(19)
جاهاندارآغا سحر تئزده ن آتین هورویونو دییشدیرمک اوچون دَیَه ده ن چیخدی . توفنگی نی الینه آلیب ، بینه لرین آشاغی طرفینده کی چمنلی یه گئتدی . چیسه کله ییردی . هر یئری دومان بوروموشدو . بئش – اون آددیملیقداکی قارالتی لار گوجله سئچیلیردی . اوتلار یویولوب سوروشکنله شمیشدی . هاوانین سویوقلوغونو آدام نفس آلدیقجا جییه رلرینده حیسس ائدیردی . دَیَه لرین اطرافیندا دولاشان ایتلر تنبل – تنبل هوروردو . خالخالداکی دانا – بوزوو مَله شیردی . بینه مورگوله ییردی .
جاهاندارآغا سَکسَکه لی ایدی . آخشام ، ال – آیاق ییغیشیریلاندان خئیلی سونرا ایتلرین آراسینا چاخناشما دوشموشدو . سیغیرچیلار کیمی ایسه قی یا باسمیشدیلار . ایتلر بینه لرین اوستونده کی یولا قده ر گئتمیشدی . نوکرلر هر یئری ، آرخاجی ، خالخالی دونه – دونه یوخلامیش ، آتین هورویونو دَییشمیش ، هر شئیین یئرینده اولدوغونو سویله میشدیلر . (( یقین یول آداملاری ایمیش )) ، - دئیه کیشینی ساکیت ائتمیشدیلر .
جاهاندارآغانین چیینینده کی یاپینجی نمله ندی . خیرداجا چیسکین اوزونه قوندو . پاپاغینی ، قاشینی ، بیغی نی قیروو کیمی بورودو . اوزاقدان قمرین قارالتی سی گوروندو . آت بیر یئرده دایانمیشدی . همیشه جاهاندارآغانین آیاق تاپپیلتی سینی ائشیده نده برکده ن کیشنه ییردی . ایره شمه نی دارتیب اورا – بورا قاچار ، سونرا دا دال آیاغی اوستونده شاها قالخیب دایاناردی . آنجاق بو دفه ترپه نمه دی . جاهاندارآغا اونا یاخینلاشاندا کونولسوزجه سینه اوخراندی . کیشی تعججوب ائندی . قمر بوینونو بوکموشدو ، یازیق – یازیق صاحیبی نین اوزونه باخیردی .
جاهاندارآغا میخچانی یئرده ن چیخارتدی . ایره شمه نی ییغدی و آتین یانینا گلدی . اونون بئلینی سیغاللادی . توکلرینده گیله له نیب مونجوق کیمی یومرولانان داملالاری سیلدی . نه ده نسه لاپ فاغیرلاییب سوست دوشن آتین بوینونو قوجاقلاییب اوزونده ن اوپدو . اونون گوزلرینه باخدی . (( سنه نه اولوب ، قمر ؟ )) – دئیه پیچیلدادی . آت باشینی آزاجیق ترپه دیب قاباق آیاغی ایله یئری ائشدی . جاهاندارآغا اوره یینده اوزونو دانلادی : (( گره ک آتی آخشامدان چوللاتیرایدیم . بئله هاوادا ائرکَک آتی تئز سویوق آلیر ، یقین کی قانچیر اولوب ، - دئیه خیالیندان کئچیردی . – بلکه ده آغناییب قابیرغاسینی- زادی سیندیریب )).
او ، آتین اطرافیندا دولاندی ، دال طرفه کئچدی و داش کیمی دونوب یئرینده قالدی . کیشی نین باشینا ائله بیل آغیر ضربه ائندیردیلر . گوزلرینی قیرپمادان تعججوب ، حئیره ت و دهشتله آتا باخدی . الینی اونون بئلینده ، بوینوندا گزدیردی . ایله بیل الی نین آلتیندا سویوق بیر ایلان ترپه ندی . کیشی دیکسینیب گئری چکیلدی . بده نی نی اوشوتمه گوتوردو . بیر خئیلی گوزلرینه اینانمادی . سرخوش کیمی ایکی – اوچ دفه آتین دووره سینه فیرلاندی . الینی بیرده آتین یالینا چکدی . جود و بیز – بیز توکلر اونون اووجونو دالادی .
