیردی . بوینونداکی دامارلار شیشیب گویه رمیشدی . هر دفه نفس آلدیقجا سینه سی کوروک کیمی قاباریردی . گلین بوغولورموش کیمی تئز – تئز اودقونوردو . شامخال گوله سرین لال باخیشلارینداکی مظلوملوقلا برابر ، مذممت و یالواریشی دا دویدو . گئنیش آچیلمیش گوزلری نین اطرافیندا حلقه له نن یاش گاه چوخالیب ببکلری نین اوستونو اورتور ، گاه دا گئری چکیلیب کیرپیکلری نین دیبینده تیتره شیردی . شامخال حیسس ائتدی کی ، گوله سرین باشی هرله نیر ، هر شئی اونون گوزلرینده تور گورونور . بیر آز دا بئله کئچسه ، بلکه ده اوره یی سیخیلیب یئره سریله جکدیر . او ، آروادینین قارشیسیندا عاجیزلیک ائده جه یینی دویدوغوندان ، یونونو چئویردی و کئتمک ایسته دی . آنجاق گوله سرین یاشارمیش گوزلرینی خیالیندان چیخارا بیلمه دی ، اونا ائله گلدی کی ، کوره یی نین اورتاسیندا نه ایسه یاندیریر ، کوز کیمی دئشیب اوره یینه کئچیر و بوتون اعضالارینی سیزیلدادیر . ائله بیل گوجلو بیر ال اونو یئرینده جه فیرلاتدی . بیرده ن اوزو ده حیسس ائتمه ده ن گئری چئوریلدی . آروادی نین اوزونه باخدی ، یئنه لال باخیشلارداکی عئینی یالواریشلاری گوردو . آستاجا آددیملارلا ائوین اورتاسینداکی دیره یه یاخینلاشدی ، توفنگی میسماردان آسدی . آروادلارین اوزونه باخمادان قاپینی آچیب ، آغیر – آغیر حیه ته چیخدی .
چرکز تزه دوشموش جیغیرین اورتاسیندا دایانیب پاپیروس چکیردی . بورنونون دئشیکلرینده ن فیسقیریب چیخان توستو اوزون قوشا زولاق کیمی قاباغا وورور ، سونرا ایسه بیر – بیرینه قاریشیر و سود رنگلی هاوادا ارییی ردی .
شامخال چرکزین فیسیلدایا – فیسیلدایا پاپیروس چکدیی نی و چیینینده کی توفنگین قاییشی نی بارماقلاریلا دیدیشدیردیی نی گوره نده ، سیلاحسیز گلدیینه پئشمان اولدو . الینی خنجری نین دسته یی نه قویوب ، (( اولمک اولمکدیر ، خیریلداماق نه دیر ، اگر بیر بالاجا ال ترپه دسه ، سیچراییب اوستونه جومماقدان باشقا علاجیم یوخدور )) – دئیه دوشوندو و سکسکه لی حالدا ایره لی له دی ، هیجانی گیزله تمک اوچون تمکینی نی پوزماماغا چالیشدی .
چرکز یئرینده ن ترپه نمه دی . شامخال اونا یاخینلاشاندا بئله باشینی قالدیرمادی . دوستلار خئیلی ساکیتجه دایاندیلار .
- خئییردیمی ؟
چرکز حریصلیکله سوموردویو پاپیروسو کنارا آتیب ، توفنگین قاییشی نی چیینی نده دوزه لتدی . یالنیز بوندان سونرا شامخالین اوزونه باخدی .
- توفنگین هانی ؟
- نئیله ییرسن ؟
- لازیمدیر .
- نه یه لازیمدیر ؟
شامخال چرکزین بو ساعات (( من یااقسیز آداما ال قالدیرمارام . گئت توفنگینی گتیر ، سونرا دانیشاریق . اوزونو ده بیلمه مه زلییه وورما))، - دئیه جه یینی گوزله دی . آمما چرکز سوالا سواللا جاواب وئردی .
- باشیمیزا گلنی ائشیتمه ییبسنمی ؟ . قیزی گوتوروب قاچیریبلار.
