(9)
گون اورتا اوستونه یاخین خیر یولونون آشاغی طرفینده ن ،آجی ده ره نین یانینداکی دونگه ده ن بیر دسته آتلی کازاک چیخدی . اونلارین آردینجا زینقیروولو بیر فایتون دیکدیره قالخدی . آرخادان یئنه ایکی جرگه دوزولموش آتلی گلدی . خیر یولونا سس دوشدو . داشلارا توخونان ناللار آهنگدار شکیلده چاققیلدادی . آزاجیق توز قالخدی . جایداق آتلار یورتماغا باشلادی . قیللی پاپاقلی ، اوزون ساققال کازاکلار یه هه رین اوستونده قالخیب – ائندیلر . چکمه لری نین دابانلارینداکی دیشلی تکرجیکلرله آتلاری ماهمیزلادیلار . دسته کنده یاخینلاشدی . گوی تپه لیلر تشویش و هیجان ایچه ریسینده دایانیب گلنلره اوزاقدان تاماشا ائتدیلر . اوشاقلار داملارین اوستونه چیخدیلار . کازاکلارین بویرونده ن ساللانان و آز قالا یئره دیه ن اوزون قیلینج لاری نین دمیرلری و توفنگ لری نین لوله لری پاریلداییردی . اونلار ایینلرینه شابالیدی رنگلی یون چوخا گئیمیش ، باشلارینا ایری قیللی پاپاق قویموشدولار . پاپاقلاری نین اورتاسینداکی قیرمیزی و باشلیقلاری نین قوتازلاری آیدین سئچیلیردی . فایتون قاپقارا ایدی . گون ووردوقجا پاریلداییردی . اونون ایچینده اوتورانلار دا ائله بیل قیزیلا بورونموشدولر . چیینلری ، دوشلری ایشیم – ایشیم ایشیلداییردی .
دسته کندده ن خئیلی آرالاندی . جاماعات اونلارین تیفلیسه اوتوب کئچدیکلری نی یقین ائدیب آرخایینلاشدی . آنجاق آتلیلار گوزله نیلمه ده ن بورولوب (( زایئژ )) ین قاباغیندا دایاندیلار .
احمد سس – کویه ائوده ن چیخدی . او ، یارلی – یاراقلی کازاکلاری گوره نده آنی اولاراق پئتئر بورگو خاطیرلادی . بده نینده ن سویوق بیر گیزیلتی کئچدی . اونلارین نه اوچون بورا گلدیکلرینی آنلامادیغیندان ، خیالینا یوز جور قورخولو فیکیر گلدی . آتدان ائنیب الینده قامچی اوینادان ائنلی کوره ک ، اوجابوی ، ساققالی سینه سینه یاییلمیش کازاک اونا یاخینلاشیب ، بیرده ن – بیره باغیردی :
- ای تاتار ، یاکشی یامان ، کالدی کارمان . نی بیلمز . نی بوم – بوم ؟
بو آجی ، تحقیرآمیز سوز ائله بیل احمدی سیلکه له ییب آییلتدی . او ، گوزونو قارشیسیندا دایانیب ایستئهزا ایله اونا باخان کازاکین اوزونه زیلله دی و خالیص روس دیلینده :
- نه بویورورسونوز ؟ - دئیه سوروشدو .
بئلینی آزاجیق ایره لی اییب آیاقلارینی آرالایان و ائله بیل کی ، احمدی اودماغا حاضیرلاشان کازاک قارشیسینداکی آدامین تمکین و جاوابیندان دیکسینیب گئری چکیلدی . گوزلری قییلدی و دونوب آرخا طرفده دایانان یولداشلارینا باخدی . احمد اونون شاشیردیغینی گوروب داها قطییه تله دیلله ندی :
- بویورون ، من سیزی دینله ییره م .
کازاک وضییه تینی دییشمه لی اولدو :
- گئده ک اوتاقلاری گوستر ، گورمورسنمی پریستاو گلیب ؟
اونلار احمدی قاباقلارینا قاتیب ایچه ری آپاردیلار . دیققتله بیر – بیر اوتاقلاری گزدیلر . هر طرفی یوخلادیلار . دیوارداکی یازی تاختاسینی ، سکامیالاری ، خریطه نی ( خریطه = نقشه ) گوره نده بایاقکی کازاک یئنیده ن باغیردی :
- بو نه دیر ؟
- اوزونوز گورورسونوز .
