سالاتین چته نی چکیب ده یه نین قاپی سینی اورتدو . کونجه ، یوک یئری نین یانینا بیر دوشکچه آتدی . آیاقلی دوعاغی اورتایا قویدو . دوشه یین آلتیندان دفتر – قلم چیخارتدی . بارداش قوروب اوتوردو . یایلاغا گله نده ن بری اویره نیب یازدیغی حرفلره خئیلی باخدی . اونلاری سس سیزجه اوخودو . سونرا دا دوعاغین اوستونه اییلیب ایری ، ناشی حرفلرله سوزلر یازماغا باشلادی . او ، خطی نین گوزه ل اولماسینا چالیشدیغیندان قلمی کاغیذا داها موحکم باسیردی . قیز ائله بیلیردی کی ، قلمی گوجو گلدیی قده ر سیخسا هر شئی دوزه له جکدیر .
سالاتین گون گون اورتا یئرینه گلنه قده ر اوچ صحیفه یازیب دولدوردو . سونرا بوینونو یانا اییب دیققتله یازدیقلارینا باخدی . اللرینی بوینونون آرخاسیندا چارپازلاییب برکده ن گرنه شدی . اونون سوموکلری شاققیلدادی . آیاغا دوروب کاغیذ – قلمی ییغیشدیردی . دوشه یین آلتیندا گیزله تدی . ده یه ده ن چیخدی .
گون قیزمیشدی . آرخاجدا ایری گوی چیبین لر ویزیلداشیردی . آروادلار یورغان – دوشه یی گونه سرمیشدیلر . حیه تده نئهره چالخالاییردیلار .
سالاتین سهنگینی گوتوروب بولاغا ائندی .
قارشی طرفده کی داغین دوشونده ، ایری فیستیق آغاجی نین دیبینده جاوانلار توپلاشمیشدیلار . اونلار گوی اوتلوغا اوزانمیشدیلار . بیر نفر ایسه اورتادا ساز چالیب اوخویوردو . سالاتین جیغیرلا ائنه – ائنه ماهنی یا قولاق آسدی . اوخویانین سسی پیس دئییلدی . آنجاق آرادا زنگوله ووراندا ناشیلیغی بیلینیردی .
او ، بولاغا ائندی . سویون اوستو قیز – گلینله دولموشدو . اونلارین بیر قیسمی ایری آغاج نوودا پالتار یاخالاییر ، بیر قیسمی قاب قوملاییر ، بیر حیسسه سی ایسه کنارداجا اوتوروب ، سسی دالغا – دالغا دره یه یاییلان سازا قولاق آسیردی . اونلاردان آرا – بیر شاققیلداییب گوله نلر ده واریدی .
- اولموش یامان اوخویور ، دئیه سن اوره یینی یاندیران وار .
- گور نئجه ده بوغازیندا قاینادیر .
- زارافات دئییل حاق عاشیقی دیر .
قیزلاردان بیری اوزونو داغین دوشونده توپلاشانلارا طرف توتدو :
- یاندیران یانسین ، اَده ، اوزونه دیوان ائله مه .
قیزلار شاققیلداییب گولوشدولر .
سالاتین سس سیزجه اونلارا یاخینلاشدی . بولاغین گوزونده ن سهنگینی دولدوروب کنارا قویدو . اته یینی چیرماییب سویون آخاری ایله آشاغی گئتدی . یارپیز دریب اونلویونو دولدوردو . گئری ، بولاغین اوستونه قاییتدی . سهنگینی گوتوروب یولا دوشمک ایسته دی . بو واخت قیزلاردان بیری اونون قولوندان یاپیشیب قهقهه ایله گولدو :
- آی قیز ، آغزین – بورنون نییه بو کوکده دیر ؟
سالاتین دایانیب مات- مات اونون اوزونه باخدی :
- نه اولوب ؟
- دوداغین گوم گوی دور ، نه یئییبسن ؟
سالاتین الی نین آرخاسی ایله آغزینی سیلدی . دیققتله بارماقلارینا باخدی و باشا دوشدو کی ، دیشی ، دوداقلاری گوم گوی دیر .
- قلمده ن اولوب .
- نه قلم ، سنده یازی یازیرسان ؟
- یوخ ، اشرفین قلمی دیر ، - سالاتین تله سیک جاواب وئردی و دونونون اوجو ایله آغزینی سیلمه یه باشلادی . دوداغینی تمیزله مک عوضینه ، قلمین رنگینی اوزونه یایمالادی . قیزلار یئنی ده ن گولوشدولر . سالاتین سهنگی یئره قویوب ، بولاقدا اوزونو ترتمیز یویاسی اولدو .
