آخشام قارانلیغی قاتی بیر کولگه کیمی "قوری"نین اوزه رینه چوکموشدو . یاریمجا ساعات بوندان اوول زیروه سینده گونه شین سون ساریلیغلارینی عکس ائتدیره ن داغلار بویون – بویونا وئریب مورگوله ییردی . بورانین طبیعه تی شیمالا بنزه میردی ، نه بیاض گئجه لر ، نه ده اوزون سوره ن یای آخشاملاری وار ایدی . بیرده ن – بیره زیل قارانلیق چوکور ، بیرده ن – بیره ده دان یئرینده شَفَقلر اویناشیردی .
سئمیونوو آرتیق بونلارا وردیش ائتمیشدی . اووللر "پئتئربورگ"ون بیاض گئجه لرینه وورغون اولان دیمیتری دیمیتری یه ویچ ایندی ده جَنوب آخشاملارینا مفتونلوق گوسته ریردی . او هر آخشام پنجره قاباغیندا دایانیب قوروبا تاماشا ائتمه یی سئویردی . بو گون ده عاده تی اوزره همیشه کی یئرینده دوروب اوفوقه باخیردی ، باغ – باغات ایچینده ایته ن " قوری"نین کیچیک داخمالاریندا یانان چیراقلار قارانلیقدا پاریلدایان یارپیز قوردلاری کیمی ایشیلداییردی .
سئمیونوو اللرینی سینه سینده چارپازلاییب شه هرین کناریندا " کور"له قوجاقلاشان " لییاخو" – ا (liyaxv) چای نین قیژیلتی سینا قولاق آسیردی . پنجره ده ن ایچری دولان خفیف کولک اونون آغارماقدا اولان ساچینی اویاندیریر ، چنه سی نین آشاغی سیندا هاچالانمیش توپا ساققالی نین یومشاق توکلری آراسیندا دولانیردی . او طرفده ، داغلارین اته یینده یئرله شن بالاجا دمیریولو واغزالی نین سولغون ایشیقلاری گورونوردو . قاتارلار اوتدوکجه تکرلر یئکنه سقلیکله تاققیلداییر ، پاراووزلار کسیک – کسیک فیت وئریردی .
قاپی دویولدو . اولگا کونستانتین اوونا الینده کی تیکیشی کنارا قویوب ، آستا آددیملارلا دهلیزه یاخینلاشدی . قاپی نی آچارکن آلئکسئی اوسیپوویچ له قارشیلاشدی . بوینونو آزاجیق یانا اییب ، قوناغی ایچری دعوه ت ائتدی :
- بویورون ، آلئکسئی اوسیپوویچ ، خوش گلمیسینیز .
قوناق شلاپاسینی چیخاریب اولگا کونستانتینا نین الینده ن اوپدو . ائو صاحیبه سی قیرچینلی اوزون دونونون یانیندان یاپیشیب ، اته یینی آزاجیق یوخاری قالدیردی و آلئکسئی اوسیپوویچه یول گوسته ردی . دیمیتری دیمیترییه ویچ فیکره گئتدیی نده ن ، ائوین اورتاسیندا دایانان آلئکسئی اوسیپوویچین گلیشینده ن خبر توتمادی . او ایسه دینمه دی . دیرئکتورون گئری دونمه سینی گوزله دی . آنجاق اولگا کونستانتینوونا آیاقلاری نین اوجوندا ایره لی یاخینلاشیب ، ائهمالجا اونون چیینی نه توخوندو :
- دیمیتری ، گور کیم گلیب !
سئمیونوو قانریلیب گئری باخدی و هر جور رسمییه تی اونوداراق ، قوللارینی آچیب دوستونو قوجاقلادی :
- آلئکسئی اوسیپوویچ ، خوش گلمیسینیز ، سیزی گورمه ییمه چوخ شادام .
