جاهاندارآغا بوتون گئجه نی آت بئلینده یول گلدی . قالین مئشه لرده ن نئجه کئچدیینی ، کوپوکلو چایلاری نه واخت آدلادیغینی ، دولاما جیغیرلارلا بَلَنلری هاچان آشدیغینی بیلمه دی . قمر آرادا آددیملارینی یاواشیداندا اونو ماهمیزلادی ، آتین یورولماسینا فیکیر وئرمه دی . بوتون یولو چاپاراق گلدی . او ، منزیله یاخینلاشدیقجا داها دا هیجانلانیردی . اوره یی یوماق کیمی بوکولور ، نفسی داریخیردی . کیشی قورخوردو . یایلاغا یئتیشن کیمی بینه ده بدبخت بیر حادیثه ایله قارشیلاشا بیله جه یینی خیالینا گتیردیکجه بده نی بوز کیمی سویویور ، آلنینا تر گلیردی . او ، ائوده کیلرین بیری نین اولومونه ، مال – قارانین اوغورلانماسینا دوزه بیلردی . آنجاق آرواد – اوشاغین ناموسونا ساتاشیلمیش اولسایدی ...آمان آللاه ، سن بئله بیر روسوایچیلیق ائله مه !!!
جاهاندارآغا ایسته ییردی کی ، تئزده ن بینه لر یوخودان آییلمامیش اوزونو یایلاغا یئتیرسین ، هئچ کسین گوزونه گورونمه ده ن آلاچیغا گیرسین ، احوالاتین نه یئرده اولدوغونو اویره نسین . اگر بیر بدبختلیک اوز وئریبسه ، اونون کئچیرتدیی ایضطرابلاری هئچ کس گورمه سین . جاماعاتین گوزو قاباغیندا ضربه آلماق و قووشورولوب – قیوریلماقدان دهشه تلی نه اولا بیله ردی ؟
آت سحره یاخین لاپ یاواشیدی . سال داشلی یوخوشو چیخاندان سونرا آستادان کیشنه ییب دایاندی . جاهاندارآغا آتین کوپوک ایچینده اولدوغونا یالنیز ایندی فیکیر وئردی . بیر آز بئله گئتسه ، قمر هئچ ترپه نه بیلمه زدی .
کیشی آتدان دوشدو . اونون ترینی سیلدی . چوخاسی نین اته یی ایله بئلینی قورولادی ، بیر خئیلی یئده یینده گزدیردی کی ، آتین تری سویوسون ، داغ یئری نین سحر هاواسیندا سویوقلاییب قانچیر اولماسین . قمر صاحیبی نین قایغی سینی حیسس ائدیب اوخراندی ، اونون الینی ، صیفه تینی ایله دی . جاهاندارآغا آتی چمنلی یه هوروکله دی ، قمر چیچه کلی گوی اوتلوقدا دینجینی آلیب اوتلادی . کیشی ایسه کوره یی نی قایایا سویکه ییب پاپیروس ائشدی ...
داغلارین دوشونه دومان چوکموشدو . مئشه لر ائله بیل نازیک ، آغ تورا بورونموشدو . قایالار چیسکین ایچینده ایدی . یوللار سوروشکنله شمیشدی . ایکی آددیملیقداکی جیغیری سئچمک اولموردو . قمر ائحتیاطلا آددیملاییر ، همیشه یولون دیب طرفی ایله گئدیردی . او ، حیسس ائدیردی کی ، آلت طرف سیلدیریم دیر ، دره نین دیبی ایله قیژیلتی لی چای آخیر . داشلار بیر – بیرینه دَییب اوغولداییر . اگر آددیمینی دوز آتماییب سوروشسه ، بیر بالاجا بودره سه ، گورولتو ایله سیلدیریم آشاغی یووارلانیب پارچا – پارچا اولاجاقدیر .جاهاندارآغا ایسه هئچ نه گورمور ، هئچ نه ائشیتمیردی . آتین جیلووونو دا بوراخمیشدی .
قمر سوروشکن سال داشلی جیغیری شاققیلدادا – شاققیلدادا خئیلی ایره لی له دی ، قایانی بورولوب دیکدیره چیخدی . دومانین سئیره لدیی نی گوروب کیشنه دی . جاهاندارآغا جیلووو ییغیشدیردی . آت صاحیبی نین فیکرینی باشا دوشدو . یورغا یئریشه کئچدی و گوز قیرپیمیندا قارشی داکی گدی یی آشدی .
جاهاندارآغا بینه لرین ، دَیَه لرین قاباغیندا قاچانلاری ، خالخالداکی دانا – بوزووو، اینک ساغان آروادلاری آیدینجا گوردو . گون خئیلی قالخمیشدی . هر یئره شئح چیله نمیشدی . اوشاقلار آیاق یالین قاچیشیردیلار .
