بینه لرین اوست طرفینده ن سس – کوی قالخدی . ایتلر چاخناشیب بیر – بیرینه دَیدی . دانا – بوزوو بویروشدو . یئنی جه یوخویا گئده ن آرواد – اوشاق اویاندی . کیمی ایسه ووردولار . سونرا دا ایت زینگیلتی سی ائشیدیلدی . هامی سکسکه لی حالدا داها نه اولاجاغینی گوزله دی .
گلنلر دَیَه لره یاخینلاشدیلار . آرواد قیشقیرتی سی اوشاق آغلاماسینا قاریشدی . کیمی ایسه سویدولر . کیمی ایسه ایته له دیلر . چته ن شاققیلدادی . بیرینجی دَیَه ده باش وئره ن عینی ایله ایکینجی ، اوچونجو دَیَه ده تکرار اولدو .
زرنیگار خانیم یئرین ایچینده ، یوخاری محلله ده باش وئره ن بو سس – کویه قولاق آسدی . یورغانی اوستونه چکدی . بویرونه قیسیلیب تیتره ین سالاتینین ساچینی سیغاللادی . سس – کوی یاواش – یاواش بینه لرین اوست طرفینده ن آشاغی ائندی . زرنیگلر خانیم مسله نی باشا دوشدو . دَیَه لره باسقین ائتمیشدیلر . آنجاق چاپقینچیلار مال – قارا آپارماغا گلمه میشدیلر . بئله اولسایدی ، بیر باش خالخالی آچار ، حئیوانلاری قاباقلارینا قاتیب آپاراردیلار . گلنلر دَیَه لری آختاریردیلار . زرنیگار خانیم اونلارین ایچه ری نئجه گیردیکلرینی ، آرواد – اوشاغین اوستونده ن یورغانی نئجه آتدیقلارینی ، قیزلارین قولوندان یاپیشیب نئجه قالدیردیقلارینی تصوورونده جانلاندیردی . آروادین جانینا واهیمه دوشدو . آخشام اوستو بولاق باشیندا آروادلاردان بیری اونا ایهام وورموشدو کی ، (( ائحتیاطلی اولون ، بینه ده خیسینلاشما وار ، قولاغیما بعضی سوزلر دَییر )) . زرنیگارخانیم بونا اهمییت وئرمه میشدی . حتتا بو مسله نی اشرفه بئله بیلدیرمه میشدی . (( ایندی من نه ائدیم ؟ سیغیرچیلاردان باشقا باشی پاپاقلی لارین هامیسی آراندادیر ، کیمه الیم چاتاجاق ؟ یوخ ، گره ک قیزی ایشیق گوزونه بیر طرفه قاچیردایدیم . یادا اشرفین یانینا گونده ره یدیم . اوشاقدا اولسا ، کیشی خایلاغی دیر ، اوله ردی ، آمما باجیسینی وئرمه زدی . بو گونو قارا دا همیشه قارداشی نین یانیندا قالیردی ، بو گئجه ترس کیمی قاچیب بورا گلدی . بلکه ائله آللاهین ایسته یی بودور . قیز اشرفین یانیندا اولسایدی ، اوشاغا خطر دَیَردی . بلکه هئچ بیزیم دَیَه لره یاخین گلمه یه جکلر ؟ ))
لاپ یاخیندان کوبود ، خیریلتی لی کیشی سسی ائشیدیلدی . آرواد – اوشاغی دَیَه ده ن باییرا توکدولر . کیمسه برکده ن سویدو :
- آی کوپک اوشاغی ، نه گزیرسینیز ، آرواد – اوشاقدان نه ایسته ییرسینیز ؟
- قیز هانی ؟
- قیز نه دیر ، آی قانماز کوپک اوشاغی ؟
- سسینی کس ، له چَر ، قیزین یئرینی دئه .
زرنیگار خانیم قاریشیقلیقدا سالاتینین آدینی ائشیتدی . آروادین ائله بیل بده نینه سویوق ایلان دولاندی . دیزلرینده ن سیزیلتی قالخدی . نه قده ر چالیشدیسا دا ، دیشلری نین شاققیلتی سینی کسه بیلمه دی . بیر آنا سووقی – طبیسی ایله قیزینی قوجاقلادی . ائل ایچینده بیابیر اولاجاغیق . ایندی من نه ائله ییم ؟ آللاه ، سن اوزون کومک اول . گوروم سنی پئشمان اولاسان ، آی جاهاندار آغا ، سنین اوجوندان بو آزارا دوشموشوک )) . آروادین نفسی داریخدی . بیر ایسته دی چیلین – چیلپاق آیاغا دورسون ، قیزین قولوندان یاپیشیب دره یه قاچسین ، بیر باشا اوزوآشاغی گئتسین ، یادا اشرفی کومه یه چاغیرسین . آرواد اوزونو لاپ ایتیردی . اوغلونو سسله مه یه اوره ک ائتمه دی . اشرفین باشینا خاطا گله جه یینده ن قورخدو .