هر شئی آیدین ایدی . آتین یالینی ، قویروغونو قیرخمیشدیلار . اونلار بیر داها ساتاشمیشدیلار ، اونو تحقیر ائتمیشدیلر ، اونون قورورونا توخونموشدولار . کیشی نین ناموسو اوچ شئی دیر : آت ، آرواد ، بیر ده پاپاق . بونلارا توخونماق ، اونون ناموسونو آیاق آلتینا آلیب تاپدالاماق دئمک ایدی . اونو دیری گوزلو قبره سوخماق ، سینه سینه چالین – چارپاز داغ چکمک ایدی . ایندی او بونا نئجه دوزه جکدی ؟ مارال وورولدو ، بیر تَهر سوسدو . قیزی سالاتینی گوتوروب قاچماق ایسته دیلر ، ایندی ده بو . بو آتی اورتایا چیخارماق اولاردیمی ؟ اونون یالی نین ، قویروغونون قیرخیلدیغینی بیر آداما دئمک اولارمی ؟ جاماعات بونو بیلسه ، جاهاندارآغا سوس سا ، اونو اله سالمازدیلارمی ؟ او ، باشینا پاپاق قویوب معره که یه چیخا بیله ردیمی ؟
کیشی لاپ سارسیلدی . حیسس ائتدی کی ، حتتا باجیسی نین اولومو بئله اونا بو قده ر آغیر گلمه میشدی . آروادی زرنیگارین ، اوغلو شامخالین کوسوب گئتمه سی ده اونو بو قده ر یاندیرمامیشدی . جاهاندارآغایا ائله گلدی کی ، اوره یی پارتلاییر . کیشی هوولونده ن نفس بئله آلا بیلمیردی .
او دونوب قمرین بیر ده تپه ده ن – دیرناغا سوزدو . هاوا آزاجیق ایشیقلاشدیغیندان ، آت ایندی داها آیدین گورونوردو . بو وضییه تده او ، قویروغو ، قانادی یولونوب لومه کله نمیش بیر قوشا اوخشاییردی . آتین اوولکی شاهانه ووقاری یوخ اولموشدو . ایپک قیز تئلی کیمی سوروشوب بوینونا توکولن یالی دیبینده ن قیرخیلدیغیندان ، توکلرین دیبی دریز دالی کیمی بیز – بیز دایانمیشدی . آتین دال طرفینه باخماق مومکون دئییلدی . قیرغی تکی جلد ، ترلان کیمی ووقارلی ، سیغاللی ، گلین کیمی یاراشیقلی اولان قمر ایندی آغلار گونه قالمیشدی . ائله بیل آت اوزوده بونو دویوردو . اونو کیم بو حالا سالمیشدی ؟ اونا کیم ال قالدیرمیشدی ؟ بس بیز هاردا یاتمیشدیق ، بونو نییه بیلمه میشیک ؟ نییه واختیندا خبر توتمامیشیق ؟
جاهاندارآغا توفنگینی چیینی نه کئچیردی . ایکی آللی آتین بئلینده ن یاپیشدی . باشینی قمرین بویرونه سویکه دی . صیفه تینی یومشاق توکلره سورتدو . او فیرلاندی ، چئوریلدی ، گاه او اوزونو ، گاه بو اوزونو ، باشینی آتین بویرونه چیرپدی .باشینی گیزله تمک ایسته ییرمیش کیمی آتین قارنی نین آلتینا اَیدی . آیاغی نین آلتینداکی نم تورپاق ائشیم – ائشیم اولدو . گوی اوتلار کوکونده ن چیخیب اَزیلدی . آت ایسه ترپه نمه دی . بوینونو بوکوب صاحیبینه باخدی . نفسی ایله اونون صیفه تینی ایسیتدی . ساکیتجه اوخراندی . ائله بیل آت جاهاندارآغانین اوره یینده ن کئچنلری دویور ، اونون دردینه شریک اولماق ایسته ییردی .
کیشی بیر خئیلی بئله جه چابالادی . سونرا الینی یاخاسینا آپاردی . چوخانین قایتانلاری ، دویمه لری قیریق – قیریق اولدو . چارپازلاردان بیری اونون دیرناغینا کئچدی . صدف دیبینده ن دوشدو . او بونو حیس ائتمه دی . سودان کنارا آتیلمیش بالیق کیمی آغزینی آچیب تووشودو . بورون پره لری گئنیشله ندی ، سینه سی قالخیب – ائندی ، کوکس قفسی آز قالدی پارتلاسین . قان ساغیلمیش گوزونون حلقه سی قیزاردی . اونا ائله گلدی کی ، بو ساعات ، ائله بوراداجا اوره یی پارتلایاجاق ، آتین دیرناغی نین آلتینا دوشه جک . بلکه بو داها یاخشی ایدی ؟ بو جور تحقیرلره دوزمه کده نسه اولوم موناسیب ایدی ؟!
هاوا آرتیق ایشیقلاشیردی . بینه لری بوروین چیسکین یئره یاتیب سئیره لیردی ، دره آشاغی سورونوب گئدیردی . قایالار ، ایری پالید آغاجلاری ، گونئی ده کی چمنلر اوزونده کی اورتویو آتیردی . آغاجلارین یارپاقلاری ، چمنلیکلرین اوتو شئحه باتدیغیندان ، گونه شین ایلک شوعالارینی عکس ائتدیریب پاریلداییردی . دَیَه لرین اطرافینداکی سس – کوی چوخالیردی . آروادلار اینه ک ساغیر ، سیغیرچیلار دانا – بوزووو قووورلار . بیر آزدان هر شئی آیدینلاشاجاقدی . دومان تامام چکیلیردی .