قمر منزیله چاتدیغینی حیسس ائدیب سئویندی . صاحیبی نین ایشاره سینی گوزله مه ده ن ، چاپاراق ، بینه لره دوغرو ائندی . جاهاندارآغا گوزونو آلاچیغدان چکمه دی . او هله یولدایکن گوزعیاری هر شئیی اویره نمک ، ائوینده نه لر باش وئردیی نی بیلمک ایسته ییردی . بیرده ن اوره یی دهشتله چیرپیندی ، کیشی نه قده ر چالیشدیسا دا ، سینه سی دولوسو نفس آلا بیلمه دی ، گوزونو آلاچیغین قاپیسینداکی یه هرلی آتلاردان چکمه دی ....
نوکرلر اونون قاباغینا یویوردولر ، اوزه نگین باسدیلار ، آتین یویه نی نی الینده ن آلدیلار . کیشی حیرصینده ن و یوخوسوزلوقدان قان چاناغینا دونموش گوزلرینی اونلارا زیلله دی :
- بو آتلار کیمیندیر ؟
- حسن آغا بیزه گلیب .
کیشی نین قاشلاری دارتیلدی . عومرونده ایلک دفه عاده تی پوزوب قوناغین نه اوچون گلدیینی سوروشدو :
- خئییردیرمی ؟
- خئییر اولمایاندا نه وار ، آغا !
جاهاندارآغا سوسدو . اطرافینداکی لاری سیناییجی نظرله بیر ده سوزدو . ائوده نه لر باش وئردیی نی اونلارین صیفه تینده ن اویره نمک ایسته دی . هیجانلی بیر شئی سئزمه ییب آزاجیق ساکیتله شدی . آغیر آددیملارلا آلاچیغا گئتدی .
اشرف دیک آتیلدی . اوتورانلار یئرلرینده ن قالخدیلار . حسن آغا گوله – گوله جاهاندارآغا ایله گوروشدو :
- آرانچی قارداش ، خوش گوردوک ، اورالاردا نه وار ، نه یوخ ؟
- خوش گونون اولسون . نه عجب بیزی یادا سالیبسان ؟
- بینه لرین یانیندان اوتوردوم ، یادیما دوشدون .
اونلار یاناشی اوتوردولار . جاهاندارآغا گوزآلتی حسن آغانی سوزدو . اشرفین اوزونه باخدی . ساکیتلیک ایدی . کیشی سوفره یه نظر سالدی . اورتادا بیر شئی یوخ ایدی . اوغلونو مذه ممتله سوزوب باشینی بوللادی :
- آ بالا ، نییه دوروبسونوز ؟
اونون نه دئمک ایسته دیی نی باشا دوشدولر . درحال آلاچیغین قاباغیندا اوجاق قالادیلار ، حئیوان کسدیلر . آزاجیق سونرا کاباب ایی اطرافا یاییلدی ....
حسن آغا ائرته سی گون ائوینه گئتدی . جاهاندارآغا قوناغینی یولا سالدیقدان سونرا مله یی یانینا چاغیردی . آرواد قورخو ایچینده اونون قارشیسیندا دایاندی . جاهاندارآغا باخیشلارینی اونون صیفه تینده ، سینه سینده گزدیردی ، مله یین بویون دامارلاری نین نئجه ووردوغو ، قولاغینداکی سیرغالارین نئجه تیتره دیی آیدین گورونوردو . آروادین اوره ک دویونتوسونده ن قاباریق سینه سی ده ائحتیزازا گلمیشدی .
- نه اولموشدو ؟
- قیزی قاچیرماق ایسته ییردیلر ، سالدیردیق .
- کیم سالدیردی .
- اوشاقلار بیر ده حسن آغا .
- دوزونو دئه !
- دوزو بودور .
ملک آرتیق بیرینجی سددی آشدیغینی دویدو ، اوولکی قورخاقلیق آزالدی . جاهاندارآغانین قان ساغیلمیش گوزلری ده آروادینا زیلله ندی . او آز قالا باخیش لاری ایله مله یین بئینی نی بورغو کیمی دئشیب ایچری گیرمک ، سینه سینده ن اوره یینه کئچمک و اونون دئدیکلری ایله دوشوندوکلری نین نه قده ر عینی اولدوغونو بیلمک ایسته ییردی .
- قیز هاردادیر ؟
- اشرفین دَیَه سینده .
- چاغیر بورا .
- دَلیلیک ائله مه یه جکسن کی ؟
- تئز اول .
ملک آیاغینی سورویه – سورویه آلاچیغدان چیخدی .