سس – کوی لاپ یاخینلاشدی . چَنه سی شاققیلدایان سالاتینین بده نی اوچوندو . او ، آناسی نین بویرونه قیسیلیب یورغانی باشینا چکسه ده ، هر شئیی ائشیدیر و وضییه تینی باشا دوشوردو . او دا چیخیش یولو آختاریردی ، لاکین تاپا بیلمیردی . (( بلکه فرماشا گیریم ، یا دا گئچه یه بورونوب چَته نین بویرونده دایانیم ؟ نَمییه گیرسم نئجه اولار ؟))
باسقینچیلار جاهاندارآغاگیلین دَیَه لرینه یاخینلاشدیلار . نوکرلر چوماق گوتوروب یولو کسدیلر . ال به یاخا ووروشما باشلادی . آغاج شاققیلدادی ، خنجر جینگیلده دی . زرنیگارخانیم دا ، سالاتین دا باشا دوشدو کی ، گلن لرین قاباغینی ساخلاماق مومکون دئییل .
قیز بیرده ن یورغانی اوستونده ن آتدی . ائله آلت کوینه کده ، آیاق – یالین ، باش آچیق باییرا قاجدی . اوولجه دره یه ائنمک ایسته دی . سونرا دَیَه لرین قاباغینداکی پالید آغاجی نین آلتینا گئتدی . بیر ته هر آغاجا چیخماغی ، اورا دا ، بوداقلارین آراسیندا گیزله نمه یی قرارا آلدی . آنجاق نه قده ر چالیشدیسا ، شاخدان یاپیشا بیلمه دی . اونون آیاقلاری اسیر ، اللری تیتره ییردی .
باسقینچیلار ، نهایت شامخالین دَیَه سینه یاخینلاشدیلار. چَته نی کنارا آتدیلار . گئچه نی دارتیب سالدیلار . یورغان – دوشه یی بیر- بیرینه قاتدیلار . سالاتین آناسی نین قیشقیرتی سینی ائشیتدی :
- گلینه دَیمه یین ، آی بی ناموسلار .
- قیزی هاردا گیزله دیب سن ، یئرینی دئه .
- قیز یوخدو .
- تئز اول ، یوخسا ساچینی بیله ییمه دولارام .
- آروادا المی قالدیراجاقسان ، آی کوپک اوغلو ؟
- سسینی کس ، تئز اول ، قیزین یئرینی دئه .
سالاتین قیشقیرتی ائشیتدی . اونا ائله گلدی کی ، آناسینی ووردولار . قیزین اوره یی دوزمه دی . آغاجین دالیندان چیخیب اونون یانینا قاچماق ایسته دی . آنجاق اوزونو ساخلادی .
باسقینچیلار زرنیگارخانیمی دا ، گوله سری ده ، قولوندان توتوب باییرا آتدیلار . یورغان – دوشه یی ، پالازلاری چوله توللادیلار . فرماشلاری، صاندیغی اله ک – وَله ک ائله دیلر . نَمیینی گزدیلر . تئژنه له ری آیاقلادیلار . اللرینه هئچ نه کئچمه دی . یئنه کیم ایسه قیشقیردی :
- قیزی هاردا گیزله دیبسن ؟
- سنه دئدیم کی ، قیز یوخدور .
- یئرینی دئه .
- چوخدان بینه ده ن قاچیرتمیشام .
- آی قاری ، بیزیم باشیمیزی اکمه .
- آختارین تاپین .
اونلار یئنه فیرلاندیلار . یورغان – دوشه یی بیر ده آلتینی اوستونه چئویردیلر .
- ا َ ، بو نئجه اولوب ؟
- هئچ یانا گئده بیلمز ، بورالاردا اولاجاق ، - دئیه باسقینچیلاردان بیری دیلله ندی .
