جاهاندارآغا آیاغی نین ایکیسینی ده یه هرین اوستونده ن ساغ طرفه آشیریب ، آتین بئلینده یاناکی اوتورموشدو . او ، پاپیروسونو سومورور و قیرچین – قیرچین اولوب دالغالانان زمی لره تاماشا ائدیردی . دَمیه ده کی تاخیل لار کهر با کیمی سارالمیشدی . سونبوللر آغیرلاشیب بوینونو اَیمیشدی . اوفوقلره قده ر اوزانیب گئده ن زمی لری آرابیر " کور " طرفده ن اسن مئه یئرینده ن اوینادیب دنیز کیمی لپه له ندیریردی . چول لره آهنگدار بیر خیشیلتی یاییلمیشدی . قرب طرف ده کی داغلارین سینه سی بئله سارالمیشدی . (( بورانی دا بیچدیریب ، دریزلری قاپی یا داشیتدیرسام ، آتین باشینی قانیریب یایلاغا قاییدارام ، - دئیه جاهاندارآغا دوشونمه یه باشلادی . - اورالاردا یئیه سیز قالیب ، آراندا چوخ لنگیمک اولماز ، زامانا اَللَم – قَللَم زاماناسی دیر ، سونرا نه اولار ، نه اولماز . شامخال ظننیمی ایتیردی .، اشرفده ن ایسه آغلیم بیر شئی کسمیر ، اونلارا آرواد – اوشاق تاپشیرماق اولماز )) .
کیشی آخیر واختلار باش وئره ن حادیثه لری خاطیرلادی ، نهایت ، مارالین اولدورولمه سینی یادینا سالدی . بونلارین هامیسی دوشمن چیلیک ایدی . اونو ایزله ییر ، هر آددیم باشی ساتاشیردیلار . جاهاندارآغا اووللر بونا او قده رده اهمییت وئرمک ایسته میردی . هر گده – گوده یه باش قوشماغی شانینه سیغیشدیرمیردی . بئله اولماسایدی ، دوشمن ین قاپی سینا آتین سوره ر ، اونو باییرا چاغیرار و گولله نی سینه سینه سیخاردی . بیرده او ، هئچ آغلینا گتیرمزدی کی ، جساره ت ائدیب اونون هنده وه رینه هرله نن اولار . آنجاق ، گورونور ، زامان دییشمیشدی . هر باشینا پاپاق قویان اوزونو کیشی حئساب ائله ییر ، الینه توفنگ آلیب جاماعات آراسینا چیخیر . (( یوخ ، بو ایشی بئله قویماق اولماز . ائل داغدان آرانا ائنن کیمی او کوپک اوغلونون ایزینی ایتیرمک لازیمدیر . بئله ائله مه سم ، بوندان سونرا دا ال – آیاقیما چوخ دولاشاجاق )) .
جاهاندارآغا باشینی قالدیریب اوفوقه ، سونرا دا " کور"ون او اوزونده کی مئشه یه باخدی . ائل داغا کوچمزده ن اوول کازاکلارین کنده گلمه سینی ، پریستاولا اولان صوحبتی خاطیرلادی . مئشه ده کی احوالاتی یادینا سالدی . کوکسونو اوتوروب باشینی بوللادی : ( بو دیوان – دره ده آمانیمیزی قیریب . دئیه سن ، بوندان سونرا چوخ چتین اولاجاق . هفته نین بیر بو باشیندا ، بیر ده او باشیندا پریستاو آتینی چاپیب گله جک ، کور کیمی قاپی نی کسدیره جکدیر . قورخورام آخیردا بیزی لاپ کبینلی آروادا دونده رسینلر)) .