شامخال درینده ن نفس آلدی . الینی خنجرین دسته یینده ن چکیب ، پاپیروس قوتوسونو چیخارتدی . بارماقلاری اسه – اسه قوتونو ائشدی . چرکزین هئچ نه ده ن خبری اولمادیغینی بیله نده ن سونرا داها دا هیجانلاندی.
- یاخشی ، ایندی فیکرین نه دیر ؟
- ایشین یوخدور کی ؟
- نه دیر کی ؟
- گئده ک قیزی آختاراق .
شامخال ساکیتجه پاپیروسونو سوموروب ، توستونو گویه اوفوردو .
چرکز دوستونون دا هیجان کوچیردیی نی ، بو خبری ائشیده ن کیمی ال – آیاغا دوشه جه یینی و اونون دردینه شریک اولاجاغینی گوزله ییردی . او ، ائله ظن ائدیردی کی ، شامخال درحال توفنگی گوتوره جک ، یئرین آلتیندا دا اولسا گوله سری آختاریب تاپاجاقلار . چرکز خئیلی واختدان بری شامخالین گوله سره مئیل سالدیغی نی دویدوغوندان ، بونا داها چوخ امین ایدی . او ، اوزده بیر سوز دئمه سه ده ، بونو ائتیراف ائتمه یه مجبور اولور ، ائله اونا گورا دا دار آیاقدا شامخالا دردینی آچیب کومک ایسته ییردی . آنجاق چرکزین گوزله دیی نین عکسینه بو خبر شامخالی ناراحات ائتمه دی . او ساکیتجه پاپیروسونو سوموردو ، سونرا دا خنجرینی یانا چکیب چومه لدی . چرکز ده توفنگینی دیزی نین اوستونه قویوب ، اونون یانیندا ساللاغی اوتوردو .آرالیغا سوکوت چوکدو . چرکز اوندان جاواب گوزله ییر ، هم ده بیر آز تله سمک لازیم اولدوغونو سویله مک ایسته ییردی . شامخال ایسه توستونو جیه رلرینه دولدورور، هئچ نه ده ن خبری اولمایان چرکزه نه دئیه جه یینی ، قیزی اوزو گوتوروب قاچدیغینی نئجه خبر وئره جه یینی بیلمیردی . اصل حقیقتی اوندان گیزله تسینمی ، یوخسا (( باجین بوردادیر ، گوروشمک ایسته ییرسن دور ، ائوه گئده کمی )) – دئسین؟ بو خبری چرکز نئجه قارشیلایاجاق ؟
شامخال پاپیروسونو سوموروب کنارا آتدی . صبیرسیزلیکله جاواب گوزله ین چرکزین اوزونه بئله باخمادان ساکیتجه دیلله ندی :
- هانسی طرفه گئتمک فیکرینده سن ؟
- او تایا دئییرلر قیزی کورده ن کئچیردیبلر.
- گومانین کیمه گلیر، قیزی کیم آپارمیش اولار ؟
- نه بیلیم ؟
اونلار یئنه سوسدولار . شامخال مومکون قده ر صبیرلی اولماغا چالیشدیغیندان ، چرکزی ساکیتله شدیرمک اوچون موناسیب سوز آختاریردی . او هله ده ائله ائتمک ایسته ییردی کی ، چرکز واختیندان اوول شوبهه لنمه سین .او ، (( ایشیم وار )) – دئیه بویون قاچیردا بیله ردی . آنجاق بونو کیشی لیینه سیغیشدیرمادی . او ایسته مه دی کی ، چرکز اونو قورخاقلیقدا ایتیهام ائتسین ، مسله نین اصلینی بیله نده ن سونرا تزه ده ن اوستونه گلیب ، داوا – قالماقال سالسین . (( قیزی گوتوروب قاچماغی بیلیرسن ، آمما بوینونا آلماغا کیشی لیین چاتمیر ؟ )) – دئیه اونو یامانلاسین .
