(6)
کندین اورتاسینداکی تپه ده ، ایری توت آغاجی نین کولگه سینده ، بویوک بیر معره که واردی . گوی تپه لیلر داغ کوچو ، یا دا بیچین واختی اولدوغو کیمی ، بورایا مصلحته ییغیشمیشدیلار . عاده تن اونلار چتینلییه دوشنده ، ائللیکله بیر ایش گورمک لازیم گلنده بورایا توپلاشیب آغساققاللارا قولاق آسار ، گوروله جک ایشلر باره ده تدبیر توکردیلر . بو تپه چوخ حادیثه لرین شاهیدی اولموشدو . سوزلری چپله شن کند جاوانلاری بورادا چوخ یومروق داواسینا چیخیب بیر – بیرینین اوستونه خنجر چکمیش ، بعضن ده آرالیغا قان سالمیشدیلار . بورادا چوخ آداملار الینی قورآنا باسیب گوناهسیز اولدوغونا آند ایچمیش ، چوخ قانلیلار باریشدیریلمیشدی . بو تپه ده ائولر ییخیلیب ، ائولر تیکیلمیشدی .
ایندی ده جاماعات بویوک ماراق و اینتیظارلا بورایا توپلاشمیشدی . اوچ گونده ن بری شئنلی یه یاییلان سوز – صوحبتین اصلینی اویره نمک و کندی دولاشان او (( کئچی ساققال روس )) ون هارادان گلدیی نی و نه ایسته دیی نی بیلمک هوسی اوره کلری بوروموشدو . کند آراسیندا دولاشان صوحبت چوخلارینی چاش باش سالمیشدی . موللا صادیغین مسجیدده دئدیی سوزلر آداملاری ائحتیاتلاندیرمیشدی . تپه آری یوواسی کیمی قایناییردی .
جاهاندارآغا دا بورادا ایدی . او ، آتینی جیدارلاییب اوتلاغا اوتورموشدو . اوزو ایسه کوره یی نی توت آغاجینا سویکه یه ره ک دوموشوب اوتورموش ، توفنگینی ده دیزی نین اوستونه قویوب دیرسه کله نمیشدی . اوغلو شامخالین حادیثه سینده ن سونرا جاماعات آراسینا بیرینجی دفه چیخدیغیندان سیخیلیردی . گمی چی قوجانین دا بورادا اولماسی اونو لاپ داریخدیریردی . نه قده ر چالیشسادا باجارمیر ، کنارداجا تورپاغین اوسته بارداش قوروب اوتوران کیشی نی گوزآلتی سوزوردو . گمی چی قوجانین بئلی لاپ اییلمیشدی . اینینده کی پالتار دیدیک – دیدیک اولموشدو . آغ ساققالی نین توکلری داراغدان چیخمیش یون کیمی پیله له نمیشدی . چوخورا دوشموش گوزلری گوجله گورونوردو . جاهاندارآغا ایختیارسیز شامخالی یادینا سالدی و اوره یینده اونو یامانلادی . (( بئلین سینسین ، فرسیز اوغول ، گور کیمنن قوهوم اولدو ! آرخاسینی کیمه دایادی ! ایندی من نه ائدیم ؟ قاپی سینا گئدیله سی دئییل کی ، بئش – اون آدام ییغیب آپاراسان ، ائل عاده تینجه باریشیقلیق ائلییه سن . نه ده بیر آداملیغی وار کی ، کیشی کیمی دوشمن چیلیک چکه سن . اونا ال قالدیرماق هئچ قئیره تده ن دئییل . اونسوز دا آیاق اوستونده اولوب )) .