- آ ا ز ، آلا قوملا سورت .
- دوعا دا یازیرسانمی ؟
- بیرجه ال چکین . سیزین کئفینیز گلیب ، منیم ایشیم وار .
سالاتین قیزلاردان آیریلیب دولاما جیغیرلارلا یوخاری قالخدی . جاوانلار یئنه چالیب – اوخویوردولار . اونلاردان خئیلی آرالی دا ایسه قیزلار یئلله نجک سالمیشدیلار . سازین سسی داها آیدین ائشیدیلیردی . عاشیغین سوزلری قایادان - قایایا دوشوب دره آشاغی یاییلیردی :
ساللانا – ساللانا گلن سالاتین ،
گل ائله ساللانما ، سوز دَیَه ر سنه .
آل – یاشیل گئیینیب چیخما قارشیما ،
ساقین بد نظرده ن ، گوز دَیَه ر سنه .
قیز آدینین چکیلدیی نی ائشیده نده اوزونو ایتیردی . آددیملارینی یئیینله شدیریب دره ده ن تئز اوزاقلاشماغا چالیشدی ، (( بیی ، جییه رین یانسین ، منی بیابیر ائله دین )) – دئیه خیالیندان کئچیردی . سورعتینی بیر آز دا آرتیردی . عاشیق اورتادا فیرلاندی . او سانکی قیزین هر شئیی ائشیتدیی نی باشا دوشدو . سازی سینه سینه باسیب اوزونو بینه لره دوغرو چئویردی :
اَیله ن ، اَیله ن، گوروم کیمین یاریسان ؟
هانسی بخته ورین وفاداریسان ؟
کولگه ده بسله نمیش گوزئی قاریسان ،
سحرین گونَشی تئز دَیَه ر سنه .
سالاتین قریبه حال کئچیریردی . او بیر طرفده ن آددیملارینی یئیینله دیب تئز دَیَه لره چاتماغا چالیشیر ، دیگر طرفده ن ده ماهنی نین سوزلرینی آخیرا قده ر ائشیتمک ایسته ییردی . ماهنی نین سوزلری اونو هم عصبی له شدیریر ، هم ده خومارلاندیریردی . سالاتین باشا دوشوردو کی ، عاشیق بو سوزلری بوش – بوشونا اوخومور ، دوغروداندا اونو تعریفله ییر ، اونون گوزه للی ینی مدح ائدیر . سالاتین آدی نین دیله ، آغیزا دوشمه سینی ایسته میردی . آنجاق تعریف ده ن ده خوشو گلیردی . بوتون قیزلار کیمی اونو دا شیرین سوزلر مئیخوش ائدیردی . ائله بیل عاشیق دا بونو باشا دوشموشدو :
عاشیق دئیه ر ، هئچ کس یارین اویمه سین ،
دویمه له یاخایین چارپاز دویمه سین .
دسته له زولفونو یئره دییمه سین ،
یوللار قوبارلی دیر ، توز دَیَه ر سنه .
عاشیق سون میصرانی دئیه رکن برکده ن زنگوله ووردو . سازی یوخاری قالدیریب اورتادا فیرلاندی . سالاتین اونون سسی نین قایالاردا عکس – صدا وئریب تکرار اولدوغونو ائشیتدی . قیز بو دفه اوزونو لاپ ایتیردی . اونا ائله گلدی کی ، بولاق باشینداکی قیزلار قاققیلداشدیلار . دونوب گئری باخماغی اوره یینده ن کئچیر سه ده ، جساره تی چاتمادی . گوج – بلا ایله اوزونو دَیَه لره یئتیردی . سهنگی یئره قویوب درینده ن نفس آلدی . آلنی نین تری نی سیلدی .
زرنیگار خانیم اونون دَیَه نین یانیندا لنگیدیی نی گوروب ال ائله دی . سالاتین آناسی نین یانینا یویوردو .
- آ بالا ، نه اولدو ، یارپیز دردینمی ؟
- درمیشم ، آنا ، باخ گور ، بسدیرمی ؟
- بسدیر . دی تئز اول ، دَیَه نی ییغیشدیر ، اوشاقلارا چوره ک آپار .
