(17)
سالاتین خئیلی اوزونه گلمه دی . یمن خانیم دَیَه نین اورتاسیندا هوش سوز اوزانان قیزا تلاشلا باخدی . اونون الینی ، آیاغینی آچدی . آغزینا تاخانمیش دسمالی چیخارتدی . اوزونه ، سینه سینه سو چیله دی . قیزین پالتاری دیدیک – دیدیک اولموشدو . بده نی قیپ قیرمیزی ایدی . بعضی یئرلرینده قان ساغیلمیشدی . ساچینا پیتراق دولموشدو . صیفه تی شیشمیشدی . یمن خانیم الینده چیراق ، بیر مودده ت قیزین ترپه نمه سینی گوزله دی . آروادین اوره یی کووره لدی . کالاغایی نین اوجو ایله یاشارمیش گوزونو سیلدی . قیزین سالامات یئری یوخ ایدی . تیکان اونون بده نی نی دئشیک – دئشیک ائتمیشدی . آرواد چیراغی کنارا قویدو . (( اینصافسیزلار ، گور یازیغی نه کوکه سالیبلار ، - دئیه اوز – اوزونه دئییندی . – دئیه سن ، اوشاغین ساچیندان توتوب سورویوبلر . گوره سن ، یازیغین آتا – آناسی وارمی ؟ )) تله سیک آیاغا دوروب قیزا یئر سالدی . سالاتینی قوجاغینا گوتوروب دوشه یین اوستونه اوزاتدی . سونرا دا قیزین باش طرفینده اوتوروب ساچینی سیغاللادی ، یئنه اوزونه سو چیله دی ، قیز اینیلده دی . آزاجیق سونرا ایسه گوزلرینی آچیب دویوکدو . هئچ نه آنلامادان ساکیت – ساکیت باخدی . آرواد باشا دوشدو کی ، قیزین هوشو هله تامام اوزونه گلمه ییب . گوزو باخسادا هئچ نه گورمور . یمن خانیم سالاتینین باشینی قالدیریب دیزی نین اوستونه قویدو . سویو اونون دوداقلارینا یاخینلاشدیردی :
- ایچ ، بالا ، هوشون اوزونه گلسین .
قیز دینمه دی . سودان قورتوم – قورتوم ایچدی . گوزونو زیلله ییب آروادین اوزونه باخدی و بیرده ن هیچقیرماغا باشلادی . بده نی دارتیلی یای کیمی گریلیب تیتره دی . قیزین یئنی ده ن هوشونو ایتیره جه یینده ن قورخان یمن خانیم اونون قولوندان یاپیشیب سینه سینه سیخماق ایسته دی . یمن خانیمین گلینی ده ایره لی گلدی . کومکله شیب قیزی یئنی ده ن یورغان – دوشه یه اوزاتدیلار . سالاتین تاقه تده ن دوشدو ، سولغون دوداقلاری تیتره دی ، ایچین – ایچین آغلادی :
- آی خالا ، قوربانین اولوم ، من هاردایام ؟
- قورخما ، قیزیم ، اوزونه توختاقلیق وئر .
- منی اولدورون ، آمما اونلارا وئرمه یین .
- هئچ نه اولماز ، بالا ، اوزونو اله آل .
سالاتین سورونوب یمن خانیمی قوجاقلادی . اوشاق کیمی اونون بوینونا ساریلیب هونکورتو ایله آغلادی :
- خالا قوربانین اولوم ، منی ائویمیزه قایتار ، یوخسا ده ده مین حیرصینده ن اوره یی پارتلایار . آمانین
بیر گونودور ، آی خالا ، منه یازیغین گلسین . منده ن سونرا آنامین گونو قارا اولاجاق . قارداشیم بو درده دوزه بیلمه یه جک . منی چئویر بالالاری نین باشینا ، آی خالا !
- یاخشی ، قیزیم آغیللی اول ، گوزونون یاشینی سیل .
یمن خانیم قَهَرله ندی . سالاتینین یاناقلارینداکی گوز یاشینی سیلدی ، ساچیندان اوپدو :
- کیمین قیزی سان ، بالا ؟
- جاهاندارآغانین .