جاهاندارآغا خئیلی ، آتا باخا – باخا ، سال قایا کیمی سوکوت ایچینده ، هئچ نه آنلامادان ، هئچ نه دوشونمه ده ن دایاندی . کیشی کئیی میشدی . نئجه حرکت ائده جه یینی بیلمیردی . او هر شئیی ، قورخونو ، ائحتیاطی اونوتموشدو . بو ساعات قایالارین آراسیندا آدام گیزله نه بیله جه یینی ، ائله بو فورصتده ن ایستیفاده ائده ره ک اونو اولدوره بیله جه یینی بئله اونوتموشدو . او آنجاق بیرجه شئیی ، بو وضییه تده ن نئجه چیخماغی فیکیرله شیردی . او بیرجه شئیی قعط ائتمیشدی کی ، آتین یالی نین و قویروغونون قیرخیلدیغینی کندده ، حتتا ائوده ده هئچ کس بیلمه مه لی دیر ، بو بیر سیرر اولاراق قالمالی دیر . بس بو بویدا آتی نئجه گیزله تمک اولار ؟ بیر آزدان بوتون بینه ده کیلر بوالارا دولاشاجاقدی . بیرجه آدام بو ایشده ن خبر توتسا ، کیفایت ایدی . بلکه آتی گیزلینجه آرانا گونده رسین ؟ اوندا دا دئمه زدیلرمی بونون سببی نه دیر ؟ بیر ده ، بو بویدا آتی یولدا گوره ن اولمایاجاقدیمی ؟ ائله اونو کنده آپاران نوکرین اوزونون بو ایشی بیلمه سی روسوایچیلیق دئییلدیمی ؟
جاهاندارآغا دوداقلارینی کیپ قاپاییب ، دیشلرینی بیر – بیرینه سیخدی . اونون آلنی نی ، بده نی نی سویوق تر باسدی . ساکیتجه ایره شمه نی ییغدی . آستا آددیملارلا جیغیرلا دره یه ائندی . او دونوب گئری باخدی . چیسکین یوخ اولموشدو . قارشیداکی داغین سینه سی ایشیلداییر ، بینه نین اوستونه چوکن دومان گئری چکیلیردی .
جاهاندارآغا تله سدی . لاپ آشاغی ، دومانین هله چکیلمه دیی یئره ائنمه یی قرارا آلدی . او هئچ کسین گوزونه دیمه مک ، هئچ کسه راست گلمه مک اوچون دومانین آلتی ایله گئتمه یه و بینه لرده ن اوزاقلاشماغا چالیشدی .
جاهاندارآغا دره یه ائندی . اورادان دا جیغیرلا قارشیداکی قایانین اوستونه قالخدی . اوچورومون کنارینا قده ر گلدی . لاپ آشاغی دا چای آخیردی . کوپوکلو سولارین قیژیلتی سی قایالارا دوشوب ، عکس – صدا وئریردی . چایین او اوزو ده سیلدیریم لیق ایدی . قایالارین اوستونو مامیر باسمیشدی . داشلارین آراسیندان تکم – سئیره ک آغاج چیخمیشدی . چایین وادی سینی اوغولتو بوروموشدو . حیرصلی سولار ایری ، قارا داشلاری یومارلایا – یومارلایا گتیردیکجه ، بیر – بیرینه توخونوب شاققیلدادیردی .
کیشی کوکسون اوتوروب آتین ایره شمه سینی یئره آتدی . قوتوسونو چیخاریب تله سمه ده ن ، فیکیرلی – فیکیرلی پاپیروس ائشدی . قمر ساکیت له شیب اوتلاماغا باشلادی . جاهاندارآغا توفنگینی دیزی نین اوستونه قویوب دونموشدو . توستو – دومان ایچینده آتا باخدی . (( ایندی من نه ائدیم ، قمر ؟ آخی ، سن منیم سیرداشیم ، دار گونومده هارای چیم ایدین . سن منی چوخ داردان چیخارتمیسان . سن منیم اوره ییمده ن کئچنلری بالاجا بیر ایشاره ده ن باشا دوشوردون . سن قوشدان آییق و ائحتیاطلی بیر آت سان ، قمر . چوخ قارانلیق گئجه لرده ، منده ن قاباق ، یولدا تهلوکه اولدوغونو سن باشا دوشوب سن . قولاغینی یاپیخیدیب ساکیتجه دایانمیسان و منی باشا سالمیسان کی ، ایره لی گئتمک اولماز . منده ن قاباق اوزون یولو دییشمیسن ، قمر . بیر تویدا ، بیر نیشاندا گئری قالمامیسان ، هله ایندیه جن جیدیرلاردا سنی کئچن اولماییب . منی اوتاندیرمامیسان . همیشه باشیمی اوجا ائله میسن . نئچه دفه من سنین یالینا یاتیب ، گوزلرینه قوربان، قمر ، علاج سنه قالیب دئمیشم . سن قوش کیمی قاناد آچیب منی گولله نین آلتیندان چیخارتمیسان . من سنی اوزومه قارداش ، سیرداش بیلیردیم ، قمر ، سن کیشنییه نده اوره ییم داغا دونوردو . شاها قالخیب فیرلاناندا ائله بیلیردیم یئری ، گویو منه باغیشلاییرلار . قمر ، ایندی من نه ائدیم ، سنین روسوایچیلیغینا نئجه دوزوم ؟ )) .
