اشرف پئنجه یینی چیینینده ن گوتوروب گئیدی . کیتابی یان جیبینه قویدو . آغاجلارین کولگه سینده ن کناردا ، گونئی ده کی قالین یارپاقلارین آراسیندا قیزاران چیه له کلری درمک اوچون دیزی اوسته چوکدو . چیه لکلرین عطری درحال اونو ووردو . اشرف هر شئیی اونوتدو . خاللی کپنک دالینجا قاچان اوشاق کیمی یارپاقلاری ، آرالاییب قیرمیزی چیه لکلری دره – دره مئشه نین درینلیینه دوغرو ایره لی له دی . اونون باشی قاریشدی . مئشه ده نه قده ر قالدیغینی بیلمه دی . ( چیه لک = توت فرنگی )
قارشیدان سس گلدی . جینگیلتیلی قیز گولوشلری اونو آیاغا قالخماغا مجبور ائتدی . اشرف تالایا یاخینلاشدیغینی باشا دوشدو . بوداقلاری آرالاییب چمنلییه باخدی .
موللا صادیق گیلین محلله سی نین قیزلاری نهنگ بیر قاراآغاجین بوداغیندان یئلله نجک آسمیشدیلار . اشرف بیر آز دا ایره لی گلیب ، یارپاقلاردان سئچیلمز بیر یئرده دایاندی . یئلله نن پاکیزه ایدی .
قیز یئنه "کور" قیراغینداکی پالتارینی گئیینمیشدی . یئلله ندیکجه دونونون اته یی دالغالانیب چتیر کیمی آچیلیر ، بوینونداکی پوللو مونجوقلار جینگیلده ییردی . کالاغایی چیینینه دوشموشدو . هوروکلری گاه کوره یی نین اورتاسیندا قیوریلیر ، گاهدا سوروشوب کوکسونه دوشوردو .
تالانین آلت طرفی اوچوروم دره ایدی . قیز هوسه گلیب یئلله ندیکجه یئلله نجک اونو یوخاری قالدیریر ، سیلدیریم قایالارین برابرینه قده ر اوجالدیردی . اشرف گوزونو پاکیزه ده ن آییرمیردی . بعضن اونا ائله گلیردی کی ، قیز بو ساعات ساپانددان چیخان داش کیمی سوزوب گویه قالخاجاق ، دره نین اوست طرفینده کی آچیق ماوی سمایا توپلاشان آغ بولودلارا قده ر اوجالاجاقدیر . آنجاق پاکیزه بونو حیسس ائتمیردی . او حتتا دره نین اوستونه قالخاندا بئله آشاغی باخمیردی . قیز گوزونو سمایا زیلله میشدی . لذذه تله یوخاری قالخیر ، سورعتینی داها دا آرتیریر و ائله بیل الینی اوزادیب بولودلاری توتماق ایسته ییردی .
گویلوکده ، آغاجین کولگه سینده اوتوران قیزلار آیاغا قالخدیلار . اونلاردان بیری الینه نازیک چوبوق آلدی . قالانلاری ایسه گیجی تیکان گوتوروب اطرافی کسدیلر . پاکیزه یئلله نجیکله برابر آشاغی ائنه نده چوبوقلا اونون بالدیرلارینا ووردولار .
- نیشانلی نین آدینی دئه .
- نیشانلیم یوخدور .
پاکیزه جینگیلتیلی سسله گولوب اونلارین یانیندان کئچدی . یئلله نجه یین کوله یی قیزلاری ووردو . اوتلار تیتره شدی ، قیزلار داها دا سیخلاشیب یئلله نجه یین گئری قاییتماسینی گوزله دیلر .
- دئمه سن ال چکن دئییلیک .
گیجی تیکانلار پاکیزه نین توپوغونو ، بودونو یاندیردی . قیز قیشقیردی ، آنجاق گولمه یینه آرا وئرمه دی .
- دئدیم کی ، یوخدور .