آت ، صاحیبی نین فیکره گئتدیی نی باشا دوشدویونده ن ، اوزو یولدان دوندو ، تاخیل لارین آراسینداکی جیغیرا کئچدی ، زمی لرین اورتاسینداکی تنها چینار آغاجینا دوغرو آددیملادی . ایری قاراقیلچیق سونبوللر جاهاندارآغانین آیاغینا توخونسا دا ، کیشی وضییه تینی دییشمه دی . چینارین او اوزونده کی بیچین چیلره گوزونو زیلله دی . اوراقلار هاوادا پاریلداییردی . کیم ایسه آستادان بایاتی دئییردی :
ائله می قار قالاندی ،
قیش گلدی ، قار قالاندی .
قارغالار لاچین اولدو ،
لاچینلار قارغالاندی .
جاهاندارآغا ساکیتجه ماهنی یا قولاق آسدی . بایاتی نین سوزلری اونو داها دا مایوسلاشدیردی . کیشی بیرده ن – بیره ایستی له ندی . الینی آتیب کوینه یینین یاخاسینی آچدی . تاخیل لارین بورکوسو اونو ووردو . بیر آز بوندان اوول "کور" طرفده ن اسن مئه بیرده ن – بیره دایاندیغیندان ، چول لرین اوستونه بوغاناقلی هاوا چوکموشدو . آدام نفس آلدیقجا بوغازی قورویور ، جییه رلرینه ایستی تندیر هنیرتیسی کیمی بیر شئی دولوردو .
آت چینارین کولگه سینده دایاندی . قولاقلارینی شکله ییب آستادان کیشنه دی . جاهاندارآغا سیچراییب یه هرده ن یئره دوشدی . آتی آغاجا باغلاییب کولگه ده کی داشین اوستونده اوتوردو . بیرجه یارپاق دا ترپه نمیردی . آغاجین گووده سینه یاپیشمیش جیرجیرامالار آغیز – آغیزا وئریب اوتوشوردو . اونلارین زیل سسی آز قالیردی آدامین بئینینی دئشسین . جاهاندارآغا بیر خئیلی داشین اوستونده ساکیتجه اوتوروب نفسینی دردی . گون اونو قارالتمیشدی . کیشی گوجله نفس آلیردی . او ، پاپیروسونو سون دفه سوموروب آتدی . کووشه نه اود دوشمه سینده ن ائحتیاط ائده ره ک ، آیاقی ایله تاپدالاییب سوندوردو . بوندان سونرا اطرافا بویلاندی . آغاجین کولگه سینده ، اوتون آلتیندا گیزله دیلمیش جورده یی گوره ن کیمی آیاغا قالخدی . قابی گوتوروب سویو باشینا چکدی . سو قان کیمی ایلیق ایدی . آنجاق کیشی بونا اهمییت وئرمه دی . دویونجا ایچدی . جورده یی یئنی ده ن اوتون آلتیندا گیزله تدی . قولو ایله آغزینی سیله ره ک ، بیچین چیلرین یانینا گئتدی .
اونلار تاخیل ین ایچینده قاتارلاشمیشدیلار . گون یاندیرماسین دئیه ، دسماللاری نین اوجونو دویون له ییب باشلارینا کئچیرمیشدیلر . کوینه کلری ایسلانیب کوره کلرینه یاپیشمیشدی ، هوه سله ایشله ییردیلر . جاهاندارآغا اونلارا یاخینلاشدی . (( یورولمایاسینیز ! )) – دئیه اوجادان بیچین چیلری سالاملادی ، سونرا دا دسته نین آغساققالی سرکیس کیشی ایله گوروشدو .
- تاخیل نئجه دیر ، آی کیروه ؟
کیشی بئلینی دوزه لدیب دایاندی ، اوراغی سول الینه وئریب ، آلنینداکی ترینی سیلدی :
- آللاه بره کت وئرسین ، یاخشیدیر ، آغا ، اوشاقلارا آذوقه چیخاجاق . آمما یامان ایستی دیر .
- ائله اونا گورا دا چالیشین تئز قورتاراق ، بولودلارین سویو بیزی گوزله ییر .