- بورا (( زایئژ)) دیر ، یوخسا مکتب ؟
- ((زایئژ)) دیر .
- بس نه اوچون بونلاری بورایا دولدورموسان ؟
- لازیم اولور .
- لازیم اولور ، لازیم اولور . آز دانیش . استوللاری باییرا چیخارت .
کازاکین صیفه تی دییشدی . آز قالدی باخیشلاری ایله احمدی یئسین . حتتا الینی یوخاری قالدیریب شاللاغینی هرله مک ایسته دی . آنجاق پریستاوین ائیواندا دایاندیغینی گوروب الینی ساخلادی .
کازاکلار استوللاری گوتوردولر . ائیواندا ، محه ججرین قاباغیندا ، کولگه یئره دوزدولر . پریستاو و یولداشلاری اَیله شدیلر . دسماللا بویونلارینی ، شاپکالاری نین ایچینی قورولادیلار . پریستاو حتتا داز باشی نین ترینی سیلدی . کور طرفده ن اسن سرین مئه اوتلاری ، چیچه کلری سیغاللایا – سیغاللایا ((زایئژ)) – ه قده ر گلدی . ائله بیل ائیواندا اوتورانلاری یئلله دیلر .
کازاکلار هئچ نه سوروشمادان احمدین آخشام بیچیب گتیردیی گوی اوتو قوجاقلاییب آتلاری نین قاباغینا توکدولر . سونرا دیوار بویو ساللاغی اوتوروب پاپیروس ائشدیلر .
پریستاو ساکیتجه کوره ، او اوزده کی مئشه یه ، آرالیقلارداکی جه له یه باخدی . بیچه نه کلرین اوتو ، یارپاق آچمیش آغاجلار ، گوی لوکلرده قاچیشان آتلار ، چیلینگ – آغاج اوینایان اوشاقلار اونون دیققتینی جلب ائتدی . دوداقلاری آزاجیق آرالانیب گولومسوندو . دئیه سن کندین منظره سی اونون خوشونا گلدی .
بایاقکی کازاک اییلیب پریستاوین قولاغینا نه سه دئدی . او بیر خئیلی باشینی ترپه تدی ، سونرا احمدی یانینا چاغیردی .بیر آز بوندان اوول اونون صیفه تینی بوروین تبسسوم یوخ اولدو :
- سن کیمسن ؟
- پوچتا ایشچی سی .
- روسجانی هاردا اویره نمیسن ؟
- پئتئربورگدا .
پریستاو یئرینده قورجالاندی . اونون آلتینداکی استول جیریلدادی . قارشیسیندا دایانان احمدی آشاغیدان یوخاری ، دیققتله سوزدو :
- استیودئنت اولموسان ؟
- بعلی .
- بس سونرا ، سونرادا قوووبلار ، ائله می ؟
- بعلی .
- نه یین اوستونده ؟
- بعضی کیتابلار اوخودوغوما گورا .
- هم ...دا ... تاک ...بس بورایا نئجه گلمیسن ؟
- گونده ریبلر .
- بورادا دا او کیتابلاردان اوخویورسان ؟
- یوخلایا بیله رسینیز ، جناب پریستاو .
- هم ...دا ... بس بورانی نه اوچون مکتبه دونده رمیسن ؟
- جناب پریستاو ، اوشاقلار هرده ن بیر یانیما گلیر . داریخاندا اونلارا یازی – پوزو اویره دیره م . اوزونوز بیلیرسینیز کی ، بیزیم کندلرده مکتب یوخدور .
- سن اونلارا تاتجا یازماغی اویره دیرسن ؟
- یوخ ، روسجا .
پریستاوین صیفه تی نین ایفاده سی یومشالدی . احمد اونون گوزلرینده کی ناراضیلیغین یاواش – یاواش سیلیندیینی حیسس ائتدی .
- هم ... دا ... تاک ... تاک ... سنده ن خوشوم گلدی . بس سیزده چای تاپیلماز ؟
- قوناق گلنلره هر شئی تاپیلار .
