(4)
اشرف مئشه نین قورتاراجاغیندا آتین جیلووونو چکدی . کورون لیل قوخوسو وئره ن سرین هاواسی اونون اوزونه ووردو . آت برکده ن کیشنه دی . تاپدیق دا یویه نی دارتدی .
کورون ساحیلی کوچری لرین دوشرگه سینه چئوریلمیشدی . آرابالار بولوک – بولوک دایانمیشدی . یولغونلوقلارین ایچی مال- قارا ایله دولموشدو . اوشاقلار دانا – بوزوولاری ، سیغیرچیلار ایسه ماللاری بیر – بیرینه قاریشماغا قویموردولار . یوخاری لارا یاغان یاغیش دان سونرا هاوا بورکوله نمیشدی . نفس آلماق اولموردو . تله م – تله سیک اوجاق قالاییب قازان آسان آروادلارین ، آرابالارین یانیندا قاچیشان تومانچاق اوشاقلارین ، حئیوانلاری سولایان سیغیرچیلارین سسی بیر – بیرینه قاریشمیشدی . میلچکلر ، گوی اویونلر ماللارا دینجلیک وئرمیردی .
تاپدیق درینده ن نفس آلدی :
- دئیه سن یئنه کورون دلیلی یی توتوب .
- یعنی دئییرسن ، گمی ایشله میر ؟
- ایشله سه یدی ، سویون قیراغیندا بو قده ر آدام اولمازدی .
آرابالار گلیب چاتدی . جاهاندارآغا ایری قوواق آغاجی نین کولگه سینده دایاندی . الینی گوزونون اوستونه قویوب ، آغیز – آغیزا قوووشان سولارا باخدی ، سونرا ایشاره ائتدی کی ، آرابالاری آچسینلار . اوزو ده آتدان ائندی . تاپدیق یویه نی اونون الینده ن آلماق ایسته ینده ، مانئع اولدو :
- گئت ، اویره ن گور ، چوخمو دایاناسییق .
تاپدیق لا اشرف لیل باسمیش جیغیرلا ، یولغون کوللاری نین آراسی ایله ایره لی له دیلر . اونلار تئز – تئز باشلارینی آشاغی اییر ، شاخلاری اللری ایله کنلر ائدیردیلر .
آچیقلیغا چیخان کیمی اشرف آتینی ماهمیزلادی و کئچیدین یوخاری طرفینه دوغرو ایره لی له دی . کئچیدین آشاغی طرفینده ، سویون یاییلیب دایازلاشدیغی یئرده ، بیر دسته جاوان حئیوانلاری شیغاییب سویا توکور ، قورخوب گئری قاییتماق ایسته ین اینکلری ، دانالاری داشا باسیردیلار . اونلار ماللاری های – کویله اوره کله ندیریب او اوزه کئچیرمه یه چالیشیردیلار ....
کورون بالاجا بیر قولو اشرف گیلین یولونو کسدی . تاپدیق بلدچیلیک ائتمک مقصدی ایله آتینی قاباغا سوروب سویا سالدی . اشرف اوندان گئری قالماق ایسته مه ییب ، قامچی نی هاوادا اویناتدی . آتلار قوشالاشدی . بوز – بولانیق سولار اطرافا سیچرادی . اونلار چاپاراق سویو کئچدیلر و جیغیرا چیخدیلار . یئنه اوتوشدیلر . دونگه نی بورولماق ایسته رکن بیر دسته قیزلا قاباقلاشدیلار . دوردنالا چاپان آتلارین جیلووونو نه قده ر ییغدیلارسا دا ، یئلینی آلا بیلمه دیلر . قیزلار تلاشلا قیشقیریشیب اطرافا داغیلدیلار . اونلاردان بیری آز قالدی آتین آیاقلاری آلتینا دوشسون . الینده کی ساخسی جورده یی سالیب سیندیردی . اشرف آجیقلی بیر سس ائشیتدی :
- جییه ری یانمیشلار .
