( 2)
مئشه نین درینلیینده ، بینه لرده ن خئیلی اوزاقدا دالبادال گولله آتیلدی . مئشه یه بوغوق بیر گورولتو یایلدی . دیه لرده ن بیر آز آرالی،تالانین اورتاسینداکی چمنلیکده هوروکله نمیش قمر قولاقلارینی شکله دی . یالینی پیرپیزلاندیریب برکده ن کیشنه دی و دال آیاغی اوسته قالخیب چه چیی نی هاوادا اویناتدی . ضربه دارتینیب ایره شمه نی قیردی . دورد نالا چاپاراق دیه لره طرف قاچدی . بینه ده کی آرواد – اوشاق چیغیریشیب کنارا داغیلدی . جاهاندارآغا آلاچیغدان هووله نک چیخیب آتین دالینجا یویوردو . یوغون و زهیملی سسله بیر – ایکی دفه (( هئی – هئی ، قمر ! )) - دئیه آتی سسله دی .قمر نه قده ر چیلغینلاشمیش اولسادا ، صاحیبی نین سسینی ائشیده ن کیمی یئریشینی یاواشیتدی . دیه لرین اطرافیندا بیر – ایکی دفه دووره ووروب دایاندی . ساکیتله شمک اوچون قاباق آیاغی ایله یئری ائشدی . جاهاندارآغا اونا یاخینلاشاندا ایسه تلاشلا اطرافا بویلانیب آستادان اوخراندی .کیشی ایره شمه نی ییغدی ، آتین یالینی سیغاللادی و یئده کله ییب آلاچیغین یانینا گتیردی .
گون یاخمیشدی . مئشه نین آرخاسیندا گیزله نن گونشین مایلی شوعالاری یارپاقلارین آراسینا سوخولوب اطرافی ایشیقلاندیرماغا چالیشیردی . ایری فیستیق و ولس آغاجلاری نین قالین یارپاقلاری ایشیغین قاباغینی کسیب یئره قاتی گولکه سالیردی . مئشه یه بیرده ن – بیره قارانلیق چوکدو .
جاهاندارآغا آتی آلاچیغین یانیندا تزه ده ن هوروکله دی . دیه لرین برابرینده کی ایری پالید آغاجی نین آلتینا گلدی . کوره یی نی آغاجا سویکه دی . گوزونو مئشه نین درینلیینه گئده ن جیغیرا زیلله دی . (( گوره سن اوشاقلارا بیر شئی اولمادی کی ؟ )) - دئیه دوشوندو . قوتوسونو چیخاردیب بارماقلاری تیتره یه – تیتره یه پاپیروس ائشدی .
ماللار اوروشده ن قاییتمیشدی . آروادلار سرنیج گوتوروب اینکلری ساغیردیلار . ملک ده اونلارین ایچینده ایدی . او ، باشینی قیزیل بیر اینه یین بویرونه قیسیب بوزووو امیزدیریر دوداق آلتی ایدیرمه دئییردی :
لای لای چاللام همیشه ،
کاروان گئدیب یئمیشه .
آخوروندا گول بیتسین ،
اوتلاغوندا بنووشه .
اینکلر بالاسینی یالاییب آستادان فیسقیریر ، بوزوولار دارتینیب آناسی نی اممه یه چالیشیردی . سرنیجلر کوپوکله نیب دولدوقجا اطرافا آهنگدار بیر قیژیلتی یاییلیردی . آنجاق جاهاندارآغا بونلارین هئچ بیرینی گورموردو . او ، تلاشلا پاپیروسونو سومورور و گوزونو یولدان چکمیردی .
ناخیرین ایچینده فیرلانان مارال بوینونداکی قومرووو زینقیلدادا – زینقیلدادا جاهاندارآغایا یاخینلاشدی . کیشی نین الینی ، پالتارینی ایله دی ، سونرا دا ایری بوینوزونو اویناداراق ، نم بورنونو اونون اوزونه یاپیشدیردی . جاهاندارآغا مارالین بوینونو قوجاقلادی . مارال قشنگ گوزلرینی صاحیبی نین اوزونه زیلله دی . کیشی بو ایری ، قومرال ، گویچک گوزلرین درینلیینده سانکی بیر مذممت گوردو . ائله بیل بو دیلسیز ، لاکین مئهریبان حئیوان اوندان گیلئیله نیر ، صاحیبی نین لاقئیدلیینده ن ، اونا قارشی اوولکی نوازیشینی اسیرگه دیینده ن شیکایتله نیردی . مارالین تزه اوت قوخوسو وئره ن نفسی اونون نفسینه قاریشدی . جاهاندارآغانین بده نینده ن خفیف بیر گیزیلتی کئچدی . کیشی داهادا خوشحاللاناراق مارالین گوزونده ن اوپدو . مارال دا بونو گوزله ییرمیش کیمی صاحیبی نین سینه سینه قیسیلیب دایاندی . جاهاندارآغا اونون بوینوزونون دیبینی قاشیدی ....