- ائله ایسه بیر ساماوار .
احمد اوتاغا گیریب ساماواری چیخارتدی . پریستاو ترینی سیله – سیله اوزونو یئلله دی . احمدین ساماوارا سو توکدویونو گوروب دیلله ندی :
- سن تکسن ، آرواد – اوشاغین یوخدور ؟
- یوخدور ، جناب پریستاو .
- یاخشی ، سن گل بورا ، چایی اونلار قویارلار .
کازاکلار درحال ساماواری گوتوردولر . چلله کده ن سو دولدوردولار . ائله حیه تین اورتاسینداجا اودون چاتیقلاییب ساماوارا اود سالدیلار . پریستاو اوزونو خئیلی یئلله دی ، ائیواندا گزیندی ، سونرا گلیب بایاقکی یئرینده اوتوردو . اوزونو احمده توتوب آستادان دیلله ندی :
- جاماعاتی بورایا ییغماق لازیم دیر . واجیب مسله وار . سن اوشاقلارلا گئت ، بوتون کیشی لری بورایا چاغیر . اوزون ده بیزه دیلمانج اولارسان .
آتلی کازاکلار کنده دولوشدولار . ایتلر یاد آداملاری گوره نده زنجیرده دارتینیب چیرپیندیلار . تورپاق یولون توزو گویه قالخدی . کندین اوستونه چوکوب ، دومان کیمی اطرافی کولگه له ندیردی . ایستی یای گونلرینده توزو – تورپاغی گویه سوووروب ، بورولغان کیمی هاوایا قالخان بو بوغاناقدان جاماعات واهیمه یه دوشدو . کیشی لر دالدالانماغا چالیشدیلار . اوشاقلار قاچیب گیزله ندیلر . آروادلار هئچ اوزلرینی ده گوسترمه دیلر . کند سویو سوغولموش دییرمان کیمی بیرده ن – بیره سوسدو . گون برک قیزدیغیندان ، آنجاق جیرجیرامالار سس – سسه وئرمیشدیلر . کور ایسه چاغلاییب – اوغولداییر ، جیلووونو گمیره ن آت کیمی فینخیریب ساحیلی دویه جله ییردی . بو اولو سوکوتو حیسس ائده ن کازاکلاردان بیری احمدده ن سوروشدو :
- جاماعات هانی ، کوچوبلر؟
- یوخ .
- بس نییه گورونمورلر ؟
- سیزده ن قورخورلار .
- نییه ؟
- سیزده ن خئییر گورمه ییبلر .
آتلی لار دوققازدا دایاندیلار . احمد جاهاندارآغانی چاغیردی . کیشی اونون سسینی ائشیده ن کیمی سیچراییب آیاغا قالخدی . توفنگینی الینه آلدی .سامانلیغین بئلینده ن ائندی . زنجیرده دارتینان ایتلره آجیقلاندی . نوکرلرده ن قاباق اوزو دوققازا چیخدی . بیر خئلی یاراقلی کازاکلارا ، سونرا دا احمده باخدی .
- خئییر اولا ، آ بالا .
- پریستاو ((زایئژ)) – ه چاغیریر .
- تکجه منی ؟
- یوخ ، بوتون جاماعاتی .
جاهاندارآغا آزاجیق ساکیتله شدی . سونرا قانریلیب نوکرلری سسله دی :
- آ بالا ، آتی یه هر له یین .
کازاکلار اوزاقلاشدیلار . جاهاندارآغا ائوه گئدیب پالتارینی دییشدی . خنجرینی بئلینه باغلادی . قولتوق آلتی سینی چیینی نه کئچیردی . توفنگی نین خزینه سینی یوخلادی . آتی یه هرله ییب حیه تده اونو گوزله ین تاپدیغا یاخینلاشدی . اوزو هر شئیی یوخلادی ، آتین چکیلرینی برکیتدی . آیاغینی اوزه نگییه قویمازدان اوول اوزونو تاپدیغا توتدو :
- سیزده آتلاری نیزی یه هرله یین ، یاراقلارینیزی دا گوتورون . بیزیم طایفادان کیم وارسا ، هامیسینا خبر ائله . دالیمیزجا ((زایئژ)) – ه گلین .