کیشی پاپیروسونو دالبادال سوموردو . آجگوزلوکله توستونو جییه رلینه چکدی . کوتویو آتیب آیاغا دوردو . آتا یاخینلاشدی . اونون یالینی ، بئلینی سیغاللادی . جیبینده ن ایری بیر دسمال چیخاردیب قمرین بده نی نی سیلدی ، هر یئرینی ترتمیز قورولادی . قولاقلاری نین دیبینی قاشیدی ، آتین باشینی سینه سینه سیخدی . آت بو نوازیشی حیسس ائتدی . صاحیبی نین قوجاغیندا خومارلاندی . جاهاندارآغانین گوزو قمرین گوزلرینه ساتاشدی . بو ایری گوزلرده اولدوقجا مولایم و مئهریبان بیر باخیش وار ایدی . ائله بیل بو دیلسیز حئیوان لال باخیشلاری ایله اونو ساکیت له شدیرمک ایسته ییردی ، صاحیبینه دئمک ایسته ییردی کی منده لکه لی ، گوزوکولگه لی یاشاماق ایسته میره م ، من یاشایاندا دا ، اوله نده ده مرد اولماق ایسته ییره م .
گونش ین ایشیغی آشاغی لارا ائندی . دره لره چوکن قاتی کولگه داغلارین دوشو ایله یوخاری قالخدی . جاهاندارآغانین دایاندیغی یئر بیرده ن – بیره گونش ین نورونا قرق اولدو . اوتلار پاریلدادی . شئحلر گوز قاماشدیردی . کیشی آتین باشینی یوخاری قالدیردی . اونون گوزلرینه باخدی . ایری ، حَبَشی دوداقلارینی آتین صیفه تینه یاخینلاشدیردی . قمرین گوزلرینده ن اوپدو . بوینونداکی ایپی آچدی . ائهمالجا قایانین کنارینا دوغرو هایلادی .
قمر آیاق ساخلادی . جئیران کیمی بوینونو دیک توتوب بویلاندی . گوزو ائله بیل یاشاردی . بورون پره لری گئنیشله ندی .
جاهاندارآغا چاخماغی هرله ییب توفنگی اوزونه قالدیردی . قمرین آلنینداکی قاشقانی نیشان آلدی . اونون یاشلا دولموش و تورلانمیش گوزو آتی گوجله سئچدی . ته ته یی چکدی . قمر دال آیاغی اوسته شاها قالخدی . بیر خئیلی بئله جه دایاندی . جاهاندارآغایا ائله گلدی کی ، آت یئرینده ن ترپه نمه یه جک ، ائله بئله جه ، دال آیاقلاری نین اوسته داشا دونوب قایانین اوستونده قالاجاقدیر . آنجاق قمر بیرده ن مووازینه تینی ایتیردی . اونون قاباق آیاقلاری هاوادا اوینادی ، آرخاسی اوسته چئوریلدی و بیر باش سیلدیریم آشاغی یووارلاندی . آت برکده ن کیشنه دی . اونون سسی دره یه یاییلدی . قایالار سس – سسه وئریب شاققیلدادی ، بوتون آغاجلار ، سیلدیریملار بیر – بیرینی هارایلادی . دره نی عومومی بیر اوغولتو بورودو . بو اوغولتو یاخینداکی داغلارین دوشونده عکس – صدا وئریب خئیلی اوزاقلارا یاییلدی . ائله بیل دره ده کی کوپوکلو داغ چایی نفسینی ایچری چکیب سوسدو .
جاهاندارآغا توفنگینی یانینا سالدی . سیلدیریمین قارشیسیندا داش کیمی دایاندی . اوغولدایان دره یه ، قیژیلتی ایله آخان کوپوکلو سولارا باخدی .
اوچونجو حیسسه نین سونو