(2)
داملارین و چارداقلارین اوستونده آخشامدان تزه ک یاندیرمیشدیلار . گئجه ده ن خئیلی کئچمه سینه باخمایاراق ، هاوا دورغون اولدوغوندان کثیف توستو لایلاری کندین اوستونه چوکموشدو . بیر یارپاق ، بیر اوت بئله ترپه نمیردی .آغجاقاناد سوروسونون ویزیلتیسی بیر – بیرینه قاریشیب کنده زوو توتوردو . هر شئی سوسموشدو . آناسی عوثمانا آخشامدان دامین اوستونده یئر سالمیشدی . او ، یاتیب یوخویا قالماماق اوچون تئزده ن یورغان – دوشه یه گیرمیشدی ، آنجاق گوزونه یوخو گئتمیردی .
مینا خالا اوغلونون یانیندا اوتورموشدو . آرواد عوثمانین کوینه یینی دیزی نین اوستونه قویوب یاماییردی . دوز اوچ گون هر یئری گزمیش ، قونوم – قونشویا آغیز آچمیش ، حتتا شه هره گئده نلره یالوارمیشدی کی، اونا بئش – آلتی مئتر پارچا آلسینلار ، سونرا الینه پول دوشن کیمی بورجو قایتارار . اونا ال توتان اولمامیشدی . آرواددا هر یئرده ن علاجی کسیلدیی نده ن ، اوغلوندان خلوه ت قاپیلارینداکی یئگانه خوروزو توتموش ، قونشو کندده کی دوکانا گئدیب پارچا ایسته میشدی . دوکانچی بیر آرشیندان آرتیق پارچا وئره بیلمه یه جه یینی سویله دیکده ایسه ، (( کسه رم ، اوشاغیم یئیه ر )) .- دئمیش و بیر باش ائوه قاییتمیشدی . او ، اوغلونون اَینینی تزه له مه یه چالیشمیش ، یولداشلاری نین یانیندا عوثمانین اوتانماسینی ایسته مه میشدی . ایسته میشدی کی ، عوثمان قریب یئره اوره یی سینیق ، اَینی چیلپاق گئتمه سین . آنجاق نه ائده سن کی ، یوخدان آللاه دا بئزاردیر .
مینا خالا ایندی اوغلونون یانیندا اوتوروب کوهنه پالتارلاری یاماییردی . آرواد دوداق آلتی میزیلدانیب آغلاییردی . تئز – تئز دیشیله ساپی کسیر ، اوغلو حیسس ائتمه سین دییه گوز یاشینی سیلیب ، بورنونو چکیردی . (( آللاه ایشینی آواند ائله میش اوچ تئل احمد ده هئچ بیلمیره م هاردان گلیب چیخدی ؟ الیمیزه کئچه نده ن تاپیب یئییردیک . اوشاغی یئرینده ن اویناتدی . ایندی من دامین آلتیندا تکجه نئجه دولاناجاغام ؟ ائله آناسی اولموش عوثمانین اوزو قریب لی یه دوزه جکمی ؟ بورادا الیمه دوشه نی بوغازیمدان کسیب اونا یئدیزدیریردیم . اوردا کیم اوشاغا باخاجاق ؟ گئجه ده اوچ – دورد دفه اویانیب اوستونو اورتمه سم ، اوره ییم ساکیتلشمزدی . ایندی کیم بیلیر هاردا یاتاجاق ؟ اِ ه ، آللاه اوزو بیلن یاخشیدیر ، بیرجه بالامی اونا تاپشیرمیشام . اونو خاطا – بالادان ساخلاسین )) .
آرواد پالتاری یامادی . سلیقه ایله قاتلاییب هئیبه یه قویدو .آغجاقانادلاری قووماق اوچون تزه یین کوزونو دئشدی ، اته یی ایله بیر - ایکی دفه یئلله دی . اوجاق کوزه ریب توستوله ندی . مینا خالانین بوغازی آجیلاشدی . آرواد دونونون اته یی ایله گوزونو سیلدی . دونوب ائهمالجا عوثمانین اوزونه باخدی . اونون گوزو آچیق ایدی . یانی اوسته اوزانیب کندین اوست طرفینده کی سیلسیله تپه لره باخیردی . تپه لرین زیروه سینه ائله بیل ایشیقلی زئه چکیلمیشدی . زئه ده ن او یانا ، سمایا ایشیق چیله نمیشدی . تپه لرین او تاییندا ائله بیل شففاف بیر شئی یانیردی . بری اوز ایسه ظولمته قرق اولموشدو .