تاپدیق کیشی نین هیجانلاندیغینی باشا دوشدو :
- نه اولوب ، آغا ؟
- ائله بیر شئی یوخدور . آنجاق ائحتیاطلی اوغولون آناسی آغلاماز ، دیوانا اعتیبار ائله مک اولماز .
جاهاندارآغا سیچراییب آتین بئلینه قالخدی .قمر قوش کیمی سکیب یولا چیخدی ...
((زایئژ)) ین حیه تی جاماعاتلا دولدو . گوی تپه کندینده نه قده ر باشی پاپاقلی واردیسا ، هامیسی پریستاوین حوضورونا گلدی . کندلیلر طایفا – طایفا بولونوب اوز آغ ساققاللاری نین باشینا توپلاشدیلار . نوکرلر ، یئده کلرینده آت ، کناردا دایاندیلار . هامی هیجانلی ایدی . پریستاوین گلیشی نی هره بیر جور ایضاح ائدیر ، خاطانی اوزونده ن اوزاق اولماسینی آرزولاییردی . پریستاو ایسه ائیواندا ساکیتجه چای ایچیر ، آلتدان – آلتدان جاماعاتی سوزوردو .
نهایت ، او آیاغا دوردو . آشاغا دوشوب جاماعاتا دوغرو گلدی . کازاکلار استوللاری گتیریب حیه تین اورتاسینا قویدولار . بیر قاباق استولو دا تاپدیلار . پریستاو کندلیلری یاخینا چاغیردی .اونلارا ایشاره ایله اوتورماغی امر ائتدی . جاماعات گوی اوتلوقدا بارداش قوروب چئوره له ندی . جاهاندارآغا اوتورمادی . یاخینداکی آغاجا سویکه نیب دایاندی . پریستاو اونو ، بیر آز کناردا ، چیینینده عبا ، تسبئح چئویره ن موللا صادیغی و اونلاردان باشقا دا اوتورماق ایسته می ین بیر نئچه آدامی نظرینده ن یاییندیرمادی .
استولون اوستونه بیر قوولوق قویدولار . پیرستاو اورادان موهورلی بیر کاغیذ چیخارتدی . اوخومازدان اوول احمدی یانینا چاغیردی :
- جاهاندارآغا کیمدیر ؟ - دئیه آمیرانه سسله سوروشدو .
هامی دونوب اونا طرف باخدی . او طایفادان اولان آداملار آیاغا قالخدیلار . نوکرلر آتلارین یویه نینی حاضیرلاییب دایاندیلار . جاهاندارآغا گوزله نیلمه ده ن آغیر ضربه آلان آداملار کیمی بیر آنلیغا اوزونو ایتیردی . یئر ائله بیل آیاغی نین آلتیندان قاچیب لنگر ووردو . اونون قولاقلاری گویولده دی ، گوزلری نین قاباغیندا قارا دایره جیکلر اوینادی . (( آغیلا گلن باشا گلر )) ، - دئیه دوشوندو و ایلدیریم سورعتیله نه ائتمه لی اولدوغونو ، آرادان نئجه چیخاجاغینی قرارلاشدیردی .
پریستاو ایشاره ایله اونو یانینا چاغیردی . جاهاندارآغا توفنگی چیینی نده ن چیخارتدی و آغیر آددیملارلا معره که نین اورتاسینا گلدی . کازاکلار پریستاوین دووره سینده سیخلاشدیلار . اونلار اوز – اوزه دایاندیلار . جاهاندارآغانین قیللی قاشلاری گوزونون اوستونه ائندی ، پریستاو اونون ضهمیلی باخیشلاری نین معناسینی آنلاماسا دا ، باشینی ترپه دیب گولومسوندو . (( خالیص شامیل دیر )) ، - دئیه اوره یینده ن کئچیردی . سونرا یانینداکی استولو گوستردی . جاهاندارآغا اوتورماق ایسته مه دی . پریستاو اوزونو احمده توتوب دئدی کی ،
(( اونو باشا سال ، قوی اوتورسون )) . جاهاندارآغا احمدین ایضاحیندان سونرا استولو کنارا چکیب ایله شدی . بیر آز ساکیتله شسه ده ، سکسکه لی قالدی . گوموش قوتوسونو چیخاردیب پاپیروس ائشدی . پریستاوین سسی یئنی ده ن ائشیدیلدی :
- موللا صادیق کیمدیر ؟
- منم .