او یئنی ده ن قودا سینی سایمازیانا سوزدو . کیشی نین مایوس و موشگول گورکه می ، بولود کیمی توتولوب سوسماسی ، همیشه شوخلوق ائدیب عالمی گولدوره ن قوجانین ایندی یوماق کیمی بوزوشمه سی جاهاندارآغانین دا اوره یینی آغریتدی . (( آللاه کاسیبا قیز وئرینجه باشینا بیر داش سالسا یاخشی دیر . ایندی بو یازیق نئیله سین ؟ اوزو ده بیلیر کی قاپی سینی آچیب باریشیغا گلن اولمایاجاق )) ، - دئیه خیالیندان کئچیردی .
او داریخدی . فیکیرینی داغیتماق اوچون چوخاسی نین یان جیبینده ن گوموش قوتوسونو چیخارتدی . قاپاغی آچیب سول الی نین بارماقلاری آراسیندا توتدو . اوولجه جیغارا کاغیذدان بیرینی گوتوردو . قاپاغین باسیب یاپیخدیردیغی ساچاقلی ساری توتونده ن بیر چیمدیک گوتورمک ایسته دی . ظریف دوغرانان لیفلر رئزین کیمی اوزانیب یوخاری قالخدی . جاهاندارآغا توتونو بارماغی ایله قیردی . کاغاذین آراسینا قویوب یوغون بیر پاپیروس ائشدی . قوتونو شاققیلتی ایله اوتوروب جیبینه قویدو . اوزون کهره با موشتویونو چیخاردیب پاپیروسونو کئچیردی . چاخماقلا قووو آلیشدیردی . پاپیروسونو یاندیریب ، درینده ن نفس آلدی . آغیمسوو توستو اونون ائنلی دوداقلاری نین اوستونه ائنمیش قالین بیغلاری نین آراسینا دولدو .
ائله بو زامان آلئکسئی اوسیپوویچ له احمد معره که یه یاخینلاشدیلار . اونلار ، عاده ت اوزره توپلاشانلارا سالام وئردیلر .اوتورانلارین بعضی سی آیاغا دوردو ، بعضی سی یئرینده جه قورجالاندی ، بعضی لری ده باشلارینی ترپه تمه کله سالامی آلدیلار . آلئکسئی اوسیپوویچ موللا صادیغین یانیندا اوتوران ساققاللی کیشی لرین دینمه دیینی ، عکسینه قاشقاباق توکدوکلرینی گوردوکده صوحبتین او قده ر ده آسانلیقلا کئچمه یه جه ینی درحال دویدو . آنجاق اوزونو سیندیرمادی . معره که ده کی لرله بیر – بیر ال توتدو. جاهاندارآغایا یاخینلاشاندا خئیلی دایاندی . دیققتله کیشی نین اوزونه باخدی .
- سیز اشرفین آتاسی دئییلسینیز کی ؟
- بعلی ، - جاهاندار آغا یاواشجا دیلله ندی و آیاغا قالخدی .
– اوشاق نئجه دیر ،جانی– باشی سازدیرمی ؟
- اوهو ، هئچ اونون دردینی چکمه یین ، لاپ قیرغی کیمیدیر .
اوزوده مکتبیمیزین گولودور . حالال اولسون ، چوخ کاماللی اوشاقدیر .
- بس نه واخت گله جک ، ائوه تئزمی بوراخاجاقسینیز ؟
- گلر . بئش – اون گونه جن ائوده اولار .
- کوچه چاتارمی ؟
- چاتار ، هئچ داریخما .
- اوشاقدان اوته ری یامان قریبسه میشیک .
- اصلینه باخسان ، اودا یامان قریبسه ییر .
- نییه ، اولمویا کورلوق چکیر ؟
- یوخ ، او باره ده آرخایین اولون ، - دئیه آلئکسئی اوسیپوویچ
ساکیتجه جاواب وئریب اطرافداکی لاری سوزدو . - تکدیر ، دوستلاریندان اوته ری یامان داریخیر . آخی بیزیم مکتبده اشرف ده ن باشقا گوی تپه ده ن هئچ کس یوخدور . اونون یولداشلاریندان بئش – آلتی نفری ده اوخوماغا گئتسه لاپ قییامت اولار . بیر – بیرلرینه حیان اولوب قریبلیی اونودارلار . دوز دئمیره ممی ؟ گره ک اونو تک قویمایاق . ائله سیزین کندده ده اوندان اوته ری گلمیشم . گره ک کومک ائده سینیز اوشاقلاردان سئچیب اوخوماغا آپاراق .