- اوندا اوره یینده کی نین آدینی دئه .
- دئمه ره م .
- دئیه جکسن .
- دئمه یه جم .
قیزلار اینادا دوشدولر . دوغروداندا پاکیزه ده ن سوز آلمایینجا ال چکمک ایسته میردیلر . او هر دفه آشاغی ائندیکجه گیجی تیکانلا دویه جله دیلر . پاکیزه نین توپوغو ، بالدیری گوینه دی . گیجی تیکان ده ین یئرلر قیزاریب شیشدی . آنجاق دئمه دی . گاه اوفولدادی ، گاه دا قیشقیریب قیزلاری حده له دی ، سونرا دا اونلارین ضربه سینده ن یاخاسینی قورتارماق اوچون سورعتی داها دا آرتیردی . او هر دفه تکان وئردیکجه ، یئلله نجک بیر آز دا یوخاری قالخیر و آز قالیردی کی ، دووره ووروب بوداغا دولانسین . گورونور ، او هر شئیی اونوداراق ،
اوچوروم دره نین اوستونه قالخدیغینی ، الی کندیرده ن بیر بالاجا بوشالسا گورولتو ایله سیلدیریمدان یووارلانا بیله جه یینی آغلینا بئله گتیرمیردی .
اشرف هیجانلاندی ، اوزوده حیسس ائتمه ده ن آغاجلارین آراسیندان چیخیب ایره لی گلدی . بایاقدان پاکیزه ایله زارافات ائده ن قیزلار دا گولمک لرینه آرا وئریب دایاندیلار . اونلاردان بیری الینده کی گیجی تیکانی کنارا آتیب قیشقیردی :
- آ ا ز ، بسدیر ، هاوالانما ، کندیر قیریلار .
پاکیزه دویوشده ن قالیب چیخدیغینا فرحله ندی و برکده ن قهقهه چکدی . اونون سسی قایالاردا عکس – صدا وئریب مئشه ده اوغولدادی .
بیرده ن بوداق شاققیلدادی . بوغوموندان چارتلاییب آرالاندی . قیزلار دهشتله چیغریشیب کنارا چکیلدیلر . پاکیزه نه اولدوغونو باشا دوشه نه قده ر آغاج بیر آز دا چاتلادی . قیز تلاشلا اطرافینا بویلاندی . اوزونو یئلله نجکده ن آتماق ایسته دی و گوردو کی ، دره نین اوستونده دیر . اورا دوشسه تیکه سی اّ له گلمز . قورخو ایچینده گوزونو یومدو و کندیرده ن یاپیشیب یئلله نجکده اوتوردو .
بوداق یاواش – یاواش آشاغی ائنیردی . یئلله نجک ایکی – اوچ دفه ده گئدیب – گلسه آغاج سیناجاق و قیز بیرباش دره یه یووارلاناجاقدی .
اشرف ایره لی آتیلدی . یئلله نجک اونا یاخینلاشاندا سیچراییب کندیرده ن یاپیشدی . آیاغینی نه قده ر یئره دایادیسا دا ، یئلله نجک شاها قالخمیش آت کیمی اونو سورویوب آرخاسینجا آپاردی . بوداق شاققیلدادی و گورولتو ایله یئره دوشدو . اشرف پاکیزه نی گوجله کنارا چکه بیلدی .
پاکیزه نین دیزی یئره دییدی . قیز اوفولداییب قیشقیردیسا دا ، اشرفی گوره ن کیمی اوزونو اله آلدی . تئز دونونو آشاغی چکدی . اوتوردو . تعججوبله اوغلانین اوزونه باخدی . قیز بئله آغیر دقیقه ده اونون بیرده ن – بیره چیخدیغینی باشا دوشه بیلمه دی . اونا ائله گلدی کی ، اونو قارا باسیر . گوزو آلاجالانیر . اونون قارشیسشیندا دوران اشرف دئییل ، بیر خیال ، بلکه ده کولگه دیر .