- گل بورا .
موللا صادیق عباسینی دوزه لتدی . تسبئحینی چئویره – چئویره او بیری طرفده ن پریستاوا یاخینلاشدی . جاهاندارآغا ایله یاناشی دوشمک ایسته مه دی . پریستاو اونادا یئر گوستردی . سونرا اوزونو جاهاندارآغانین ، هله ده آیاق اوستونده دایانان قوهوملارینا توتدو :
- سیز نییه قالخمیسینیز ، اوتورون .
احمد اونون دئدیکلرینی ترجومه ائتدی . جاهاندارآغا باخیشلاری ایله اونلارا ایجازه وئردی .
پریستاو کندین بوتون آغساققاللارینی چاغیردیقدان سونرا الینده کی کاغاذی یئره قویدو . اطرافیندا اوتورانلارا باخدی . او ، یئرلی قایدا - قانونلاری اویره نمه یه چالیشان مامورلاردان ایدی . بیلیردی کی ، هر خالقین اوزونون ضییف و قووه تلی جهتی وار . بونلاری اویره نیر و یئری گلنده اونلاردان باجاریقلا ایستیفاده ائتمه یه چالیشیردی . او ، باشا دوشموشدو کی ، کندلیلرده هله طایفا و نسیللر وار ، اونلارین آغساققالی نه دئسه ، اونا تابئع اولورلار . بیر ده ، بو طایفالارین اوزلری نین آراسیندا دا ضددییه تلر وار . یئری گلنده بونلاردان دا ایستیفاده ائتمه یی پریستاو نظرده ن قاچیرماماغی فایدالی اولدوغونو یقینله شدیرمیشدی . ایندی ، گوی تپه یه گلمزده ن وول ، پریستاو بو کندین وارلی و نوفوذلو آداملارینی موعییه نله شدیرمیشدی . اونون مقصدی همین آداملاری اله آلماق و نه ایش گورسه ، اونلاردان ایستیفاده ائتمک ایدی . او ، فیکرینده یانیلمادیغینی ائله سیاهینی گوتوروب جاهاندارآغانین آدینی اوخویاندا جاماعاتین بیر حیسسه سی نین تلاشلا آیاغا قالخدیغینی گوره ن کیمی آنلادی . او همده بو یوللا کندده کیمین گوجلو ، کیمین ضییف اولدوغونو موعییه نله شدیردی . پریستاو چوخ یاخشی بیلیردی کی ، بو آداملارلا هله چوخ گوروشه جکدیر .
پریستاو آیاغا دوردو . بیر خئیلی سوکوتلا دایانیب ، اونون نه دئیه جه یینی گوزله ین گوی تپه لیلری نظرده ن کئچیردی :
- جاماعات ، کورون او اوزونده کی مئشه بوندان سونرا پادیشاهین اوو یئری اولاجاق . اورایا یاخین گئتمک ، قوروغا گیرمک قاداغاندیر . سیزی خبردار ائدیره م ، کیم قانونو پوزسا ، ایجازه سیز او طرفلره هرله نسه ، مئشه ده اوو ائله سه ، جزالاناجاق . اله کئچه نی بیرباش سیبره گونده ره جه- یه م . قوروغون کئشیکچی لری نین سوزونه باخمایانلار یئرینده جه گولله له نه جک .
پریستاو سوسدو . سوزونون جاماعاتا نئجه تاثیر ائتدیی نی یوخلاماق مقصدی ایله آداملاری بیر – بیر گوزآلتی سوزدو . او گوردو کی ، هامی تعججوب ایچینده دیر . آغساققاللار فیکیرلی – فیکیرلی باشلارینی آشاغی سالمیشدیلار . جاهاندارآغا پاپیروسونو توستوله دیردی ، موللا صادیق ایسه تسبئح چئویرمه یه آرا وئرمیردی . ائله بیل جاماعاتین اوستونه سو اله نمیشدی .