آرواد دیکسیندی . سالاتینین باشینی سینه سینده ن آییریب دیققتله اوزونه باخدی :
- کیمین ؟
- جاهاندارآغانین.
یمن خانیم سوسدو . سالاتینین اینتیظار و تلاش دولو گوزلرینه باخدی . قیز ائو صاحیبه سی نین سوکوتوندان داها دا هیجانلاندی . اونون نه لر دوشوندویونو آییرد ائده بیلمه دیی نده ن بده نی بوزا دوندو . اوره یی اوشودو :
- نییه دینمیرسن ، آی خالا؟
- یاخشی ، قیزیم سن اوزان ، منده بو ساعات گلیره م .
یمن خانیم تله سیک دَیَه ده ن چیخیب آلاچیغا یاخینلاشدی . اَرینی چاغیردی . حسن آغا آغیر آددیملارلا آروادی نین یانینا گلدی :
- دَیَه نی بوشالتدینمی ؟
- بری گل ، سنه سوزوم وار.
- نه سوز ؟ کیشی گوزله ییر . دَیَه نی بوشالت ، یئر دوزه لت .
- بیر آز صبر ائله ، دئدیکلرینی دوزه لتمک آساندیر .
اونلار آلاچیقدان خئیلی آرالاندیلار . یمن خانیم پیچیلتی ایله سوزه باشلادی :
- بیلیرسن سنین قوناغین کیمین قیزینی گتیریب ؟
- نه بیلیم ، یقین یئتیمین بیری دیر .
- منده ائله بیلیردیم ، آمما ...
- اوزون ائله مه ، دئه گوروم کیمین قیزیدیر ؟
- جاهاندارآغانین .
- نه ؟ ! آرواد ، نه دانیشدیغیندیر ؟ ائله شئی اولماز !
- اولار ، نییه اولمور ، نامردده ن هر نه دئسه ن چیخار .
حسن آغا دینمه دی . همیشه چتینه دوشه نده ائتدیی کیمی ایندی ده ساققالینی قاشیماغا باشلادی .
آللاهیار اونون اوزاق تانیشلاریندان ایدی . بینه یه گلنده کیمین قیزینی قاچیرماق ایسته دیینی اونا دئمه میشدی . ائله حسن آغا دا سوروشمامیشدی . قیز گوتوروب قاچماق اونا او قده ر ده تعججوبلو گورونمه دیی نده ن ، هئچ نه ایله ماراقلانمامیشدی . بیر ده ، اونا پناه گتیره ن آدامی سورغو – سوالا توتماق حسن آغانین عاده تی دئییلدی . کیشی آنجاق ایندی باشا دوشدو کی ، مسله هئچ ده اونون فیکیرله شدیی کیمی دئییل . آللاهیار آرواد آلماق مقصدی ایله قیز گتیرمه میشدیر . اونون فیکرینده نه ایسه قارا نییت وار ، هم ده جاهاندارآغا – حسن آغانین یاخین دوستلاریندان بیری ایدی . نئچه ایلدی آرالاریندا حاقّ – سالاملاری وار ایدی .
- ایندی فیکرین نه دیر ، آ کیشی ؟
- قیز نه تهر دیر ؟
- لاپ الده ن دوشوب . بده نینده سالامات یئر یوخدور .
- گئت قیزی راحاتلا ، اوزونه ده یئمکده ن – زاددان وئر .
- بس سونرا ؟
- سونراسینی من اوزوم بیلیره م .
حسن آغا دینمه ز – سویله مه ز آلاچیغا قاییتدی . او ایچری گیره ن کیمی آللاهیار دوشکچه نین اوستونده بیر آز یایخاندی . حسن آغانین بوساعات (( هر شئی حاضیردیر ، دور گئت )) دئیه جه یینی گوزله دی . لاکین گوردو کی ، کیشی نین قاشقاباغیندان زَهَر توکولور . آللاهیارین تبسسومو دوداقلاریندا قالدی :
- قیز نه تهردیر ؟
- دور پالتارینی گئیین ، دینمه ز – سویله مه ز چیخ باییرا .