جاهاندارآغانی بیرده ن – بیره تیتره تمه گوتوردو . کیشی نه قده ر چالیشدیسادا ، اللری نین ، چنه سی نین اسمه سینی دایاندیرا بیلمه دی . سانکی اونو شاختالی – بورانلی قیش گونونده بوزلو سویا سالمیشدیلار . بیر نئچه ثانیه نفسی نی چکه بیلمه دی . آلنیندان قالخان سیزیلتی بئینی نی دولانیب بوینونون دالینا کئچدی . قارامتیل چوهره سی آوازیدی ، بوغولوب قارالدی .
سالاتین سس سیزجه ، کولگه کیمی گلیب ایچری کئچدی . آتاسی نین اونونده دایاندی . کالاغایی سینی ایره لی چکدی ، باشینی کوکسونه ائندیریب سوسدو . کیشی گوزونو قیزینا زیلله سه ده ، اونون صیفه تینی آیدین سئچه بیلمه دی . اونا ائله گلدی کی ، گونش قارالیب ، اطرافی ظولمت بورویوب .
کئچه نین دئشیکلرینده ن ، چَته نین آراسیندان ایچری ایشیق سوزولوب دوشموشدو . همین ایشیقلار یئره دوشه نمیش پالازی زولاق – زولاق ائتمیشدی . ائله بیل شففاف ، ایتی بیر قیلینج آلاچیغین هاواسینی اورتادان پارچالامیشدی . سالاتین او اوزده ، آتاسی ایسه بری طرفده ، قارانلیق بیر عالمده قالمیشدی . آرانی اودلو بیر قیلینج کسمیشدی .
کئچه ده ن سوزولن زولاقلاردان بیری سالاتینین چیینینده ن ساللانیب ، دوز آیاغی نین اوستونه دوشموشدو . جاهاندارآغا باخیشلارینی محض بورایا ، قیزین آیاغینا زیلله میشدی .
سالاتین آیاق یالین ایدی . گونش شوعاسی اونون آیاغینی داها دا شففافلاشدیرمیشدی . اونون آغ دَریسی ، گوی دامارلاری جیزیلیب قیزارمیش توپوغو آیدینجا گورونوردو . جاهاندارآغایا ائله گلدی کی ، شففاف ایشیقدا قیزی نین آیاق سوموکلری ، دامارلاریندا آخان قانی بئله سئچیلیر ، ایشیق زولاغی هر شئیی آیدینلاشدیریر ، گوزگو کیمی گوسته ریر ، کیشی همین زولاغین یوخاری قالخدیغینی ، قیزین بالدیری ، بودو بویونجا یوکسه لیب سینه سینه ، اوزونه دوشدویونو آنلادی . باخیشلارینی همین زولاق بویو یوخاری قالدیرماق ، سالاتینی ایزله مک ، اونون بوتون اعضالارینی ایشیقدان کئچیرمک و نهایت ، گوزلری نین ایچینه باخماق ایسته دی . لاکین قورخدو . کیشی یه ائله گلدی کی ، همین ایشیقدا قیزینا وورولموش لکه نی درحال گوره جک ، اونون تاپدانمیش عیصمتی آشکارا چیخاجاقدیر .
ائله بیل بیرده ن شیمشک چاخدی . اودلو قیلینجلار حرکته گلیب چارپازلاشدی ، آلاچیغین دیوارلارینی دوغرادی ، یئر لنگرله ندی . جاهاندارآغانین گوزلرینده اود پاریلدادی . او سندیرله ییب دَیَه نین چوبوغوندان یاپیشدی .
- سنه نه اولدو ، آتا ؟
سالاتینین یاشدان بوغولموش تیتره ک سسی اونون قولاقلاریندا جینگیلده دی . بئینینده کی گویولتو آزالدی . گوزونون قاباغیندا اوینایان ایشیق دایره جیکلری چکیلدی . کیشی اوزونو تارازلاییب قیزینا باخدی . سالاتین دیز چوکموشدو . کالاغایی سی سوروشوب چیینی نه دوشموشدو . یاناغیندا ایکی زولاق پاریاداییردی .
- سنه ال دییبمی ؟
- آتا !!!
- جاواب وئر !
سالاتین آغزی اوسته دوشه ندی . اللری ایله اوزونو قاپاییب هیچقیردی :
- من لکه سیزه م .
- یالان دئییرسن .
- آند ایچیره م .
- اینانمیرام .
سالاتین باشینی قالدیریب آتاسی نین اوزونه باخدی . اونون گوزو ، دیبینده ن قورویان بولاق کیمی شففافلیغینی ایتیردی . بَبَکلری گئنیشله نیب حرکتسیز قالدی .
جاهاندارآغا قیزی نین تیتره یه ن سینه سینه باخدی . یاواش – یاواش خنجری سییردی .