ایتلر قارا سویون او تایینداکی قامیشلیغا دوغرو جومدولار . مارال دیکسینیب قولاقلارینی شکله دی . جاهاندارآغا توفنگینی چیینینده ن آلیب چاخماغی هرله دی . بیر خئیلی ، سکسکه لی حالدا اطرافی دینله دی .
قارالتی لار تالانین آشاغی طرفینده کی کورپوده ن کئچیب دیه لره دوغرو ایره لی له دیلر . جاهاندارآغا اوولجه تاپدیغین ، سونرا دا اشرفین سسینی ائشیتدی . کوینه یی نین یاخاسینی آچیب درینده ن نفس آلدی . توفنگین دابانی نی ائندیردی . پاپیروسونو آخیرینجی دفه سوموروب یئره آتدی . اوغلونون قاباغینا گئتمک عوضینه ، دونوب آلاچیغا دوغرو آددیملادی . قاپی یئرینده ن آسیلمیش پرده نی آرالاییب ایچری کئچدی . توفنگی چادیرین دیوارینا سویکه دی . دوشکچه نین اوستونه اوزانیب موتککه یه دیرسکله ندی .
او بورادان هر شئیی آیدین گوره بیلمه سه ده ، سس – کویده ن و اوجاقلارین اطرافیندا دولاشان کولگه لرین حره کتینده ن حیه تده نه لر باش وئردیی نی تصوورونده جانلاندیریردی . او حیسس ائتدی کی ، اشرفی قارشیلاماغا چیخانلار آتین باشینی توتدولار . اوغلان یه هرده ن ائنیب اطرافینداکی لارلا بیر – بیر گوروشدو . آرادا دئیه سن زارافاتلاشانلار دا اولدو . هامی گولدو . سونرا اشرفی ساخلادیلار . تاپدیق ایری بیر قوچون بوینوزوندان یاپیشیب دارتا – دارتا کتیردی و دوز اشرفین برابرینده دایاندی . (( بیر آز صبر ائله )) ، - دئیه اونو ترپه نمه یه قویمادی . اشرف مانئع اولماق ایسته سیده سه ، تاپدیق قولاق آسماییب قوچو دوز اونون آیاغینین آلتیندا اوزاتدی . (( منه تاپشیریبلار ، گره ک کسه م . یوخسا دریمه سامان تپه رلر )) . اشرف ائل عادتینه تابئع اولدو . آیاغی نین آلتیندا کسیلن قوربانا خئیلی باخاندان سونرا کنارا چکیلدی . یئنه اونون باشینا توپلاندیلار . جاهاندارآغایا ائله گلدی کی ، آرادان کئچن دقیقه لرین هر بیری ایل قده ر اوزون چکدی . کیشی داریخدی . حتتا آیاغا دورماق ، اشرفی صوحبته توتوب لنگیده نلره آجیقلانماق و اوغلونو یانینا چاغیرماق ایسته دی . آنجاق یئرینده ن ترپه نمه دی .
ملک ایچری گیردی . الینده کی ساماواری آلاچیغین قاباق طرفینده کی کونجه قویدو . چیراغین فیتیلینی قالدیردی . ساماوار دیغیلداییب زومزومه یه باشلادی . ملک چاینیکی دمکئشین اوستونه قویدوقدان سونرا قارا ، گوللو پودنوسداکی ایسته کانلاری ایره لی چکدی . گوزونو اری نین اوزونه زیلله دی :
- ایندی نه دئییرسن ، من اونون گوزونه گورونوممو ؟
جاهاندارآغانین فیکری حیه تده اولدوغوندان ، بیر آز گئج دیلله ندی :
- هه ، اوزون قوللوق ائله .