صوحبت بو یئره چاتاندا آرالیغا سوکوت چوکدو . جاهاندار آغا نه جاواب وئره جه یینی بیلمه دی .
موللا صادیق دا سوسوب معنالی – معنالی جاماعاتی سوزدو . اونون تسبئحی داها دا برکده ن شاققیلدادی . آلئکسئی اوسیپوویچ صوحبتی باشلاماق اوچون اله دوشن فورصه تین گئده جه یینی گوروب سوکوتو پوزدو :
- نییه سوسورسونوز ؟
- بیزیم کندده اوخوماغا گئده سی اوشاق یوخدور !
- نییه یوخدور ، وار ، - آلئکسئی اوسیپوویچ ده ن قاباق احمد
دیلله ندی . – اونلاری اوخوتساق ، امه للی – باشلی آدام اولارلار .
- کیمدیر اونلار ؟ ! - موللا صادیق دا بو دفه قضبله دیلله ندی .
- بیری عوثمان .
- کیم ؟ عوثمان ! او کی ، کورافهمین بیریدیر . اوچ ایلده بیر
قورآن آیه سینی ازبه رله یه بیلمیر ، اوندان اوخویان چیخار ؟
- چیخار ، نییه چیخمیر ؟!
- درس دئیه ن منم . من یاخشی بیلیره م ، یوخسا سن ؟
- بیلمه سم دئمه ره م . بیر ده ، اوجور کی سیز درس دئییرسینیز ،
البتته ، اوشاق هئچ نه باشا دوشمز .
- ای ، روس احمد ، آرتیق – اسکیک دانیشما . حددینی بیل ،
سونرا پئشمان اولارسان !
- بس علی نئجه ، اودا فراصتسیزدیر ؟
- ایکی سی ده بیر بئزین قیراغیدیر .
- سلیم ده ؟
- ایندی بوردا مننن نه هینکیر – مینکیر باشلایبسان ؟
- آجیغین توتماسین ، آی موللا صادیق ، - سحرده ن صوحبته
قولاق آسان گمی چی قوجا آستاجا دیلله ندی . - نفسین آغیردیر . اوشاقلار سنده ن هئچ نه اویره نه بیلمیرلر . ائله بیزیم چرکزده اوچ – دورد ایل آیاق دویدو ، آمما بیر شئی چیخمادی .
- دئمک ، آللاه – تعالا اوز سیررینه واقیف ائله مک ایسته میر .
- آللاه – تعالا نین بورادا نه ایشی وار ، آی موللا ؟
- کوفر دانیشما ، کیشی ، هر شئی آللاهین امری له دیر .
- نه اوچون داو ا – دالاش سالیرسینیز ؟ - دئیه آلئکسئی
اوسیپوویچ موباحیثه ائده نلری ساکیتله شدیرمه یه چالیشدی . - اعلاحضرت پادیشاهیمیز اوزو موسلمان بالالارینین اوخوماسینا ایجازه وئریبدیر . کندلرین بیر چوخوندا یئنی مکتبلر آچیلیبدیر . سیزین اویئزده ده بو ایشه باشلاماق لازیمدیر ، بیز ده سیزده ن اوته ری چالیشیریق . قویون اوشاقلارینیز اوخوسون .