اشرف قیزین کئچیردیی حالی گوردو . گولومسونوب آستادان سوروشدو :
- آدام دا دلی کیمی یئلله نرمی ؟
اشرفین سسی پاکیزه نی اوزونه گتیردی . قیز اونون گوم – گوی اولموش دیرسه کلرینه و شالواری نین دیزینه باخدی . بده نی نین آغریلارینی و ایکی آددیملیقدا دایانان قیزلاری اونوتدو . آز قالدی اوزونو اشرفین اوستونه سالسین ، اونون پئنجه یی نی سویوندوروب دیرسه کلرینه باخسین :
- بیر یئرین سییریلمه ییب کی ؟
اشرف گولومسوندو . بیر یانی نین ازیلدیی نی ، دیرسه ک و دیزینده ن قان سیزدیغی نی اونا بیلدیرمه دی :
- من هئچ ، سنین بیر یئرین ازیلمه ییب کی ؟
قیزلار ایره لی گلدیلر . پاکیزه نین قولوندان یاپیشیب قالدیردیلار . تعججوب و تشویشله اشرفه باخدیلار .
- تئز اول ، گئده ک ، گوره ن اولار .
پاکیزه هئچ نه دئمه دی . اوستونو چیرپدی . قیزلارین دالینجا گئتدی . اشرف اونون آزاجیق آخسادیغینی حیسس ائتدی .
قیزلار گئتدیلر . خئیلی سینمیش بوداغا ، پاکیزه نین بیر آز بوندان اوول یئلله ندیی یئلله نجه یه ، قارشی داکی دره یه باخدی . الینی گوزونون اوستونه قویوب سماداکی آغ بولودلارین سوروندویو سمته بویلاندی . باشینی بوللاییب گولومسوندو و جیغیرلا دره یه ائندی . چایین کنارینا چاتان کیمی قارشی داکی سال داشین اوستونده اوتوردو . قایانین دیبینده بورولان آغ کوپوکلو سویا نظر سالدی . خیرداجا چای بالیقلاری نین سورو ایله شوتویوب اوزدوکلرینی گوردو . بیرده ن سویا گیرمک ، اوشاقلیقدا اولدوغو کیمی سویون قاباغینی کسمک و قولونو دیرسه یه قده ر چیرماییب داشلارین آلتیندا گیزله نن بالیقلاری آختاریب توتماق هوسی اونو یئرینده ن ترپه تدی . اشرف شالوارینی چیرمه مک ایسته یه نده دیزی نین سیزیلتی سینی حیسس ائتدی . سویوندو . کوینه یینی ده چیخارتدی . اوولجه سویوق سودا یویوندو . بده نی نین سییریلمیش یئرلرینی یوخلادی . بیر – ایکی باغا یارپاغی تاپیب یاراسی نین اوستونه قویدو . چایی کئچیب پالتارینی گئییندی . اوستونو سلقه یه سالدی . دولاما جیغیرلا یاواش – یاواش دره ده ن قالخدی .
هاردا سا ، لاپ یاخیندا ، تالانین برابرینده ، توفنگ آتیلدی . مئشه اوغولدادی . قایالار سس – سسه وئریب شاققیلدادی . اشرف آیاق ساخلادی . دونوب گئری ، سس گلن طرفه بویلاندی . هئچ نه گوره بیلمه دی . سورعتینی آرتیریب دیکدیری قاخدی . دره نین قاشینداکی قایالارین برابرینه چاتاندا داشلارین آرخاسیندان بیر آدام چیخدی . اشرف دیکسینیب گئری سیچرادی .
- شامخال ؟
- یئره اوزان .
شامخال قارداشی نین یاخسیندان دارتیب قایانین دالداسینا اوزاتدی . اونون صیفه تینده قان قالجامیشدی . اللری ، دوداقلاری سیرییردی .