اونلار ائوین کونجونده کی یازی ماساسی نین یانینا گئتدیلر . دیمیتری دیمیترییه ویچ اوز یئرینده ایله شدی و قوناغا کورسوده اوتورماغی تکلیف ائتدی . بیر خئیلی سوسدولار . آلئکسئی اوسیپوویچ جیبینده ن دسمال چیخاردیب بیغینی سلیقه یه سالدی . ائو صاحیبی شامدانی قاباغا چکدی . شامین آلتیسی نی دا یاندیردی و دوستونون اوزونه باخدی :
- سویله یین گوره ک ، نه وار ، نه یوخ ؟ سفری نیز نئجه کئچدی ؟
آلئکسئی اوسیپوویچ اونا جاواب وئرمک ایسته ییردی کی ، قونشو اوتاغین قاپی سی آچیلدی . اولگا کونستانتین اوونا یئرینده ن دورانا قده ر بالاجا لیدا قوناغین بویرونده دایاندی . یونگولجه تعظیم ائتدی :
- خوش گوردوک ، جناب اینسپئکتول .
آلئکسئی اوسیپوویچ درحال یئرینده ن قالخدی . آیاقلارینی جوتله ییب بالاجا لیدانین اونونده دایاندی :
- خوش گوردوک ، لیدا دیمیترییه ونا ، نئجه سینیز ؟
- دیققتنیزه گورا میننتدارا م .
آلئکسئی اوسیپوویچ آشاغی اییلیب لیدانین بالاجا ، ظریف الینده ن اوپدو . لیدا داها دا نازلاندی :
- منه ناغیل سویله مه یه گلمیسینیز ؟
- ایسته سه نیز سویله ره م .
- اوزو ده گلک تزه سی اولسون .
- لاپ تزه سینی سویله ره م .
- آمما اژدها اولماسین ، من اوندان قولخولام ..
- یوخ ، قورخما ، - آلئکسئی اوسیپوویچ قیزین اونونده ساللاغی اوتوردو . اونون ساچینی سغاللاییب ، اللرینی دونه – دونه اوپدو . – من سنه چوخلو ، مزه لی و شیرین ناغیللار دانیشاجام .
سئمیونوو دوستونون لیدا ایله اوینایارکن دفه لرله گوزونون یاشاردیغینی و سئزیلمه ده ن دسماللا اونو قورولادیغینی گورموشدو . او ، باشا دوشوردو کی ، دوستو ائولادسیزلیق دردی چکیر . اونون بو حالی سئمیونوو قَهَرلَندیریردی . اولگا کونستانتین اوونا آلئکسئی اوسیپوویچ له اری نین واجیب ایشی اولدوغونو بیلدیی نده ن ، لیدانین یانینا گلدی :
- قیزیم ، ایندی گئجدیر ، گئده ک یاتاق ، ناغیلا باشقا واخت قولاق آسارسان .
لیدا قاشقاباغینی ساللادی . آلتدان – یوخاری آناسی نین اوزونه باخدی و یئرینده سیلکه له ندی :
- یوخوم گلمیل .
- آدام آناسی نین سوزونه باخار . ایندی گئت یات . هاواخت ایسته سن گلیب سنه ناغیل دانیشارام .
- آللاتمیل سینیز کی ؟
- من سیزه هئچ یالان دئمیشم ؟
- یاخشی ، آنجاق گوزله یه جم .
لیدا آناسی نین الینده ن یاپیشیب او بیری اوتاغا دوغرو گئتدی . قاپی نین یانیندا دایاندی . گئری دونوب ال ائله دی :
- گئجه نیز خئیله قالسین .
- یوخون شیرین اولسون ، قیزیم .
لیدا قاپینی اورتوب گئتدیکده ن سونرا آلئکسئی اوسیپوویچ بیر خئیلی ائوین اورتاسیندا دایانیب اوشاغین دالینجا باخدی . عاده تی اوزره دسمالینی چیخاردیب بیغینی سیغاللادی ، سونرا کئچیب اوولکی یئرینده ایله شدی .
- سویله یین گوره ک هارالاردا اولدونوز ؟
- "دربند"ده ن باشلاییب " ایره وان" – ا قده ر گزدیم .
- اوو ، قارداش ، بوتون قافقازی دولاشمیسان کی ؟
- ائله دیر ، دیمیتری دیمیترییه ویچ ، اوچ مین بئش یوز وئرست یول گئتمیشم .
- چوخونودا پیادا ؟
- پیادا گئتدییم یئرلر ده اولدو . آنجاق ان چوخ آتلا ، فورقونلا گزیردیم . وضییه ت چوخ آغیردیر
قضالارین اکثرییه تینده مکتب آچیلماییب ، آچیلانلاردا دا اوخویان یوخدور . بیر تصوور ائدین ، " ایره وان " قوبئرنییاسیندا یوز یئتمیش مین موسلمان یاشاییر ، آنجاق اونلاردان سئمینارییایا اوخوماغا بیرجه نفر ده گلمک ایسته مه دی .