احمد پریستاوین دئدیکلرینی ترجومه ائتدیکده ن سونرا موللا صادیق عاده تی اوزره عباسینی چیینینده دوزه لتدی ، قورآن اوخویاجاغمیش کیمی بیر – ایکی دفه اوسکوروب بوغازینی آریتلادی :
- جناب پریستاو ، او یئرلر ده ده – بابادان بیزیم کندین اولوب . مالیمیز ، بینه لریمیز اورا ایله دولانیب ، ایندی جاماعات نئیله سین ؟
پریستاو موللادان بو جاوابی گوزله میردی . اونا گوره بیر آز دوروخدو .دوغرو سوزه جاواب تاپا بیلمه دیی نده ن ، آزجا سسینی اوجالتدی :
- ایندییه جن نه اولوبسا ، اونونلا ایشیم یوخدور . بو گونده ن سونرا قوروق طرفه هئچ کس آیاق باسمامالیدیر .
- بئله چیخیر کی ، بیز سیزه بورجلویوق ، - دئیه جاهاندارآغا ساکیتجه باشلادی ، - سیزین دئدیی نیزی نئجه باشا دوشک ، جناب پریستاو ، یئرسیز گلدی ، یئرلی قاچ ؟
- جاهاندارآغا من سنی آغیللی آدام حئساب ائله ییردیم ، بو نه سوزدور ، دانیشیرسان ؟ بو منیم یوخ ، قوبئرناتورون امریدیر . من بورایا سیزده ن ایجازه آلماغا گلمه میشم .
- به اوندا بیزی بورایا نه یه ییغیبسان ؟
- اگر سیز دینج دایانسایدی نیز ، من نه بورایا گله ردیم ، نه ده سیزی چاغیراردیم .
- بیز نه ائله میشیک ؟
- بو ساعات بیله رسینیز . – پریستاو اوزونو جاماعاتا توتدو و سسینی اوجالتدی . - سیزین کندده ن سئمئنارییادا اوخویان وارمی ؟
جاماعات دینمه دی . هامی بیر – بیری نین اوزونه باخدی .گوی تپه لیلر باشا دوشدولر کی ، پریستاو اشرفی آختاریر . بلکه ده بو قده ر آتلی کازاک توکولوب گلیب کی ، اونو آپارسین . هئچ کس ، جاهاندارآغانی ایسته یه نده – ایسته مه یه نده بونا راضی اولمازدی .
جاهاندارآغا پریستاوین نه یه ایشاره ائتدیی نی و صوحبتین هارایا گتیریب چیخاراجاغینی آنلادی . او هله "کور"ون ساحیلینده کازاکلارلا توققوشاندا بیلمیردی کی ، بو مسله بئله قالمایاجاق . جاهاندارآغا هئچ نه سئزدیرمه ده ن گوزآلتی اوز آداملارینا ، لاپ کناردا دایانان شامخالا ، اشرفه باخدی . تاپدیغین هیجانلا اطرافا بویلاندیغینی گوردو . او ، باشا دوشدو کی ، گوی تپه لیلرین هئچ بیری اونو اله وئرمه یه جک ، هئچ کس اشرفین آدینی چکمه یه جک . کیشی داهادا اوره کله ندی .
پریستاو سوالینی تکرار ائتمه لی اولدو :
- یئنه سوروشورام ، سیزین کندده ن سئمئنارییادا اوخویان وارمی ؟
- وار .
- کیمدیر ؟
- منیم اوغلوم .
پریستاو گوزله مه دیی بو جاوابدان سونرا بیر خئیلی نئجه حرکت ائده جه یینی موعیین له شدیره بیلمه دی . جاهاندارآغا گوزونو زیلله ییب اونون سونرا نه دئیه جه یینی گوزله دی . پریستاو بونو دویدو . هم تعججوب ، همده قضب دولو سسله دیلله ندی :
- اونون نه ایش توتدوغونو بیلیرسنمی ؟
- یوخ .
- مئشه ده کازاکلارین یولونو کسیب .