- سنه نه اولوب ؟
- عجب آدامسان !
شامخال اوزونو اله آلیب پاپیروس ائشدی . بیر – ایکی دفه درینده ن سوموروب توستوله تدی . اشرف الیله توستونو اوزونده ن اوزاقلاشدیردی . شامخال گوز آلتی اونو سوزدو . باشینی بوللاییب بایاق کیندان خئیلی یومشاق طرزده دیلله ندی :
- هارا گئتمیشدین ؟
- مئشه یه .
شامخال یئنه ساکیتجه پاپیروسونو سوموردو . چیینی نین اوستونده ن دونوب قایالارین آراسیندان او طرفه ، اشرفین گلدیی سمته باخدی :
- آز قالمیشدی اوره ییم پارتلاسین .
- نییه ؟
- ائله بیلدیم سنه گولله آتیرلار .
- من کیمه نئیله میشم ؟
شامخال بو دفه قارداشینی ترس – ترس سوزدو . اونون صیفه تینده اوولجه بیر قضب سئزیلدی . سونرا دوداقلاری قاچدی . گوزلری قییلدی . اونون تبسسومونده ایستئهزامی ، یوخسا داخیلی بیر نیفره تین ایفاده سیمی اولدوغونو اشرف سئزه بیلمه دی .
- دئیه سن اوخوماق سنین آغلینی آزالدیب ؟
- بو نه دئمکدیر ؟
- بیلمیرسنمی آتام دوشمنلی دیر ؟
- بیلیره م .
- به اوندا نییه وئل – وئل گزیرسن ؟
اشرف قارداشی نین گوزلرینه باخدی . بو دفه او همین گوزلرده قضب قاریشیق بیر نیفره ت اولدوغونو آیدینجا حیسس ائتدی . شامخال یئنی ده ن دیلله ندی :
- قیزلار دا یئلله نجک سالمیشدیلار ، ائله می ؟
- سن هاردان بیلیرسن ؟
- نئجه یعنی هاردان بیلیرسن ؟ سحرده ن بوردا اوره ک – گوبه ییمی یئمیشم . سنین خالقین یاد قیزلاری اولان یئرده نه ایشین وار ؟ بیلیرسنمی او طرفلر کیمین محلله سی دیر ؟
- بیلیره م .
- بیلیرسن نییه او طرفلره آیاق باسیرسان ؟
- اورداکیلار دا بیزیم کندین آداملاری دئییلمی ؟
شامخال حیرصله توپوردو . سونرا دابانی ایله گوی اوتلوغو دویه جله ییب چوکه لتدی :
- قئیره تسیز آداما اوخشاییرسان !
اشرف آرتیق دوزه بیلمه دی . قارداشی نین بو جور یئکه خانالیغی ، اونو اوشاق یئرینه قویماسی شستینه توخوندو . او دا سسی نین آهنگینی دییشدی :
- قئیره تسیز اولسایدیم منده آتامین اوستونه آغ اولوب ، ائوده ن گئده ردیم .
- نه ؟!
شامخال ایلان کیمی فیسیلداییب آیاغا قالخدی . اشرفین بوینوندان یاپیشدی . اونو چکیب قالدیردی . گوز – گوزه دایاندیلار . شامخالین ایستی نفسی اشرفین یاناقلارینی یاندیردی . اوزونو تندیر هنیری کیمی قارسالادی . حتتا نفسینی داریخدیردی . اشرف دوزدو . قارداشی نین داها نه لر ائده جه یی نی گوزله دی . اونون باخیشلارینداکی تمکین و مذه ممت شامخالین قولونو بوشالتدی :
- بیر ده منه بئله سوز دئه سن ، قارداشیم اولدوغونا باخمارام .