ملک گلدیی کیمی ده آستاجا چیخیب قونشو دیه یه گئتدی .
حیه تین اورتاسینداکی سس – کوی آزالدی . آیاق تاپپیلتیلاری چادیرا یاخینلاشدی . تاپدیغین سسی ائشیدیلدی :
- آغا ، بورداسانمی .
- گلین .
اشرف آتاسی نین سسینی ائشیده ن کیمی قاباغا کئچدی . آلاچیغین پرده سینی آرالاییب ایچری گیردی . بیر خئیلی ساکیتجه دایانیب ، دوشه کچه نین اوستونده بارداش قوروب اوتوران جاهاندارآغایا باخدی . بوتون یول بویو ائوه چاتان کیمی آتاسی نین بوینونو قوجاقلاییب ، اوز – گوزونده ن اوپه جه یینی قت ائتمیش اولسا دا ، ایندی کیشی یه یاخینلاشا بیلمه دی .او دا یئرینده ن ترپه نمه دی . اوغلونون لال سوکوتلا باشدان – آیاغا سوزدو .
اشرف مکتبلی لیباسیندا ایدی . آیاغیندا قارا چکمه واریدی . بالاغی آچیق اوزون شالوار گئیمیشدی . بئلینه اوستونده یازی اولان ایری توققالی کمر باغلامیشدی . باشیندا ایسه گونلویو پاریلدایان ماهود شاپکا واریدی . اوشاق لاپ دیشمیشدی . جاهاندارآغا اوغلونو همیشه وزنه لی چوخادا گورموشدو . اشرف گوی بوخارا پاپاق گئیه ردی . بئلینده کی ساللامالی کمرینده ن خنجر آساردی . ایندی ایسه او ، اوزاق یئرده ن گلمیش یاد بیر آداما اوخشاییردی . چیراغین سولغون ایشیغیندا آیدین گورونمه سه ده ، اشرف آتاسی نین بیرده ن – بیره توتولدوغونو حیسس ائتدی . او گوزله ییردی کی ، آتاسی آیاغا دوراجاق ، یا دا اونو یانینا چاغیریب اوز – گوزونده ن اوپه جک ، گوله – گوله سالاملاشیب حال – احوال توتاجاجاقدی . آنجاق بونلارین هئچ بیری اولمادی . جاهاندارآغانین حیرصلی سسی ائشیدیلدی :
- گئت ، پالتارینی دییش .
اشرف سئمیناریادا اوخودوغو موده تده خئیلی سربستلییه آلیشمیشدی . او اوزونو آرتیق بویوک آدام حئساب ائدیردی . آمما ایندی آتاسی نین زهیملی سسینی ائشیده ن کیمی اوشاغا دوندویونو حیسس ائتدی . اونا اعتیراض ائتمک ، مکتب لیباسینی سویونماق ایسته مه دیی نی سویله مک آغلینا بئله گلمه دی . سالامی دیلینده قالدی . ساکیتجه آلاچیغدان چیخدی . اونو کولگه کیمی ایزله ین تاپدیقلا بیرلیکده قونشو دیه یه کئچدی . ملک پالتارلارین ایچریده ، صاندیغین اوستونده اولدوغونو ایشاره ایله باشا سالیب اوزاقلاشدی .
اشرف کونولسوزجه سینه لیباسینی دییشدی ، یئنی ده ن آلاچیغا ، آتاسی نین یانینا گئتمک ایسته دی . آنجاق جاهاندارآغا نین سسی اونو ساخلادی :
- آی اوشاق ، اونون الینه سو توکون ، یولدان گلیب .
تاپدیق الینده آفتافا ، قولونون اوستونده دسمال ، حاضیر اولدو .
اشرف تر تمیز یویونوب ، اوست – باشینی سلیقه یه سالدیقدان سونرا آلاچیغا قاییتدی . کیشی بو دفه اونو چاغیریب یانیندا ، دوشکچه نین اوستونده اوتورتدو . ملک سسیزجه ایچری گیردی . ایکی ایسته کان چای سوزوب بیرینی اری نین ، او بیرنی اشرفین قاباغینا قویدو . یاشماغینی یوخاری قالدیریب کونجده ایله شدی . اشرف اونو گوز آلتی سوزدو و باشا دوشدو کی ، تزه آدامدیر . (( یقین قوللوقچودور )) – دئیه خیالیندان کئچیردی و هئچ نه سوروشمادی . جاهاندارآغا ایسته کانی قاباغینا چکدی و اوغلونون اوزونه باخمادان دیلله ندی :
- یولدا نه چوخ لنگیدینیز ؟
- قاباغیمیزی کسمیشدیلر .