حسن آغانین خیریلتی لی سسی آللاهیاری چاشدیردی :
- اَ ، سنه نه اولدو ؟
- منیم ائویم اوغره ش خانا دئییل ، قورومساق .
- اَ ، تمیز دانیش .
- اَ ، سن کیمه ساتاشیرسان ؟
آللاهیار ایشین نه یئرده اولدوغونو سئزدی . او ، باشا دوشدو کی ، حسن آغا قیزین کیم اولدوغونو بیلیب . او دا جیددیله شدی . یاواشجا آیاغا دوردو . حسن آغا ایله اوزبه اوز دایاندی :
- به او منه ساتاشاندا یاخشی دیرمی ؟
- بورا باخ ، سن منیم قوناغیمسان . نئچه گوندور ائویمده دوز – چوره ک کسیرسن . اونا گورا دا سنه بیر شئی ائله میره م . ال – آیاغیم سنه دیمه میش ، اوزو سولو ایکن چیخ گئت .
- اَ ، کیشی لیین بودور ؟
- ردد اول ، قورومساق !
آللاهیار گوردو کی ، مسله جیددی دیر . اونونلا دانیشماق دئیه سن فایدا وئرمه یه جک . او ، سرت بیر حرکتله یاپینجی سینی گوتوروب چیینینه آتدی . آلاچیغین قاپی سینا یاخینلاشدی . نوکرلرده ن بیری اونون آتینی یه هرله ییب گتیرمیشدی .
- یاخشی ائله میرسن ، آی حسن آغا ، آدام قوناغی ائوینده ن قووماز .
- نامرد آداما منیم ائویمده یئر یوخدور .
- یاخشی ، قوی سن دئیه ن اولسون ، من سنی بئله قورخاق بیلمیردیم . جاهاندارآغانین آدی گلن کیمی اوزونو نه یامان ایتیردین ؟
- آللاهیار ، اجل سنی هرله مه سین ، چیخ گئت .
- یاخشی گئدیره م . دئینن قیزی گتیرسینلر .
- نه قیز ؟
آللاهیار دابانی اوسته فیرلانیب فیسیلدادی .حسن آغا اونون نفسینی اوزونده حیس ائتدی .
- قیزی وئر یوخسا آرایا قان سالارام .
حسن آغانین دوداغلاری سَیریدی . آللاهیاری سینه سی ایله ایته له ییب آتین بویرونه سیخیشدیردی :
- بو ساعات ردد اول بوردان ، حارامزادا ، یوخسا دالینا بولوو چالدیررام !
آللاهیار توفنگینی هرله مک ایسته دی . آنجاق نوکرلر دالدان اونون قولونو توتوب قانیردیلار .
- تئز اولون ، الینی – آیاغینی باغلاییب ، آتین بئلینه ساری یین بو کوپک اوغلونو !
آللاهیار نه قده ر چابالادیسا دا ، یاخاسینی قورتارا بیلمه دی . اونو یئره ییخیب خنجرینی ، توفنگینی الینده ن آلدیلار . یاپینجی یا بورویوب ساریدیلار ، سونرا دا آتین بئلینه آشیردیلار . بیر – ایکی شاللاق چکیب جیلووو بوراخدیلار .
یمن خانیم سحره قده ر یاتمادی . چیراغی یاندیریب قیزین بده نینه دولموش تیکانلاری چیخارتدی . اونون گویه رمیش یئرلرینه تَپیتمه قویدو . هورویونو آچیب پیتراقلاری تمیزله دی . گلین ین پالتارلاریندان گتیریب ، سالاتینی گئییندیردی . آنجاق قیز ساکیت اولمادی . یمن خانیم اونا نه قده ر اوره ک – دیره ک وئریب ، (( بیر آز یات ، دینجَل )) دئسه ده ، مومکون اولمادی . قیز بوتون گئجه نی گوزونو یوممادی . یالنیز سحره یاخین ، دان یئرینه صدا دوشه نده ، یمن خانیمین قوجاغیندا مورگوله دی . آرواد اونون باشینی ائهمالجا دیزی نین اوستونه قویدو . اوزو ده ائله بئله جه ، اوتوردوغو یئرده چیمیر ائتدی ...
