(11)
گوی تپه لیلر ایکی گونده ن سونرا چای قووشان آدلی صفالی بیر یئرده دوشرگه سالدیلار . آرابالاری یولدان کنارا چکیب کوپوکلو داغ چایی نین ساحیلینده کی چمنلیکده آچدیلار . ایستی ده ن تنتی میش کللر بویوندوروغون آلتیندان چیخان کیمی اوزلرینی سویا وئردیلر . فیسیلداشا – فیسیلداشا لذذه تله چیمدیلر . یول بویو آرابالارین سیلکه له ییب یوردوغو اوشاقلار سئوینه – سئوینه قاچیشماغا ، یومورو قارا چای داشلاری ایله جامیشلاری یالامالاماغا باشلادیلار . آروادلار آرابالارین کولگه سینه پالاز سالدیلار ، یاستیق ، موتککه چیخارتدیلار . کیشی لر بالتا گوتوروب یولون او اوزونده کی مئشه یه ، اودون قیرماغا گئتدیلر . موللا صادیق گیل آرابالاری کوچون او باشیندا ، جاهاندارآغاگیل ایسه آشاغی طرفینده ایری بیر پالید آغاجی نین آلتیندا آچدیلار . اوجاقلار قالاندی ، ساماوارلار چیخاریلدی ، کندده ن تداروک سوز یولا دوشنلر خمیر یوغوروب ساج آسدیلار . بعضی آرابالارین یانیندا قازان دانقیلدادی ، یاغدا قیزاردیلمیش سوغان ایی اطرافا یاییلدی .
اشرف پئنجه یینی چیینینه سالیب یولا دوغرو گئتدی . جاهاندارآغا کولگه ده موتککه یه دیرسه کله نیب فیکیرلی – فیکیرلی اوتورموشدو .
آغیز – آغیزا قوووشان داغلارین آراسی ایله آخیب گلن چایا تاماشا ائدیردی . آیاق سسی ائشیتدیکده دونوب اوغلونا باخدی :
- هارا گئدیرسن ، آ بالا ؟
- بولاغا طرف .
- چوخ لنگیمه .
اشرف دیکدیره چیخدی . آستا آددیملارلا ، جیغیرلا ، دره نین او باشینداکی بولاغا دوغرو یوللاندی . بولاغین آخارینا یئنیجه چاتمیشدی کی ، کیمینسه تووشویه – تووشویه آرخاسینجا گلدیینی حیسس ائدیب گئری دوندو . سالاتین تنگه نفس حالدا اوزونو اونا یئتیردی :
- من ده گئدیره م .
اشرف چیینی سهنگلی قیزا باخدی . اونون ایینینده بوز قوفتا واردی . حالبوکی همیشه داغ یولوندا قیرمیزی آتلازدان دون گئیینه ردی ، آغ کالاغایی اورته ردی . ایندی ایسه صاندیقدا قات کسمیش قارا کالاغایینی بوینونا دولامیشدی ، او ، بی بی سی نین یاسینی ساخلاییردی ، اشرف بونو باشا دوشدو و هئچ نه دئمه دی . اونلار یاناشی آددیملادیلار .
بولاغین سویو گوی اوتلارین آراسی ایله شیریلدایا – شیریلدایا آخیردی . یارپیزلارین عطرینده ن نفس آلماق اولموردو . اشرف هرده ن آیاق ساخلاییب اونلارا باخیر ، درینده ن نفس آلیب بو تمیز عطیر قوخویان هاوانی اودوردو . هاردانسا اوچوب گلمیش بال آری لاری گاه یارپیزلارا قونور ، بیر مودده ت دایانیب نه ایسه آختاریر ، سونرا دا ویزیلتی ایله هاوایا قالخیب بنووشه رنگلی گوللرین باشینا دولانیردی . طبیعتین بو ساکیت آهنگی ائله بیل زومزومه ائدیر و آداما لایلا چالیردی .
اشرف آیاغی نین ایسلانماسینا اهمییت وئرمه دی . آشاغی اییلیب کوکو سودا اولان یارپیزلاری دردی . سالاتین اوندان گئری قالمادی .
- اوره یین دووغا ایسته ییرمی ، آی قاغا ؟
- لاپ بورنومون اوجو گوینه ییر .
- داغا چاتان کیمی اوزوم سنه لذذه تلی بیر آیران دووغاسی بیشیره جم . یارپیزینی دا چوخ ائله یه جم . اوخودوغون یئرده سیزه دووغا بیشیریرلرمی ؟
- یوخ .
- خنگل نئجه ؟
- یوخ .
- بس پلوو ؟
- هفته ده بیر دفه .
- ائله بو ؟
- بو آزدیر ؟
- آزدی ، به نه . هئچ فیکیر ائله مه . بو یای سنه اوزوم قوللوق ائله یه جم . گره ک سنی او قده ر کوکه لده م کی ، لاپ موتالا دونه سن .
- سونرا پارتلایارام .
- بیی ، ایراق جانینیدان ، ائله دئمه ، آی قاغا . – سالاتین سوزونه آرا وئردی . بیر خئیلی ترددود ایچینده دایاندی . سونرا آستادان قارداشینا موراجیعت ائتدی . – آی قاغا ؟
- نه دی ؟
- بیر سوز سوروشسام اینجی مز سن کی ؟
- دئه گوروم .