- بیز سیزده ن ده چوخ تله سیریک ، آغا ، آرواد – اوشاغی توکوب گلمیشیک ، ایندی گوزلری یولدادیر .
- هئچ نه اولماز ، آز قالیب .
جاهاندارآغا سوسدو . بیر خئیلی بیچین چیلره باخدی . کنارداکی دریز تایاسینا یاخینلاشدی . سرکیس کیشی نین اوراغلاریندان بیرینی گوتوروب الی اله آغزی نین اووخارینی یوخلادی و گولومسوندو :
- گلسه نه اوتوشه ک ؟
- سیزه اذذیت اولار ، آغا .
- دئیه سن قورخورسان .
- ایندی کی بئله اولدو ، اوزونو گوزله .
جاهاندارآغا اوست کوینه یینی سویوندو . دسمالی نین اوجونو دویونله ییب باشینا کئچیرتدی . اوته ن گونلری یادینا سالماق و بیچین چیلری هوه سله ندیرمک مقصدی ایله اوراغی هاوادا اوینادیب ، ساری سونبول لری قوجاقلادی . سرکیس کیروه بیر خئیلی اونا گوز قویدوقدان سونرا پئشه کار بیر اوستالیقلا اوراغی هرله دی . باشقا بیچین چیلرده یاریشا قوشولدولار . جاهاندارآغا جلدلیکله اوراغی هرله ییر ، هر دفه ده آز قالیردی کی ، بیر دریز تاخیل بیچسین . اونون دالینجا گلیب دریز باغلایان اوغلان جاهاندارآغانین آرخاسیندان گوجله چاتیردی . سرکیس کیروه اوندان گئری قالماق ایسته مه دیینده ن ، اوراغی تئز – تئز هرله ییر ، آرابیر ده (( آ باشینا دونوم ، قویما )) ، - دئیه قیشقیریردی . هامی هوه سه گلمیشدی . ائله بیل تاخیل ین بورکوسو ده ، قیزمار گونَشین ایستی سی ده بیر آنلیغا یوخ اولموشدو .
اونلار خئیلی بئله جه ، بیر- بیرینی قووا – قووا تاخیل بیچدیلر . جاهاندارآغانین کوینه یی تره باتدی ، یاریمجا ساعاتدان سونرا کوره یینه یاپیشدی . تاخیل ین توزو آغ کوینه یی قاپ قارا ائتدی . تونج صیفه تینده تر زولاق سالدی . آنجاق اوراغی الینده ن بوراخمادی . زمی نین اورتاسینداکی خنده یه چاتان کیمی گئری دوندو . اوراغی هرله یه – هرله یه چینار آغاجینا دوغرو گلدی . سرکیس کیروه ده اونا آمان وئرمه دی . دابان باساراق ایره لی له دی . جاهاندارآغا زمی نین کنارینا چاتاندا بئلینی دوزه لدیب دیکه لدی . اوراغی کنارا آتیب قالیب لر کیمی قورورلا سرکیس کیشی یه باخدی :
- هه ، دئیه سن ، دالیمدان چاتا بیلمه دین ؟
بیچین چی گولومسوندو . (( یاریم ساعات ایشله مه یه نه وار . حئساب اودور کی ، بو جیرجیراما یای گونونده هفته لرله بئلینی قالدیرماییب ، تاخیل بیچه سن )) ، - دئمک ایسته دی . آنجاق دیلی نین اوجونا گلن سوزو گئری قایتاردی :
- آغا ، اَمه للی – باشیلی بیچین چی سنمیش کی ؟
- بس نه بیلمیشدین ؟
جاهاندارآغا اوراغی دریزین دیبینه آتیب کوینه یینی گوتوردو . پالتارینی گئیینمک ایسته دی . ائله بو واخت بایاقدان بیچین چیلره سو پایلایان تاپدیق اونا یاخینلاشدی :
- آغا ، ال – آیاغینیزی یوماسانیز سرینله مه زسینیز .