گون خئیلی قالخدی . اوشاقلار اویانیب سحر – سحر شئحلی اوتلاردا آیاق یالین قاچیشماغا باشلادیلار . سیغیرچیلار ماللاری هارایلادیلار ، آنجاق سالاتین اویانمادی . حسن آغا بیر – ایکی دفه ایچری گیریب آروادیندان نه ایسه سوروشماق ایسته دی ، یمن خانیم اَرینی گئری قایتاردی . بیر آز دا کئچدی ...
بینه لرین اوست طرفینده ایتلر هوروشدو . قیز دیکسینیب آییلدی . قورخولو – قورخولو اطرفا بویلاندی . گوزونون حلقه سی بویودو . سینه سی قالخیب – ائندی و بیرده ن قیشقیردی :
- قوربانین اولوم ، آی خالا.
- قورخما ، قیزیم ، سنی هئچ کسه وئرمه یه جم . سن منیم بالامسان، آنان زرنیگارلا اوشاق واختی باجیلیق اولموشوق .
سالاتین آروادین دئدیکلرینه او قده رده اینانمادی . اورکک باخیشلارلا دَیَه نی سوزدو . یورغان – دوشه یه ، کیلیمین اوستونده اوتوروب گولومسه یه ن گلینه و نهایت ، یمن خانیما باخدی .
آرواد اونون ساچینی سیغاللادی :
- دور ال – اوزونو یو ، چای – چوره ک یئه .
- هئچ نه ایسته میره م ، منی ائویمیزه چاتدیرین .
- تله سمه ، حسن آغا دایین اوزو سنی آپاراجاق .
سالاتین آروادین مئهریبانلیغی قارشیسیندا سوسدوسا دا ، اوره یی یئنه سکسکه لی قالدی .
اونون ال – اوزونو یودولار . سوفره آچدیلار . سالاتین ایشتاه سیز ایدی . یئدیی تیکه لر بوغازیندان گوجله کئچیردی . او تئز – تئز چته نین آراسیندان باییرا بویلانیردی . یولدا گلیب – گئده ن اولوب – اولمادیغینی بیلمه یه چالیشیردی .
قیز بیرده ن دیک آتیلدی . الینده کی چوره ک یئره دوشدو .
- آی خالا ، قارداشیم گلدی .
یمن خانیم ساکیتجه آیاغا دوردو . سالاتینی گئری ایته له دی .
- هئچ یانا چیخما ، اوتور بوردا .
یمن خانیم آلاچیغین قاباغیندا هرله نن اَرینه یاخینلاشدی . بینه لرین اوست طرفینده کی یولدا دایانان آتلی لاری گوستردی :
- آ کیشی ، اوشاقلاری گونده ر ، قوی اونلاری چاغیرسینلار . دئیه سن ، جاهاندار آغانین آداملاری دیر .
حسن آغا چوخاسینی چیینینده ن گوتوروب گئییدی . اوزو یولا دوغرو گئتدی . ال ائله ییب آتلی لاری چاغیردی :
- آ بالا ، بری ده ن گلین .
اونلار دَیَه لره یاخینلاشدیلار . اشرف حسن آغانین برابرینده آتدان دوشدو . احمد ده آتینی یئده کله دی . اشرفین گوزلری قیپ قیرمیزی ایدی .
- هارا گئدیرسینیز ؟
حسن آغا اشرفین دوداقلاری نین سَیریدیینی ، بوغازیندا دویونله نن یاشینی گئری قایتاردیغینی سئزدی .
- جاهاندارآغانین اوغلو هانسی نیز سی نیز؟
- منم .
- به بو اوغلان کیمدیر ؟
- منیم دوستوم دور .
- آتان هاردادیر ؟
- آرانا ، بیچینه گئدیب .
- آ قیریشمال ، به آدام باجیسینی بئله می قورویار ؟
کیشی نین سوزو اشرفی برک توتدو . او هئچ نه دئیه بیلمه دی . گوزونون حلقه سینه ییغیلان یاشی گئری قایتاریب اودقوندو :
- سیز هاردان بیلیرسی نیز ؟
- یاخشی ، گلین ائوه گئده ک . چایدان – زاددان ایچین ، سونرا دانیشاریق .