- اورادا پالتارلاری نیزی اوزونوزمو یویورسونوز ؟
- نییه اوزوموز یویوروق ؟ مکتبده پالتار یویانلار وار .
- دئمک ، هر شئیی نیزی حاضیر وئریرلر ؟
- هامی سینی .
- صاندیقدا ساخلادیغین پالتارلاری دا مکتبده ن وئریبلر ؟
- هه .
- آی قاغا ، اونو نییه گئیینمیرسن ؟ خلوتجه صاندیغی آچیب باخمیشام . ائله یاخشی دیر کی ، دویمه لری پار – پار پاریلداییر ، کمرین اوستونده یازی دا وار . من سنی هئچ او پالتاردا گورمه میشم .
- کیشی قویمور .
اشرف قاباغا دوشموشدو . سالاتین قارداشی نین دالینجا ایره لی له ییردی . او ، گوزونو اشرفین کوره یینه زیلله میشدی . بیر آنلیغا اونو سئمینارییا پالتاریندا تصوورونده جانلاندیرماغا چالیشدی . قارداشی (( کیشی قویمور )) – دئدیکده خئیلی تعججوب ائتدی . نییه قویمور ، پیس پالتار دئییل کی ؟ - دئیه خیالیندان کئچیردی . آنجاق آشکاردا بیر شئی دئیه بیلمه دی ، باشا دوشدو کی ، دوغرودان دا قارداشی کندده مکتب لیباسینی گئیینمه یه جکدیر . آنجاق او ، اشرفی همین پالتاردا گورمک ، اونا نئجه یاراشدیغینی بیلمک آرزوسو ایله آلیشیب – یانیردی . ائله بو مقصدله ده خئیلی سوسدوقدان سونرا تزه ده ن دیلله ندی :
- آی قاغا ، بیلیرسن نه ائله یه ک ؟ داغا چاتان کیمی خلوتجه همین پالتارینی گئیین ، من باخیم . گوزلریین آغریسین آلیم ، یاخشی می ؟
- یاخشی ، داها بوندان اوته ری نییه یالواریرسان ؟
- آی قاغا ، بیر سوز ده سوروشماق ایسته ییره م .
اشرف گئری دوندو . سئوینجده ن و داغلارین سرین ، تمیز هاواسیندان یاناقلاری قیزاران باجی سینا ، اونون فرحده ن آلوولانیب – یانان گوزلرینه باخدی :
- دئه گوروم ، نه سوروشماق ایسته ییرسن ، آی شئیطان ؟
- سیزده ن قیزدا اوخویورمو ؟
- یوخ ، قیزلارین آییریجا مکتبی وار . اشرف باجیسی نین قولوندان توتدو . اوزو کنارا چیخیب اونو جیغیرا سالدی . یاناشی گئتمه یه باشلادیلار . بیر خئیلی هئچ بیری دینمه دی . سالاتین سوسوب اونون نه دئیه جه یینی گوزله دی . اشرف ایسه اوره یینده کیلری اونا نئجه ایضاح ائتمه یی فیکیرله شدی . او ، "قوری " موعللیملر سئمینارییاسیندان ، دیرئکتور سئمیونوون ، چئرنییایئویسکی نین ، کیپیانی نین وئردیگی درسلرده ن ، اونلارین کونوللو اولاراق قیزلار اوچون کیمنازی یا آچدیقلاریندان ، اورادا پولسوز درس دئمه لرینده ن باجی سینا ناغیل ائتمک ایسته دی . هرده ن بیر هر ایکی مکتب طلبه لری نین بیرلیکده موسابیقه لر تشکیل ائتمه لرینده ن قیزلارین اوغلانلارلا برابر صحنه یه چیخیب شئعر اوخوماسیندان ، کیچیک صحنه جیکلر گوستردیکلرینده ن باجی سینا دانیشماق ایسته دی . آنجاق بونلارین سالاتینا چوخ قریبه تاثیر باغیشلایاجاغینی دوشونوب ، بو صوحبتی باشقا واختا ساخلاماغی قراره آلدی . - بیلیرسنمی ، سالاتین ، اوخوماق یاخشی شئیدیر . آدام چوخ شئی اویره نیر . خاصییه تی ده دییشیر . من اوخوموش قیزلاری گورموشم . اونلارین پالتارلاری دا قشنگدیر ، اوزلری ده . دانیشاندا آدام قولاق آسماقدان دویمور . اگر بیزیم قیزلار اوخوسالار اونلاردان دا گوزه ل اولارلار .
- آی قاغا ، هئچ ائله شئی اولارمی؟
- نییه اولمور ؟
سالاتین دینمه دی . اشرف سئزدیرمه ده ن باجی سی نین هارایا ایسه زیلله نمیش فیکیرلی گوزلرینه باخدی . بو گوزلرده افسانه وی ناغیللاردا سویله نن سئحیرلی ، عینی زاماندا اولدوقجا جاذیبه دار بیر عالمه قوووشماق حسره تی ایله قوورولوب - یانان ، لاکین بونون مومکون اولمادیغینی درک ائدیب مایوسلاشان بیر آدامین کئچیردیی حالی موشاهیده ائتدی . قیز خیالن چوخ اوزاقلارا گئتمیشدی . او اوزو ده حیسس ائتمه ده ن یوخولو اوشاق کیمی گاه گولومسونور ، گاهدا قاشلارینی چاتیب جیددیله شیردی . اشرف اونو شیرین خیاللاردان آییرماق ایسته مه دی . سالاتین بیرده ن کوکسونو اوتوردو :
- گوره سن ، منده اوخویا بیله ره ممی ؟
- نییه بیلمیرسن ؟
قیز بو سوزلری اوره یینده ن سویله دیینی ظن ائدیردی . آنجاق اشرفین سسینی ائشیده نده دیکسیندی و باشا دوشدو کی ، قارداشی اونون دئدیکلرینی ائشیتمیشدیر . او دایانیب اشرفین اوزونه باخدی :
- باجاراراممی ؟
- نییه باجارمیرسان ؟
- سنین ، بیرده اوزومون آدیمی یازا بیلسه یدیم ، دونیادا هئچ دردیم اولمازدی .