سالاتین قاییدیب دَیَه یَه گیردی . اته یینده کی یارپیزی بوشالتدی . قوفتاسی نین قوینوندان بالاجا بیر گوزوگو چیخارتدی . اوولجه صیفه تینده کی موره ککه بین گئدیب – گئتمه مه سینی یوخلادی . سونرا ساچی نین ایسلاق قیویرجیقلارینی سیغاللادی . هورویونو چیینی نین اوستونده ن آشاغی سالیب دیققتله باخدی . (( جییه ری یانمیش دوز دئییرمیش ، هئچ ایندیه جن فیکیر وئرمه میشدیم ، دئیه سن ، ساچیم دوغروداندا اوزوندور )) . سونرا یورغان – دوشه یی چیرپیب تمیزله دی ، سلیقه ایله قاتلاییب بیر کونجه ییغدی . دَیَه نین چوبوغوندان آسیلمیش پئنجه یی گوتوروب قاتلاماق ایسته دی . ائله بو واخت پئنجه یین یان جیبی نده ن یئره بیر قوتو دوشدو . پاپیروس دَیَه نین اورتاسینا سَپَله ندی . سالاتین دیزی اوسته چوکوب اونلاری ییغدی ، سلیقه ایله قوتویا دولدوردو . بیر خئیلی الینده ساخلاییب باخدی . قوتونون اوستونده کی زرلی یازیلاری اوخوماق ایسته دی . حرفلرین بعضی سینی تانیسا دا ، سوزلری باشا دوشه بیلمه دی . قوتونو بورنونا یاخینلاشدیریب قوخولادی . توتون توزو اونون بورنونو قیجیقلاندیردی . قیز بیر – ایکی دفه آسقیردی . او بیرینجی دفه بو جور یاراشیقلی پاپیروس گوروردو . آتاسی دا ، شامخال دا ائشمه چکیردیلر . آمما بو قوتولو پاپیروس آدامین گوزونو اوخشاییردی . سالاتین بیرده ن نه فیکیرله شدیسه ، پاپیروسو قوینوندا گیزله تدی . قاچا – قاچا اوز دَیَه لرینه گئتدی . صاندیغی ائهمالجا آچدی . اشرفین اوخوماقدان قاییداندا آلیب گتیردیی عطیر شوشه سینی چیخارتدی . قاپاغینی آچیب پاپیروسون اوستونه چیله دی . دَیَه نی خوش بیر رایحه دولدوردو . قیز ، الینده قوتو ، بیر خئیلی بئله جه دایاندی . (( گوره سن ، چکه نده باشا دوشه جکمی کی ، پاپیروسونا عطیر چیله نیب ؟ گوره سن ، آغلینا نه گله جک ؟ یقین من هئچ خیالینا دا دوشمه یه جم . چوخ مزه لی ایش اولاجاق . فیکیرله شه – فیکیرله شه قالاجاق کی ، گوره سن ، بونو کیم ائله ییب ؟ ))
سالاتین قوتونو بورنونا یاخینلاشدیریب قوخولادی . عطیرلی توتونون ایی اونون جییه رینه دولدو . قیز آستادان گولوب آیاغا دوردو . دَیَه ده ن چیخماق ایسته دی . سونرا نه فیکیرله شدیسه گئری قاییتدی . دوعاغی چکیب قاباغینا قویدو . پاپیروس قوتوسونو بوشالتدی . چوخ ائحتیاط و چتینلیکله قوتونون ایچینه (( احمد )) سوزونو یازدی . دونه – دونه اوخودو . پاپیروسلاری یئنی ده ن سلیقه ایله قوتویا دولدوردو . آپاریب پئنجه یین جیبی نه قویدو . دَیَه ده ن چیخدی . چَته نی چکیب قاپی نی باغلادی .
گون گون اورتا یئرینده ن اییلمیشدی .
سالاتین آناسی نین حاضیرلادیغی باغلامانی گوتوردو . بینه لرین اونونده کی تپه یه دوغرو آددیملادی . اونون یاناقلاری آلیشیب – یانیردی. بیر آز بوندان اوول توتدوغو ایشده ن پئشمان اولموشدو . یول گئده – گئده اوزونو دانلاییردی . (( دئیه سن ، آخماقلامیشام . گئتدیکجه آغلیم آزالیر . خالقین پاپیروسونا دوردوغوم یئرده نییه عطیر چیله دیم ؟ یاد اوغلانلا منیم نه ایشیم وار ؟ هئچ قیز تانیمادیغی آداملا بئله زارافات ائله یه رمی ؟ دوردوغوم یئرده جه اوزومو ایشه سالدیم . بلکه پاپیروسو یئرلی – دیبیلی گیزله دیم . اوندا دا فیکیرله شه جک کی ، گوره سن بونو کیم گوتوروب . یقین اوشاقلاردان شوبهه له نه جک . بلکه اشرفه دئییم کی ، بیلمه دیم شوشه الیمده ن دوشدو ، پاپیروسون اوستونه عطیر سپه له ندی . بس یازی ؟ آخی من آخماق قوتویا اونون آدینی دا یازدیم . یوخ ، قاییدان کیمی گره ک پاپیروسو گیزله ده م . آللاه ائله مه میش ، بو ایشده ن ده ده م خبر توتسا ، بویوک تیکه می قولاغیم بویدا ائله یه ر . ائله شامخال دا اتیمی شیشه چکر)) .