مینا خالا عوثمانین اوستونو اورتمک ایسته دی . الینی یورغانا اوزاتدی . آنجاق دایاندی . باشا دوشدو کی ، اوغلو بو ساعات هئچ نه ائشتمیر ، هئچ نه حیسس ائتمیر . اونون خیالی چوخ اوزاقلاردادیر .
آرواد ائهمالجا آیاغا دوردو . بارماقلاری نین اوستونده دامین اوستونده ن ائندی . حیه تین اورتاسینداکی اوجاق یئرینه گلدی . قازانی کنارا چکدی . اوغلونون یولونا کسیب سویوتما بیشیردیی خوروزو چیخاردیب سینی یه قویدو . چارداغین آلتینا گلدی . طاقت سیزله شمیش کیمی تاختین اوستونده اوتوردو . (( ایندی هئچ ، هاوا ایستی دیر ، بس قیشدا نه اولاجاق ؟ اوشاغین نه چوخاسی وار ، نه آیاغینا گئیمه یه بیر شئی . بیر چاریق لیق گون ده قه حه طه چیخیب )) .
مینا خالا قارا چیراغی یاندیردی . تورپاغی شاپپیلدادا – شاپپیلدادا قازما داما گیردی . بیره لر اونون یالین آیاغینا و بالدیرینا داراشدی . آرواد بونلارا فیکیر وئرمه دی . الینده چیراق ، ائوین اورتاسیندا دایاندی . اونون ایری کولگه سی دیوارا ، سونرا دا کونجه دوشدو . اری اوله نده ن بری یاخینا گئدیب آغزینی آچمادیغی صاندیق گوزونه ساتاشدی . بده نینده ن سویوق گیزیلتی کئچدی . (( بلکه کیشی نین پالتارلاریندان اوشاغا ...)) - دئیه فیکرینده ن کئچیردی .
آرواد تیتره دی ، الینده کی چیراق دا تیتره دی ، صاندیغین اوستونه سریلن کولگه ده . مینا خالایا ائله گلدی کی ، کونجده نه ایسه ترپه نیر . آرواد واهیمه له ندی ، دیلینه کلمئیه – شهاده ت گتیردی : (( سنه آغیر گلمه سین ، ای یئری – گویو یارادان ، نه ائله ییم ، علاجیم یوخدور ، اوشاق چیلپاقدیر ، - دئیه اوزونه تسکین لیک وئردی . – اوزگه ها دئییل ، اوز بالاسی دیر ، بلکه ائله آتاسی نین روحو دا شاد اولاجاق ؟ )) .
آرواد آستا – آستا ، آیاغی نین آلتیندا بیر شئی قالیب سیناجاغیندان قورخورموش کیمی ائهمالجا ، صاندیغا یاخینلاشدی . چیراغی ایره لی توتدو . کولگه گئری چکیلدی . مینا خالا دایاندی ، باخدی و بیر آنین ایچینده اون – اون بئش ایللیک یولا گئدیب قاییتدی . تیتره ک الینی اوزاتدی . بارماغینی صاندیغا توخوندوردو . نارین توز اورتموش قاپاقدا اونون بارماغی نین ایزی قالدی . آرواد دیز چوکدو . چیراغی تره جه یه قویدو . دونونون اته یی ایه صاندیغین توزونو آلدی . اری اوله نده ن قاپاغی قالدیرمامیشدی . کیشی نین پالتارینا توخونمامیشدی . مینا خالا دایاندی . یاش گوزلری نین حلقه سینه ییغیلدی ، سونرا داشیب گیله – گیله یاناغینا سوزولدو . اونون دوداقلاری سَیریدی ، نه قده ر چالیشدی سا دا ، هونکورتوسونو بوغا بیلمه دی ، بیرده ن اوزو اوسته سریلیب صاندیغی قوجاقلادی : (( هارداسان ، آی کیشی ، نییه کومه ییمه گلمیرسن ؟ نییه گلیب اوغلونو یولا سالمیرسان ؟ دئمیرسنمی ، آروادیم تکدیر ، دامین آلتیندا کومکسیز قالیب ؟ آللاه سنه اینصاف وئرسین ، نییه تئز گئتدین ، نییه منی اودسوز – اوجاقسیز یاندیردین ؟ آخی من سنه نه پیسلیک ائله میشم کی ، اعتیبارسیز اولدون ، آی کیشی ؟ نه اولار ، بیرجه دفه باشینی قالدیر ، باخ ، گور اوغلون نه بویدا اولوب ! سوزومه باخماییب اوخوماغا گئدیر ، آ کیشی ، سن بونا نه دئییرسن ؟)) .