- سویون وارمی ؟
- وار گئده ک آغاجین کولگه سینه .
اونلار زمی ده ن آرالاندیلار . جاهاندارآغا چیم سویا باتمیش کوینه یینی سویوندو . تاپدیق اونو آغاسی نین الینده ن آلیب موحکم سیخدی و گونه سردی . سونرا دا جورده یی گوتوردو :
- آغا ، آشاغی اییلین .
جاهاندارآغا اووجونو سو ایله دولدوروب اوزونه چیرپدی . بوینونون دالیندان شورالانیب توکولن سو ایله قوللارینی و توکلو سینه سینی یودو . باشینی دا ایسلاتدی . یالنیز بوندان سونرا بده نی بیر آز سرینله دی . جورده یی تاپدیغین الینده ن آلیب ، باشینا چکدی . بیر خئیلی آغاجین کولگه سینده گزیندی . تاپدیق جاهاندارآغانین قوروموش کوینه یینی گتیردی . کیشی الینی بده نینه چکدی . قوپ قورو اولدوغونو گوروب پالتارینی گئییندی . کمرینی ، خنجرینی بئلینه باغلادیقدان سونرا سرکیس کیشی نی یانینا چاغیردی :
- فیکیرینیز نه دیر ، آی کیروه ، گئجه کنده می قاییداجاقسینیز ؟
- یوخ ، آغا ، ائله بوراداجا چینارین دیبینده یاتاریق . اوباشدان دوروب سرین کن تاخیل بیچمک داها فایدالی دیر .
- آغیللی سوزدور ، یئمه کده ن کورلوق چکمیرسینیز کی ؟
- یوخ ، چکمیریک . آمما بیر آز اوره ک سرینه ده ن شئی اولسا ، پیس اولماز .
- ائله شئیین فیکرینی چکمه یین ، دوزه له ر .
سرکیس کیشی قاییدیب بیچینه باشلادی . جاهاندارآغا ایله تاپدیق آغاجین کولگه سینده تک قالدیلار .
- بیچین چیه یاخشی قولاق آسماساق ایش یئریمه ز . بو ساعات اوشاقلاردان بیرینی گونده ر بیر چلله ک سرین سو گتیرسین . سونرا دا اوزون بوستانا گئت ، بیر – ایکی خورجون قارپیز گتیر ، قوی یئه سینلر ، داغ آداملاری دیر لار ، اوره کلری سرینه سین . چوره ک بیشیرتدیرمیسن می ؟
- بیشیرتدیرمیشم . بیر آزدان قاتیق ، سودده گتیره جکلر .
- لاپ یاخشی . دی دورما ، تَرپَن . گون اورتا چوره یینه قده ر دئدیکلریمی دوزه لت . منده او طرفلره باش چکیم .
جاهاندارآغا یاشینا اویوشمایان بیر چئویکلیکله سیچراییب آتین بئلینه قالخدی . ائله بیل بیر آز اوولکی یورغونلوقدان و ازگینلیکده ن هئچ نه قالمامیشدی . کیشی ایشله یه نده ن سونرا سانکی دیرچه لمیشدی . آت دا صاحیبی کیمی یونگولله شمیشدی ، جاهاندارآغا آیاغینی اوزه نگییه قویان کیمی ، جیلووو گمیریب یورغا آددیملارلا کولگه سینده ن اوزاقلاشدی . بئشجه دقیقه کئچمه میش تاخیل لارین آراسیندان چیخیب ، کندین اوستونه ائنن تورپاق یولا دوشدو .