شامخال اشرفین یاخاسینی بوراخدی . قایانین کولگه سینده کی توفنگینی گوتوردو . ساللامالی کمرینی دارالتدی . خنجری یانا چکدی . هئچ نه دئمه ده ن قاباغا دوشوب دولاما جیغیرلا دیه لره دوغرو آددیملادی . اشرف قارداشی ایله یاناشی گئتمه یه چالیشدی . اونون شامخالا دئییله سی سوزو چوخ ایدی . او ایسته ییردی کی ، قارداشی گئری ، آتاسی نین یانینا قاییتسین ، یئنه اوولکی کیمی بیر یئرده یاشاسینلار ، کیشی تک قالمیشدی . او ، حیسس ائتمیشدی کی ، آناسی دا اوره یینده پئشمانچیلیق چکیر ، آنجاق ائلده ن آرالاندیغینا گورا ائوینه دونه بیلمیر . بلکه ده گوزله ییر کی ، جاهاندارآغا اونون دالینجا گلسین ، آروادینا میننت ائله سین . ائله سالاتینین اوزوده ایکی اود آراسیندا قالمیشدی . اشرفی اینجی ده ن او ایدی کی ، بو توپ داغیتماز ائو ، بو بویوک عاییله گوز قاباغیندا پارچالانیب داغیلیردی . اشرف اوول بو باره ده بیر – ایکی دفه سوز سالماق ایسته میشدیسه ده ، شامخال ایمکان وئرمه میشدی . ایندی ایسه فورصت ایدی . سوز دوشموشکن هر شئیی آخیرا چاتدیرماق لازیم ایدی .
- آجیغین توتماسین ، شامخال ، هئچ آدامدا آتاسینی تک قویارمی ؟
- به آتا دا من بویدا کیشی نین آناسی نین اوستونه آرواد آلارمی ؟ تزه آروادین گوزونون قاباغیندا اوغلونو تپی یین آلتینا سالارمی ؟
شامخالین سسی قضبده ن خیریلدادی . حولقومو بیر نئچه دفه قالخیب – ائندی . اشرف اونون دا آتاسی کیمی گیجگاهلارینداکی خیرداجا دامارلارین ووردوغونو گوردو :
- بس فیکرین نه دیر ؟ اونو بیر یوللوق آتالیقدان چیخارتدین ؟
- یوخ . او منیم آتامدیر . اونون ناموسو منیم ناموسومدور . اونون
آیاغینا داش دیه نده اوره ییمین باشی گوینه ییر ، ائشیتدینمی ، بیر آدام اونون ایتینه داش آتاندا حیرصیمده ن اوره ییم پارتلاییر ، باشا دوشورسنمی ، من بونا دوزه بیلمیره م .
شامخال لاپ قهرله ندی . اوزونو یانا چئویردی . گوزونون یاشاردیغینی قارداشینا سئزدیرمک ایسته مه دی . اشرف اوزوده دولوخسوندو :
- یاخشی ، ایندی نه ائله یه ک دئییرسن ؟
- نه ائله یه جکسن ، کیشی اول . آتامین ناموسو بیزیم ناموسوموزدور . اونون دوشمنی بیزیم ده دوشمنیمیزدیر .
سوسدولار ، اشرف قارداشی نین نه یه ایشاره ائتدیینی باشا دوشدو . او چوخ گوزه ل بیلیردی کی ، جاهاندارآغا موللا صادیقلا باریشمایاجاق . اونو دا حیسس ائدیردی کی ، پاکیزه نین تئز – تئز اونون یولونون اوستونه چیخماسی قوهوملارین خوشونا گلمیر . اصلینده اوزو ده بوتون بونلارین نه دئمک اولدوغونو اوزونه آیدینلاشدیرا بیلمیردی .
- دئمک گئری قاییتماق ایسته میرسن ؟
- یوخ .
- نییه ؟
- چونکی سن وارسان .
- من اوخوماغا گئده جه یم .
- گئتمه .
- بو مومکون دئییل .