مینا خالانین کولگه سی دیواردا بیر خئیلی تیتره دی . سینه سی بولود کیمی بوشالیب ساکیتله شدی . دیکه لدی . ساچینی ایسلاق یاناقیندان گئری ائله دی . الینی قوینونا سالیب ، بوینوندان آسدیغی آچاری چیخارتدی . قاپاق جینگیلتی ایله آچیلدی . کیف آتمیش پالتار ایی ائوه یاییلدی . آرواد بیهوشداری قوخولامیش کیمی سرمست اولدو . اونا ائله گلدی کی ، اری نین بده نی نین قوخوسو بورنونا دولور . کیشی ایشده ن گلیب پالتارینی یئنی جه سویونموشدور . اونون تری نین ایی پالتارا هوپموشدور . بو قوخو تپ تزه دیر ، کیشی اولمه ییب ، آرادان ایللر کئچمه ییب ، فصیل لر دولانماییب ، مینا خالا هر شئیی - پالتارداکی میراث سویوقلوغونو ، اولونون واهیمه سینی اونوتدو . اری نین چوخاسینی ، شالوارینی سینه سینه باسدی ، قریب بیر حسره تله اوپدو ...
ائله بیل بو گوز یاشلاری اونو یونگولله شدیردی . آرواد آغیر یوک آلتیندان چیخمیش کیمی آیاغا دوردو . اَری نین پالتارینی گوتوروب تاختین اوستونه قویدو . اوغلانین اَینینه گلیب – گلمه یه جه ینی گوزلری ایله اولچدو . خیالن عوثمانی آتاسی ایله یاناشی قویدو . عوثمان اونون چیینینده ن ایدی . چوخانی گئیین سه اَته یی یئرله سورونه جکدی ، شالواردا بوغازینا چیخاجاقدی. بس نه ائتسین ؟ بلکه قایچی نی گوتوروب کسسین ، اوشاغی یوخودان قالدیریب اونون اوستونه اولچوب – بیچسین ؟سحره قده ر یاتماییب تیکسین ؟ بس عوثمان اوزو بونا نه دئیه ر ؟
مینا خالانی یئنی ده ن فیکیر گوتوردو . او باشا دوشدو کی ، اوغلو آناسی نین فیکری ایله راضی لاشمایاجاق . اوسته لیک اونونلا ساواشیب اوزاق سفره کوسولو گئده جک . آرواد کوکسونو اوتوردو . پالتارلاری قاتلاییب یئنی ده ن صاندیغا یاخینلاشدی . نه ایسه تاپپیلتی ایله یئره دوشدو . مینا خالا اَییلدی ، الینه یومشاق بیر شئی دَیدی . ایشیغا گتیریب باخدی . بارماقلاری اسه – اسه کیسه نین آغزینی آچدی . الی سویوق و یووارلاق بیر شئیه توخوندو . بو سویوق تماس آروادی تیتره تدی . آزاجیق سونرا ایسه همین سویوقلوق ایسیندی ، ائله بیل مینا خالانین دامارلارینا ایلیق قان ووردولار . آروادین بده نی قیزیشدی ، گوزلری ایشیقلاندی . چیراغی یاخینا چکدی ، اووجونا باخدی . سویوق مئتال پاریلدادی .
(( گورونور ، سن منده ن تدبیرلی سَنمیش ، آی کیشی ، جیبینده پول گیزله دیب دار گونه ساخلاییرسانمیش . ائله بیل سومویون دویوبموش کی ، بیر گون اوغلون مکتبه گئده جک ، اونا خرجلیک لازیم اولاجاق . سن نه یامان یئرده هارایما چاتدین ، آی کیشی ، من باشی باتمیش سا سنی اعتیبارسیز بیلیردیم )) .