اوره یی ساکیتله شمک اوزره اولان سالاتینین بده نینه یئنیده ن لرزه دوشدو . او ائله بیلدی کی ، باسقینچیلار آغاجا دوغرو گلیرلر . قیز اله کئچمه مک اوچون سورونه – سورونه خالخالا گیردی . بویور – بویوره وئریب یاتیشان اینه کلرین آراسیندا اوزاندی . حئیوانلار گووشه کلرینی ساخلادیلار . بیر خئیلی قولاقلارینی شکله ییب تعججوبله باخدیلار . سالاتین ترپه ندی . یاخینداکی اینه ک ایلان کیمی فیسیلداییب یئرینده ن قالخدی . سالاتین اونون قارنی نین آلتیندا دالدالانماق ایسته دی . اینه ک بو آغ پالتارلی قیزی گوره نده داها دا هورکدو . گئری چکیلیب قورخونج بیر سسله مَله دی . او بیری اینه کلر ده هورکوب آیاغا دوردولار . خالخالا چاخناشما دوشدو . سالاتین نه قده ر چالیشدیسا دا ، دالدالانماغا یئر تاپمادی . اینه کلر اونو بوینوزلارینا گوتوروب خالخالدان آتماغا حاضیرلاشدیلار .
باسقینچیلاردان بیری آیاق ساخلادی . اینه کلرین چَپَره سیخیشدیردیغی آغ پالتارلی قیزی گوردو . درحال او بیر یولداشلارینی سسله دی :
- اَیه ، تاپمیشام .
سالاتین دوزه بیلمه دی . قیشقیرا – قیشقیرا دره یه قاچدی . اونون دالینجا توکولدولر . زرنیگارخانیمدا ساچینی یولا – یولا دره یه ائندی . قیزین آیاغی دولاشدی ، آغزی اوسته یئره سریلدی . بیر – ایکی دفه یومالاندی . دیرسه یی داشا دییب قانادی ، آنجاق سسینی چیخارتمادی . سورونوب اوزونو گیجی تیکان کوللوغونا سالدی . ائله بیل بده نی نه دوز باسدیلار ، آیاقلاری قورا دوشدو . قوللاری ، اوز – گوزو شیشدی . آنجاق جانینی دیشینه توتوب سوسدو . آددیم سسلری یاخینلاشدی . سالاتین اله کئچه جه یینی گوروب سینه – سینه ( سییه – سییه ) گیجی تیکانلیقدان چیخدی . آسیرقاللیقدا گیزله ندی . بورادان او یانا قاچماغا یئر یوخ ایدی.
باسقینچیلار خئیلی گزدیلر . حتتا بیر – ایکی دفه لاپ سالاتینین یانیندان کئچدیلر . قیز بیر آن ایچینده بیر نئچه دفه اولومده ن قاییتدی .
- اَیه ، بیرده گزین ، بورالاردادیر .
آسیرقاللاری قاتلاییب آیاقلاری نین آلتینا آلدیلار . اونلاری شارت ها شارت لا سیندیردیلار . سالاتینی اوزوک قاشی کیمی قومارالادیلار . قیز آتیلیب آرادان چیخماق ایسته دیکده اونو توتدولار . قولونو قانیریب آغزینی باغلاماغا چالیشدیلار . سالاتین توکورپَردیجی سسله قیشقیردی :
- آنا ! ! ! هارداسان ، آی قاغا دادیما چات ، آی قارداش !
اونون ال – قول آتیب چابالاماغینا فیکیر وئرمه دیار . یاخین گلنلرین اوز – گوزونو جیریب اللرینی دیشله مه سینه باخمادیلار . باسقینچیلاردان بیری اونو یوماق کیمی بوکوب قولتوغونا ووردو ، سالاتین چابالادی ، سوروشوب یئره دوشدو . قیزین بو حرکتلرین ده ن قضبله نن کیشی اونون اللرینی ، آیاقلارینی ایری اووجونون ایچینده سیخیب قویون کیمی چیینی نه آلدی . باسقینچیلار قایالیغا دوغرو گئتدیلر . قارشی طرفده ن آت کیشنه دی . سالاتین یئنی ده ن قیشقیردی . زرنیگار خانیم الینی دیزینه چیرپدی و آشاغی داکی دره لره دوغرو قاچدی .
- وای ، ائویم ییخیلدی ، اشرف ، قیزی آپاردیلار .