- نییه ؟ - شامخال آیاق ساخلادی . سیناییجی نظرله قارداشینا باخدی . اونون دئدیکلری نین نه قده ر جیددی اولوب – اولمادیغینی بیلمک ایسته دی . – ده ده – بابامیز اوخوماییب ، آجیندان اولموشوک ؟
- سن یئنه ده ده – با با قایداسی ایله یاشاماق ایسته ییرسن ؟
- یوخسا اوخوماقدان تزه قایدا – قانون گتیرمیسن ؟
- اٍِ ه ، شامخال ، - اشرف کوکسونو اوتوردو . ائله درد بوراسیندادیر کی ، نه ائله دیینی اوزون ده بیلمیرسن . بیر یاندان کوهنه قایدالاری مودافیعه ائله ییرسن ، بیر یاندان دا اونا تابئع اولماق ایسته میرسن .
- کیم دئییر اونو ؟
- من . آتام ده ده – بابا قایداسی ایله ایکینجی آرواد آلیب ، به سن نییه بونا دوزمورسن . هه؟
- بو آیری شئیدیر . سن هر شئیی بیر – بیرینه قاتما.
- گورورسنمی ، مسله اوزوموزه گله نده ، سنه توخونان بیر شئی اولاندا دوزمورسن ، بو آیری شئی دیر دئییرسن ، آمما باشقاسی نین توستوسونو تپه سینده ن چیخاردیرسان ، وئجینه ده گلمیر .
- من کیمه نه ائله میشم ؟
- قوجا کیشی نین قیزینی گتیرمیسن ، آمما آتاسی ایله باریشمیرسان ، قارداشی چرکزی اوزونه دوشمن ائله میسن . گوله سری ده ائوده دوستاق کیمی ساخلاییرسان . بس اونلار اینسان دئییل ؟ اونلار دا بیر – بیرینی گورمک ایسته میر ؟ باشقاسی نین اوره یینه چالین – چارپاز داغ چکه بیلیرسن ، اوزونه ایسه بیر بالاجا توخوناندا گوینه ییرسن . بو اینصافدیرمی ؟
- من گوله سره نه پیسلیک ائله میشم ؟ چوره ک ده تاپمیردی ،ایندی اینی ده دویوب ، قارنی دا .
- مسله چوره کده دئییل ، گره ک اینسانین روحی عالمی ده توخ اولسون .
شامخال اوره یینده قارداشینا آزاجیق حاق وئرسه ده ، اونون دئدیکلرینی تام قبول ائده بیلمیردی . بیر ده ، اشرفین قوجا کیشی نی ده ، چرکزی ده اوزونه تای ائتمه سی اونون خوشونا گلمیردی . بئله گئتسه ، اشرف هر ایتی – قوردو گتیریب جاهاندارآغانین سوفره سینه چیخاردیب ، یوخاری باشدا اوتورداردی .
- ایندی نه ائله یه ک دئییرسن ، قاپیمیزدا تایامیزی یاندیرسینلار ، ناخیرمیزدا مارالیمیزی وورسونلار ، بیزده اوتوروب باخاق ؟
- کیمدیر تقصیرکار ؟
- نئجه یعنی کیمدیر تقصیرکار ؟ سن نه دانیشیرسان ؟ هله ایندییه کیمی بیزیم هنده وره هرله نن اولماییب ، بوندان سونرا دا اولمایاجاق !
- اولاجاق . آتام باشقاسی نین کبینلی آروادینی گتیره نده بیلمیردیمی باشی آغری یاجاق ؟ سنین باشینا بئله ایش گلسه ، دوزه رسنمی ؟
شامخال دابانی اوسته فیرلانیب سسینی اوجالتی :
- بی قئیره ت – بی قئیره ت دانیشما ، کس سسینی .