سالاتین تپه نین دیکدیرینه چاتیب نفسینی دردی . الینی گوزونون اوستونه قویوب اوزاقلارا بویلاندی . اوستو مامیر لی ( مامیر = چیچه کسیز ، کوکسیز جوجرتی "داشقینین سوزلوک لوغت نامه سی ") یالچین (سیلدیریم داش) قایالارا ، داغلارین دوشونده کی دولاما جیغیرلارا ، آرانا دوغرو اوزانان تورپاق یوللارا باخدی . بورادان هر شئی ، سینه سی دالغالانان یاشیل یاماجلار ، اوتلاری سارالان تالالار ، دره ایله آخان کوپوکلو سولار آیدینجا گورونوردو . قارشی داکی داغین دوشونده بیر دسته اوشاق واریدی . اونلار چیه له یی اوتا دوزوب اللرینده ساللامیشدیلار .
قیز کوکسونو اوتوردو . جیغیرا دوشوب ایره لی له دی . اوت قورشاغا چیخیردی . ساری قایماق چیچکلری ، قیرامافون گوللری(سارماشیق) یاشیللیغی داهادا گوزه لله شدیریردی . چمنلی یین اورتاسیندا اوجالان قایانین اوستو خینالی ایدی ، اطرافینی که ک اوتو بوروموشدو . سالاتین اوزو ده حیسس ائتمه ده ن گوی تپه لیلرین (( اریم گلدی )) آدلاندیردیقلاری یئره گلیب چیخدی . بورا همیشه قیز – گلینله دولو اولاردی . قیزلار که ک اوتو دریب بورداجا قورودار ، گلینلر باش – باشا وئریب خیسینلاشار ، آرابیر قاینانالاریندان گیلئی له نیب داد چکردیلر . آرانا دوغرو اوزانان یوللارا حسره تله بویلانماق ، هر قارالتی یا گوز قویماق اونلارین عاده تی ایدی . آشاغی لاردا بیر آرابا ، بیر آتلی گورونن کیمی اوره کلری دویونه ردی . سئوینجلرینی بیر – بیرلرینده ن گیزله ین گلینلر قارالتی یاخینلاشانا کیمی اوزلرینی ساکیت آپارماغا چالیشاردیلار . گله نین کیم اولدوغونو بیله نده ن سورا ایسه ساکیتجه آیاغا دورار ، (( اریم گلدی )) - دئیه قیمیشاردی . یاشماقلارینی بورونلارینا قده ر قالدیریب دَیَه لره دوغرو قاچاردیلار . اری گلمه ینلر ایسه بیر – بیرنه قاش – گوز ائدیب ، گئده نلرین دالینجا گوله ردیلر .
بو گون نه ده نسه بورا بوش ایدی . بینه ده کی کیشی لر بئش – اون گون ایدی کی ، آرانا ، بیچینه گئتمیشدیلر . اونلارین قاییتماق واختی ایدی . بس نه ایچون یوللارا بویلانان یوخ ایدی ؟سالاتین تعججوب ائتدی . آنجاق بیرده ن قایانین آلت طرفینده ن ، کولگه دوشن یئرده ن جینگیلتیلی بیر سس ائشیتدی :
شکی ده ن فورقون گلیر ،
آتلاری یورقون گلیر ....
ماهنی نین دالینجا قاققیلداشیب گولوشدولر . سالاتین آنلادی کی ، بورا بوش دئییل . بینه ده کی قیز – گلین قایانین کولگه سینه توپلاشیب یوللارا باخیر . دوغرودان دا دره نین دیبی ایله اوچ آت فورقون گلیردی .
قایانین دیبینده یئنه گولوش ائشیدیلدی . کیمسه اوجادان قیشقیردی :
- آی گلینلر ،اوزونوزو حاضیرلایین ، هانسی نیزین سا اری نیز گلیر.
- داها یاخشی .