هر طرفده قیزغین ایش گئدیردی . زمی لرین آراسینداکی جیغیرلارلا یوکلو آرابالار ایره لی له ییب کندین اوست طرفینده کی یولا چیخیردی . خیر یولونا چاتانا قده ر قاتارلاشان آرابالارین تکرلرینده ن قوپان توز لایلانیب هاوادا دایانمیشدی . آرتیق کند ائولری نین قاباغیندا تاخیل لار تایالارا وورولموشدو . کندلی لرین چوخو خیرمان آچیب وَل قوشموشدو . هامی پئشقوردا حاضیرلاشیر ، بیچیلمیش تاخیل لاری قاپی یا ییغیب تئزلیکله یایلاغا قاییتماغا تله سیردی .
جاهاندارآغا زمی لرین آراسیندان کئچیب بیر باش خیر یولونا ائندی و اورادا دا آتین باشینی قانیریب ائوه گلدی . بورادا دا ایش قایناییردی . ایکی یئرده وَل قوشموشدولار . سامانلیق طرفده ایسه یئنیجه خیرمان سالمیشدیلار . نوکرلر دریزلرین بندینی قیریب سونبوللری خیرمانا توکموشدولر .
جاهاندارآغا آتدان ائندی . بو دفه نوکرلری یاخینا قویمادی . اوزو آتین یه هرینی آلیب چارداغین آلتینا ، کولگه یه چکدی ، الی ایله قمرین یالینی سیغاللادی ، دوشونون ترینی سیلدی . اونون قاباغینا بیر قوجاق گوی اوت توکدوکده ن سونرا دریز تایالارینا یاخینلاشدی . او نه ده نسه بو گون ایشله مه یه هوه س گوستردیی نده ن ، بورادا دا ساکیت دایانمادی . یئنی سالینمیش خیرمانا دریز داشی یان نوکرلره کومک ائتدی . اوکوزلری قوشدولار ، وَلی خیرمانا سالدیلار . جاهاندارآغا اوزو آتیلیب وَل ین اوستونه چیخدی . چوبوغو هاوادا یئلله دیب اوکوزلری سسله دی . حئیوانلار دیزه قده ر کووشه نه ( کوله شه) باتدیلار . وَل کله – کوتور دریزلرین اوستونده لنگرله ندی . لپه له رین آتیب – توتدوغو قاییق کیمی گاه چوکه یه ائندی ، گاه دا یوخاری ، دریزلرین اوستونه قالخدی . سونبوللر خیشیلتی ایله اووخالاندی ، کووشن ( کوله ش) ازیلمه یه باشلادی . جاهاندارآغا بویوک بیر ذووقله اوکوزلری هایلادی . وَل بئش – اون دفه خیرمان بویو فیرلاندی و دریزلر یاپیخدی . خیرمان بویو دایره وی جیغیرلار دوشدو . جاهاندارآغا هر دفه وَلی یئنی یئرده ن سوردو و خیرمان تامام یاپیخانا قده ر وَل ین اوستونده ن دوشمه دی .
نهایت ، چوبوغو اونون الینده ن آلدیلار . جاهاندارآغا سیچراییب کنارا چیخدی و سامانلیغین اوستونده دایانیب ، ایشله یه نلره خئیلی تاماشا ائتدی . دسمالینی چیخاردیب ترینی سیلدیکده ن سونرا تالوارین آلتینا ، آتا یاخینلاشدی . قمر قویروغو ایله چیبینلری قووا – قووا خمیرت – خمیرت گوی اوت یئییردی . ایستی آتی دا تنتیتمیشدی . اونون سینه سی کوپوکله نمیشدی . آت ترین ایچینده ایدی . قمر صاحیبینی گوره نده باشینی ترپه دیب اوخراندی و گوزونو زیلله ییب صاحیبی نین اوزونه باخدی . سانکی (( بیزی بو ایستی ده نییه اولدورورسن ؟ )) - دئمک ایسته دی . جاهاندارآغا اونون یالینی سیغاللادی ، بوینونو قاشیدی ، باشینی سینه سینه سیخیب گوزونو اوخشادی . آت صاحیبی نین نوازیشینی دویدو و نازلی گلین لر کیمی جیلوه له ندی . جاهاندارآغا آز قالدی قمری کوکسونه باسیب اوز – گوزونده ن اوپسون . اونلارین آراسینداکی اونسییت بیر حئیوانلا اینسان آراسیندا اولان دوستلوقدان داها چوخ ایکی سیرداشین ، آغیر گونده بیر – بیرینه کومک دوروب هارایا چاتان ایلک آدامین مئهریبانلیغینا بنزه ییردی . محض بونا گورا دا جاهاندارآغا اوزو آتینا قوللوق ائدیر ، اونون اوتونو ، سویونو اوزو وئریردی ، هورویونو اوزو دییشیر ، یه هرینی ، یویه نینی اوزو آلیردی . کیشی سانکی بونونلا آتین اونا ائله دیی یاخشیلیق لارین عوضینی گئری قایتارماق ایسته ییردی .