مینا خالا پالتاری سلقه ایله قاتلاییب صاندیغا قویدو . تله سیک حیه ته چیخدی . یونگولجه دامین بئلینه قالخدی . عوثمانی اویاتماق ایسته دی . آنجاق اونون میشیلتی ایله یاتدیغینی گوروب دایاندی ، اوغلونا قییمادی . اوتوردو . الینی اونون ساچینا چکدی ، یورغانی قالدیریب ائهمالجا اوغلونون یانینا گیردی . عوثمانی قوجاقلادی ، باشینی ائحتیاطلا قالدیریب قولونون اوستونه قویدو . عوثمان چئوریلدی . اوزونو آناسی نین کوکسونه سیخیب ، یئنی ده ن میشیلدادی . مینا خالانین بارماقلاری اونون ساچی نین آراسیندا دولاشدی . اوغلونون ایلیق نفه سی آروادین سینه سینی ایسیتدی .....
آغجاقانادلار اوچوب هارایا ایسه داغیلمیشدیلار . لایلانیب کندین اوستونه چوکن توستونو سحر مئهی قوووب اوزاقلارا آپارمیشدی . هاوا تمیزله نمیشدی . " کور"ون قیژیلتی سیندان باشقا هئچ نه ائشیدیلمیردی .
* * * * *
قوجا کیشی یوخوسونو داغیتماق اوچون اوزونه بیر – ایکی اووج سو ووردو . بئلینی دوزه لدیب دیکه لدی . کوینه یی نین اته یی ایله یاش صیفه تینی سیلدی . ایسلاق الینی باشینا چکدی . گمی یه گئتدی . سحر مورگوسو اونو تَنتیتمیشدی . "کور"ون اوستونه قارانلیق چوکموشدو . یاخینداکی جله ده ن قاناد سسی گلمه سه یدی ، قوشلار بوداقلاردا جیککیلده مه سه یدی ، آخشامین تزه جه دوشدویونو ظن ائتمک اولاردی .
کندده ن بوغوق و یورغون خوروز سسی گلدی . هارداسا ایت هوردو . قوجا کیشی سینه سینی آچدی . "کور"ون سرین مئهی اونون ساققالی نین آراسیندا اوینادی . کیشی اوفوقه باخدی . دان یئری قیزاریردی .
گمی یارغانین دیبینده ایدی . خیرداجا لپه لر اونو ییرغالادیقجا ، تکنه یه توخونان سو شاپپیلداییردی . آرابیر بالیقلار سودان هاوایا آتیلیردی . بیر آز آشاغی داکی گولمه چه لرده ایسه قورباغالار قورولداییردی .
قوجا کیشی گمی نین کنارینی یوخلادی . سویون داشیب – داشمادیغینی بیلمک اوچون ساحیله ، یارغانین دیبینده کی لپه دویه نه باخدی . آغاج قیرینتی لاری و بوز کوپوک زئهی اوولکی یئرینده ایدی . کیشی سولغونلاشان اولدوزلارا فیکیر وئرمه ده ن آتیلیب گمی یه میندی. چپی ، کوره یی یوخلادی . دال طرفه کئچیب هئیبه نی گوتوردو . بیر تایی یاریم چیق قالمیش چاریغی چیخارتدی . بیزی ، کوشه نی الینه آلدی.
دونن یوخاریداکی داغ کندلرینده ن گمی ایله کئچیردیی کندلیلرده ن بیری اونا بیر جوت گون وئرمیشدی . کیشی نین آیاغی یالین ایدی . بو گون اونون الینه گویده ن دوشموشدو . قوجا کیشی قارانلیق قاریشان کیمی اوجاغین ایشیغیندا گونو کوشه له میش و اوزونه چاریق تیکمه یه باشلامیشدی . آنجاق آغجاقانادلار اونا آمان وئرمه میشدی .