او ، یه هرین اوستونده ن قانریلیب گئری باخدی . قیرمیزی آتلاز دونونون سینه سینده کی پوللار و بئلینده کی کمرین توققاسی پاریلدایان بیر قیز قاشقاباغینی توکوب اونلارین آرخاسینجا باخیردی . ساخسی قابین قیریقلاری جیغیرین اورتاسینا سپه له نمیشدی . اشرف آتین جیلووونو دارتیب دایاندی . قیزی باشدان – آیاغا سوزدو . اودا یئرینده ن ترپه نمه دی . بیر آز اوول باش وئرمیش حادیثه نی اونوتموش کیمی آتلی اوغلانا باخدی . اشرف قیزین چاتما قاشلاری نین اورتاسینداکی دویونون آچیلدیغینی ، اوشاق اداسی ایله بوزوب ساللادیغی دوداقلاری نین ترپه ندیی نی ، گوزلرینده کی قضبین یوخ اولوب ، ارکه سویون بیر مذممته چئوریلدیی نی گوردو . قیز آنی شاشقینلیقدان سونراحیرصدن چوخ کوسکونلویو آندیران بیر چئویکلیکله دابانی اوستونده فیرلاندی و گئری دوندو . اونون هوروکلری یئلله نیب چیینلرینی اوپدو و کوره یی نین اورتاسیندا دایاندی . قیز قاچا – قاچا کورون بالاجا قولو اوسته سریلیب کورپونو عوض ائده ن ایری قوواق آغاجی نین اوستونه چیخدی . سویو او اوزه کئچن قیزلارین آرخاسیندان چاتماغا تله سدی . اشرف اونون یالین آیاغی نین قابیغی سویولموش آغاجین گووده سینه سالدیغی ایزلری بئله گوردو . قیز کورپونون اورتاسیندا دایاندی . اشرفین هله ده اونون آرخاسینجا باخدیغینی گوره نده قاشلارینی چاتیب دوداقلارینی بوزدو و بیرده ن اونو تانیدی :
- بیی ، دیلیم قوروسون ، بو ، اشرف ایمیش کی .
قیز دابانی اوسته فیرلانیب کورپونو کئچدی و قیزلارین آرخاسیندان چاتدی . اشرف ده آتین باشینی چئویریب تاپدیقلا برابرله شدی :
- او قیز کیم ایدی ؟
- هانسی قیز ؟
- بیزه قارغایان .
- تانیمادینمی ؟ پاکیزه ایدی .
- هانسی پاکیزه ؟
- موللا صادیغین قیزی .
اشرف اونو یئنیده ن گورمک ایسته ییرمیش کیمی آرخایا بویلاندی :
- او کی لاپ بالاجایدی .
- اه ، قیزا نه وار . گوزونو یوموب – آچینجا بیر قامچی بویدا اوزانیرلار .
- سالاتین دا بویویوب ؟
- ماشاللاه ، یئکه قیز اولوب .
اشرف یئنی ده ن سوسدو . آتلار آددیم – آددیم ایره لی له ییر ، بعضن لیللی گولمه چه لرده ن کئچیر ، بعضن ده آغیزلارینی اوزادیب ، آغاجلارین یارپاغینی قوپاریردی .
ساحیله چاتدیلار . آتلار لپه لی ، بوز – بولانلیق سویون کوپوکلو سینه سینی گوره ن کیمی دایاندی . قولاقلارینی دیکه لدیب کیشنه دی ، اشرف دوداق اوجو گولومسوندو :
- یازیق قیز آز قالیردی آغلاسین .
- هانسی قیز ، آغا ؟
- پاکیزه نی دئییره م . قابینی سیندیردیق . سویو دا داغیلدی .
- او دا عوضینده بیزه قارغاییب ، اوره یینی بوشالتدی . داها نه ایسته ییرسن .
- هئچ ... ائله – بئله سوزدو ، دئدیم .
- اولمایا قیزدان خوشون گلدی ، آغا ؟
اشرف دیکسینیب تعججوبله تاپدیغین اوزونه باخدی . او ایسه اشرفین قولاقلاری نین اوجونا قده ر قیزاردیغینی ، حتتا حیادان آلنینا تر بئله گلدیی نی گوردو . زارافاتیانا باشلادیغی صوحبتی جیددییه تله قورتاردی :
- ائله شئیی اولمایا – اولمایا آغلینا گتیره سن ،آغا . موللا صادیق لا آتان بو ساعات خنجر – بیچاقدیر .
- نییه ، نه اولوب کی ؟
- بیر – ایکی دفه سوزلری چپله شیب ، آز قالیب آرایا قان دوشسون .
- آخی نه یین اوستونده ؟
تاپدیق صوحبه تین گوزله نیلمه ین بیر ایستیقامت آلدیغینی آنلادی . وضییه تده ن چیخماق اوچون آتینی ماهمیزلاییب سویون یاخاسی بویو سوردو .