ایندی او ، آتین چیم تره باتماسینا دوزمه دی . هئچ کسه هئچ نه دئمه دی . آتا بورونتاق وئریب یالیندان یاپیشدی و سیچراییب بئلینه قالخدی . قمر صاحیبی نین فیکرینی باشا دوشدو و بیر باش جیغیرلا ساحیله ائندی . آت سوواداغا چاتان کیمی اوزونو "کور"ون دایاز یئرینه سالدی . داشلاری شاققیلدادا – شاقیلدادا سو یوخاری ایره لی له دی . آیاغی نین آلتیندان قالخان سو اطرافا سپه له ندی . جاهاندارآغانین پالتاری ایسلاندی ، کیشی بوندان داهادا خوشحاللاندی . نهایت ، بیر آز سرنییه نده ن سونرا دایاندی ، جاهاندارآغا یئره دوشدو ، اوست پالتارینی سویونوب آتی چیمیزدیرمه یه باشلادی . قمر ساکیت دایاندی . سینه سی ، قولاقلاری نین دیبی قاشیندیقجا خوشحاللاندی و آرا بیر آستادان صاحیبینی قوخولادی .
جاهاندارآغا آتی ترتمیز یودوقدان سونرا ائوه قاییتدی . آتی یئنه تالوارین آلتینا باغلاییب قاباغینا اوت قویدو . بیر خئیلی قمرین ایشتاهلا اوت یئمه سینه تاماشا ائتدی . بیر آز دینجینی آلماق اوچون اوتاغا گیریب تاختین اوستونه اوزاندی . قوللوقچولاردان بیری اونون دیرسه یی نین آلتینا موتککه قویدو ، قاباغینا سوفره سالدی ، بیر شئی یئمک ایسته ییب – ایسته مه دیینی سوروشدو . جاهاندارآغا چای ایچه جه یینی بیلدیردی . اونا دالبادال بیر نئچه ایسته کان چای گتیردیلر . کیشی اونلاری بیر نفسه ایچیب ، دینجه لمه یی قرارا آلدی . برکده ن گرنه شیب اوزاندی . هئچ بئشجه دقیقه کئچمه میش اونو یوخو آپاردی . قوللوقچونون سوفره نی ییغیشدیردیغینی گورمه دی ، گون دوشمه سین دئیه پنجره نین تاختالارینی اورتمه سینده ن خبری اولمادی . اوتاق سرین اولسا دا تر اونو باسدی . نفس آلماسی بئله چتین له شدی . سینه سی قالخیب ائندی . اوتاغا تووشویه بنزه ر بیر سس یاییلدی . کیشی قریبه بیر یوخو گوردو :
او گوردو کی ، قاپی آستادان آرالاندی . شاه نیگار سس سالمادان ایچری گیردی . آستانادا دایانیب آیاق قابی سینی سویوندو و بارماقلاری نین اوجوندا تاختا یاخینلاشدی . بیر خئیلی قارداشی نین یاستیغی نین یانینی کسدیریب ، اونون نئجه نفس آلماسینا قولاق آسدی . جاهاندارآغا باجیسی نین اونا نئجه حسره ت و مذه ممه تله باخدیغینی گوردو . شاه نیگار الینی قوینونا قویوب ، باشینی آزاجیق یانا ایمیشدی . سینه سی آستادان تیتره ییردی . بورون پره لری گوجله سئزیله جک درجه ده سَیرییردی ، ائله بیل ایچین – ایچین آغلاییردی . جاهاندارآغا آیاغا دوروب باجیسی ندان نه اوچون آغلادیغینی سوروشماق ایسته دی . اونون قولوندان یاپیشیب تاختین اوستونده اوتورتدماغا چالیشدی ، آنجاق یئرینده ن ترپه نه بیلمه دی .