- بس باکی قوبئرنییاسی نئجه ؟
- یالنیز بیرجه شاگیرد راضیلیق وئرمیشدی ، اونو دا آتاسی بوراخمادی . "شاماخی" دا وضییه ت
پیس اولدو . قضا رییسی منیمله گئتمیشدی . جاماعات اونو گوره ن کیمی اوشاقلاری نی اوخوماغا
گونده رمکده ن قطی بویون قاچیردیلار . نه ده نسه موسلمانلار بیزه اعتیبار ائله میرلر . خوصوصن ده پریستاولاری ، ناچالنیکلری گوره نده یاخینا گلمک ایسته میرلر .
- اونلاردا تقصیر یوخدور . آلئکسئی اوسیپوویچ ، پریستاولار کنده گلنده یا آدام دویورلر ، یا توتوب
" سیبیر" – ه یوللاییرلار . جاماعاتین گوزو قورخوب . یوخسا هئچ کس خئیرینده ن قاچماز .
- موسلمان روحانی لری نین بویوک قیسمی ده یئنی آچیلان مکتبلره قارشی چوخ آمانسیزدیلار .
- بس رسمی ایداره لر سیزه کومک ائتمیر ؟ قافقاز والی سی اونلارا گوستریش وئرمیشدی .
- ائله یه نلر اولدو . گئنئرال روسلانوو منیم " ناخجیوان" – ا گئتمک ایسته ییمی بیله نده قضا رییسی نه
تاپشیردی کی ، اوزو شخصن منی موشایعت ائتسین و گئنئرال کبله خان لا گوروشدورسون . کبله خان چوخ نوفوذلو آدام دیر ، منه خئیلی خئیری دَیدی . ظننیمجه ، جاماعات آراسیندا نوفوذو اولان آداملاردان ایستیفاده ائتمک لازیمدیر .
- موطلَق ! – دیمیتری دیمیرییه ویچ فیکیرلی – فیکیرلی دیلله ندی . آلئکسئی اوسیپوویچ سوزونه داوام
ائتدی :
- جمی اوتوز شاگیر سئچه بیلمیشم . " ناخجیوان" دان اوچ نفر گله جک . "شوشا " روس – تاتار
مکتبینده سکسن اوخویور ، اونلاردان اون اوچ نفری بیزیم مکتبه داخیل اولماق اوچون عریضه یازیب .
"شکی" ده ن ایکی ، "گنجه" ده ن بئش ، "دربند" ده ن اوچ اوشاغین گلمه سی یقین دیر ." قازاخ "دان دا دورد – بئش نفر گله سی دیر . گوره ک سوزلری نین اوستونده دوراجاقلارمی ؟
- دئمک ، اوشاقلارین هامیسی گلسه ، موسلمان شوعبه سی نین نزدینده حاضیرلیق گروپلاری دا
آچا بیله جه ییک . بو لاپ یاخشی اولدو . آلئکسئی اوسیپوویچ ، سئمیناریست لر تجروبه درسلرینی اورادا کئچرلر ، سونرا دا همین اوشاقلارین اوزلری سئمینارییادا اوخویارلار . ترتیب ائتدیی نیز پروگرام لایحه سینی ده نظرده ن کئچیردیم . خوشوما گلدی . پئداگوزی شورا دا تصدیق ائده ریک . آنجاق منی باشقا بیر مسله دوشوندورور .
- او نه دیر ، دیمیتری دیمیترییه ویچ ؟
- درسلیک . دئه گوروم موسلمانلارین اوز آنا دیللرینده درسلیکلری وارمی ؟ - او ، آیاغا دوردو .
همیشه فیکیرلی اولاندا ائتدیی کیمی اوتاقدا گزینمه یه باشلادی . – ابتیدایی تحصیل اوچون درسلیک واجیب مسله دیر . بونو سیز منده ن یاخشی بیلیرسینیز .
- یوخدور . موللا خانالاردا آنجاق قورآن ازبرله دیرلر ، بیرده سعدی نین دیداکتیک "گولوستان" ینی
اویره دیرلر . وسسلام .