* * * *
قوجا کیشی شالوارینی دیزینه قده ر چیرمه میشدی . گمی نین دال طرفینده دایانیب وئدره ایله سویو بوشالدیردی. یاغیش سویو گمی نین اورتاسیندان ایدی . گمی یاری یا قده ر آشاغی چوکموشدو . لپه لر اونو ترپه تدیکجه لنگرله نیر ، بعضن ساحیله توخونوب بورنو ایله خیرداجا داشلاری خیشیلدادیب شاققیلدادیردی .
اشرف آتدان دوشدو . بیر خئیلی گمی چی یه ، ساحیلده کورون – کورون یانان اوجاغا باخدی . جیلووو تاپدیغا وئریب قوجا کیشی یه یاخینلاشدی :
- خوش گوردوک ، آی قوجا دایی .
کیشی بئلینی دوزه لدیب دیکه لدی . ساحیلده ، یارغانین قاشیندا ، ایکی – اوچ آددیملیقدا دایانان اوغلانا باخدی . اشرفی تانی یان کیمی دوداقلاری قاچدی . عاده تی اوزره اونا شوخلوقلا جاواب وئرمک ایسته دی . آنجاق بیرده ن – بیره توتولدو . قاشقاباغینی ساللاییب کونولسوزجه سینه دیلله ندی :
- خوش گوردوک .
اشرف کیشی نین صیفه تینده کی دییشیکلیی سئزمه دی . یئنه اوولکی کیمی گوله – گوله گمی چی یه ساتاشدی :
- قیزلارلا آران نئجه دیر ؟
گمی چی گوزونو قییب دیققتله اشرفین اوزونه باخدی و حیسس ائتدی کی ، اونون کندده باش وئره ن حادیثه لرده ن خبری یوخدور . قوجا کیشی بیر آن ترددود ایچینده دایاندی ، سونرا دوداقلاری قاچدی :
- دئیه سن کئفین کوکدور ، آی نیشانلی سی گویچک ؟
- نییه کوک اولماسین ، آی قیزی گویچک ؟
- قیزیمدا ایشین اولماسین ، سونرا خالانا سویه ره م .
- پئشکشدی . قوجا دایی ، تکی منی او اوزه کئچیره سن .
- ائله زارافات یوخدور .
- نییه ؟
- هله جانیمدان بئزمه میشم .
- سودان قورخورسان ؟
- گورمورسن ؟
- گوروره م . بوردا نه وار کی ؟ سن کی چوخ بئله سئللر – سولار یولا سالمیسان .
- سن ایندی ده ن دانیش .
- یوخسا قوجالیبسان ؟ داها الی نین آرخاسینی یئره قویورسان ؟
قوجا کیشی قانریلیب قارشی طرفده کی ساحیله ، هوندور یارغانی دویه جله ین بورولغانلی سولارا باخدی :
دوز دئییرسن ، بالا ، قوللاریم تاقتده ن دوشوب . داها گمی سوزومه باخمیر .
کیشی کوکسون اوتوروب ، گمی نین آرخا حیصه سینده کی تاختانین اوستونده اوتوردو . اشرف اونون بوینونون قیریش – قیریش اولموش دریسینه ، ایسلاق کوینه یی نین یاخاسیندان گورونن دوردکونج دوعایا باخدی . گمی چی نین اللرینده کی گوی دامارلار شیشمیشدی . بارماقلاری خفیفجه تیتره ییردی . دوغوردان دا اونون باخیشلاریندان حیاتدان اوسانمیش بیر آدامین یورغونلوغو توکولوردو . او ، گوزونو سویا زیلله میشدی . لپه لر بیر – بیرینی قووا – قووا قارشیداکی ساحیله قده ر گئدیردی . کورون کوکره ین سویو ائشیم – ائشیم ائشیلیر ، لیللی چیله کن لرین یانینداکی ایری بورولغانلارا قده ر آپاریردی . اوردا ایسه قضبله نمیش کیمی هر شئیی باسمارلاییب آلتینا آلیر و یالنیز بوندان سونرا اوره یی ساکیتله- شمیش تکی لال سوکوتلا آخیردی .