شاه نیگار بیر مودده ت بئله جه دایاندی ، سونرا اونلویونون اته یی ایله گوزونو قورولادی و آشاغی اییلیب قارداشی نین یاستیغینی دوزه لتدی . ائله بو واخت اونون الی جاهاندارآغانین آلنینا توخوندو . کیشی ترپه ندی . شاه نیگار دالی – دالی گئری چکیلیب قاپی نین آغزینا گئتدی . جاهاندارآغا دوروب اوتوردو . باجی سینی یانینا چاغیردی . او گلمه دی . (( دردین آلیم گئده جم ، تله سیره م ، ایشیم وار ، بوردا چوخ قالا بیلمه ره م ، - دئیه جاواب وئردی ، - گلدیم سنه دئییم کی ، اوندا تقصیر یوخدور . خاصییه تینی بیلیره م ، ائشیده ن کیمی دلی اولاجاقسان . آنجاق ، آللاه حاققی ، دوز سوزومدور ، سنین قیزین ترتمیزدیر ، اوندا گوناه یوخدور . سالاتین گول پارچاسی کیمی بیر اوشاقدیر . اونو دا منیم کیمی بدبخت ائله مه ، آی قارداش ، اوزونو ده ، بالانی دا اودسوز – اوجاقسیز یاندیرما ، آتام بالاسی ، ائشیتدینمی ؟ دی سالامات قال ، گوزونه قوربان اولوم ، گوروره م یامان درد چکیرسن ، آنجاق فیکیر ائله مه ، اولان – اولوب ، کئچن – کئچیب . اوزونو اوزمه )) .
شاه نیگار آیاق قابی سینی الینه گوتوردو . دونونون اته یینی یوخاری قالدیردی ، گلدیی کیمی ده ساکیتجه قاپینی آرالاییب اوتاقدان چیخدی. جاهاندارآغا اونو ساخلاماق ، گئری قایتاریب یانیندا اوتورتماق ، گوز – گوزه دایانیب دویونجا صوحبت ائتمک ایسته دی . نه قده ر قیشقیردیسا دا ، سس چیخمادی . ائله بیل سینه سی نین اوستونه آغیر بیر قایا ییخمیشدیلار . کیشی بوغولموش کیمی خیریلدادی .
جاهاندارآغا هووله نک آییلدی . هارادا اولدوغونو بیر خئیلی آیدینلاشدیرا بیلمه دی . گوزونو دویوب ماددیم – ماددیم بویلاندی . گوزو اوتاغین قارانلیغینا آلیشدیقدان سونرا یوخویا گئتدیی نی آنلادی . (( لعنت شئیطانا )) – دئیه اوز – اوزونه سویله ندی و تاختین اوستونده ن دوشدو . آغیر آددیملارلا قاپی یا یاخینلاشدی . او بیر آز بوندان اوول شاه نیگارین دایاندیغی کونجده ن گوزونو چکه بیلمیردی . کیشی یه ائله گلیردی کی ، باجیسی اورادا دایانمیشدیر . بو ساعات ترپه نه جک ، بلکه ده آتیلیب قارداشی نین بوینونا ساریلاجاقدیر . گونون گون اورتا واختی کیشی نی ائله بیل قارا باسیردی . بو بویدا آدامی واهیمه گوتورموشدو .