- نه اولار . بیز پادیشاهیمیزین فرمانینا بویون ایمه یه همیشه
حاضیریق . آنجاق بیزی باشا سالین گوره ک،او تزه مکتب لر نئجه اولاجاق ؟ اورادا قورآن اوخونمایاجاق ؟
- اوخوناجاق ، موللا صادیق ، نییه اوخونمویاجاق . اورادا شریعت
درسلری ده کئچیریله جک . ائله بیزیم قوری دا کی سئمیناریادادا شریعت درسلری کئچیریلیر .
- سوننی لرله شیعه لر بیر یئرده ؟
- یوخ ، اونو دا نظره آلمیشیق . هره نین اوز موللاسی وار .
گونده اوچ اوینه نامازلاری نی دا قیلیرلار . بیز هئچ کسی دینینده ن دونده رمک ایسته میریک .
موللا صادیق گوزلرینی قییب ، حیله گر جه سینه آلئکسئی اوسیپوویچه باخدی . سونرا دا اطرافلارینداکیلاری سوزدو .
- یوخ ، جناب ، بو یوللارلا بیزی آلدادا بیلمزسینیز .
خاچ پرستلرین ایسلام میلله تی آراسیندا تفریقه سالماق کوهنه پئشه سیدیر . بیز سیزی یاخشی تانییریق . ایندی ده اوشاقلاری اوخوماق آدی ایله باشیمیزی توولاماق ایسته ییرسینیز . آرالیغا چاخناشما سالماق فیکرینده سینیز . آنجاق اونو بیلین کی ، بئله ایشلر داها باش توتماز . بیز اوشاقلارمیزی وئره ن دئییلیک . آی جاماعات ائشیدیرسینیزمی ؟
موللا صادیق الینی هاوادا اویناتدی . آلئکسئی اوسیپوویچ بئلی خنجرلی کیشی لرین قاشلاری نین اوستونه قده ر ائنمیش ساچاقلی پاپاقلاری آلتیندان پاریلدایان قضبلی گوزلرینه باخدی . او ، آغزینی آچماغا ماجال تاپمامیش موللا صادیغین یانینداکی کیشی لرده ن بیری قاباغا یئریدی . اونون ساللامالی کمرینده ن آسدیغی ایری خنجری آز قالیردی کی ، بئلینی اوزوب سالسین .
- بورا باخ ، بیزه نه وئریبسن آلا بیلمیرسن ؟ قاپی – قاپی
دوشوب اوشاقلاریمیزین باشینی نییه توولاییرسان ؟
- من کی اونلارا پیسلیک ائله مک ایسته میره م .
- سنین یاخشی لیغیندا ، پیسلیین ده بیزه لازیم دئییل ، ردد اول
بوردان !!!
ائله بیل جاماعات بونا بند ایمیش . کیشی سوزونو دئییب قورتاران کیمی هره بیر طرفده ن هوققولداماغا باشلادی .
- بیز اوشاقلاری میزین باشیندان کئچمه میشیک !
- قویماریق اونلارین بوینونا خاچ سالاسینیز !
- آی جاماعات ، قووون اونو !
- روس احمدی ده اونا قاتین !
- دینسیزلر ، چیخین کندیمیزده ن !
- بیزی ده اوزلری کیمی کافیر ائله مک ایسته ییر لر .
- آی جاماعات ، صبرینیز اولسون ، بیر آز دایانین !
- کس سسینی ، روسدان دونموش !
- منده سیزین کیمی موسلمانام .
- یالان دئییرسن . آدینی احمد قویساندا کافیرسن !
- بو ساعات ایکینیزی ده بیر – بیرینیزه چاتاقلاییب ، یارغاندان
باشی آشاغی کوره آتاجاغیق .