اشرف یونگولجه گمی یه آتیلدی :
- قوجا دایی ، سن بویوک اولارسان ، یوخسا بو گمی ؟
کیشی گوزونو سولاردان چکیب موصاحیبی نین اوزونه باخدی . بیر خئیلی هارایا ایسه ، لاپ اوزاقلارا گئده ن فیکرینی توپلاماغا چالیشدی . بیر – ایکی دفه اوتقوندوقدان سونرا آستاجا دیلله ندی :
- بو گمی منده ن چوخ بویوکدور ، بالا ، آتام دئیه ردی کی ، منه ده بابامدان قالیب .
- آتان دا گمی چی ایدی ؟
- بیز ده ده – بابادان گمی چی اولموشوق . کندیمیزین بیناسی بوردا قویولاندان بیزیم نسیلیمیز گمی چیلیک ائله ییب .
- چرکزده گمیچی اولاجاق ؟
کیشی بیر خئیلی دینمه دی . سولغون گوزلرینی اشرفین اوزونه زیلله ییب دایاندی :
- بیلمیره م . منده ن اولسا ، گمی چیلیک ائله مز .
- نییه کی ؟
- سو سنه یی سودا سینار ، بالا ، گمی چی نی یا سئل آپارار ، یادا سودا بوغولار . بو گمی بابامی یولا سالیب ، آتامی یولا سالدی ، بو گون – صاباح دا نووبه منیمدیر.
قوجانین سوزلری اشرفی کده رله ندیردی . او بیر آنلیغا چرکزی ، اونلارین قارا دامینی گوزلری قاباغینا گتیردی :
- بس فیکرین نه دیر ، قوجا دایی ؟
- نه بیلیم ، بئش – آلتی تاغارلیق یئریمیز اولسایدی ، هئچ اولماسا اکین – بیچین ائله یه ردیک . آللاهین وئرگی سینده ن او دا یوخدور .
اشرف حیسس ائتدی کی ، قوجا کیشی تمامیله اومیدینی ایتیرمیش آداملار کیمی سسی تیتره یه – تیتره یه دانیشیر . اونو ساکیتله شدیرمک ، یئری گلسه قوجایا یاردیم ائتمه یی بئله خیالیندان کئچیردی . (( دوغرودان دا آتاما دئسه م ، بو یازیغا بیر آز تورپاق وئرمه زمی ؟ )) – دئیه دوشوندو :
- تاپیلار ، قوجا دایی ، فیکیر ائله مه .
- هاردان تاپیلار ، آی بالا ؟
- نه چوخدور آللاهین تورپاغی .
- آللاهین تورپاغینی بنده لر چوخدان قامارلاشدیریبلار . اولسه لر ده اللرینده ن بیر تیکه وئرمه زلر .
- وئره رلر .
کیشی قارشیسیندا دایانان بو یئنی یئتمه اوغلانین صیفه تی نین جیددیله شدیی نی گوردو . اوره یینده اونون هله دونیا ایشلرینده ن بی خبر اولدوغونا گولدو :
- آی نیشانلیسی گویچک ، آغزین ایستی یئرده دیر ، اونونچون بئله دانیشیرسان . گل ، اوزونو یورما . دونیا بئله گلیب بئله ده گئده جک . دئه گوروم ایشین – گوجون نئجه دیر ؟
- چوخ ساغ اول ، قوجا دایی ، یاخشی دیر . بس سیزلرده نه وار ، نه یوخ ؟
- سالاماتلیقدیر .
- چرکز هاردادیر ؟ گوله سر نه تهردیر ؟
کیشینی ائله بیل بیرده ن – بیره دییشدیلر . جلد آیاغا دوروب گمی نین بویرونه سویکه دیی چپی گوتوردو ، دال طرفده کی تاختانین اوستونه قالخیب سویا سالدی . وار گوجو ایله تکان وئریب گمی نی ایره لی ایته له دی :
- گئده نده قارداشیندان سوروشارسان ....
اشرفین آتی یویه نی دارتدی . قولاقلارینی دیکه لدیب برکده ن کیشنه دی . گمی چی الینی گوزونون اوستونه قویوب مئشه یه طرف باخدی :
- آ بالا ، بونلار کیمدیر ؟ - دئیه تعججوبله سوروشدو .
اشرف گمی ده ن ساحیله سیچرادی . آتیلیب یه هره قالخدی .
بیر دسته آتلی کازاک مئشه نین قورتاراجاغیندا دایاندی . اونده کی ضابیط دوربینله ساحیلده کیلره ، او تایدا ، یارغانین قاشیندا اوتوروب کوچو گوزله ین لره باخدی . مال – قارانی ، آرواد – اوشاغی گوزده ن کئچیردی . سونرا آتینی ماهمیزلاییب جیغیرا دوشدو . قالانلاری اونون آرخاسینجا گلدیلر .