آرالیغداکی سوکوت چرکزی داریخدیردی . او تله سیر ، بیر قوش کیمی قانادلانیب ، گومانی گلدیی یئرلره باش وورماق ایسته ییردی . باشقا واختدا بیرجه ایشاره یه بند اولان دوستو ایسه ایندی کاروانی باتمیش کیمی داشا دونوب دینمیردی . اونا نه اولدوغونو باشا دوشمک چتین ایدی .
- نه یامان فیکره گئتدین ؟
چرکزین سسینی ائشیده نده ن سونرا شامخال باشینی قالدیریب اورکک نظرلرله موصاحیبی نین اوزونه باخدی .
- گئج دئییلمی ؟
- نه گئج دئییلمی ؟
- دئییره م ، قیزی آختارماق گئج دئییلمی ؟ . دونن آپاریبلار ... ایندی یقین ایش ایشده ن کئچمیش اولار
... تزه ده ن ...
- منیم باجیما هئچ کس ال وورا بیلمز !
شامخالین دوداقلاری قاچدی . بیغی نین آلتیندان آستاجا قیمیشدی . چرکز گوجله سئزیلن بو تبسسومده اوزونده ن راضی قالان آرخایین بیر آدام ایستئهزاسینی گوردو .
- نییه ال وورا بیلمز ؟
- اونون آناسینی آغلادارام!
شامخال نه قده ر صبیرلی اولماغا چالیشسادا ، سون سوزه دوزمه دی . چرکزه توخونمالی بیر جاواب وئرمه سه ، ساکیتله شه بیلمه یه جه یینی دویدو :
- چوخ سینه نه دویمه ، گئجیکمیسن .
- بورا باخ ،- دئیه چرکز حیرصله آیاغا دوردو. – گئتمک مئیلین یوخدورسا ، آچیق دئه ، چره ن – پره ن
دانیشما .
- ا ، نه اودلو – اودلو دانیشیرسان ؟ توتاق کی ، قیزی تاپدین ، باش کسه جکسن ؟
- نییه کسمیره م ؟
- الینه نه کئچه جک ؟
- هئچ اولماسا ، اوره ییم سویویار .
- باجیندا قالار اورتالیقدا ، ائله می ؟
- به نه اولسون دئییرسن ، قیزین باشیندان کئچیم ؟
- کئچمه ، نییه کئچیرسن ؟!
شامخال یئنه قوتوسونو چیخارتدی . اوولجه ده ن بوکدویو پاپیروسلاردان بیرینی گوتوردو . چرکز اونون آلیشقانی یاندیرارکن ، بارماقلاری نین تیتره دیی نی گوردو . اگر شامخالین باخیشلارینداکی اورککلیک اولماسایدی ، چرکز اونون هیجانلانماسینا فیکیر وئرمه زدی . آنجاق شامخالین حرکتلری اونو آییلدان کیمی اولدو .سحرده ن دوستونون بیر دفه ده اولسون اونون اوزونه شاخ باخا بیلمه دیی نین ، نظرلرینی یاییندیریب ، یان – یوره سینه بویلاندیغینین فرقینه واردی . (( نییه سوچلو آداملار کیمی گوزلرینی منده ن گیزله دیر ؟ سوز دانیشاندا گاه یئره باخیر ، گاه دا چیینیمین اوستونده ن او یانا بویلانیر ؟ هئچ بوینونو دا دیک قالدیرمیر؟ پله جامیش کیمی یالمانیب فیسیلداییر . یوخسا بو ایشده ن خبری وار؟ اونون اوچون ده دیلینی سورویور ؟))
چرکزین سینه سی قاباردی . گوزلری ایله شامخالی یئیه جک اولدو :
- ایندی نه مصلحت گورورسن؟
- بیر آز گوزله .
- گوزله یه بیلمیره م . هئچ اولماسا قیزی هانسی کوپک اوغلونون آپاردیغینی اویره نمه لی یه م ، یا یوخ؟!
شامخال دیک آتیلدی . الینی خنجرین دسته یینه آپارماسیلا یارییا قده ر سییرمه سی بیر اولدو . سینه سینی قاباغا وئریب ، سسینی اوجالتی :
- آغزینی تمیز ساخلا !
- نه دئییرسن ؟ !
- دئییره م آرتیق – اسکیک دانیشما !