آداملار گئتدیکجه قیزیشدیلار . اونلارین چوخو الینی خنجره آتیب ، ایره لی جومماغا بیر بالاجا ایشاره گوزله دی . آلئکسئی اوسیپوویچ بونو آیدین گورسه ده ، کئری چکیلمه یین مومکون اولمادیغینی درک ائتدیی نده ن ، اوزونو شاخ توتدو . او هله بو جور قیزیشمیش آداملارلا اوز – اوزه گلمه میشدی . باشقا کندلرده اونا قولاق آسمیش ، اوسته لیک کومک ده ائتمیشدیلر . آنجاق بو ساعات اونون حیاتی بئله تهلوکه آلتیندا ایدی . کورون ساحیلینده کی بو اوجقار کندین آداملارینی باشا سالماق ، گورونور ، او قده ر ده آسان دئییلدی . احمد ده چیخیلماز وضیه تده قالمیشدی . او ، گوی تپه یه گله لی آز – چوخ خاصییه تینه بلد اولدوغو کندلیلرین بئله صبیرسیز اولاجاغینی ، حتتا قانا سوسایاجاقلارینی تصوور ائتمیردی . شوبهه سیز ، بورادا بیر ال واریدی . گورونور ، موللا صادیق گئجه نی یاتمامیشدی . یوخسا جاماعات بیرده ن – بیره یوواسی داغیلمیش آری کیمی قضبلنمه زدی . احمد قورخدو .بیر حادیثه اولان کیمی کورو کئچیب ، اوزلرینی مئشه یه وئره ن ، دیوان – ده ره تانیماق ایسته مه ین بو آداملار فیتوایا اویوب نه دئسن ائده بیلردیلر . او ، گوزآلتی قوناغینی سوزدو . آلئکسئی اوسیپوویچین رنگی کوینه یینین آغ یاخالیغیندان سئچیلمیردی . هوجوما کئچن کندلیلر اونلاری توت آغاجینا دوغرو سیخیشدیردیلار . احمد هر ائحتیمالا قارشی قاباغا کئچدی . ایلک ضربه لرین قارشیسینی آلماق ، یا دا جاماعاتی ساکیتله شدیرمک اوچون بیر – ایکی سوز دئمه یی لازیم بیلدی .
- آی جاماعات ، های – هارای نه یه لازیمدیر . اوشاغینیزی
وئرمیرسینیز ، وئرمه یین ، داها عالمی باشینیزا نییه توکورسونوز ؟ بیز دئدیک مصلحتله شک ، دئمه دیک داوا ائله یه ک . آغلینیزی باشینیزا ییغین .
- بیزه آغیل اویره تمه ! تقصیرین هامیسی سن دینسیزده دیر .
بو روسو توولاییب گتیره ن ده سن سن . اوولجه ائله سنی دوغراماق لازیمدیر !
آلئکسئی اوسیپوویچ احمدین قولوندان چکیب گئری دارتدی . اوزو قاباغا یئریدی . شاپکاسینی چیخاردیب ، ایچینی دسماللا قورولادی . بیر موده ت ساکیتجه دایانیب جاماعاتین سوسماسینی گوزله دی .
- بیز هئچ کسی اوز دینینده ن دونده رمک ایسته میریک . بیزیم مقصدیمیز سیزین اوشاقلارینیزی اوخوتماق ، اونلارا علم اویره تمکدیر . اونلاری ساوادلاندیرماقدیر . ایندی زامان دییشیر . علمسیز آدام کور کیمیدیر . گره ک سیز اوشاقلارنیزی بدباخت اولماغا قویمایاسینیز .
- بیز اوخومامیشیق ، دونیا اوچوب ؟ اوشاقلاریمیزدا اوخوماسا یئمه یه چوره ک تاپمایاجاقلار ؟ لازیم دئییل سیزین اوخوماغینیز !
- بیز سیزین خئیرینیز اوچون چالیشیریق . بیزه کومک ائتمک عوضینه موللا صادیغین فیتواسینا ناحاق اویورسونوز .
- ایندی ده موللامیزا ساتاشیرسان ؟ - دئیه بایاقکی خنجرلی کیشی اونون سوزونو کسدی . – الیم – آیاغیم دیمه میش ردد اول بوردان !!!