قوجا کیشی چاریغی گوتوردو . سوواداغا آداملار گلنه قده ر تیکیب گئمک ایسته دی . گون خئیلی قالخدی . یارغانین کولگه سی گئری چکیلدی . سولار قیزاردی . کیشی هئچ نه یه فیکیر وئرمه دی . چاریغی تیکیب قورتاردی ، شیرینجه گرنه شیب برکده ن اسنه دی . آیاغینی قورولاییب چاریغین بیر تایینی گئیدی . ائله بو واخت یارغانین قاشیندان اونو سسله دیلر . کیشی الینی گوزونون اوستونه قویوب باخدی . دیکدیرده دایانانلارین ایچینده قارداشی اوغلو عوثمانی گوره نده بیر خئیلی تعججوب ائتدی . مینا خالا ، اشرف ، احمد و کندین آرواد – اوشاغی دا یارغانین قاشیندا ایدی . قوجا کیشی بیرده ن – بیره هر شئیی باشا دوشدو . چاریغی سویوندو . جوتله ییب کنارا قویدو . (( دئیه سن قوجالیق منی یامان اوسته له ییب ، اوشاقلارین اوشکولا (اوشکول= مدرسه ) گئده جه یینی لاپ یاددان چیخارتمیشام . گره ک عوثمانین یولونا بیر شئی تاپایدیم )) .
دسته ساحیله ائندی . قوجا کیشی گمی ده ن دوشوب اونلاری قارشیلادی . عوثمان کنارداجا دایاندی . مینا خالا نه قده ر چالیشدی سا دا ، گوزونون یاشینی ساخلایا بیلمه دی . اوزونو یانا چئویریب اته یی ایله گوزونو سیلدی . عوثمان دا دولوخسوندو . آخشامدان بری گئتمه یه تله سن ، هئیبه سینی بیر گون قاباقدان حاضیرلاییب صبیرسیزلیک له بو آنی گوزله ین اوغلان بیرده ن – بیره قریب سه دی . اوشاقلار قوهوملاری ایله گوروشوب بیر – بیر گمی یه آتیلاندا حیسس ائتدی کی ، یاش اونو بوغور ، بیر آز دا کئچسه هونکوره جک دیر .
مینا خالا اوزونه توختاخلیق وئردی . یاخینلاشیب اوغلونون اوزونده ن اوپدو . الی ایله کوینه یی نین یاخاسینی دوزه لتدی ، بارماقلارینی دویمه لری نین اوستونده گزدیردی . چیینی نی سیغاللادی .
- باخ ، یادیندان چیخماسین ، دردین آلیم ، شه هره چاتان کیمی اوزونه پالتار آل .
- یاخشی ، آنا ، ناراحات اولما .
اونلار یئنی ده ن قوجاقلاشدیلار . قوجا کیشی گمی نین ایپی نی آچدی . بیر – بیرینده ن آیریلماق ایسته مه ین آنا – بالایا آجیقلاندی :
- دی بسدیر ، آز زَوزه لیک ائله یین .
عوثمان آناسیندان آرالاندی . عاده تی اوزره شالوارینی دارتدی ، بورنونو چکدی . بیر – ایکی آددیم دالی – دالی گئتدی . سونرا دابانی اوسته فیرلانیب ، قوش کیمی گمیه آتیلدی . قوجا کیشی اونون چاریغی نین آلتینداکی دئشیکلری آیدینجا گوردو .
مینا خالانین اوره یی ساکیت اولمادی . اونون تیتره ک سسی ائشیدیلدی :
- اشرف ، دردین آلیم ، عوثمانی سنه تاپشیریرام ، ائله سنین دهگوزون اوستونده اولسون ، احمد قارداش .
- آرخایین اول ، آی باجی .
- باخ ، سلیم آماناتی ، منی دیله توتدون ، جاوابدِه اوزون سن .
احمد گولومسوندو :
- اوندان نیگاران اولما ، دَییرمانین گوزونه اولو سالسان دیری چیخار .
گولوشدولر . آروادلار گوزلرینی قورولادیلار . کیشی لر اوزلرینی شاخ توتماغا چالیشدیلار .