ائله بو واخت قولاغینا سس گلدی : (( قوربانین اولوم ، آی قارداش ، نه یامان اینصافسیزسانمیش ، سنه دئمه دیممی سالاتین گول پارچاسی کیمی ترتمیزدیر ، اوندان نه ایسته ییرسن ؟ یوخسا اونو دا گوناهسیز یئره منیم کیمی بدبخت ائله مک فیکرینده سن ؟)) شاه نیگار اونون گوزونون اونونده دایاندی . شوشه کیمی سویوق گوزلرینی قارداشی نین اوزونه زیلله ییب ناراضی لیقلا باشینی بوللادی .
آلاچیغی هئیبتلی بیر سس گوتوردو :
- ردد اولون ، ایکی نیزده ایتیلین گوزومده ن !!!
سالاتین دیک آتیلدی . دهشتله آتاسی نین اوزونه باخدی . اونون آیاقلاری نی قوجاقلاییب ، اوزونو چکمه لرینه سورتدو :
- قوربانین اولوم ، آی ده ده ، سنه نه اولدو ؟
جاهاندارآغا ایکی گون آلاچیغدان چیخمادی . تیتره تمه و قیزدیرما ایچینده آغزی اوسته یاتدی . اوچونجو گون دوروب پالتارینی گئییندی . ملک ساماواری ایچری گتیردی . سوفره سالدی ، اوزوده کیشی نین دیزی نین یانیندا اوتوردو . چای سوزدو . گوله – گوله ارینده ن سوروشدو :
- نه تهرسن ، اََیه ؟
جاهاندارآغا گوزونو هرله ییب ترس – ترس مله یه باخدی :
- نه اولوب کی ؟
- کئفینی سوروشماق اولماز ؟
ملک ایستی چوره یی ، تزه پورتله دیلمیش قوزو اَتینی ایره لی ، اَری نین قاباغینا چکدی :
- یئه ، اوزوم تزه جه بیشیرمیشم .
جاهاندارآغا چوره ک گوتوردو . بوزارتمانین اوستونه ساریمساقلی قاتیق توکدو . الینی جاما اوزاتمازدان اوول دیرسه یی ایله مله یین بویرونه توخوندو :
- سن ده یئه .
ملک سئویندی ، آنجاق سوفره یه ال اوزاتمادی :
- سن یئه ، من سونرا یئه یه ره م .
کیشی اوولجه کونولسوز ، سونرا ایسه ایشتاهلا یئمه یه باشلادی . ملک الی چَنه سینده ، اَری نین چوره ک یئه مه سینه تاماشا ائتدی . بونو جاهاندارآغا سئزدی :
- گوزونو نییه زیلله ییب سن ؟
- هئچ ... اشرف سنی گورمک ایسته ییر .
- نه اولوب ؟
- گئتمک ایسته ییر . دئییر اوخوماغین واختی دیر .
جاهاندارآغا دینمه دی . او ، اوزاق و اوزوجو سفرده ن قاییتمیش کیمی اوزونو چوخ یورغون حیسس ائدیردی .
خوره یی یئدی . جامی گئری ایته له دی . دوشکچه یه اوزانیب دیرسه کله ندی . چای ایچه – ایچه اوغلونو دوشوندو . (( دئیه سن ، زندیمی ایتیره جک . ائله اوخوماغین قویروغوندان یاپیشیب ، بوراخماق ایسته میر . آتا – آنا وئجینه دئییل )) .
جاهاندارآغا ایسته ییردی کی ، اوغلو اونو بئله یورغون و اَزگین گورمه سین . او ، اوزونون معنن سارسیلدیغی نی ، کومکسیز بیر آدام کیمی عاجیزله شمک اوزره اولدوغونو هئچ کسه بیلدیرمک ایسته میردی . اوغلونون قاباغیندا آتانین سینماسی ال چاتماز بیر یوکسه کلیکده ن ائنمه کده ن ده دهشتلی ایدی .
- نه واخت گئدیر ؟
- صاباح یولا دوشمک ایسته ییرلر . احمدده گئدیر . اوشاقلاری دا آپاریرلار .
ائرته سی گون آرابا قوشدولار . بوتون بینه گئده نلری یولا سالدی . جاهاندارآغا اونلاری تک بوراخمادی . بئش – آلتی سیلاحلی آدام قوشدو . آنجاق اوزو دَیَه ده ن چیخمادی . چته نین آراسیندان اشرفین آناسی ایله ، قارداشی شامخال لا و بوتون قوهوملاری ایله نئجه گوروشدویونه باخدی . اونلار گوزده ن ایتینجه یه قده ر گوزونو چته نین آراسیندان چکمه دی .