- چوخ ساغ اولون ، گره ک گئده ک . بلکه قیزی بورالاردان کئچیره نده گوروب – ائله ین اولوب ، بیر شئی بیلمیرسینیزکی ؟
- بری گلین ، تاپیلار .
- ساغ اولون ، یولچو یولدا گره ک .
حسن آغا اشرفین اومیدسیزله شدیینی گوروب گولومسوندو :
- باجینی سنه گوسته رسم نه وئره رسن؟
اشرف قارشیسیندا دایانان بو گولومسر چوهره لی کیشی یه دیققتله باخدی . اونون بئله آرخایین دانیشماسی اشرفی هم ساکیتله شدیردی ، هم ده تشویشه سالدی . (( بلکه قیزی ائله بونون اوزو قاچیردیب ؟ ایندی ده منی اوشاق گوروب اله سالیر ؟ یا دا آتامین دوشمنلرینده ن دیر ، اونا گورا دا بو ایشه سئوینیر )) .
اشرف ساکیتجه گئری دوندو . آتین یالیندان یاپیشیب یه هره قالخماق ایسته دی . حسن آغا اونو ساخلادی :
- آ بالا ، لاپ ده ده ن کیمی دَیمه دوشر سن ، هارا گئدیرسن ؟
- ده ده می هاردان تانییرسان ؟
- او منیم دوستوم دور ، اوغول ، آتی نیزی بری چکین .
- دوست سان سا کومک ائله ، قیزی تاپاق .
- سنه دئدیم کی ، تاپیلار .
اشرف قانریلیب سحرده ن ساکیتجه دایانان احمدین اوزونه باخدی . احمد راضیلیق وئردی . اونلار آتلارینی یئده کله ییب آلاچیغا دوغرو گلدیلر . نوکرلر جیلووو اونلارین الینده ن آلدیلار . حسن آغا قوناقلارینی ایچری دعوه ت ائتدی . اونلار ائو صاحیبی نین سوزونده ن چیخا بیلمه دیلر . دوشکچه نین اوستونده اوتوردولار . حسن آغانین گلینی ، آغزیندا یاشماق ایچری گیردی . اورتایا سوفره سالدی . چای – چوره ک گتیردی . ایسته کانلارا چای سوزدوکده ن سونرا ساکیتجه آلاچیغدان چیخدی . اشرف گیل تزه جامیش قایماغیندان بیر – ایکی قاشیق گوتوردولر . ائله بو واخت یمن خانیم ایچری گیردی . بیر خئیلی اَری نین اوزونه باخدی . کیشی آروادی نین نه دئمک ایسته دیینی باشا دوشدو :
- اوشاقلارا تاپشیر آتلاری یه هرله سینلر .
- قیز اوزونو اولدورور .
- گتیر بورا .
اشرف دیک آتیلدی . حسن آغا اونون قولوندان توتوب یانیندا اوتورتدو :
- اَیله ش .
- سالاتین بوردادیر ؟
- بوردادیر .
- نئجه اولوب او بورایا گلیب ؟
حسن آغا گوله – گوله بوتون احوالاتی دانیشدی .
- ایندی فیکرین نه دیر ؟ ایسته ییرسن قیز آتان گله نه قده ر بیزده قالسین .
- یوخ ، ده ده م هاردا اولسا اوزونو یئتیره جک . قیزی ائوده گورمه سه ، باغری چاتلایار .
- یاخشی ، چوره ک یئیین .
یمن خانیم سالاتینین قولوندان توتوب آلاچیغا گتیردی . قیز قوش کیمی قانادلانیب اوزونو اشرفین اوستونه سالدی :
- قوربانین اولوم ، آی قاغا ...
اشرف آیاغا قالخدی . سالاتین قارداشی نین قوللاری آراسینا ییخیلیب هایقیردی .
احمد جیبینده ن پاپیروس چیخارتدی . اللری اسه – اسه کیبریت یاندیردی . اوتاغا توستو ایله برابر خوش عطیر قوخوسو یاییلدی .