آلئکسئی اوسیپوویچ آیاغا دورماق ایسته دی . آنجاق دیمیتری دیمیترییه ویچ اونون چیینی نده ن باسیب قالخماغا قویمادی :
- باخ ، بو باره ده دوشونمک لازیمدیر .
- دیمیتری دیمیترییه ویچ ، - آلئکسئی اوسیپوویچ آستادان دیلله ندی - جساره تیمه گورا عوذر
ایسته ییره م . آنجاق موذاکیره یه وئرمه یه اوره ییم گلمیر . بیلیرسینیزمی ، ایلک تشببوسدور ، قورخورام ، مودافیعه اولمایام .
- قورددان قورخان مئشه یه گیرمز . هانی کیتاب ، گوستر گوروم .
آلئکسئی اوسیپوویچ بیر قده ر ترددود ایچینده دایندی . ال یازی سینی وئرمک ایسته مه دی . آنجاق باشی نین اوستونو کسدیره ن دئروکتورون صبیرسیزلیی اونو جساره ته گتیردی . قوولوقدان ال یازماسینی چیخارتدی . دیمیتری دیمیترییه ویچ عئینه یی نی گوزونه تاخیب ائله آیاق اوستونده جه کیتابی وَره قله دی . دوستونون ظریف خطله ، اولدوقجا سلیقه لی شکیلده یازدیغی صحیفه لره خئیلی باخدی . کیتابین اوستونو اوخودو : "وطن دیلی" . اونون دوداقلاری قاچدی .
- چوخ شاعیرانه آددیر . دئمک ، بئله . سیز منده نده اوزاق گوره ن سینیزمیش ، جناب اکس –
پوچتالیون ، بس بو کیتابی ایندییه جن نییه موذاکیره یه تقدیم ائتمه میسینیز ؟
- ایسته ییردیم بیر آز گوزله ییم . ال یازماسینی تام تکمیلله شدیردیکده ن سونرا اورتایا چیخاردیم .
- یوخ ، گوزله مک اولماز . ائله گونو صاباحدان پئداگوژی شورا دا باخاریق لازیمی مصلحت لر وئره ریک ، سن بئش – اون گئجه یاتماییب هر شئیی دوزه لده رسن . تله سمک لازیم دیر ، عزیز دوست ، تله سمک . بو کیتابا ایندی بویوک ائحتیاج وار . حتتا چالیشاریق کی ، چاپ اولسون ، باشقا یئرلرده ده اوندان ایستیفاده ائتسینلر . – او گوزونو قییب دیققتله آلئکسئی اوسیپوویچین اوزونه باخدی ، سونرا بیرده ن الینی اونون چیینی نه قویدو . – هئچ بیلیرسینیزمی نه بویوک ایش گورورسونوز ؟ بو حرکتینیز تقدیره لاییق دیر . گله جک نسیل بونو اونوتمایاجاق .
آلئکسئی اوسیپوویچ آزاجیق قیزاریب باشینی آشاغی سالدی . کوینه یی نین بوینونو بوشالتدی ، دسمال چیخاردیب آلنی نی قورولادی . دیمیتری دیمیترییه ویچ فیکیرلی – فیکیرلی اوتاقدا گزیندیکده ن سونرا یئنه پنجره نین قاباغیندا دایاندی . گوزونو اولدوزلارا زیلله دی . سینه سی دولوسو نفس آلدی :
- جناب اِکس – پوچتالیون ، یاخین گلین . بیر سمایه باخین . اورادا ، ظولمت ایچینده پاریلدایانلاری گورورسونوزمو؟ بیر باخین نئجه ده ساییریشیرلار ! ائله بیل قارانلیق گئجه یئر کوره سی نین اوزه رینه قارا پرده سالماق ، اونو بورویوب اورتمک ایسته ییر . ایشیق نئجه اونو دئشیر، اوردان – بوردان سوزولوب پاریلداییر . او ، تابئع اولمور ، ایینه اوجو بویدا دا اولسا یئر تاپیر ، اوزونه یول آچیر ، کیمه ایسه ایشیق وئریر . ماراقلی دئییلمی ، هه ، آلئکسئی اوسیپوویچ ، نئجه بیلیرسینیز ، ایشیق ، یوخسا قارانلیق ؟
- البتته ایشیق
- موطلق ، - او قطییه تله دیلله ندی . - قیغیلجیملار قورلاندیقجا چوخالاجاق ، آلوولانیب اطرافا ایشیق
ساچاجاق . قیغیلجیمدان اود توره یه جک . بیلیرسینیزمی ، آلئکسئی اوسیپوویچ ، من هر آخشام بو قارانلیق جَنوب گئجه لرینده داخمالاردا یانان ایشیقلارا باخاندا اوزوموزو ، اوز زحمتیمیزی خاطیرلاییرام . بیز قارانلیق گئجه ده ، ظولمات سَلطَنَتینده یاشاییریق ، دئییلمی ؟ بیزیم هر بیر عملیمیز قارانلیقدا ایلدیریم کیمی چاخاجاق ، شیمشک کیمی پاریلدایاجاق . نییه سوسورسونوز ؟ یوخسا منیم دئدیکلریمی تصدیق ائتمک ایسته میرسینیز ؟ قورخمایین ، من اینقیلابچی دئییلم .