- بورا باخ ، سن نییه اوزونده ن چیخیرسان ؟ سوغان یئمیش آداملار کیمی ایچین نییه گوینه ییر؟
شامخال قاباغا یئریییب، چرکزله اوزبه اوز دایاندی . او قصده ن آراداکی مسافه نی قیسالتدی و صوحبت مودده تینده ایلک دفه شستله موصاحیبی نین گوزلری نین ایچینه باخدی . ائله بیل وهمیلی باخیشلاری ایله قارشیسینداکی نی سارسیتماق ، اوره یینده ن کئچنلری اوزونده ن اوخوماق و ائشیده جه یی سوزده ن سونرا اونون نئجه حرکت ائده جه یینی اوولجه ده ن اویره نمک ایسته دی . دویوشه حاضیرلاشان خوروزلار کیمی دیمدیک- دیمدییه دایانانلارین نفسی بیر – بیرینی ووردو . شامخال ، بیر شئی اولسا ، درحال رقیبی نین ال – قولونو توتماق اوچون اوزونو بیر آز ایرلی وئردی و تمکینله دیلله ندی :
- داغا – داشا دوشمه ، قیز منده دیر .
چرکز یالنیز بیرجه آنلیغا سوسدو . قارشیسیندا دایانان شامخالین صیفه تینده ، قویروغونون اوستونه قالخیب ، آدامی چالماغا حاضیرلاشان شاهمار ایلان سویوقلوغونو دویدو . اونا ائله گلدی کی ، اوزونه زیلله نن گوزلرده اووونو اوولجه اووسونلاییب سونرا یئیه ن بیر ییرتیجی سئحیرکارلیغی وار .شامخالین اوزونده کی توکلر ده اونا زهرلی تیکانلار کیمی گوروندو .اگر بیرجه آندا کئچسه ، چرکز فورصتی الده ن وئره جک ، گوزونون ایچینه فیسیلداییب قیوریلان شاهمار آتیلیب بوینونا دولاناجاقدی . او دوغروداندا قفیلده ن زهرلی ایلانی تاپدالایان آدام کیمی دهشتله گئری آتیلدی و درحال دا توقنگی هرله دی . بیر گوز قیرپیمیندا گوللله نی لوله یه وئردی . بارماغینی ته ته یه اوزادانا قده ر شامخال اوو گوده ن پیشیک جلدلیی ایله ایره لی شیغیدی . توفنگده ن یاپیشیب ، لوله نی یوخاری قالدیردی . اونلار سوپورله شمه یه باشلادیلار . شامخال بیر الی ایله قونداقدان ، بیر الی ایله ده لوله ده ن یاپیشیب ، توفنگی هم اوزونده ن اوزاقلاشدیریر ، هم ده بوروب چرکزین الینده ن آلماق ایسته ییردی . چرکز ایسه وار گوجو ایله موقاویمت گوسته ریر ، نئجه اولورسا - اولسون سیلاحی الده ن وئرمه مه یه چالیشیردی .