- بلکه کازاکلار اونون یولونو کسیب ؟
- کازاکلار قولدور دئییل ؟
- منیم اوغلومدا قولدور دئییل .
پریستاو ائله بیلیردی کی ، جاهاندارآغا اوغلونون تقصیرکار اولدوغونو بوینونا آلاجاق ، بلکه ده خاهیش ائده جکدی کی ، اونون گوناهیندان کئچسین . آنجاق جاهاندارآغا پریستاوین گوزله دیی نین عکسینه ، آز قالیردی کی ، اونون اوزونو گوناهلاندیرسین . پریستاو سسینی بیرآز آلچالتدی و سیناییجی نظرلرله جاهاندارآغانین اوزونه باخدی :
- دئمک اوندا تقصیر یوخدور ؟
- اولسا ، اوزوم تنبئهینی ائله ردیم .
ایندییه قده ر یالنیز دئییله نلری ترجومه ائده ن و صوحبته قاریشمایان احمد دوزه بیلمه دی :
- جناب پریستاو تورپاق کندلی نین چوره یی دیر . بونو اونون الینده ن آلماق بویوک جینایت دیر . همین مئشه "کور" اطرافینداکی کندلیلرین دیر و اونلار همین مئشه ایله دولانیرلار .
- سن بو ایشلره قاریشما .
- آخی مومکون دئییل . سیز بیچه نه کلره کئشیکچی قویوبسونوز ، یوللاری کسیب سینیز کی ، بوردان گلیب گئتمه یین . بس جاماعات نئییله سین ، گویله اوچسون ؟
پریستاوین اللری خفیفجه تیتره دی . بوینونداکی دامارلار شیشدی . اونون سسینده قضبده ن چوخ ایستئهزا دویولدو :
- تکلیفین نه دیر، جناب پئتئربورگ استیودئنتی ؟
- بس سیزین تکلیفینیز نه دیر ، جناب پریستاو ؟
- منیم تکلیفیم آیدیندیر . بو گونده ن سونرا هئچ کس او طرفلره آیاق باسمایاجاق .
- بو مومکون دئییل .
- نئجه ، حوکومتله حوکومتلیک ائلییه جکسینیز ؟ کونلونوزه سیبیر دوشوب ؟ ایسته ییرسینیز کی ، بالالارینیز یئتیم قالسین ؟
- حده – قورخو لازیم دئییل ، جناب پریستاو ، آیدا ، ایلده جانیشین ین کئفی دوروب بیر دفه اووا چیخاجاق دئیین ، جاماعاتین یئرینی الینده ن آلمازلار . بو ، عدالت سیزلیک دیر . اگر پادیشاه بونو بیلسه ، سیزی جزالاندیرار .
پریستاو گوی تپه یه یولا دوشه نده ائله ظن ائتمیشدی کی ، جاماعاتین اوستونه تپینن کیمی هامی قورخوب گئری چکیله جک ، کازاکلاری مئشه ده آغاجا سارییان آداملاری درحال تاپیب توتاجاق ، کازاکلارین قاباغینا قاتیب حبس خانایا گونده ره جکدی . آمما ایندی گوزله مه دیی بو وضییه تده ن چاشیب قالمیشدی .
- جناب استیودئنت ، بلکه پادیشاهی چاغیراق گلیب سیزده ن ایجازه ایسته سین ؟
- نه اولار ، اوز تابئع لری نین قایدینا قالماق پادیشاهین بورجودور .
- کس سسینی ! – پریستاوین ائله بیل بئینینه قان ووردو ، گوزلری آز قالدی حده قه سینده ن چیخسین . – بو ساعات قوللارینی باغلاتدیریب ، ساللام آتین قاباغینا .
احمدین دوداغی آزاجیق قاچدی . گوزلرینده قضب قاریشیق بیر ایستئهزا دولاشدی . اوزونو آله آلدی و سسی نین تیتره مه سینی بوروزه وئرمه دی :
- منی حده له مه یین ، جناب پریستاو ، بئله شئیلری چوخ گورموشم .
- یوخ ، آز گورموسن . واختیندا سنین باشینا آغیل قویسایدیلار ، ایندی بئله دانیشمازدین .