- آلئکسئی اوسیپوویچ ، ناحاق یئره فیتوا وئریرسینیز ، گئتسه نیز مصلحتدیر .
- فیتوانی او یوخ ، سیز وئریرسینیز !
موللا صادیق دوداق اوجو گولوب ، احمدی باشی ایله جاماعاتا گوستردی .
- ایندی گوردونوز بو ایشلرین مایئیی – فسادی کیمدیر ؟
موللا صادیغین تمکینله سویله دیی بو سوزلر آداملاری یئرینده ن اویناتدی . اونلار احمدله آلئکسئی اوسیپوویچی توت آغاجینا قیسنادیلار . احمد آرتیق گوزله مه یین مومکون اولمادیغینی یقین ائتدی . هر ائحتیمالا قارشی جیبینده گزدیردیی ناقانین ( ناقا – قمه ) دسته یینه ال اوزاتدی .
بایاقدان پاپیروسو پاپیروسون اودونا یاندیران جاهاندارآغا دوزه بیلمه دی . توفنگی دیزینین اوستونده ن گوتوروب ، آیاغا دوردو . قیزیشمیش جاماعاتین اونونجه گلن موللا صادیغین قاباغینی کسدی . اونون ضهیملی باخیشلاریندان ائحتیات ائدیب ، آیاق ساخلایانلار ترددود ایچینده دایاندیلار . جاهاندارآغانین یوغون سسی ائشیدیلدی :
جاماعات بورولغان کیمی بورولوب یئرینده جه فیرلاندی .
- گئری دونون ، دئییره م سیزه !!!
اونلار ترپه نمه دیلر . جاهاندارآغا چاخماغی هرله یه ره ک گولله نی لوله یه وئردی .
- فیکرینیز نه دیر ، یوخسا کونلوزه سیبیر دوشوب ؟ بس
بونون سونراسیندان قورخمورسونوز ؟ صاباح آتلی کازاکلار توکولوب گلنده جاواب وئره بیله جکسینیز ؟ هه ، نییه دینمیرسینیز ؟ سیزی بیر – بیرینیزه چاتاقلاییب آتین دوشونه سالاندا بو موللا صادیق قاباغا دورا بیله جکمی ؟ سیزده ن سوروشورام ، اوندا هارایینیزا چاتان اولاجاقمی ؟!
آداملار قیمیشدیلار . آددیم – آددیم گئری چکیلیب گوزلرینی جاهاندارآغایا زیلله دیلر . نه ائده جکلرینی بیلمه ده ن ترددود ایچینده دایاندیلار . بونو حیسس ائده ن جاهاندارآغا دا سسینین آهنگینی دییشیب ، مذممه ته کئچدی :
آدام بیر ایش گوره نده فیکیرله شر . هر یئته نین سوزونه باخیب
توی توغلوسو کیمی اورتالیغا دوشمز . بیر ده ، قوناغا ال قالدیرمازلار .
موللا صادیق گوردو کی ، بیر آز بوندان اوول ایره لی آتیلانلار گئری چکیلدیلر . جاهاندارآغانین سوزلرینی ائشیدیب سوسدولار . او اوزونون مغلوب اولدوغونو حیسس ائتسه ده ، سوزونده ن دونمک ایسته مه دی . سینه سینی گریب ، جاهاندارآغانین اوستونه قاباردی .
- او ، قوناق دئییل .
- قوناقدیر .
- کیمین قوناغی دیر ؟
- منیم .
- سنین؟
- ایندی کیمین هونری وار ، قاباغا چیخسین !
- ائله سنین کیمیلری دئییلمی جاماعاتین ائوینی ییخان .
- ا ، جادوگر حارامزادا ، دیلینی قارنینا قوی !
- آرتیق – اسکیک دانیشما . اوز اوغلونو دینسیز ائله دین یئتمیر ،
ایندی ده باشقاسینین ....