- بونا نه وار ، آی دلی ، یایلاغا چاتان کیمی سنه بوتون حرفلری اویره ده جم . آرانا کوچنه قده ر تکجه بیزیم آدیمیزی یوخ ، اوره یینده ن کئچنلرین هامی سینی یازماغی باجاراجاقسان . آمما بیر شرطیم وار ، گره ک عوضینده هر گون منه لذذه تلی خوره ک بیشیره سن .
- بئله منیم گوزوم اوسته .
باجی – قارداش قول – قولا وئریب بولاغا یاخینلاشدیلار . ائله بو واخت قارشیداکی دونگه ده ن ، مئشه طرفده ن ایکی قیز چیخدی . اشرف اونون بیرینی درحال تانیدی . دئیه سن ، قیزدا اونو گوردو . تئز کالاغایی- سینی ایره لی چکدی . باشینی آشاغی سالدی . ساکیتجه اونلارین یانیندان اوتمک ایسته دی . آنجاق اشرف :
- پاکیزه ، - دئیه اونو چاغیردی .
قیز آیاق ساخلادی .اشرفین سونرا نه دئیه جه یینی گوزله دی ، سالاتینین ایسه تعججوبده ن قاشلاری چاتیلدی .
- بیر دولچا سو وئر .
پاکیزه قیپ قیرمیزی اولدو . گوزونو قالدیریب اشرفه ، سونرا دا سالاتینا باخدی . اونلاردان بیر آز آرالی دایانیب گوزله ین قیز قاش – گوز اویناتدی . حیم – جیم له باشا سالماغا چالیشدی کی ، دایانما ، آنجاق پاکیزه یئرینده ن ترپه نمه دی . سالاتینین حیرصینده ن دیشلری کیلیدله ندی .
- آ قاغا ، خالقی یولوندان ساخلاما ، اونسوزدا بولاغا چاتمیشیق .
- یوخ ، من پاکیزه نین سهنگینده کی سودان ایچمک ایسته ییره م .
پاکیزه نین دوداغی آزجا قاچدی . دیشلری پاریلدادی . کالاغایی سی سوروشدو . اونون آغ بوینو ، قولاغینداکی قیزیل سیرغاسی گوروندو ، سینه سی نین اوستونه قده ر ساللانان ایکی قاتار مرجان اشرفین دیققتینی جلب ائتدی . قیزین نظره گوجله چارپاجاق قده ر ظریف اولان بوخاغی صیفه تینی داهادا گوزه ل له شدیردی .
- دولچا هانی ؟
اشرف اونون سینه سی نین تیتره دیی نی دویدو . سالاتینین الینده ن دولچانی آلدی . پاکیزه قولونو چیینینده کی سهنگین قولپونا کئچیرمیشدی . او آزاجیق آشاغی اییلدی . تیخاجی چیخارتدی . خیردا ، قیرمیزی آلچالار تاققیلتی ایله بیر – بیر دواچایا توکولدو ، بیر خئیلی ده اطرافا سپه له ندی . پاکیزه قونور گوزلرینی سوزوب اشرفین اوزونه باخدی . دوداقلاری آستادان ترپه ندی . آز قالا پیچیلتی ایله دیلله ندی :
- بسدیرمی ؟
- بسدی ، بسدی ، سونرا اوزونه قالماز .
- سهنگ دولودور .
سالاتین پاکیزه نین حرکتلرینه حئیره تله باخسادا ، سهنگده ن سو یئرینه آلچا توکوله نده تعججوبله دیلله ندی :
- آ ا ز ، اتین توکولمه سین ، بو نه دیر ؟
- بولاغین اوستونده ن او یاندا بیر آغاج وار ، اوستو دولودور ، ایسته ییرسینیز سیزده گئدین درین .
پاکیزه جاماعات بیلمه سین دئیه قصده ن سهنگه سو عوضینه آلچا دولدوردوقلارینی و گیزلینجه آرادان چیخماق ایسته دیکلرینی ایضاح ائتمه دی . ساکیتجه سهنگین آغزینی تیخادی . گوله – گوله سالاتینین اوزونه باخدی . گئری دونوب جیغیرا دوشمزده ن اوول ، آنی سئزیلمه یه جک درجه ده سورعتلی بیر چئویکلیکله گوزونون اوجو ایله اشرفی سوزدو . اشرفه ائله گلدی کی ، قیز آیاق ساخلاییب داها نه ایسه دئمک ایسته ییر . اوزو ده حیسس ائتمه ده ن جساره تله ندی :
- منده ن اینجی مه ییبسن کی ؟
- نه ده ن اوته ری ؟
- کورون قیراغیندا سنی قورخوتدوم .
- تک منی قورخوتمادین کی ، هامینی هورکوتدون . آدام آتی یاواش سوره ر .