احمد گرگین دویوشده ن چیخمیش آدام کیمی درینده ن نفس آلیب گولومسوندو :
- دوز ایش گورمورسونوز ، جناب ، آدام گمی ده اوتوروب ، گمیچی ایله داوا سالماز .
پریستاو باشا دوشدو کی ، بو کندده احمدله بئله آچیق دانیشماق اونون خئیرینه اولمایاجاق . جاماعاتین گوزو قاباغیندا مغلوب اولوب گئری چکیلمه سی ایسه مومکون دئییلدی .
گوی تپه لیلرین آغساققاللاری احمدین جساره تینه تعججوب ائدیردیلر . جاماعات ایندییه قده ر احمده یازیق ، قریب ، اوزباشینی دولاندیران بیر آدام کیمی باخیردیلار . ایندی ایسه او بیرده ن – بیره گوی تپه لیلرین گوزونده بویویوردو . ائله بیل پریستاو دا بونلاری باشا دوشوردو :
- نه دئمک ایسته ییرسن ؟
- بیزی اینجیتمه یین .
پریستاو سوسدو . احمدی ساکیت باخیشلارلا گوزآلتی سوزدو . اصلینده او ائله کنده گلیب احمدله صوحبت ائله دیی ایلک آندان اوندان شوبهه له نمیش و قرارا آلمیشدی کی ، شه هره قاییدان کیمی اونون آدینی شوبهه لی آداملار سیاهیسینا یازسین ، آیریجا بیر قوولوق دوزه لتسین و احمدین اوزه رینه نظاره تچی قویسون . او ، بئله بیر عقیده ده ایدی کی ، اگر سنه تاپشیریلان قضادا راحاتلیق اولماسینی ایسته ییرسنسه ، گره ک مکتبده ن قووولموش ایستیودئنتلری گوزده ن قویمایاسان . خوصوصن ده پئتئربورگ طله به لرینی . آنجاق ، دئیه سن ، پریستاو داها جیددی حرکت ائتمه لی اولاجاق و ائله ایندی جزالاندیراجاقدی .
او ، کازاکلارا باخدی . بایاقکی قیللی پاپاق ، یئکه پر کازاک ایره لی چیخدی . پریستاوین سسی خیریلدادی :
- بونون قوللارینی ساری یین .
جاهاندارآغا سیچراییب آیاغا قالخدی . گوی تپه لیلر ایشاره گوزله ییرمیش کیمی یئرلرینده ن آتیلدیلار . آداملارین جرگه سی سیخلاشدی . بیر آز بوندان اوول بولوک – بولوک ، طایفا – طایفا اوتوران کندلیلر زنجیر حلقه سی کیمی بیرله شدیلر . جاهاندارآغا ایله کازاک دوش – دوشه دایاندی . هر ایکی سی نین قیللی قاشی آشاغی ائنیب گوزلری نین اوستونو اورتدو . اونلارین ببکلری گئنیشله ندی .
- بیز اونو وئرمه ریک ، جناب پریستاو .
- نئجه یعنی وئرمه ریک ، من سنین اوغلونو دا ، اونون یولداشلارینی دا ایسته سم ، بو ساعات قاباغیما قاتارام . اوزباشیناسینیز ؟
- اوزباشینا دئییلیک ، آمما ائلین قایدا – قانونو دا وار .
- سیز منه قانون اویره ده جک سینیز ؟
- پریستاو ، من دئییره م ، داوا – دالاشسیز ، بیر – بیریمیزی باشا دوشه ک . ترسینه چکسه ک ، حوجت له شسه ک ، ایش پیس اولار .سن بیزی آیاغی چاریقلی گورمه .
پریستاو الینی گئری یانیندا چارپازلادی . پنجه سی اوسته قالخیب بیر – ایکی دفه یئرینده سیلکه له ندی . اونون دوشلرینده کی مئداللار بیر – بیرینه دییب جینگیلده دی . پاگونونون زر بافتالی قوتازلاری پاریلدادی :
- ایندی نه ائده ک دئییرسن ، جاهاندار آغا ؟
- ایسته سه نیز مصلحتله شیب دیل تاپاریق .
- یاخشی گئری دورون .
کازاکلار گئری چکیلدیلر .