ایتلر زنجیرده دارتینیب آغیز – آغیزا وئردیلر . آرالیقدا قاچیشان اوشاقلار قورخودان آرابالارین بویرونه قیسیلدیلار . جاماعات گوزله نیلمه ده ن کیمی یولونا گلن کازاکلارا تشویشله باخدی . جاهاندارآغا ایسه سیچراییب آیاغا دوردو . نوکرلره دئدی کی ، (( آرابالاری قوشون ، کنارا چکین )) . اوزو درحال آتین بئلینه قالخدی .
کازاکلار ساحیله ، دوز گمی نین برابرینده دایاندیلار . ضابیط اوولجه گمی یه ، سونرا کورون قابارمیش سینه سینه باخدی . آتینی بیر آز دا سوروب قوجا کیشی نین یانیندا ساخلادی :
- بیزی او تایا کئچیر .
کیشی هئچ نه باشا دوشمه دی . چیینی نی چکیب ضابیطین اوزونه باخدی .آتلیلاردان بیری ایره لی چیخدی . یه هرین اوستونده ن اییلیب قوجا کیشی نین قولاغینا باغیردی :
- ناچالنیک دئییر کی ، بیزی او تایا کئچیر .
قوجا کیشی گولومسوندو :
- ناچالنیک اولاندا نه اولار، گورمورمو سو آغیز – آغیزا قوووشوب ؟
- بس اوز آداملاری نیزی نییه کئچیریرسن ؟
- کیم دئییر اونو ؟
- من .
- یالانچی نین آتاسینا لعنت .
دیلمانج آتینی ایره لی سوردو ، الینی قیلینجا اوزاتدی . کیشی نین اوستونه قیشقیردی :
- کس سسینی ، قوجا کافتار .
اشرف آرتیق دوزه بیلمه دی :
- بورا باخ ، آتان یاشیندا کیشی نی نییه بی حورمت ائله ییرسن ؟
- سن کیمسن ؟
- اونون سنه دخلی یوخدور .
ضابیط دونوب آغ چرکزی چوخالی ، گوی بوخارا پاپاقلی جاوانین بئلینده کی ساللامالی کمرینه ، گوموش خنجرینه باخدی . کازاکلار ضابیطین ایشاره سینی باشا دوشوب حاضیرجا دایاندیلار . ترجومان اوزونو یئنی ده ن قوجا کیشی یه توتدو :
- بورالاردا سنده ن باشقا گمی چی وارمی ؟
- یوخ .
- او تایا آدام کئچیریبسنمی ؟
- دئدیم کی ، یوخ . ایکی گوندور گمی ایشله میر .
- یالان دئییرسن . بس دونن گئجه کئچیردیین ایستیودئنت یادیندان چیخیب ؟
- ایستیودئنت نه دیر ؟
- باشیندا روس شاپکاسی ، شالواری نین بالاغی آچیق بیر آدام گورمه ییبسن ؟ توققاسیندا یازیلاری دا وار .
- یوخ بو طرفلرده ائله آدام گوزومه دیمه ییب . نئجه مگر ؟
- آ کیشی ، اینکیر – مینکیر باشلاما ، دئه گوروم بئله بیر آدام گوروبسن ، یا یوخ ؟
اشرف مسله نی باشا دوشدو . تاپدیق دا اونلارین کیمی آختاردیغینی آنلادی . یاواشجا اشرفین قولاغینا پیچیلدادی :
- آغا ، بونلار دونن کیلردیر . بیزی آختاریرلار ، گل آرادان چیخاق .
اشرف اونو ائشیتمه دی . اوزونو دیلمانجا توتوب گمی چی نی مودافیعه ائتدی :
- اونون اوستونه نییه دوشوبسونوز ، گورمورسونوزمو هئچ نه ده ن خبری یوخدور ؟
ضابیط اشرفین اوتکه ملیی نی خوشلامادی . گوزونو قییب دیققتله اونو بیر ده تپه ده ن – دیرناغا سوزدو . سونرا دیلمانجا ایشاره ائتدی :
- بلکه ائله بو اوزودور ؟
اونلارین اطرافینا توپلاشان گوی تپه لیلر سوسدولار . بویوک ناراحاتلیقلا بو حوجتله شمه نین نه ایله قورتاراجاغینی گوزله دیلر . جاهاندارآغا آتی چاپیب جاماعاتا یاخینلاشدی . کازاکلارین یانینا گئتمزده ن اوول آداملاری خبردار ائتدی :
- آرواد – اوشاغی آرادان چیخاردین .