- دالیمیزجا چوخمو قارغادین ؟
پاکیزه نین یاناقلاری داهادا قیزاردی . گوزلرینده سئوینج قیغیلجیمی اوینادی . دوداغینی دیشله ییب یئنی ده ن سیلکه له ندی :
- اولمایا منیم سوزلریم خطرینه دییب ؟
- یوخ ، ائله – بئله سوروشورام .
- من کوسمه میشم . سنی بیلمیره م .
پاکیزه ارکیانا اشرفین گوزونون ایچینه باخدی و قلبه سینه امین اولان آداملار کیمی دابانی اوسته فیرلانیب ، او بیری قیزین دالینجا یویوردو . اشرف حئیره تله اونون آرخاسینجا باخدی . پاکیزه یولداشینا برابرله شه نده قیز اونو مذممه ته باشلادی . اشرف اونلارین سوزلرینی آیدینجا ائشیتدی .
- بیزی نییه بیابیر ائله دین ، آ گونو قارا ، ایندی اشرفین اوزونه نئجه باخاجاقسان ؟
- نه ائله ییم ، او سو ایسته دی ، منده اولانیمی وئردیم .
سالاتین قارداشی نین یئرینده ن ترپه نمه دیی نی ، قیزلاری کوچون برابرینه قده ر گوزو ایله موشایعت ائتدیی نی گوره نده لاپ حئیره تله ندی . اشرفین بو حالی اونو هورکوتدو . یاواشجا قارداشی نین قولونا توخوندو :
- سنه نه اولوب ؟
- هه ... هئچ ... نه ... گئده ک .
اونلار بولاغین اوستونده ده ، گئری قاییداندا دا هئچ نه دانیشمادیلار ...
آخشام اولدو . گوی تپه لیلر دوشرگه ده ن ترپه نمه دیلر . اونلار بورادا بیر خئیلی دینجه لمه یی قراره آلدیلار . اونسوز دا یوللار توتولموشدو . سورو ایله یایلاغا قالخان قویونلارین ، قاتارلاشان آرابالارین ، ایلخی لارین ، آتلی – پییادا حرکت ائده ن آران آداملاری نین الینده ن ترپه نمک اولموردو . یوللارین اوستونو بولود کیمی بوروین توز آخشاما قده ر یئره چوکمور ، سورولرین آردینجا سورونه – سورونه یوخاریلارا قده ر قالخیردی . بیر آز گوزله مک ، حئیوانلارا دا راحاتلیق وئرمک لازیم ایدی .
آرابالارین یانیندا اوجاق قالادیلار . داغلارین قورو فیستیق اودونو چاتیردادی ، قیغیلجیملار اطرافا سیچرادی . آلوولار دیلیم – دیلیم اولوب گویه قالخدی . اطرافدا هرله نه نلرین کولگه سی اوزاندی ، چایین اوستونه سریلدی . آلوولارین ایشیغی بیر – بیرینه قاریشدی . قارانلیقدا مورگوله ین داغلارین دوشونه ایشیق دوشدو ، قیژیلتی ایله آخان چایین سینه سی پاریلدادی . گویون اوزونده شفق اوینادی .
جاهاندارآغا آرابالارین یانیندا اوجاق قالاماغا ایجازه وئرمه دی . ایشیقدا هر شئیین نظره چارپاجاغیندان ائحتیاط ائتدی . اونون نوکرلری مال – قارانی بیر آز کناردا ساخلادیلار ، ائله اوراداجا اوجاق قالادیلار .
جاهاندارآغا پالید آغاجی نین دیبینده اوتوردو . اشرف اونون گئری یانیندا ایله شدی . ساکیتجه دوشرگه یه باخدی . اوجاقلار اولماسایدی ، ایکی آددیملیقدا نه لر باش وئردیی نی تعیین ائتمک چتین له شردی . گویون اوزونه اولدوزلارین سپه له نمه سینه باخمایاراق ، چایین وادیسی قارانلیق ایدی . داغلار او قده ر اوجا ایدی کی ، سمانین بیر پارچاسیندان باشقا هئچ نه یی گورمک مومکون دئییلدی . سیلدیریم قایالارین و داغلارین قاتی کولگه سی گئجه نین قارانلیغینی داها دا توندله شدیریردی .
آخشامدان خئیلی گئچدی . آرابالارین دال تاختاسینا باغلانان ایتلری آچدیلار . اوشاقلار و آروادلار دیه لره دولوشدولار . اوجاقلارین آلوولاری آزالدی . ال – آیاق ییغیشیلدی . گئجه اویاق قالیب ، نووبه ایله کئشیک چکه سی آداملاردان باشقا هامی راحاتلاندی . اشرف ده آرابایا گلدی .
سالاتین یئر سالیب قارداشینی گوزله ییردی . اونلار یاناشی اوزاندیلار . خئیلی سوکوت ایچینده دایاندیلار . سویون قیژیلتی سینا ، مئشه قوشلاری نین سسینه قولاق آسدیلار . هرده ن بیر هاردانسا شاققیلتی گلیر ، قایالار دیغیرلانیب چایا دوشوردو . گورونور ، مال – قارانین ایینی دویان آیی لار یاخینلاردا دولاشیردی ...