- ا ، خالق سنی اوزونه وکیل ائله ییب ؟ نه دوشموسن اورتالیغا ؟
- بس سن نییه دوشموسن ؟ نییه قویمورسان بو دینسیزلری
قوواق گئتسین ؟ یوخسا تزه قودان گمی چی قوجانین قارداشی اوغلو عوثمانی دا اوخوماغا گونده ره جکسن ، هه ؟!
- او منیم اوز ایشیمدیر !
- سنی اوز باشینا قویمازلار !
- کیم قویماز ؟
- تاپیلار .
- او هانسی کوپک اوغلودور ، گلسین گوروم ؟
موللا صادیق چیینینده ن سوروشوب دوشن عباسینی دوزه لتدی . الینده کی تسبئحی ساققالی برابرینه قالدیریب ، سسینی دییشدی .
- یئکه کیشی سن ، آغزینی تمیز ساخلا .
- کس سسینی ، دینقیرا سوزه ن قورومساق !
موللا صادیق جاهاندارآغانین قیللی قاشلاری آلتیندان اوزونه زیلله نن قان ساغیلمیش گوزلرینه باخا بیلمه دی . اونون ایری قالین دوداقلاری نین سییری دیینی ، بارماغی نین توفنگین ته ته یینده تیتره دیینی گوره نده سوزونون دالینی قیسدی . هله اوشاقلیقدان خاصییه تینه بلد اولدوغو ، بالاجا واختی بیر یئرده اوینایاندا دفه لرله یوموروغونون دادینی گوردویو جاهاندارآغانین ضهمی اونو باسدی . دئمک ایسته دیی سوز ایلیشیب بوغازیندا قالدی . موصاحیبینین دوداغی نین بیر بالاجا ترپه نمه سینه بند اولان جاهاندارآغا دا سوسدو . موللانین دیلله نمه یه طاقتی اولمادیغینی یقین ائتدیکده ن سونرا بارماغینی ته تیکده ن چکدی .
- آغیر اوتور ، باتمان کل . بورادا سنده ن باشقا دا کیشی وار .
موللا صادیق حیرصله جاماعاتی سوزوب ، معره که ده ن اوزاقلاشدی . بئش – اون ساققاللی کیشی ده اونون آرخاسینجا گئتدی . آرالیغا داوا دوشسه ووروشماغا حاضیر اولانلار یارییا قده ر سییردیکلری خنجری شاققیلتی ایله قینینا سالدیلار . جاهاندارآغا قوهوملارینی گوزآلتی سوزوب آرخایینلاشدی . آلئکسئی اوسیپوویچ له احمد ده درینده ن نفس آلدیلار . احمد دیلی نین اوجو ایله قایساقلانمیش دوداغینی ایسلادیب ، اووجوندا سیخدیغی ناقانین دسته یینی بوراخدی . جاماعاتین ساکیتله شدیینی و بیر داها قالماقال سالمایاجاقلارینی یقین ائتدیکده ن سونرا جاهاندارآغا یئنه اوولکی یئرینه قاییتدی . چیینین توت آغاجینا سویکه دی . عصبلرینی ساکیتله شدیرمک و هیجانینی اطرافداکی لارا بیلدیرمه مک اوچون یئنی ده ن پاپیروس ائشدی . بیر – ایکی دفه درینده ن نفس آلدیقدان سونرا اوزونو احمده توتدو :
- آ بالا ، آدام بیر ایش گوره نده اوولجه مصلحتله شر . یوخسا دوردوغون یئرده اوزونو ده خاطایا سالمیشدین ، بیزی ده . بو کیشی نی ده اورتالیقدا بیابیر ائله دین . قریب آدامسان ، هر شئیه باش قاتما . قانماز آدام چوخدور ، اللرینده ن نه دئسن گلر .
- من کی اونلارا پیسلیک ائله میره م .