او اوزونو توپلادی . الینی جفته یه اوزاتدی و قاپینی آچیب جلد ائیوانا چیخدی . اورادا دایانمیشدی ، بیرباشا خیرمان یئرینه گلدی و بیر خئیلی گزیندیکده ن سونرا توختادی .
آرتیق سرین دوشموشدو . خیرمانلارین چوخوندا وَلی آچمیشدیلار . حتتا لاپ تئزده ن خیرمان دویه نلرده ن ایندی تاخیل سووورانلاردا وار ایدی . جاهاندارآغانین خیرمانلاریندان ایکی سی حاضیر ایدی . نوکرلر تاخیلی ییغیب ، خیرمانین اورتاسینا توپارلامیشدیلار .
جاهاندارآغا فیکرینی داغیتماق مقصدی ایله نوکرلرده ن قاباق شانانی الینه آلدی ، تیغین(تیغ= سامان قاریشیق بوغدا) بیر یانیندا دایانیب تاخیلی سووورماغا باشلادی . ایری ساری بوغدالار بیر یانا توکولدو ، سامان قیرینتی لارینی کولک خئیلی اوزاغا آپاردی . نوکرلرده اونا قوشولدولار . گون باتانا قده ر خیرمانداکی تاخیل لاری سوووردولار . آروادلار ساری بوغدانی خلبیرده ن کئچیردیلر . ایری چوواللارا دولدوروب یان – یانا دوزدولر . جاهاندارآغا آخیرا قده ر ایشله دی . نوکرلر سامانی ییغیب سامانلیغا توکه نده ایسه اوستونون توزونو چیرپیب بیر طرفه چکیلدی و هوندور بیر یئرده ساللاغی اوتوروب پاپیروس ائشدی .
دوققازدا آت کیشنه دی . کیم ایسه جاهاندارآغانی سسله دی . کیشی آیاغا قاخیب اوست – باشینی دوزه لتدی و آستا آددیملارلا چاغیران آدامین قاباغینا چیخدی :
- اَ ، خوش گوردوک ، یایلاقدان نه واخت گلیبسن ؟
- ائله ایندی .
- بیزیم اوشاقلاری گورمه دین کی ؟
- گوردوم . یاخشیدیلار ... آمما یایلاغا قاییت سان پیس اولماز .
جاهاندارآغانین قاشلاری چاتیلدی . او ، گوزونو آتلی نین آغزینا زیلله ییب دایاندی . کیشی حیسس ائتدی کی ، اللری تیتره ییر . اوزونو اله آلماق و کئچیردیی هیجانی قارشی سینداکینا بیلدیرمه مک اوچون پاپیروسونو سوموردو :
- نه اولوب ، خئییردیمی ؟
- ائله بیر شئی یوخدور ، آمما دئیه سن سیزین بینه لره باسقین ائله میشدیلر .
- کیم ؟ نه واخت ؟
- دونن گئجه .
- بدبختلیک – زاد اولماییب کی ؟
- واللاه ، دوزونو بیلمیره م .
- منده ن سوز گیزله تمه ، اوره ییمه دامیب .
- ائله بیر شئی یوخدور ، بیلسه م دئیه ردیم .
جاهاندارآغا پاپیروسونو کوتویونه قده ر سوموردو . کهره با موشتوک چاتیردادی و آز قالدی کی ، آلیشیب یانسین . آتلی پاپیروسون ایشیغیندا کیشی نین آغارمیش صیفه تینی گوردو . اونون یاناقیندا بیر دامجی قان قالمامیشدی . گیجگاهلارینداکی دامارلار ووروردو . بارماغی نین آراسینداکی موشتوک تیتره ییردی