کیمسه توتک چالماغا باشلادی . اشرف گوزلرینی یوموب لاپ اوشاقلیقدان سئوه – سئوه قولاق آسدیغی هاوالاری دینله دی . جمی سکیز دئشیی اولان عادی ، نازیک میس توته یی دوداقلارینا یاخینلاشدیریب چالان آدامی گوزلری نین قارشی سیندا جانلاندیرماغا چالیشدی . کند آراسیندا هامی نین شومشد آدلاندیردیغی بو توته یین سسی نده قریبه ، اوره یه یول تاپان و خیالی اوزاقلارا آپاران بیر حوزن واریدی .
توتک ده اوولجه چوبان بایاتی چالدیلار ، سونرا دا زارافاتا باشلادیلار . اشرف توتک چالانلاری توتک له آداملارا ساتاشدیقلارینی ، قیز – گلینلره سوز آتدیقلارینی چوخ گوزه ل بیلیردی . نه ده نسه بو ساده و صمیمی زارافاتدان هئچ کس اینجیمیردی . اشرف اوشاقلارین ، یئنی یئتمه لرین ، حتتا یاشلی کیشی لرین بئله توتک چالانلارا جاواب وئردیکلرینی ، بیر – ایکی بامزه سوز دئدیکلرینی ایندی ده خاطیرلاییردی ، او ، بالاجالیقداکی کیمی دیققتله توته یه قولاق آسدی و اونون نه دئدیی نی اوره یینده تکرار ائتدی: (( اده ، اده ، او یولنان گئده ن اوغلان ، قوربان اولوم تئللی باجینا ، قلم قاشلی ، اینجه بئللی باجینا )) .
اشرف آرابانین بوینونا دوغرو گلدی . موتککه نی سینه سی نین آلتینا قویوب آغزی اوسته اوزاندی . اوجاغین اطرافیندا توپلاشانلار بورادان آیدین گورونوردو . سالاتین دا اونون یانینا گلدی . توتک چالان آرا وئردی . اطرافینداکی لار گولوشدولر . سونرا دا اویون هاواسی چالدیلار . اوشاقلاردان بیرینی آیاغا قالدیریب اورتایا سالدیلار ، ال چالیب اویناتدیلار . اونلارین گولوشو ، های – هارایی دالغا – دالغا اولوب چای یوخاری یاییلدی ، دره نی دولدوردو . سالاتین دیرسه یی ایله اشرفه توخوندو :
- آی قاغا ، خوشونا گلیرمی ؟
- یامان . منی قینایان اولماسایدی ، بو ساعات قاچیب اوینایانلارا قوشولاردیم .
- بو دا بایاقکی دئییل ، بیزی بیابیر ائله مه .
- نییه ، اوینایاندا نه اولار کی ؟
- نئجه نه اولار ؟ هئچ سئمینارییادا اوخویان اونلارا قوشولارمی ؟
- نییه ، من اونلاردان آرتیغام ؟
- به نه ، هئچ اونلارین تایی سان ؟
- بیلیرسن نه وار ، سالاتین ، آللاه هامینی برابر یارادیب .
- بیرجه کیری ، کیری ، آخشام واختی آللاهدا – زاددا ایشین اولماسین . قولاق آس ، ماهنی اوخویورلار . باتمیشین گور نه یاخشی سسی وار .
اوتورموشدوم بولاق اوسته ،
قیزلار گلیر دسته – دسته
قوی منی اولدور سونلر ،
بیر آلا گوز قیز اوسته
آمان اووچو وورما منی ،
من بو داغین مالی یام ،
یار الینده ن یارالی یام .
ائله بیل هامی سوسموشدو . نفسینی ایچه ری چکیب بو حزین نغمه یه قولاق آسیردی . ماهنی ایسه قایالاردا عکس – صدا وئریب گئجه نین قارانلیغیندا داها اوزاقلارا یاییلیردی .....
باجی - قارداش دوشرگه ده سس – سمیر کسیله نه قده ر بئله جه اوزاندیلار . توتک سوساندان سونرا آرابانین ایچینه چکیلیب ، یاتماغا حاضیرلاشدیلار . آرخاسی اوسته یاناشی اوزاندیلار . هر ایکی سی گوزونو ده یه نین اوستونده کی گئچه یه زیلله ییب سوسدو . قارانلیقدا بیر – بیری نین اوزونو گورمه سه لرده ، نفس آلمالاریندان یاتیب – یاتمادیقلارینی بیلیردیلر . سالاتین بولاغین اوستونده کی حادیثه نی اونودا بیلمیردی . پاکیزه نین آیریلارکن اشرفین اوزونه نئجه باخدیغی یادیندان چیخمیردی . قیزین گولوشو ، کیرپیی نی چاخماسی ، اشرفی نئجه هوسله سوزمه سی گوزونون قاباغیندان گئتمیردی . (( گونو قارا گلمیشین گوزو ائله بیل ایلان گوزو کیمی اووسونلودور . آز قالمیشدی بیرجه دقیقه نین ایچینده گده نین دیلینی ، آغزینی باغلاسین )) . سالاتین پاکیزه نین گونور گوزلری نین نئجه سوزولدویونو و گوزله نیلمه ده ن آداما نئجه قیقاجی باخدیغینی یادینا سالدی . اونون دوداقلاریندان سیلینمه ین گولوشو ، سول یاناغی نین آزاجیق چوکه لدیی نی نظرینده جانلاندیردی . پاکیزه نین تیتره ک سسی نی بئله ائشیده ن کیمی اولدو . اوزو ده حیسس ائتمه ده ن کوکسونو اوتوردو . (( قارداشیم نئیله سین ، من قیزلیغیملا اولموشه باخا بیلمیره م . گوزو قاییر – قاییر قایناییر . قیمیشاندا آدامین توستوسونو تپه سینده ن چیخاریر . بخته ورین قیزی نین سوموکلری شیرت – شیرت شیرتلاییر . باتمیش ائله بیل قاراچی گوزه لی دیر . قاش – گوزو آدامی یاندیریر ، بئلی ده کی اوزوکده ن کئچه ر . اوزو ده دئیه سن قاغامدان کسیر . اوره یینده شیلتاقلیق اولماسایدی ، اونون قاباغیندا موم کیمی ارییب آخمازدی )) . سالاتینین اوره یینده بیرده ن – بیره قارداشی نین بویونا قووالانان بیر باجی نین ایفتیخاری باش قالدیردی . او ، کندین ان گوزه ل قیزلاریندان بیری نین اشرفده ن اوته ری قوورولوب یاندیغینا سئویندی . (( قوی آغزی نین سویو آخسین ، قوی قارداشیمین دالینجا سورونسون ، بویونا قوربان اولدوغومون بویونا وورولسون ، - دئیه خیالیندان کئچیردی . – هه ، دئیه سن اوره یین توکولور ، هله هاراسی دیر ، چوخلاری نیز قارداشیمین دالینجا سورونه جکسی نیز ، دیلی نیزی بیر قاریش چیخاردیب منه یالواراجاقسینیز ، دور یانیمدا شیرواناجاقسینیز کی ، منی آلین ، من سیزین گلینی نیز اولماق ایسته ییره م . آمما اونو گورمه یه جک سینیز . هامینیزا داغ چکه جم . قارداشیمین بویونا قوربان اولوم ، هله چوخ قیزلار اونون آیاغینا دوشه جک )) .
لاکین بو فرحلی دوشونجه لرین دالینجا گلن باشقا فیکیرلر اونو سارسیدیردی ، اونون سئوینجینی سئل کیمی یویوب اوزو ایله آپاریردی . نینیز
سالاتین بیر آنلیغا بی بی سی نین اولومونو گوزونون قارشی سینا گتیردی . اونون موصیبه تینی یادینا سالدی . (( اونون قانلی سی موللا صادیق دیر ، - دئیه دوشوندو . – اگر اونون فیتنه سی اولماسایدی ، بی بی م نه موریدلرین مئیخاناسی نا گئده ردی ، نه ده باشینا بو ایش گلردی . ده ده م بو دردی هئچ اونودارمی ؟ بوندان اوول ده اونلارین سوزو دوز گلمیردی . ده ده مین موللا صادیق دان زندئیی – زهله سی گئدیر ، همیشه اونا ((دینقیرا سوزه ن قورومساق )) دئییر . ایندی ده اونلار لاپ خنجر – بیچاق دیرلار . هئچ بئله ایشه ده ده م قول قویارمی ؟ یوخسا پاکیزه ایله اشرفین ائله اوولده ن حیم – جیمی وار ، بیزیم خبریمیز یوخدور ؟ بئله اولماسایدی خیسین – خیسین دانیشمازدیلار . اونلارین بیر – بیرینه اوستو اورتولو دئدیکلری نه ایدی ؟ یوخسا اشرف ده ده مین سوزونده ن چیخاجاق ؟ راضیلیق آلمادان گئدیب اوز باشینا ائوله نه جک ؟ یوخسا بو قارداشیمین دا تویون گورمه یه جم ؟
سالاتین لاپ داریخدی . دوشونجه لرینه آرا وئریب ، قارداشی نین نفسینه قولاق آسدی .
- آی قاغا ، یاتماییبسان کی ؟
- یوخوم گلمیر .
- منیم ده .
یئنه سوسدولار . هر ایکیسی بیر – بیری نین نئجه نفس آلماسینی ائشیتدی .
- پاکیزه ایله اوستواورتولو دانیشدیغین نه ایدی ؟
اشرف دونوب سالاتینین اوزونه باخدی . قارانلیقدا اونون نه لر دوشوندویونو صیفه تینده ن اوخوماغا چالیشدی :
- ائله بونا گورا یوخون قاچیب ؟ گوزونو یوم ، ییخیل یات .
- دئمه سن ال چکن دئییلم .
اشرف باجی سی نین دوغرودان دا هیجان کئچیردیی نی دویدو و اونو ساکیتله شدیرمک مقصدی ایله کورون ساحیلینده پاکیزه ایله نئجه راست لاشدیقلارینی اونا دانیشدی . سالاتین آزاجیق راحاتلانسا دا ، پاکیزه نین حرکتینی باغیشلایا بیلمه دی .
آرادان خئیلی کئچدی . دوشرگه یه تام سوکوت چوکدو . اوجاقلارین کوزو سونوب کول اولدو . چایین قیژیلتی سی چوخالدی .
- آی قاغا؟
- آ گونو قارا یاتماییبسان ؟
- پاکیزه ده ن خوشون گلیر ؟
- سنین خوشون گلیر ؟
- نه بیلیم ، صیر – صیفه تی پیس دئییل .
- قشنگدیر .