بو قیشقیرتینی اشرفده ن قاباق احمد ائشیدیب دیک آتیلدی . شالوارینی گئیینمه سی ایله توفنگی گوتوروب دَیَه ده ن چیخماسی بیر اولدو . بیر باش سس گلن طرفه یویوردو . ایتلر قایالیغا باسقین ائدیردیلر . سیغیرچیلار های – هارای سالمیشدیلار . قارماقاریشیق سس گلیر ، آرابیر آت کیشنه ییردی . احمد جیغیرلا قایانین اوست طرفینه یویوردو . باسقینچیلارین قاباغینی کسمک ایسته دی . آنجاق اوندان قاباق اوزونو یئتیره ن اشرف قایالیغا دالبادال ایکی گولله آتدی . آت کیشنه دی . باسقینچیلاردا گولله آتدیلار . احمد قایالیقدا آیاق اوسته دایانان اشرفی دارتیب یئره ییخدی . تووشویه – تووشویه سوروشدو :
- نه اولوب ؟
سالاتینی آپاریبلار .
اشرف یئرینده ن سیچراییب آیاغا قالخدی . سسی گلدیکجه باغیردی :
- آ کوپک اوشاغی ، بو ساعات هامینیزی قیراجام .
او هئچ نه یه باخمادان ایره لی جومدو . نوکرلر ده اونون دالینجا قاچدیلار . احمد بیر خئیلی ساکیتجه دایانیب قارانلیقدا اطرافی دینشه دی . باسقینچیلارین هانسی طرفه گئتدیکلرینی تخمین ائتدیکده ن سونرا (( اریم گلدی )) تپه سینه دوغرو یویوردو . داشلاردان بیرینی اوزونه مه ته ریس( دالداناجاق ) ائدیب گوزله دی . باسقینچیلار یئنی جه آتلانیردیلار . احمد چاخماغی هرله دی . قایالار شاققیلدادی . توفنگین دالینجا اوزو ده قیشقیردی :
- اَیه ، قویمایین قاباقلارینی کسین .
آتیشما باشلاندی . باسقینچیلار بیر خئیلی قایالارین اطرافیندا فیرلاندیلار . سونرا آتلارین تاپپیلتی سی دره ده ائشیدیلدی . کیم ایسه اینیلده دی . احمدین قولاغی نین دیبینده ن ایکی گولله وییلداییب کئچدی . او ، یئره یاتدی . اشرفی گوزده ن ایتیردی . آرتیق ایتلر دره نین او طرفینده هوروردولر . آتلار اوزاقدا کیشنه ییردی .
احمد اشرفی او طرفده ، داغین دوشونده تاپدی . او دولوخسونموشدو:
- آرادان چیخدیلار ، احمد له له ، ایندی نه ائله یه ک ، قیز الده ن گئتدی !
- داللارینجا دوشمک لازیمدیر .
اونلار بیر آزدان آتلاری دوردنالا چاپاراق دره ده گوزده ن ایتدیلر .
* * * * * *
آللاهیار کوچری کندی نین بینه لرینده ، حسن آغانین آلاچیغیندا اوتوروب بویوک اینتیظار و تلاشلا سالاتینی قاچیرماق اوچون گونده ردیی آداملارین قاییتماسینی گوزله ییردی . اونون فیکیری داغینیق ایدی . دوز بیر هفته ایدی کی ، نه گوزونه یوخو گئدیر ، نه ده بوغازیندان بیر تیکه چوره ک کئچیردی . آللاهیار ، نهایت ، الینه فورصت دوشدویونه و دوشمنینده ن اینتیقام آلاجاغینا سئوینیردی . تئز – تئز اوره یینده جاهاندارآغانی یامانلاییردی : (( آدامین آناسینی بئله آغلادارلار. سن منیم آروادیمی آپاردین ، منده عوضینده سنین دوغما قیزینی گتیریب روسوای ائله یه جم)) .
اصلینده سالاتینی گوتوروب قاچماغی اونون آغلینا موللا صادیق سالمیشدی . اون گون بوندان اوول آللاهیارا سیفاریش یوللامیشدی کی ، (( باشینی اورادا ایسلات ، بورادا قیرخدیر )) . آللاهیار بو خبری ائشیده ن کیمی آتینی مینیب ، بیرباش یایلاغا گلمیشدی . اونلار داغ کندلری نین بیرینده گوروشموشدولر . موللا صادیق بینه لرده کیشی لرین آز اولدوغونو ، هامی نین آرانا ، بیچینه گئتدیی نی اونا خبر وئرمیشدی . جاهاندارآغا یوخ ایدی . بئله فورصت اله دوشمه زدی. آللاهیار موللانین مصلحتی ایله اون نفر آدام تاپیب دانیشمیشدی ، اونلاری قیزین دالینجا گونده رمیشدی . اوزو ایسه حسن آغانین یانینا گلمیشدی . اونون مقصدی بیر نئچه گونلویونه بورالاردا دالدالانماق ایدی . او چوخ گوزه ل بیلیردی کی ، قیزی آختاراجاقلار . اگر سالاتینی اوز کندلرینه آپارسا ، درحال اله کئچردی . بورادا ، آغیلا گلمز یئرده نسه بیر نئچه گون قالا بیلردی . اونا ائله بو دا بس ایدی . آللاهیارین مقصدی سالاتینی اوزونه آرواد ائله مک دئییلدی . او ایسته ییردی کی ، جاهاندارآغا اونون آروادی ایله کئف چکدیی کیمی ، بو دا بیر هفته ، اون گون سالاتینلا کئف چکسین ، سونرا ایسه قیزی اوزوقارا حالدا گئری قایتارسین . بلکه ده باشینا داها بئتر پیسلیکلر گتیرسین .