- کیم ؟
- کازاکلار .
کیشی یئرینده جه قورجالاندی و قاشلارینی چاتیب تعججوبله اوغلونون اوزونه باخدی :
- کازاکلارین بیزیم مئشه ده نه ایشی وار ؟
- نه بیلیم ؟ - دئیه اشرف چیینی نی چکدی . – دئییرلر بورالار
داها قوروق اولاجاق . پادیشاهین آداملاری اووا چیخاجاقلار .
آرایا سوکوت چوکدو . جاهاندارآغا قندداندان ایری بیر قند گوتوروب آغزینا آتدی . هورتاهورتلا چایینی ایچدی .
باییردا اوجاق چاتدیلار . قوورولان ات ایی مئشه یه یاییلدی . جاهاندارآغا اوزونو مله یه توتدو :
- گئت دئه ، تئز اولسونلار ، اوشاق آجدیر .
ملک آلاچیغدان چیخمازدان اوول ارینه بیر ایسته کان دا چای سوزدو . آتا ایله اوغول تک قالدی . یالنیز بو زامان اشرف اوره کله نیب آتاسی نین اوزونه باخدی :
- بس آنام هانی ؟
- او تایدا ، کندده دیر .
- شامخال دا ؟
- هامیسی . بیز ده سحر کوچوروک . ائله سنی گوزله ییردیک .
- بی بیم نه تهر دیر ؟
جاهاندارآغانین چایی بوغازیندا قالدی . کیشی چه چییب ایسته کانی یئره قویدو . جیبینده ن دسمال چیخاردیب آغیز – بورنونو سیلدی . سونرا یئنه سلیقه ایله قاتلاییب آرخالیغی نین قوینوندا گیزله تدی . بوندان سونرا سویوققانلیقلا دیلله ندی :
- پیس دئییل .
اشرف حیسس ائتدی کی ، آتاسی نه ده نسه چوخ دانیشماق ایسته میر ، هم ده اونون اوسکورمه سی ، ایسته کانی حیرصله گئری ایته له مه سی گوستریردی کی ، بو باره ده دانیشماق لازیم دئییل .
اشرف ایسته کانی قاباغینا چکیب قورتوم – قورتوم چای ایچمه یه باشلادی . جاهاندارآغا سوسدو . او ، اوغلونا نه یالان دانیشا بیلیر ، نه ده بو ساعات هر شئیی اونا سویله مه یی موناسیب حئساب ائدیردی . کیشی قورخوردو . او چوخ گوزه ل بیلیردی کی ، اشرف حقیقه تی اویره ننده ن سونرا آغزی لذذه تی ایله بیر تیکه چوره ک یئمه ک ، هئچ اولمازسا بئش – آلتی آیدان بری اوزونو گورمه دیی اوغلو ایله شیرین – شیرین دانیشماق بئله چتین اولاجاقدی . اونا گورا سوسماغی و گئجه نی ساکیت کئچیرمه یی قرارا آلمیشدی . جاهاندارآغا اشرفین بو ایشلره نئجه موناسیبت بسله یه جه ینی بیلمه سه ده ، هر حالدا خوشاگلمز ، کونول بولاندیران صوحبت ائشیتمک ایسته میردی . او هامی یا تاپشیرمیشدی کی ، اشرفه هئچ نه یی خبر وئرمه سینلر . او ایسته ییردی کی ، اشرف کنده گئده نده اوزو هر شئیی اویره نسین . کیشی بو اوغلونو دا کوسدوره جه یینده ن ائحتیاط ائتدیی اوچون سوسماغی ، هئچ اولماسا بیرجه گئجه مئهریبان یاتماغی آرزو ائدیردی ....