سالاتین سوسدو . بیرده ن آغلینا قریبه بیر فیکیر گلدی . قیز واهیمه له ندی . (( دئیه سن گده یه جادو ادله ییبلر . بلکه ائله او آلچالارا جادو یازیلمیشدیر ؟ گونو قارا قصده ن یولوموزون اوستونه چیخدی ؟ سو یئرینه اشرفه آلچا وئردی ؟ آللاه ، آماندیر ، کوپک اوشاغی قاغامی درده سالماسالار یاخشی دیر )) .
سالاتین قالخیب اوتوردو . هیجاندان تووشویه – تووشویه ، تلاشلا دیلله ندی :
- آی قاغا ، آلچادان هئچ یئدینمی ؟
- لاپ لذذه تنن . بس سن یئمه دین ؟
- یوخ .
- نه دی آی دلی ، نییه تووشویورسن ؟
- جادویا اینانیرسان ؟
اشرف اوستونده کی یورغانی آتیب اوتوردو . آرابانین قاباق طرفینده ن آی ین ایشیغی ایچه ری دوشموشدو . ایندی او ، باجی سی نین اوزونو بیر بالاجا گوروردو . سالاتین قورخودان اسیر ، دیققتله قارداشی نین اوزونه باخیردی :
- جادو نه دیر ؟
- نه بیلیم ، آی قاغا ، دئییرلر موللا صادیق جادوگر دیر . آرپانی دیره یه دیرماشدیریر .
- دئیه ک کی ، بونلار لاپ دوغرودور ، نه اولسون ؟
- نه بیلیم ، آی قاغا ، دیلیم – آغزیم قوروسون ، آغلیما گلیر کی ، بیرده ن سنه جادو ائله یه رلر ، سنی یولوندان آزدیرارلار . اوندان سونرا گونوموز قارا اولار . اوزون بیلیرسن کی ، آتامین اونلاری گورمه یه گوزو یوخدور . هئچ بئله ایشه راضی اولارمی ؟
- نییه اولمور ، آی سالاتین ؟
- نه بیلیم ، آی قاغا ، قورخورام . سن آللاه ، اونلاردان اوزاق اول . آلچادان دا یئییبسن ، هئچ اوره ییم راحاتلانمیر .
- یعنی دئییرسن ، آلچالار جادولو اولار ، هه ؟
- گولمه .
- دوروب قالانینی دا یئیه جه یه م .
- منی اله سالما ، قاغامین جانی اوچون ، سن جییه زی جادولاییبلار .
- افسونلانمیشام ، باجی ، کرم کیمی یانیرام ، قویما .
- اشرف ، منی قورخوتما .
اشرف گوله – گوله باجی سینی قوجاقلادی . یاستیغین اوستونه ییخیب یورغانا بوکدو . اوزوده اونون بویرونه اوزاندی . سسی نی جیددیله شدیردی :
- یاخشی ، ائله سوزلر دانیشما . آغیلسیز ها دئییلم ، هر شئیی بیلیره م . اوزوم سنی جینله ندیریردیم . گئجه کئچیر ، یاتماق لازیمدیر .
- دوز دئییرسن ، گل یاتاق .
اونلار بیر – بیری نین قوینونا قیسیلدیلار . آزاجیق سونرا ده یه نین ایچینی معصوم بیر میشیلتی دولدوردو .
سحره یاخین دالبادال ایکی گولله آچیلدی . آغاجلار عکس – صدا وئریب شاققیلدادی . بوتون ده ره اوغولدادی . اوجاقلارین کناریندا مورگوله یه نلر دیک آتیلدیلار . دوشرگه سیلکه له نیب یوخودان اویاندی . قارماقاریشیق حالدا هره بیر طرفه قاچدی . هله نه اولدوغونو باشا دوشه بیلمه ین آروادلار اوشاقلارینی تئز قوجاقلارینا آلدیلار . کیشی لر درحال اوز ماللارینی یوخلادیلار . قونشولار بیر – بیرلرینی سسله ییب نه اولدوغونو سوروشدولار . ایتلر یولون او اوزونده مئشه نین درینلیی نه جومدولار .
جاهاندارآغانین اویانماسی ایله گئیینمه سی بیر اولدو . چاخماغی هرله ییب گولله نی لوله یه وئردی . آنجاق آرابادان چیخمادی . توفنگلی ، چوماقلی یولا دوغرو قاچانلارین قاییتماسینی گوزله دی . اشرف ده هوولنک یوخودان اویاندی و توفنگینی گوتوروب مئشه یه گئتمک ایسته دی . آنجاق آتاسی اونو ساخلادی . بیر آز دا کئچدی . اوفوق قیزاردی . بولاغین آلت طرفینده کی چمنلیکده ن ، چایین لاپ یاخینلیغیندان قومروو سسی گلدی . سونرا دا اینیلتی ائشیدیلدی . نوکرلر یارالی مارالی پالید آغاجی نین آلتینا گتیردیلر . اشرف دوزمه دی . سیچراییب آرابادان چیخدی .
مارالین سینه سینده ن قان آخیردی . حئیوان قالخماق ایسته سه ده باجارمیر ، چاپالاییب بوینوزونو یئره دویور ، تاقتده ن دوشه نده ایسه آیاقلارینی اوزادیب یازیق – یازیق اطرافینا بویلانیردی . نئچه ایلده ن بری الده بسله ییب بویوتدوکلری مارالین بو جور ، گوزله نیلمه ده ن هانسی بیر مردیمازارین سا گولله سینه قوربان اولماسی اونلاری کده رله ندیریردی .