قاپی دویولدو . اولگا کونستانتینوونا او بیری اوتاقدان چیخیب دهلیزه گئتدی . دیمیتری دیمیترییه ویچ سوزونه آرا وئریب ، واختسیز گلن قوناغین کیم اولدوغونو بیلمک مقصدی ایله گوزونو قاپی یا زیلله دی . اولگا کونستانتین اوونا گئرییه دونوب تلاشلا اَری نین اوزونه باخدی . اوجا بوی و نامربود حرکتلی بیر پولیس نفری ایچری گیردی . بیر آن دایانیب گوزلری ایله کیمی ایسه آختاردی . دیمیتری دیمیترییه ویچی گوره ن کیمی دابانلارینی بیر – بیرینه ووروب حربی قایدا دا تعظیم ائتدی . دوشه مه سیلکه له ندی . یوغون بیر سس اوتاغین دیوارلارینی جینگیلده تدی :
- جناب دیرئکتور ، سیزه قایَت مخفی بیر مکتوب وار . زاتی- عالی لری شخصن سیزه تقدیم ائتمه یی
امر ائتمیشدی.
او ، قولتوق جیبینده ن آغزی سورغوجلو ( سورغوج = موهور) بیر مکتوب چیخارتدی . هله ده پنجره قارشی سیندا حرکتسیز دایانان دیمیتری دیمیترییه ویچه اوزاتدی :
- مکتوبو آلمانیز باره ده قبض وئرین ، جناب .
سئمیونوو عصبی حرکتله مکتوبو اوندان آلدی . یازی ماساسینا یاخینلاشیب ظرفین ( ظرف – پاکت) چاتماسی باره ده پولیسه کاغیذ وئردی . او یئنه دبانلارینی جوتله ییب الینی گیجگاهینا آپاردی . فیرلانیب گئرییه دوندو . دوشه مه نی تاققیلدا دا – تاققیلدا دا ، ایری آددیملارلا دهلیزه یاخینلاشدی . اولگا کونستانتین اوونا پولیسین آرخاسینجا قاپینی باغلادی ، اینتیظار و تشویش ایچینده ارینه باخدی . چیینینده ن سوروشوب دوشن نازیک آغ یون شالی دوزه لتدی ، الینی اوزادیب بوینونون دالیندا توپلادیغی گور ساچینی ساهمانا سالدی . دیمیتری دیمیترییه ویچ ایسه تاختا پیلله کنله آشاغی ائنن پولیسین ناللی چکمه لری نین تاققیلتی لارینا قولاق آسدی . اونون بویرونده ن ساللانان اوزون قیلینجی نین یئریدیکجه پیلله کنلره توخوندوغونو گوره ن کیمی اولدو . آددیم سسلری اوزاقلاشدیقدان سونرا درینده ن نفس آلدی و بئش یئرینده ن سورغوجلانمیش ظرفین او اوز – بو اوزونه باخدی . او حیسس ائتدی کی ، اولگا کونستانتین اوونا تلاش ایچینده دیر ، ائله آلئکسئی اوسیپوویچ ده اینتیظاردادیر .