اوشاقلار گمی یه دولوشوب قاتارلاشدیلار. قوجا کیشی گوزآلتی اونلارین اَینینه ، آیاققابی لارینا ، چیینلرینده کی هئیبه لرینه باخدی . هامی دان پیس گئیینَن ، هامی دان سینقین عوثمان ایدی . اونون اَینینده آغ بئزده ن کوینک واریدی . گورونور ، آناسی یئنی جه تیکمیشدی . عوثمان ائله بیل کوهنه گئییم ینده ن خجالت چکیردی . اوشاقلارین آراسیندا دالدالانماغا چالیشیردی . آیاغینی خورجونلارین آراسیندا گیزله تمیشدی .
قوجا کیشی گمی نین دال طرفینه کئچدی . یئنی جه تیکیب قورتاردیغی چاریغی جوتله ییب گوتوردو . عوثمانا یاخینلاشدی :
- آل ، بالا ، گئیین .
عوثمان عمیسی نین الینده کی چاریغا باخدی . اونون گوزلرینده سئوینج و تعججوب بیر – بیرینه قاریشدی . آنجاق باشینی بویلاییب گئری چکیلدی :
- لازیم دئییل ، عمی ، چوخ ساغ اول .
- آل .
- پولوم وار ، شه هره گئده ن کیمی ...
- بَه شه هره جن آیاق یالین گئده جکسن ، آ نیشانلیسی گویچک ؟
- قوجا کیشی سوزونو کسیب گولومسوندو ، کیچیک گوزلری داهادا قییلدی . – تئز اول ، گئیین ، اوزوم سنه تیکمیشم .
عوثمان هئیبه نی چیینینده ن یئره قویدو . چاریقلاری گمی چی ده ن آلدی ، آشاغی اَییلیب کوهنه نی سویوندو ، تزه نی گئیدی . چاریغین باغلارینی برکیتمک ایسته رکن گوزو عمیسی نین یالین آیاقلارینا ساتاشدی . الی چاریغین باغیندا ، بیر خئیلی دایاندی . گوزونو قوجا کیشی نین سودا چوخ اولدوغوندان آغاریب ، قانی قاچمیش آیاغی نین قیریشلاریندان چکه بیلمه دی .
- عمی بس ..
قوجا کیشی اونا جاواب وئرمه دی . عوثمانین آلتی دئشیک چاریقلارینی گوتوروب " کور"ه آتدی . سونرا اوزونو اوشاقلارا توتدو :
- اَ ، آ نیشانلیسی گویچکلر ، کیمی گوزله ییرسینیز ، دوشون گمی نی یوخاری چکه ک .
اوشاقلار حرکته گلدیلر . گولوشدولر . سلیم دیل آلتیندا قالمادی :
- قوجا دایی ، یول اوستونده ییک ، بیزه ساتاشما .
- سوز گوله شدیرمه ، آ نیشانلیسی گویچک ، سونرا گئجیکه ریک .
روستم کیشی قاباغا گلدی ، الینی اوزادیب کندیرده ن یاپیشدی :
- اوشاقلاردا ایشین اولماسین ، اوزوموز چکه ریک ، قوی آیاقلاری ایسلانماسین .
ساحیلده کیلر کومه کله شیب گمی نی یوخاری ، هوندور یارغانین آلتینداکی کئچیده چکدیلر . بورادا دایانیب اوشاقلارلا بیر ده گوروشدولر . قوجا کیشی چَتی گوتوروب دال طرفه کئچدی . اشرف کوره یی آلدی . قاباغا گئتدی . ساحیلده کیلر ایپی گمی یه آتدیلار . گمی "کور"ون آخارینا دوشدو . بیر گوز قیرپیم یندا ساحیلده ن آرالاندی . اوشاقلار سوکوت ایچینده دایاندیلار . یارغانین دیوارلارینداکی دئشیکلرده ن بیر دسته گویَرچین اوچوب هاوایا قاخدی . اونلار "کور" یوخاری سوزوب کنده دوغرو گئتدی . ساحیلده کی جَله ، کنده دوغرو کئده ن تورپاق یول ، ائله اوچوروم یارغانلار دا فیرلاندی ، کندین ائولری گئتدیکجه کیچیلدی ، اوزاقلاشدی .
عوثمان گوزونو آناسیندان چکمه دی . مینا خالا ساحیل بویو ، سویون آخاری ایله ، گمی نین برابرلرینجه قاچیر و الینی سینه سینه دویوردو .