سوسدولار . شامخال قاشقاباغینی ساللاییب قاباغا دوشدو . (( بو گده لاپ زاییللاییب ، - دئیه اوز – اوزونه دوشونمه یه باشلادی . – هر ایتی – قوردو گتیریب بیزه تای ائله ییر . هامینی بیر گوزله گورور. منیم آتامی قوجا کیشی یه تای توتور . نه اولسون کی ، من اونون قیزینی آلمیشام ، آتام هارا ، او هارا ؟ قیزیل – گوموشون اوز یئری وار ، قارغانین باشقا .آت – آتدیر کی ، سئچنده جینسینی ، اصلین آختاریرلار . یوخ ، اوخوماق اونون اولوب – قالان آغلینی دا آپاریب . نئجه یعنی بیز کوهنه قایدالارلا یاشایا بیلمریک ؟ گونده کنده بئش – اون آتلی توکولوب گله جک ، دیوان – دره آداملاری گورونه جک دئیین من قورخاجام ؟ یوخ . من آختاردیغیمی تاپیم ، اوندا باخاریق کیمین آناسی آغلار قالاجاق . بو گده ظنیمی ایتیره جک . لاپ خوش قئیره ت اولوب . ائشیتدییمه گورا ، موللانین قیزی نین تومانینی نئیله مه یه حاضیردیر )) .
دیکدیره چاتدیلار . بوردان آیریلمالی ایدیلار . شامخال اوز دیه سینه دوغرو آددیملاماق ایسته دی . آنجاق آیاق ساخلادی . اشرفین اوزونه باخمادی . زهر توکولن قاشقاباغینی داهادا تورشوتدو :
- بورا باخ ، آغلینی باشینا ییغ ، بیر ده بئله سوزلر دانیشما .
- چالیشارام ، آنجاق ائوده پاپاغینی قاباغینا قوی ، من دئدیکلریمی امه للی – باشلی فیکیرلش .
- من فیکیرلشمیشم ، سن فیکیرلش .
اشرف اونا یئنه نسه دئمک ایسته دی . آنجاق سالاتینین قاچا – قاچا اونلارا یاخینلاشدیغینی گوروب سوسدو . قیز اوولجه دینمه دی . گوز آلتی شامخالا ، سونرا دا اشرفه باخدی . باشا دوشدو کی ، قارداشلاری نه ده نسه حیرصلی دیرلر .
- آتام سنی چاغیریر .
شامخال توفنگی چیینی نه کئچیردی . باجیسی نی ترس – ترس سوزدو . انون آخیر گونلر گاه آتاسی نین یانینا ، گاهدا آناسی نین یانینا گئدیب – گلمه سی نی خوشلامیردی . ایندی اونون اشرفین دالینجا گلمه سی ده شامخالی حیرصله ندیردی :
- نه چوخ او یانا – بو یانا قاچیرسان ؟
- نئیله ییم ، آتام گونده ردی .
- باشقا آدام یوخدور ؟
قیز دینمه دی . شامخال ائله بیل اشرفین ده آجیغینی سالاتیندان آلماق ایسته ییردی :
- بیرده سنی بورالاردا گورسم ، اتینی شیشه چکه جم .
او ، حیرصلی – حیرصلی اوز ده یه سینه گئتدی . سالاتینین دوداقلاری سَیریدی . نه قده ر چالیشدیسا ، هیچقیریغینی بوغا بیلمه دی . بیرده ن اونلویو ایله اوزونو اورتوب هونکوردو . اشرف اونون بوینونو قوجاقلادی :
- آی دلی ، نییه آغلاییرسان ، آداما قارداشی آجیغلانار .
- آخی منیم گوناهیم نه دیر ؟
- یاخشی ، یاخشی ، گوزونو سیل ، عاییبدیر ، گوره ن اولار .
سالاتین اوزونو گوجله توختاتدی . اشرف تمیز دسمال چیخاردیب ، اونون گوز یاشینی سیلدی . یئنه بوینونو قوجاقلادی :
- یاخشی ، گئده ک .