شامخال آیاغینی چرکزین قارنینا دایاییب ، توفنگی گئری چکدی . رقیبی نین قولونو قانیریب ، سیلاحی قوپارماق ایسته دی . آنجاق باجارمادی . بئله اولدوقدا قونداغی یوخاری قالدیریب لوله نی تورپاغا دوغرو چئویرمه یه چالیشدی . چرکز اونون فیکرینی دویدوغوندان ، وار کوجونو توپلادی و بارماغینی ته ته یه یئتیردی . گوللله شامخالین قولاغی نی یالاییب کئچدی . چیینی نی قارسالادی . کثیف باریت قوخوسو بورونلارینا دولدو . بوندان سونرا اونلار توفنگده ن داها موحکم یاپیشدیلار . هر ایکی سی نین دیزی یئره گلدی . بیر آنلیغا دایانیب ، نفسلرینی دردیلر . ایکی سی ده قان – تره باتیب ، تاقتده ن دوشموشدو . کوینه کلری نین یاخاسی آچیلمیشدی . شامخالین سینه سینده ن تر آخیردی . چرکزین ایسلانمیش ساچی داغیلیب ، آلنینا یاپیشمیشدی . نفس آلدیقجا سینه لری قالخیب – ائنیر ، گئنیشله نمیش بورون پره لرینده ن نفسلری فیسقیریردی . اونلار سون دفه گوجلرینی سیناییردیلار . بو آنی سوکوتدان سونرا قطی هوجومون باشلاناجاغی شوبه سیز ایدی . شامخال آرادا توفنگی بوراخیب ، خنجری سییرمه یی آغلیندان کئچیرتدی .لاکین اوره ک ائله مه دی . چرکزین درحال آیاغا دوروب ، چاخماغی یئنیده ن هرله یه جه یینده ن قورخدو . بس نه ائتمه لی ؟ او بیرده ن وار گوجو ایله توفنگی اوزونه طرف چکیب بوردو . چرکز بونو گوزله مه دیی اوچون صنده له دی . مووازینه تینی ایتیردیینده ن ، باشی چاتیلتی ایله شامخالین الینه دیدی .گوزونده ن قیغیلجیم قوپسا دا ، توفنگی بوراخمادیلار . بوینوزلارینی بیر- بیرینه کئچیردیب ، کلله – کلله یه گلن کللر کیمی یئنی ده ن توتوشدولار . سحر شئحینه چیله نمیش گوی اوتلار دیزلری نین آلتیندا ازیلدیلر . تورپاق ائشیم – ائشیم اولدو .
قارداشی اوغلونون ائحتیاتسیزلیق ائتدیینده ن ناراحات اولان شاه نیگارخانیم ائوده قرار توتا بیلمه دی . (( گده نین تشخّوصلیینه بیر باخ ، خالقین قیزینی گتیریب ائوه ، آمما قارداشینی سایا سالمیر . بو ساعات چرکز قیزیل ایلانا دونوب ، راستینا کیم گلسه تاس – تاس ائله مه یه حاضیردیر ، بو دا توفنگ گوتورروب اونون قاباغینا چیخماغی شانینه سیغیشدیرمیر . بوتونجه ده ده سیدیر )) .- دئیه اوره یینده شامخالی آسیب – کسدی . قازما دامین قولاقلاری جینگیلده ده ن سوکوتو ایچریسینده اوره ک چیرپینتیلارینی دویسادا ، اوزونو او یئره قویمادی . ائهمالجا توفنگی گوتوردو . قاپینی آچیب باییرا آتیلماغا حاضیرلاشان گوله سرین قاباغینی کسدی . سالاتینین قولوندان توتوب گئری ایته له دی . (( اوتورون یئرینیزده !)) – دئیه اونلارا آجیقلانیب ، گوزونو آغارتدی . چارداقدا آیاق ساخلاییب ، دیره یه سویکندی . جاوانلار ال با یاخا اولسا ، هارایچیلیا چاتماق اوچون حاضیر دایاندی . آنجاق اونلارین چومه لتمه اوتوروب ، یاناشی صوحبت ائتمه لری ، آرخایین – آرخایین پاپیروس چکمه لری شاه نیگارخانیمی بیر آز ساکیتله شدیردی . (( آللاه ائله یه هر شئی ائله – بئله ، داواسیز – شاواسیز قورتارا))، - دئیه اوز – اوزونه دوشوندو . حتتا قاباغا یئری ییب اونلارین صوحبتینه قولاق آسماق ، هر شئیی زارافاتا سالیب ، قورتارماق بئله ایته دی . آنجاق جاوانلارین بیرده ن – بیره ال بایاخا اولدوغونو گوره نده اوزونو ایتیردی . گوللله آچیلاندا ایسه بیر سیچراییشلا ایره لی آتیلیب ، توفنگی اوزونه قالدیردی . گوی اوتلوقدا ائشه له نن لرین باشینین اوستونو کسدیردی . اونون قضب دولو جینگیلتیلی سسی ائشیدیلدی :
- آرالانین دئییره م سیزه ! ائشیدمیرسینیز ؟ یوخسا ایکینیزی ده قانینیزا بویایاجام .