آللاهیارین چایی چوخدان سویوموشدو . حسن آغا ساکیتجه اونو سوزور ، آرابیرده دوداقلاری گولوردو . او اوزوده بئله حال کئچیرمیشدی . آروادی یمن خانیمی اونا وئرمک ایسته مه یه نده قیزی گوتوروب قاچماغا آدام گونده رمیشدی . اصلینده قیز اوزو ده قاچماغا حاضیرلاشمیشدی . آنجاق قیزی گتیره نه قده ر حسن آغا دوروب دینجه له بیلمه میشدی .
- اَ ، نه اولوب ، نه قم دریاسینا باتیبسان ؟
- قورخورام الی بوش قاییدالار .
- بئح وئریبسنمی ؟
- هره سینه بیر قیزیل اونلوق .
- اوندا اوره یینی بوز کیمی سرین ساخلا . اوله رلر ، آمما پولدان کئچمه زلر . اونلارین پئشه سی مال اوغورلاییب ، قیز قاچیرتماقدیر .
- اوراسی ائله دیر ، آمما یئنه اوره ییم ناراحاتدیر .
- ناراحات اولما .
اونلارا یئنه چای وئردیلر . آللاهیار ایسته کانی گوتوروب بیر – ایکی هورتوم ایچدی . ائله بو واخت سس – کوی قالخدی . ایتلر برکده ن هوردو . بیر دسته آتلی بینه یه یاخینلاشدی . اونلار آلاچیغین قاپی سیندا دایاندیلار . سالاتینی یئره دوشوردولر . حسن آغانین آروادی گلینی ایله کومه کله شیب الی ، آیاغی باغلی سالاتینی اوز دَیَه سینه آپاردی . باسقینچیلارین باشچی سی آلاچیغا گیردی . آللاهیار درحال آیاغا دوردو :
- گتیردینیزمی ؟
- گتیردیک ، آمما بیزه یامان باها تامام اولدو .
- نئجه ؟
- آتیمیزین بیرینی ووردولار . یولداشلاریمیزدان دا ایکی سی یارالاندی .
- هئچ نه اولماز .
- یاخشی ، بیزیم حاققیمیزی وئر ، قارانلیقکن آرادان چیخاق .
- قیز هانی ؟
- خانیم دَیَه یه آپاردی .
آللاهیار الینی جیبی نه سالدی . اوولجه ده ن آییریب حاضیرلادیغی پولو چیخارتدی :
- آل ، اوزونوز بولوشرسینیز .
- بو آزدی . یارالانانلار هئچ ، گره ک آتین پولونو دا وئره سن .
- او منیم ایشیم دئییل .
- سونرا پئشمان اولارسان .
- نه دئمک ایسته ییرسن ؟
- بیر سوزدور ، دئییره م ، فیکیرلش .
آللاهیار قارشی سیندا دایانان آدامین ساچاقلی پاپاغینا ، توکلو صیفه تینه باخدی . بیر خئیلی تره ددود ایچینده دایاندی . اونون فیکرینده ن نه لر کئچدیی نی بیلمک ایسته دی . حسن آغا آرایا چوکن سوکوتو زارافاتیانا طرزده پوزدو :
- کیشی نی یولا سال . کونلو بالیق ایسته ین گره ک سویا گیرسین .
آللاهیار دینمز – سویله مز الینی جیبی نه سالدی . آتین پولونو دا وئردی . یالنیز بوندان سونرا باسقینچیلارین باشچیسی اونلارلا خوداحافیظ له شدی .
- سالامات قالین .
اونلار گئده نده ن سونرا آللاهیار بیر آز ساکیت له شدی . حسن آغا قوناغی نین گوزلرینده وحشی بیر حریص لیکله سئوینجین قاریشی غینی گوردو . دوداق آلتی گولومسونوب دوشکچه نین اوستونه اوزاندی .