سالاتین قیزاردی . اوره یینده (( آللاه آبرینیزی توکسون )) . – دئیه گولوشه نلرین دالیسینجا دئییندی و آددیملارینی یئیینله دیب اوردان اوزاقلاشدی . بئش – اون آددیم گئتمیش اوز – اوزونو دانلاماغا باشلادی . (( منده قریبه اولموشام . خالقی قیناییرام ، آنجاق اوزومون توتدوغوم ایشده ن خبریم یوخدور )) .
اشرف گیل قایانین کولگه سینده ایدیلر . احمد ایری بیر داشین اوستونده اوتورموشدو . عوثمان قایانین دیوارینا کومورله نه ایسه یازیردی . اشرف بیر آز او طرفده ، سلیمه شئعر ازبرله دیردی . قایادا سالامات یئر قالمامیشدی . هر طرف یازیق – یازیق اولموشدو . حتتا تورپاقدا دا ایری – اویری خطلر واریدی . اونلارین باشی لاپ قاریشمیشدی . عوثمان بیرده ن دایاندی . الینده کومور قایایا باخیب فیکره گئتدی . آلنی نین داماری شیشدی . اونون قریبه گورکه می واریدی . صیفه تی کومور توزونا بولاشمیشدی . ساچی نین دیبینده ن آخان تر یاناغیندان قارا زولاق سالمیشدی .
عوثمان گوزونو یوخاری دیکیب خیالیندا نه یی ایسه حئسابلادی . کومورله قایانی یازدی . درحال دا الی ایله سیلدی . سلیم شئعره آرا وئریب اونا نه ایسه ایشاره ائتدی . احمد بونو گوردو و سلیمه گوزونو آغارتدی :
- ایشین اولماسین ، بوساعات اوزو تاپاجاق .
دوغروداندا عوثمان بیرده ن قایایا یاخینلاشدی . الینده کی یاش اسکی ایله داشی سیلدی و دانیشا – دانیشا اود کیمی یازماغا باشلادی . احمد آیاغا دوروب الینی عوثمانین کوره یینه ووردو :
- باخ ، ایندی آرخایینام . حئسابدان ایمتاحان وئره جکسن .
عوثمان قولو ایله آلنی نین ترینی سیلدی . اونون صیفه تی قاپ قارا اولدو .
- سلیم سن نئجه ؟
- هامیسینی بیلیره م . بوتون دورد عملییاتی لاپ یوخولو – یوخولو دانیشارام .
- چوخ یاخشی . اشرف ، بس شئعری بیلیرمی ؟
- بیلیر . – دئیه اشرف گوله – گوله جاواب وئردی . – بیز بو گونکو ایشیمیزی قورتارمیشیق .
- منده سیزه چوره ک گتیرمیشم .
اونلار دونوب ، الینده باغلاما ، قایانین اوستونده دوران سالاتینا باخدیلار . اشرف تئز قیزین یانینا قاچیب باجیسی نین چیینی نی قوجاقلادی :
- لاپ گوزه ل ایش گوروبسن ، تئز اول ، باغلامانی آچ ، گوره ک نه یین وار .
سالاتین قایانین کولگه سینده یاشیل اوتلوغدا سوفره آچدی . تزه ایستی چوره یین عطری اطرافا یاییلدی . اشرف چوره یین بیرینی درحال گوتوروب کسدی . آراسینا پئندیر قویوب دورمه کله دی .
- احمد له له ، تئز اول ، موتال پئندیر ایله تزه چوره یین لذذه تی آیری اولور .
احمد ساکیتجه سوفره یه یاخینلاشدی .
سالاتین اشرفین بویرونه قیسیلدی :
- آخشام دووغامیز اولاجاق .
- اوزو ده یارپیزنان ، ائله می ؟
- ائله دیر .
اشرف اوشاقلاری دا چاغیردی . اونلار بارداش قوروب هرله مه اوتوردولار . سالاتین عوثمانین صیر – صیفه تینه باخیب گولدو :
- اَ یه ، اوز – گوزون نه کوکده دیر ، لاپ کومورچویه اوخشاییرسان .
هامی گولوشدو . اصلینده او بیری اوشاقلاردا توز – تورپاق ایچینده ایدیلر .
- تئز اولون ، اوزونوزو بولاغا سالین . گوروم کیم تئز گئدیب - گله جک . دالدا قالانا چوره ک وئرمه یه جه ییک .
اوشاقلار بیر – بیرینی قووا – قووا دره یه ، بولاغین اوستونه ائندیلر .