سئمیونوو کورسوده ایله شدی . شامدانی قاباغینا چکدی . ظرفی ایشیغا توتوب دیققتله باخدی . سونرا دا عاده تی اوزره سییرتمه ده ن ( سییرتمه = کشو ) بالاجا بیر قایچی چیخاردیب ظرفی ائهمالجا کسدی . عینه یینی گوزونه تاخدی . پئشه کار کاتیبین الی ایله یازیلمیش سلقه لی مکتوبو اوخودوقدان سونرا کاغاذی کنارا آتدی و بارماقلاری ایله ماسانی تاققیلداتدی .
دیوار ساعاتی نین زنگی آراملا اون بیر دفه دانقیلدادی . دیمیتریدیمیترییه ویچ دوشونجه لرینده ن آیریلدی . اونو ساکیت ائتمک اوچون (( قوللوق کاغیذی دیر )) ، - دئیه جاواب وئردی . اولگا کونستانتین اوونا راحات نفس آلیب او بیری اوتاغا ، اوشاقلاری نین یانینا گئتدی . آلئکسئی اوسیپوویچ ده گئتمه یه حاضیرلاشدی . مکتوبون گلمه سی ایله بیرده ن – بیره حالی دییشن سئمیونووا مانئع اولماماغی ، اونو تک بوراخماغی قراره آلدی . آنجاق دیمیتری دیمیترییه ویچ اونا ایجازه وئرمه دی . یئنی ده ن اوتاقدا وار- گل ائتدی . بیرده ن آلئکسئی اوسیپوویچین قارشی سیندا دایانیب دوز اونون گوزونون ایچینه باخدی :
- نه اوچون مکتوبلا ماراقلانمیرسینیز ؟
- سیزه عاید اولان مخفی بیر ...
- من سیزده ن هئچ نه گیزله تمیره م . آلین ، اوخویون .
آلئکسئی اوسیپوویچ مکتوبو گوتوروب نظرده ن کئچیردی .
(( مرحمتلی آغا !
سیز جنابلارا معلوم دور کی ، سیزین تحدی – حیمایه نیزده اولان سئمینارییادا ، گورجو دیلینده درس دئمک اوچون جناب کیپیانی یه رسمی اولاراق بو شرطله ایجازه وئردیک کی ، سیز دایم اونا نظاره ت یئتیره سینیز و اونو گوزده ن قویمایاسینیز . بو ایشه مسئول اولاسینیز . بونا باخمایاراق ، "قوری" ده یاشایان اعتیبارلی و رسمی بیر شخص معلومات وئرمیشدیر کی ، کیپیانی شوبهه لی ایشلرله مشغول اولور ، ائوینه موختلیف آداملار ییغیب حوکومت علئیهینه کیتابلار اوخویور .
حورمتلی جناب ، بو معلوماتی سیزه وئرمه کله برابر ، آرتیق دره جه ده خاهیش ائدیره م کی ، کیپیانی نین حیات طرزی و نه لر دوشونمه سی باره ده الده ائتدیی نیز معلوماتلاری اولدوقجا مخفی طرزده منه گونده ره سینیز )) . (روماندا ایستیفاده اولونان بوتون سندلر تیفلیس ده کی خالق معاریفی موزئی نین آرخیوینده ن گوتورولموشدور . )
آلئکسئی اوسیپوویچ اوخودوقدان سونرا موهوره ، قافقاز معاریف مووککیلیی نین ایمضاسینا ، تاریخه و کاغیذین یوخاریسینداکی (( قایَت مخفی دیر )) سوزلرینه باخدی . آرالیغا یئنیده ن سوکوت چوکدو . ساعاتین تاققیلتیسی گوجله ندی . سئمیونوو اللری دالیندا ، پنجره نین قارشی سیندا دایانمیشدی . آلئکسئی اوسیپوویچ اونون آزاجیق ایره لییه دوغرو اییلمیش کوره یینه باخدی . سئمیونوو اللرینی اووشدورور ، بارماقلارینی چارپازلاییر ، بونونلا دا داخیلی ناراحاتلیغینی ساکیتله شدیرمه یه چالیشیردی :
- فیکرینیز نه دیر ؟
- کیپیانی گوزه ل موعللیم و یاخشی وطنداشدیر .
- اونلارا دا بئله یازاق ؟
- من یازارام .
دیمیتری دیمیترییه ویچ یاشینا اویوشمایان بیر جلدلیکله دابانی اوستونده فیرلانیب گئری دوندو :
- بس بو دانوس باز کیمدیر ؟
آلئکسئی اوسیپوویچ چیینلرینی چکدی .