- سوزومه قولاق آس ، - دئیه جاهاندارآغا سسینی اوجالتدی .
- منیم سوز گوله شدیره ن آدامدان خوشوم گلمز . بیر ایشین اولاندا اوولجه منه دئه . هر یئتن له آغیز – آغیزا وئرمه . اشرفین دوستو منده ن اوته ری ده عزیزدیر . بیلدینمی ؟
- چوخ ساغ اولون .
آلئکسئی اوسیپوویچ کوینه یینین یاخاسینی آچدی . قالیستوکونو بوشالدیب الینده کی دسماللا ترینی سیلدی . سونرادا عادتی اوزره شاپکاسینین ایچینی قورولادی . داغیلیب گئده نلرین آرخاسینجا خئیلی باخدی . بویوک کده ر و حوزنله باشینی بوللادی .
- من بئله گوزله میردیم . دئیه سن آداملارینیز یامان خاطالی
ایمیش .
- اونلاردا گوناه یوخدور . تقصیرین هامیسی او مورید کوپک
اوغلوندادیر .
- تاسسوف ائدیله سی حالدیر . آنجاق نه ائتمه لی ، گورونور ،
الی بوش قاییتمالی اولاجام .
جاهاندارآغا ساکیتجه جاواب وئردی :
- او باره ده سونرا فیکیرله شه ریک .
معره که ده کیلر داغیلمیشدیلار . بئلی خنجرلی کیشی لرین چوخو کندین دولاما جیغیرلاریندا گورونمز اولدو . توت آغاجی نین اطرافیندا یالنیز جاهاندارآغانین قوهوملاری قالدی . آلئکیئی اوسیپوویچ فیکیرلی – فیکیرلی پاپیروس چکن جاهاندارآغایا یاخینلاشدی .
- چوخ ساغ اولون . اگر سیز اولماسایدینیز ، دئیه سن سالامات
قورتارا بیلمه یه جکدیک . سیزه مینتدارام . اشرفه سوزونوز یوخدورکی ؟
کیشی اوغلونون آدینی ائشیده نده قاشلارینی چاتیب آغیر – آغیر قوناغا باخدی . بیر آز بوندان اوول باش وئره ن حادیثه ده ن خجالت چکدیی نده ن نه ائده جه یینی بئله موعین له شدیره بیلمه دی .
- گئتمک ایسته ییرسینیز ؟
- بعلی .
- نه واخت ؟
- ائله بو ساعات . یولچو یولدا گره ک ، اونسوزدا یامان
گئجیکمیشم .
- تله سمه یین .
- فایتون گوزله ییر ، ائرته یکن یولا دوشسه ک یاخشی دیر .
- داریخمایین ، - دئیه جاهاندارآغا اونا جاواب وئردی ، سونرا دا
اوزونو جاوانلارین بیرینه توتدو .- آ بالا ،گئت او آتین جیدارینی آل ، بورا گتیر . سونرا دا قاچ ائوه ، خبر وئر کی ، قوناغیمیز وار .
باشا دوشدونمو؟ اوشاقلارا دا تاپشیر کی ، حاضیرلاشسینلار ، یولا چیخاجاغییق . هه ، ایندی دورون ائوه گئده ک .
- زحمت چکمه یین .
- دورون گئده ک . بو کنده گلن قوناق منیم ائویمده
چوره ک کسمه میش گئده بیلمز .
- سوزون دوزو ....
- گئده ک ائوه . اوردا دانیشیب ، مصلحت له شه ریک .
آلئکسئی اوسیپوویچ دونوب احمدین اوزونه باخدی . راضی لاشماقدان باشقا علاج اولمادیغینی بیلیب سوسدو . اونلار توزلو یولون کنارینداکی جیغیرلا کورون ساحیلینه دوغرو آددیملادیلار . جاهاندارآغا آتینی یئده کله میشدی . ایوان فیلیپیچ سه فایتونو آستا – آستا سوروردو .