جاهاندارآغا گلنده نوکرلر گئری چکیلدیلر . مارال صاحیبینی گوره ن کیمی سون قووه سینی توپلاییب دورماق ایسته دی . گوجسوزلویونو حیسس ائدیب اینیلده دی . اونون گوزلری یاشاران کیمی اولدو . بو گوزلرده سانکی ایمداد ایسته ین بیر جانلی نین یالواریشی واردی . جاهاندارآغا بولود کیمی توتولدو . باشا دوشدو کی ، کیمسه یئنه اطرافدا دولانیر . بو تصادوفون نتیجه سی دئییلدی . بو ، دوشمن چیلیک ایدی .
آراباسی نی کوچون لاپ کناریندا ، آتاسیندان خئیلی اوزاقدا آچمیش اولان شامخال دا یوخودان سکسکه لی اویانمیشدی . حتتا آتاسینی گئج گوره نده ده تشویشه دوشموشدو . ایندی ده نظره چارپمادان کناردا ، آغاجلارین دالیندا دایانمیشدی .
اونون دوداقلاری تپیمیشدی . بیغی نین اوجونو آغزینا آلیب چئیینه ییردی . بارماقلاری اسیردی : (( بو نه ایدی ؟ کیشی یه ساتاشان کیم ایدی ؟ یوخسا اونو تک گوروب اوستونه آیاق آلیردیلار ؟ جاماعات آراسیندا حورمت ده ن سالماق ایسته ییردیلر ؟ )) شامخالین بیر ده ن – بیره اوره یی کووره لدی . آز قالدی آغلاسین . او ان چوخ حیرصله نه نده ، لاکین نه ائده جه یینی بیلمه ییب عاجیزله شنده آغلاماق ایسته ییردی . ایندی ده بئله اولدو .
مارالی کیمین ووردوغونو موعیین ائتمک چتین ایدی . اگر او بیر آدامدان آزجا شوبهه له نسه ، بو ایشده الی اولدوغونو بیلسه ، دینمز – سویله مز توفنگی اوزونه قالدیریب ته تیی چکمه یه حاضیر ایدی . شامخال ایشی نین یالنیز ماراللا قورتاریب گئده جه یینه آرخایین دئییلدی . او بو ساعات کیمینسه آغاجلارین دالیندا ، یادا قایالارین بیری نین دیبینده ن کوچه آتش آچاجاغیندان ، بلکه ده داها بویوک بیر بدبختلی یین اوز وئره جه یینده ن قورخوردو ، اونا گورا دا کنارداجا گیزله نیب اطرافی گودوردو . آتاسی ایله کوسولو اولسا دا ، اونو گوزونده ن قویموردو . گیزلیجه اونون کئشینی چکیردی . زرنیگارخانیم سا آرابانین ایچینده اوز – گوزونو جیریر ، بو ایشین نه ایله قورتاراجاغینی گوزله ییردی .
احوالاتین نه یئرده اولدوغونو بیله نلر یاواش – یاواش آغاجین دیبینه توپلاشدیلار . جان وئره ن مارالا باخیب حاییفسیلاندیلار .
نوکرلرده ن بیری مارالا باخیب کوکسونو اوتوردو :
- آغا ، نئجه اولوبسا گوزوموزده ن قاچیب سویون قیراغینداکی چمنلییه گئدیب ، هانسی کوپک اوغلوسا ائله بیلیب چول مارالی دیر . یوخسا ال حئیوانینا گولله آتمازدیلار .
بایاقدان قوورولا – قوورولا قالیب ، نه ائده جه یینی ، جاماعاتا نه دئیه جه یینی موعیین له شدیره بیلمه ین جاهاندارآغا بو سوزده ن یاپیشماغی قراره الدی . او بئله لیکله هله لیک ایز ایتیرمک ، حقیقتی بیله نه قده ر سوسماق ایسته ییردی .
مئشه یه دوغرو گئده نلرده ، کیمی ایسه لاپ اوزاقلارا قده ر قووانلار دا قاییتدیلار . جاهاندارآغا ضهیملی باخیشلارینی نوکرلرین اوزونه زیلله دی :
- نه اولدو ، بیر شئی گوزونوزه دیمه دی ؟
- یوخ ، آغا ، ایتلرین دالینجا لاپ او یانلارا گئتدیک . هئچ کس یوخ ایدی . گورونور ، دویوق دوشوب واختیندا آرادان چیخیب لار .
جاهاندارآغا اوزونو سیندیرماماق اوچون مارالین اوزونه باخمادی . قورخدو کی ، حئیوانین حالی اونو کووره لده ر . قوتوسونو چیخاردیب پاپیروس ائشدی :
- سیزه تاپشیرمامیشدیمی سحره قده ر اویاق اولون ،یول– ایزدیر ، گلیب – گئده ن اولور ؟
- واللاه یاتمامیشدیق ، هم ده ایشیقلاشیردی .
- کس سسینی ، آخماق ، سیزین کیمی مایماقلار اولان یئرده آدامین مارالینا دا گولله آتارلار ، ایتینه ده داش . داها بسدی ، گوزونوزو دویمه یین . تئز اولون آرابالاری قوشون .
یاریمجا ساعات کئچمه میش کوچ یولا دوشدو . اوولجه ماللاری حایلادیلار ، سونرا ایسه آرابالار قاتارلاشدی . جاهاندارآغا همیشه کی کیمی آتینی چاپیب قاباغا دوشمه دی . فیکیرلی – فیکیرلی آرابالارین یانی ایله گئتدی .