چرکزله شامخال اونون سوزونو ائشیتمه دیلر . توفنگی وئرمه کده ن قورخدوقلارینا گورا دارتیشلاماریندا داوام ائتدیلر . شاه نیگار خانیم چاخماغی هرله ییب ، یئنیده ن قیشقیردی .
- سیزه آرالانین دئمیره م ؟ !
اونون سوزو یئنه جاوابسیز قالدی . شاه نیگار خانیم ته ته یی چکدی ، وییلداییب گئده ن گوللله دالاشانلاری دیکسیندیردی ، چرکز سینه سینه توشلانمیش توفنگین بوز اوزونو گوردو . و نهایت اینادیندان ال چکن دالاشقان اوشاقلار کیمی قوللارینی بوشالدیب توفنگی بوراخدی . شامخال بونو گوزله مه دیینده ن تنگیلده دیسه ده تئز اوزونو اله آلدی . سیچراییب آیاغا دورماسی ایلا توفنگی هرله مه سی بیر اولدو . شاه نیگار خانیم اوزونو ایره لی سالیب سینه سینی گوللله نین قاباغینا وئردی . چارداغین آلتیندان قیشقیریق قوپدو .
- ناراحات اولمایین خانیم ، - دئیه یئرینده ن ترپه نمه ین چرکز ساکیتجه دیلله ندی ، - آتا بیلمز . چاخماغی چیخارتمیشام .
شامخال یالنیز بوندان سونرا عبث یئره آتیلیب – دوشدویونو آنلادی و توفنگی حیرصله یئره آتدی . شاه نیگار خانیم دا درینده ن نفس آلیب ، قونداغی اوزونده ن آرالادی .
چرکز اییلیب توفنگی نی گوتوردو . چاخماغی یئرینه سالدی . اوزونو شامخالا چئویردی :
- نامرد ! . بورادا دا اوزونو بیلدیردین .
- آدام دوستونا ائله سوز دئمز - دئیه شاهنیگار دیلله ندی .
- گوردوم دوستلوغونو .
- یاخشی ، آغیللی اول . بیر قیز بیر اوغلانیندیر . ائله شئده ن اوته ری داوا سالمازلار . گلین باریشین .
آتامین گورو حاققی ال چکن دئییله م .
- من ائله نامرد نن اوز – اوزه دورمارام .
- قوی ردد اولسون ، آی بی بی .
- سسینی کس ، سنه سوز دوشمور .
چرکزین گوزو چارداغین آلتیندا دیره یی قوجاقلاییب ، ایچین – ایچین آغلایان باجیسینا ساتاشاندا آغلی باشیندان چیخدی . گوزلرینه قارانلیق چوکدو . حیرصینده ن و عاجیزلیی نی درک ائتدیینده ن داخیلده ن قوپوب گلن هونکورتونو گوجله بوغوب دیشینی دیشینه سیخدی . قیزاریب قان چاناغینا دونموش گوزلری نین حلقه سینده ییغیشان یاش داملالارینی گئری قایتاریب اودقوندو . اونون حولقومو بیر نئچه دفه قالخیب – ائندی .
- نییه دوردون ؟ گئده ک باجینلا گوروش .
چرکز شاه نیگار خانیما جاواب وئرمه دی . قضبده ن آلیشیب یانان گوزلرینی شامخالا زیلله دی . سوزلر دیشلری نین آراسیندان فیسیلتی ایله چیخدی :
- کوکونوز کسیلسین !
شامخال خنجری سییریب ، یئنی ده ن ایره لی آتیلماق ایسته دی . شاه نیگار خانیم قارداشی اوغلونون سینه سینده ن گئری ایته له دی . چرکذین سون سوزونه اهمییت وئرمه مه یه چالیشدی :
- آ قیریشمال ، بیلیره م آجیقلیسان ، آمما سارساقلاما ، ایندیه جن دوست ایدینیز ، ایندی ده قوهوم اولدونوز
، داها نه ایسته ییرسن ؟
چرکز هئچ نه دئمه دی . توفنگی چیینینه کئچیریب ، آغیر – آغیر اوزاقلاشدی .