بینه لره چاخناشما دوشدو . بیر نئچه دقیقه ده ن سونرا کیشی لرده ن باشقا هئچ کس گورونمه دی . مال – قارا یولغونلوغا دولدورولدو . آرابالار کنارا چکیلدی . بوتون بونلاری گوزآلتی سوزه ن جاهاندارآغا کازاکلارا یاخینلاشدی . اونون قوهوملاری و کند جاماعاتی درحال ، اوستالیقلا ، سایمازیانا اطرافی کسدیلر . کازاکلارین موحاصیره یه آلیندیقلاریندان خبرلری اولمادی . جاهاندارآغا گوردو کی ، هامی حاضیردیر . اللر خنجرین دسته یینده بارماقلار توفنگین ته ته یینده دیر .
او توفنگینی یه هرین قاشینا قویدو ، چاخماغین دابانی نی آچدی . ضابیطه یاخینلاشیب آستادان سوروشدو :
- اوشاقدان نه ایسته ییرسینیز ؟
جاهاندارآغانین تمکینله ، آمیرانه بیر طرزده وئردیی سوال ضابیطین خوشونا گلمه دی :
- سن بو ایشه قاریشما .
- یئنه سوروشورام ، اوشاقدان نه ایسته ییرسینیز ؟
ضابیط آرتیق دوزمه دی . اونون قضبلی سسی خیریلدادی :
- توتون بونلاری !
ائله بیل جاهاندارآغایا اود ووردولار . آتین جیلووونو دارتیب گئری فیرلاندی . قمر قفیل تکاندان دال آیاغی اوسته قالخیب کیشنه دی . اونون آیاغی نین آلتینداکی خیردا ، یومرو داشلار شاققیلدادی . جاهاندارآغانین بورون پره لری گئنیشله ندی . حَبَشی دوداقلاری گوم گوی اولدو . اونون فیسیلتی سی آیدینجا ائشیدیلدی :
- ردد اولون !
آداملار سیخلاشدیلار . کازاکلار گوردولر کی ، اوزوک قاشی کیمی موحاصیره ده دیرلر .آزجا حرکت ائتسه لر ، ته تیکلر چکیله جک ، خنجرلر گویده پاریلدایاجاقدیر . ضابیط آنجاق ایندی درک ائتدی کی ، چوخ آرخایین ترپه نیبدیر . اگر سیلاحا ال آتسالار ، آرایا قیرغین دوشه جک ، بلکه ده بورادان سالامات قاییدان اولمایاجاقدیر . گوزله مه دیی بو وضییه ت اونو سارسیتدی :
- بیزیم سیزینله ایشیمیز یوخدور . بیزه دونن گئجه قوروغا گیره ن آداملار لازیمدیر . اونلار بیزیم کازاکلاری دویوب ، اللرینده ن سیلاحلاری آلیبلار . اونلاری تاپیب وئرین .
- بیزیم سیزه وئریله سی آدامیمیز یوخدور .
ضابیطله دیلمانج بیر- بیرینین اوزونه باخدیلار . دیلمانج ضابیطین اوره یینده ن کئچنلری دویدو ، سسینی یومشالتدی :
- نه اوچون داوا آختاریرسینیز ؟ اگر آداملار بوردا یوخدورسا ، آچیغینی دئیین ، چیخاق گئده ک .
- دئدیم کی ، سیزه وئریله سی آدامیمیز یوخدور .
- ائله ایسه سالامات قالین .
- یول آچیقدیر .
ضابیط ائله بیل یاددان چیخارماماق اوچون دیققتله اشرفین اوزونه باخدی . سونرا جاهاندارآغایا اوته ری نظر فیرلاتدی . آتینی ماهمیزلاییب قاباغا کئچدی . جاماعات آرالانیب اونلارا یول وئردی . کازاکلار یه هرین اوستونده قالخیب دوشه – دوشه مئشه یه طرف چاپدیلار . گوی تپه -لیلر اونلار مئشه ده گوزده ن ایتمه میش اللرینی ته تیکده ن چکمه دیلر .