یاناشی آددیملادیلار . سالاتین یاناغینا یاپیشمیش ساچینی گئری ائله دی . هله یاشی قورومامیش گوزونو قارداشی نین اوزونه زیلله دی :
- بیلیرسن کیم گلیب ؟
- کیم ؟
- اوچ تئل احمد .
جاهاندارآغا دوشکچه نین اوستونه اوزانیب موتککه یه دیرسه کله نمیشدی . احمد ایسه اونونلا اوز به اوز ، دوشکچه ده بارداش قوروب اوتورموشدو . اونلارین قاباغیندا چای واردی .
جاهاندارآغا اوغلونو گوره ن کیمی ایسته کانی قاباغینا چکدی . اشرفین اوزونه بئله باخمادان ، آستادان دیلله ندی :
- سنه نئچه دفه تاپشیرمیشام ، بیر یانا گئده نده اوزونله توفنگ گوتور .
- نه اولوب کی ، آتا ؟
- او نه سس – کوی ایدی ، دئیه سن ، گولله آتیردیلار ؟
اشرف توتولدو . اونونلا گوروشمک اوچون آیاغا قالخماق ایسته ین احمد ده پرت اولدو .
- ائله بیر شئی یوخ ایدی .
کیشی راحاتلاندی . چایینی گوتوروب هورتولداتدی . احمد حیسس ائتدی کی ، جاهاندارآغانین قَضَبی اوغلوندان اوته ری ناراحات اولان بیر آتانین حیرصله نمه سینده ن باشقا بیر شئی دئییل .
- قاپی نین آغزیندا دورما .
اشرف ایچه ری کئچدی . احمدله گوروشدو و اونون یانیندا بارداش قوروب ساکیتجه اوتوردو .
بیر خئیلی هئچ کس دینمه دی . جاهاندارآغا چای ایچه – ایچه گوزونو آلاچیغین قاپیسیندان او طرفه اوفوقده کی داغلارا دوغرو زیلله دی . او اوز محلله سینده یاد آداملارین اولماسینی ایسته ین کیشی لرده ن دئییلدی . آنجاق قاپی سینا گلنلری ، اونا پناه گتیره نلری ده گئری قایتارمازدی . ایندی او نه ائتسین ؟ احمد خبرسیز – اته رسیز کندین یئتیم – یئسیرین ده ییغیب بیر باش یایلاغا گتیرمیشدی . اوزو ده فورقونو اونون محلله سینه سوردورموشدو . اگر او بیر آداما آرخالانماسا ، بئله ائتمَزدی . گوره سن اشرف نه دوشونور ؟
کیشی گوزآلتی اوغلونا باخدی . بلکه ائله بئله یاخشیدیر . بلکه بوندان سونرا تک باشینا داغ – داشی گزمه ییب ، احمدله برابر ده یه لرین بیرینده اوتوراجاق ؟ بئش – آلتی گونده ن سونرا آرانا ، پئشقوردا گئده جم ، اوندا اشرفین یانیندا بیر کیشی نین اولماسی پیسدیرمی ؟
سوکوت اوزون چکدی . احمد چایینی ایچیب آیاغا دوردو :
- ساغ اولون ، من گئدیم . اوشاقلاری راحاتلاماق لازیم دیر .
اشرف ده آیاغا دوردو :
- هارا گئدیرسن ؟
گوره ک هاردا یئر تاپیریق . اوشاقلارا ده یه ده ن – زاددان تیکه ک .
اونلار آلاچیقدان چیخماق ایسته دیلر . آنجاق جاهاندارآغا اونلاری ساخلادی :
- آ بالا ، سیز اوتورون ، اوشاقلار گئدیب فورقونو گتیره رلر .
- جاهاندار عمی ...
- سوزومه قولاق آس . منیم قاپیما گلن گئری قاییتماز .
جاهاندارآغا پاپیروسونو سوموردو . گویومسوو توستو آلاچیغین ایچینه یاییلیب لایلاندی و سونرا بولود قاتاری کیمی سورونوب قاپی دان باییرا چیخدی .