چای – چوره کده ن سونرا ملک آتا ایله اوغولا آلاچیغدا یاناشی یئر سالدی . اشرف آتاسینا سربستلیک وئرمک و اونون حوضوروندا سویونماماق اوچون ائشییه چیخدی . اوجاقلار سونموشدو . دیه لرین چوخو سوکولموش ، فرماشلار ، چتنلر، قالین کئچه لر ، قاب – قاجاقلار آرابالارا دولدورولموشدو. ایشینی قورتارانلار شیرین یوخویا گئتسه لر ده ، هله اورا – بورا قاچانلار ، یاددان بیر شئی چیخارتماماق اوچون یورد یئرینی دونه – دونه یوخلایانلار دا واریدی . خالخالدا کووشه ین ماللارین گه ییرتیسی ائشیدیلیر ، آرابیر اوکوزلر اوسکوروشوردو . بیر آز بوندان اوول مئشه نی بوروین زیل قارانلیق اوزاقداکی قوللو – بوداقلی نهنگ آغاجلارین یارپاقلاری آراسیندان بویلانان و هر دقیقه یوکسه یه قالخان نارینجی دییرمی آیین پاریلدادیغینی گوروب گئری چکیلمیشدی . مئشه یه سولغون بیر ضیا سپه له نمیشدی . تالاداکی تکم – سئیرک آغاجلارین چمنلی یه سریلن کولگه لری آیدین گورونوردو . یالنیز قالین کوللارین سیخ یارپاقلاری اوولکی کیمی بیر – بیرینه قیسیلاراق آی ایشیغی نین قاباغینی کسیر ، قاتی کولگه لری داها دا توندله شدیرمه یه چالیشیردی .
لاپ یاخیندا آنادیل اوتدو . اشرف بو گوزه گورونمز قوشلارین سسینی ائشیده ن تک آلاچیغین قاباغینداکی پالیدین آلتینا گئتدی . آغاجین گووده سینه سویکه نیب سوسدو . مئشه سئحیرلی بیر قارانلیق ایچینده مورگوله سه ده ، مین بیر پیچیلتی ایله دانیشیردی . چه ییرتکه لر پیریلتی ایله اوتدان – اوتا آتلانیر ، آرابیر مئشه خوروزلاری بانلاییر ، هاردا ایسه قاناد شاققیلداییر ، قارا سویون یاخاسی بویو اوزانان قامیشلیقلاردا قورباغالار قورولداییر ، چاققاللار واققیاداییردی . بو سسلر کسیک – کسیک ، فاصیله له رله ائشیدیلیردی . بعضن مئشه یه ائله بیر سوکوت چوکوردو کی ، مئهین ترپه تدیی یارپاقلارین خیشیلتی سی بئله آیدینجا ائشیدیلیردی . باخ همین بو سوکوت آنلاریندا سانکی هر شئیین سوسماسینی گوزله ین آنادیللرین زیل و کده رلی سسی ائشیدیلیردی . اشرف لاپ اوشاقلیقدان بو قوشلارین قملی اوخوماغینی دینله یه نده موتعسسیر اولوردو . او ایندی هر شئیی اونوداراق مئشه یه قولاق آسدی . او بیلیردی کی ، آغاجلارین بوداقلاری آراسیندا باشی آشاغی ساللانان بو قوشلار یالنیز گئجه لر اوخویورلار . دئییله نه گورا اونلار واختی ایلا اینسان اولموشلار . ایندی بیر – بیرینی سسله ین آنادیللر پئیغمبرین داناسینی اوتاریرلارمیش . بیر گون دانا ایتیر ، اونلار نه قده ر آختاریرلارسا ، حئیوانی تاپا بیلمیرلر . مئشه نین قارانلیغیندا ، چنلی – چیسکینلی هاوادا هره سی بیر یانا اوز توتور ، بیری (( تاپدینمی ؟ )) – دئیه سوروشور ، او بیری ایسه (( یوخ )) – دئیه جاواب وئریر . ائله بو جور ، بیر – بیرلرینی سسله یه – سسله یه ، قورخولاریندان دونوب قوش اولورلار .
اشرف دئییله نلرین دوغرو اولوب – اولمادیغینی یوخلاییرمیش کیمی ساکیتجه قولاق آسدی .
(( تاپدینمی ؟ )) ، (( یوخ )) ... (( تاپدینمی ؟ )) ، (( یوخ )) نئجه ده آیدین ایدی !
آیین ایشیغی یارپاقلارین کولگه سینی چالین – چارپاز دوغراییب اشرفین چیینینه دوشدو . هارداسا قاناد شاققیلدادی . لاپ یاخیندا بایقوش اولادی . آغاجلارین دووره سینده یاراسالار اوچوشدو . اشرف دیکسیندی . آستا آددیملارلا آلاچیغا یاخینلاشدی . جاهاندارآغا یورغانی سینه سینه چکیب یئرینه اوزانمیشدی . توفنگی دوشه یین یانینا قویموشدو . اونون ایری عضله لی توک باسمیش سینه سی آچیق ایدی .
- توفنگ آتان سیز ایدینیزمی ؟
- یوخ ، کازاکلار ایدی . دالیمیزجا دوشموشدولر .
- هارا گلدیینیزی گوردولرمی ؟
- یوخ ، ایز ایتیردیک .
کیشی خئیلی دینمه دی . گوزونو آلاچیغین تاوانینا زیلله ییب دایاندی . ائله بیل خیالیندا نه یی ایسه اولچوب – بیچیردی :
- یاخشی ، ییخیل یات .
اشرف چیراغین فیتیلینی آشاغی چکدی . شوشه نین یوخاری سیندان اوفوروب ایشیغی سوندوردو . یورغانین آلتینا گیریب اورادا پالتارینی سویوندو . تزه ایپک یورغان – دوشک بیر مودده ت خیشیلدادی . مئشه نین نملی ،سویوق هاواسیندان بوزا دونموش یاتاق اونا دوغما و خوش گوروندو . بو سرینلیک اونون یورغون اعضالارینی دینجه لتدی . اشرف یئرین ایچینده یئنه بیر مودده ت آنادیللره قولاق آسدی و اوزو ده حیسس ائتمه ده ن یوخویا گئدیب میشیلدادی ....
جاهاندارآغا اوغلونون یاتدیغینی یقین ائتدیکده ن سونرا یئری نین ایچینده دیرسه کله ندی . حیه تده کی ایری پالید آغاجی نین کولگه سی آلاچیغین اوستونه سریلمیشدی . یارپاقلار خیشیلدادیقجا بو کولگه خال – خال اولور . آیین ایشیغی تالا – تالا یئره سریلیر و چادیرین آچیق قاپی سیندان ایچری سوخولوب یورغان – دوشه یین اوستونده اویناییردی . همین بو ایشیق بعضن اشرفین اوزونو ایشیقلاندیریر، بعضن ده گئری چکیلیب چادیرین دیوارینا یاپیشیردی .
جاهاندارآغا اوغلونا دوغرو اییلدی . بیر خئیلی حئیران – حئیران بالاسینا تاماشا ائله دی . اشرفین آغ بنیزی داهادا آغارمیشدی . قاشلاری اینجه لمیشدی . دوداقلاری ، چنه سی نازیلمیشدی . کیشی قوصصه له ندی . او اوز ائولادینی قوللو – بوداقلی ایری بیر پالید آغاجی کیمی موحکم گورمک ایسته ییردی . او ایسته ییردی کی ، اوغلونون اللری جود ، بالدیرلاری موحکم ، کوره یی ائنلی ، سینه سی و قوللاری تونج کیمی اولسون . دوراندا پالید کیمی عضمتلی ، ییخیلاندا دا پالید کیمی نریلتی لی اولسون . آنجاق ، دئیه سن ، اشرف قیز کیمی ظریفله شمیشدی ، بلکه اوخوماق اونو سیخیردی ؟ بلکه اونو داها مکتبه گئتمه یه قویماسین ؟
کیشی بو جور دوشونجه لرله خئیلی اوغلونون اوزونه باخدی . بیرده ن ائحتیاطلا آشاغی اییلدی . اشرفین اوزونده ن و آلنیندان ائهمالجا اوپدو . اونون هئچ نه حیسس ائتمه دیی نی ، یئنه اوولکی کیمی میشیلتی ایله یاتدیغینی یقین ائتدیکده ن سونرا یئرینه اوزانیب یورغانی سینه سینه چکدی . گوزونو آغاجلارین باشی اوستونده ن او یانا ، سماداکی پارلاق اولدوزلارا زیلله دی . آنادیللر یئنه حزین – حزین اوتوردولر :
(( تاپدینمی ؟ )) ، (( یوخ )) ...